ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 53 - LIFOTNTᤔᤏᤠᤜᤠ᤹ᤖᤧ ᤂᤢᤏᤡ᤹ ᤁᤢᤀᤡᤓᤧᤶᤔᤧᤴ ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤔᤠᤜᤠᤗᤠᤌ ᤁᤢᤀᤡᤛᤡᤰ ᤍᤠᤀᤢᤍᤖᤧ ᤔᤛ᤻ᤁᤡᤗ ᤁᤢᤛᤠᤶᤗᤥ 1 ᤀᤍᤱ ᤏᤡᤱᤘᤠ᤹ ᤁᤧᤃᤵᤐᤠᤜᤠ᤹ᤖᤧ “ᤏᤡᤱᤘᤠ᤹ᤑᤢᤔᤠᤱ ᤜᤥᤵ” ᤔᤧᤒᤠ᤺ᤳᤋᤢᤖᤥ॥ ᤂᤧᤱᤜᤠ᤹ ᤑᤧᤳᤔᤧᤗᤠᤖᤧᤀᤠᤱ ᤔᤧᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤡᤰᤁᤧᤗᤧ᤺ᤱᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖᤥ. ᤂᤧᤱᤜᤠ᤹ᤀᤥ ᤏᤢᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤠᤳᤋᤡᤴᤏᤠᤱ ᤜᤥᤵᤗᤥ॥ 2 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶᤒᤠ ᤔᤧᤴᤇᤠᤶᤛᤠᤜᤠ᤹ ᤀᤥᤔᤧᤳᤋᤢᤛᤡᤖᤥ॥ ᤛᤡᤰᤁᤢᤶᤛᤠᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤃᤥ᤺ᤵᤐᤠᤜᤠ᤹ ᤔᤧᤘᤠ᤹ᤒᤡ ᤑᤠ᤹ᤀᤠᤱ ᤁᤥ᤺ᤳᤋᤢᤛᤡᤖᤥ॥ 3 ᤁᤧᤖᤧᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤔᤠ᤺ᤱᤄᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ. ᤂᤧᤱᤜᤠ᤹ ᤛᤥᤛᤥᤖᤡᤰ ᤑᤧᤳᤔᤧᤗᤠ᤹ᤖᤧᤀᤠᤱ ᤔᤧᤘᤠ᤹ᤖᤥ॥ ᤏᤢᤒᤠ ᤁᤧᤈᤥ᤺ᤰᤐᤠ ᤌᤡᤰᤁᤠᤱ ᤜᤥᤵᤗᤥ. ᤀᤠᤜᤠ᤹. ᤗᤳᤌᤡᤰᤁᤠᤱ ᤜᤥᤵᤗᤥ॥ 4 ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤀᤠᤓᤧᤸᤗᤧᤀᤠᤱ ᤔᤧᤴᤜᤢ᤹ᤛᤡᤱᤅᤡᤴᤒᤡ᥅ ᤂᤧᤱᤜᤠ᤹ᤖᤧ ᤂᤖᤧ᤺ᤱ ᤔᤧᤈᤒᤠ ᤁᤢᤀᤡᤛᤡᤰ ᤀᤠᤔᤏᤠᤜᤠ᤹ ᤔᤧᤈᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤓᤧᤸᤗᤧᤀᤠᤱ ᤐᤣᤗᤡ ᤔᤧᤶᤓᤠᤰᤋᤢᤸᤗᤥ॥ 5 ᤂᤧᤵᤔᤥ ᤁᤡᤔᤠ ᤕᤱᤔᤠ ᤁᤧᤒᤥᤱᤒᤠ ᤜᤥ᤺ᤵᤋᤧᤛᤠᤱ ᤂᤧᤱᤜᤠ᤹ ᤁᤡᤔᤠᤸᤗᤧ ᤕᤢᤶᤛᤢᤱᤔᤠ ᤔᤧᤒᤥ᤺ᤰᤂᤧᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤕᤧᤵᤐᤠᤜᤠ᤹ ᤂᤢᤏᤧ᤹ ᤛᤧᤛᤢᤍᤣᤛᤢᤖᤥ॥ ᤂᤧᤱᤜᤠ᤹ ᤛᤡᤖᤡᤱᤔᤔᤥ ᤔᤧᤎᤠᤖᤥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤀᤳᤋᤢᤛᤡᤖᤥ॥ 6 ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤧᤴᤗᤵᤐᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤃᤥ᤺ᤰᤔᤠ ᤛᤡᤕᤥᤏᤗᤠᤶ ᤋᤠᤖᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤕᤠᤶᤔᤥ ᤏᤢ᤹ᤔᤠᤍᤠᤔᤠ ᤋᤠᤖᤢ ᤐᤡᤖᤢᤛᤡᤸᤗᤧ ᤕᤠᤁᤢᤒᤧᤴ ᤛ᤺ᤳᤗᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤜᤠᤱᤜᤠᤱ ᤔᤧᤗ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.