ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 52 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶ ᤏᤢ ᤁᤢᤄᤠᤛᤧᤴ

ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤍᤠᤀᤢᤍᤖᤧ ᤔᤛ᤻ᤁᤡᤗ ᤁᤢᤛᤠᤶᤗᤥ

¹ ᤁᤧᤎᤢᤶᤒᤠ ᤔᤏᤠᤀᤣ. ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤁᤠᤱ ᤌᤣᤀᤠᤱ ᤕᤶᤒᤠ ᤁᤧᤗᤧᤱᤛᤡᤱᤒᤠᤒᤣ᥅ ᤗᤧᤴᤍᤡᤰ ᤏᤠᤶᤎᤠᤎᤠ ᤌᤣᤀᤠᤱ ᤁᤧᤜᤧᤴᤇᤡᤱᤅᤠᤱ ᤁᤧᤘᤠ᤹ᤒᤠᤒᤣ᥅ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤓᤧᤸᤗᤧᤛᤠᤱ ᤗᤢᤱᤔᤠ᤹ ᤀᤠᤍᤢᤰᤗᤥ॥

² ᤂᤧᤏᤧ᤹ᤃ ᤘᤣ᤹ ᤔᤏᤠᤜᤠ᤹ ᤔᤧᤱᤔᤠᤛᤡ ᤆᤧᤶᤓᤴ ᤁᤧᤈᤥ᤺ᤰᤗᤥ. ᤂᤧᤏᤧ᤹ ᤁᤧᤸᤛᤥ᤺ᤵᤐᤠᤴ ᤂᤠᤃᤧᤛᤢᤰᤐᤠ ᤑᤧᤈᤠ ᤁᤢᤀᤡᤛᤡᤰ ᤆᤥᤰᤗᤥ. ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤛᤠᤱ ᤋᤠᤵᤑᤧ᤺ᤶᤒᤠ ᤜᤧᤰᤁᤣ ᤗ᤹ᤖᤥ॥

³ ᤏᤢᤒᤠ ᤆᤥ᤺ᤰᤔᤠᤖᤧ ᤁᤢᤗᤧᤰᤘᤠ ᤋᤠᤵᤑᤧ᤺ᤶᤒᤠ ᤆᤥ᤺ᤰᤔᤠ ᤁᤧᤛᤡᤖᤠ᤹ ᤌᤠᤱᤗᤥ. ᤜᤧᤰᤁᤩᤠᤱ ᤛᤧᤰᤂᤠ ᤐᤠᤴ ᤐᤠ᤺ᤵᤔᤠᤖᤧ ᤁᤢᤗᤧᤰᤘᤠ ᤀᤡᤱᤗᤧᤰ ᤐᤠ᤺ᤵᤔᤠ ᤁᤧᤛᤡᤖᤠ᤹ ᤌᤠᤱᤗᤥ॥ ᤛᤣᤗᤠ

⁴ ᤀᤡᤱᤗᤧᤰ ᤁᤧᤒᤠ᤺ᤵᤐᤣ. ᤂᤧᤏᤧ᤹ ᤐᤠ᤺ᤴᤏᤡᤸᤗᤧ ᤘᤣ᤹ ᤔᤏᤠᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ ᤋᤢᤰᤗ ᤕᤠ᤺ᤶᤔᤠᤛᤡ ᤁᤧᤛᤡᤖᤠ᤹ ᤌᤠᤱᤗᤥ॥

⁵ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤛᤠᤱ ᤂᤧᤏᤧ᤹ ᤛᤍᤠᤍᤡᤱᤗᤧ ᤗᤠᤃᤡ ᤁᤧᤔᤧᤱᤗᤥ॥ ᤂᤧᤏᤧ᤹ ᤁᤧᤘᤠ᤹ᤔᤠᤍᤧᤴᤏᤥᤗᤠᤶᤒᤠ ᤁᤧᤀᤢ᤺ᤱ ᤁᤧᤗ᤺ᤳᤗᤥ. ᤜᤧᤰᤁᤩᤠᤱ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤗᤠᤶᤒᤠ ᤂᤧᤏᤧ᤹ ᤁᤧᤗ᤺ᤳ ᤁᤧᤍᤣᤖᤥ॥ ᤛᤣᤗᤠ

⁶ ᤛᤠᤶᤕᤥᤒᤠᤜᤠ᤹ᤖᤧ ᤁᤴ ᤔᤧᤏᤡᤛᤢᤀᤠᤱ ᤔᤧᤃᤡᤖᤥ. ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖ ᤁᤢᤏᤠᤔᤧᤴᤇᤠ᤹ ᤁᤧᤶᤔᤧᤳᤗᤥ॥

⁷ ᤀᤥᤔᤧᤳᤋᤧ᤹. ᤁᤴ ᤔᤏᤠᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤡ᤺ᤶᤛᤡᤱᤛᤧ ᤔᤧᤍᤩᤧᤏᤧᤴᤗᤥ. ᤁᤖ ᤂᤢᤏᤧ᤹ ᤁᤳᤋᤢᤒᤠ ᤕᤖᤡᤰ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤀᤠᤱᤃᤠ᤹ ᤛᤧ᤺ᤵᤐᤠ ᤑᤠ᤹ᤀᤠᤱ ᤀᤡ᤺ᤳᤋᤢᤖᤥ. ᤜᤧᤰᤁᤩᤠᤱ ᤘᤣ᤹ᤜᤠ᤹ ᤔᤧᤰᤂᤢᤛᤡᤀᤠᤱ ᤁᤧᤎᤢᤶᤒᤠ ᤐᤥ᤺ᤰᤂᤧᤖᤥ॥

⁸ ᤁᤖ ᤀᤠᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤛᤖᤣ᤺ᤰᤁᤩᤠ᤺ᤵᤐᤠ ᤈᤤᤋᤢᤏ ᤛᤡᤱᤒᤢᤱ ᤁᤢᤀᤡᤛᤡᤰ ᤆᤥ᤺ᤰᤁᤠᤖᤥ॥ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤁᤢᤔᤡ᤺ᤶᤈᤡᤀᤥ ᤛᤍᤠᤍᤡᤱ ᤋᤠ᤺ᤰᤐᤥ ᤕᤢᤰᤂᤢᤱᤗᤥ॥

⁹ ᤂᤧᤏᤧ᤹ ᤁᤧᤈᤥᤃᤢᤒᤠ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤛᤍᤠᤍᤡᤱ ᤂᤧᤏᤧ᤹ ᤁᤧᤏᤠᤖᤠ ᤑᤥᤛᤢᤱᤗᤥ॥ ᤀᤠᤱᤃᤠ᤹ ᤁᤧᤔᤡᤱᤅᤥ ᤋᤠ᤺ᤰᤐᤥ ᤆᤥᤃᤢᤱᤗᤥ ᤌᤣᤀᤠᤱᤓᤧᤸᤗᤧ ᤁᤧᤔᤡᤱᤅᤡᤴ ᤏᤢᤒᤠ ᤆᤥᤰᤗᤥ. ᤏᤛᤠ᤺ᤴᤛᤠᤒᤠ ᤁᤧᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤧᤏᤠᤖᤠ ᤑᤥᤛᤢᤱᤗᤥ॥