ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 51 - LIFOTNT

ᤗᤠᤕᤥᤗᤠᤶ ᤜᤡᤶᤔᤠ ᤐᤣᤗᤡ

ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤌᤠᤏᤧᤴ ᤂᤢᤏᤧ᤹ᤀᤥ ᤋᤩᤧᤀᤠᤱ ᤀᤣᤃᤠᤱ ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤓᤧᤸᤗᤧᤛᤠᤱ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤁᤧᤍᤢᤰᤁᤠᤒᤠ ᤜᤧᤰᤁᤣ ᤏᤢᤖᤡᤰ ᤔᤧᤳᤋᤠᤱᤅᤧ᤹ᤀᤥ. ᤐᤕᤶ ᤕᤶᤒᤠ ᤁᤧᤔᤡ᤺ᤶᤈᤡ᤺ᤸᤗᤧ ᤀᤠᤱᤃᤠ᤹ ᤀᤠᤗᤠᤕᤥᤴ ᤂᤧᤳᤋᤧᤍᤣᤛᤧ ᤐᤡᤖᤠᤱᤅᤧ᤹ᤀᤥ॥

² ᤁᤧᤖᤧᤰ ᤀᤠᤗᤠᤕᤥᤜᤠ᤹ ᤘᤠᤜᤵᤋᤧ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤗᤠᤕᤥ ᤗᤠᤛᤥ᤺ᤳᤗᤧ ᤔᤧᤴᤍᤧᤳᤋᤣ ᤀᤠᤱᤃᤠ᤹ ᤛᤢᤳᤌᤥ ᤆᤥᤃᤠᤱᤅᤧ᤹ᤀᤥ॥

³ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱᤒᤠ ᤐᤠ᤺ᤴᤏᤥ ᤋᤧᤴᤏᤠᤖᤥ. ᤜᤧᤰᤁᤩᤠᤱ ᤀᤠᤓᤧᤸᤗᤧᤛᤠᤱ ᤀᤠᤗᤠᤕᤥᤜᤠ᤹ ᤏᤡᤱᤘᤠ᤹ ᤂᤥᤛᤢᤱᤗᤥ॥

⁴ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ. ᤂᤧᤏᤧ᤹ᤀᤣ ᤁᤧᤍᤰᤗᤧᤱᤘᤠᤀᤥ ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤡᤛᤢᤸᤗᤧ ᤋᤠᤵᤑᤧ᤺ᤶᤒᤠ ᤏᤡᤃᤧᤎᤠ᤺ᤵᤐᤠ ᤐᤠ᤺ᤴᤜᤠ᤹ᤀᤣ ᤀᤠᤱᤃᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤁᤧᤓᤧ᤺ᤰᤁᤠᤒᤠᤴ ᤗᤠ᤹ᤖᤢᤖᤥ. ᤜᤧᤰᤁᤩᤠᤱ ᤂᤠᤛᤧᤴ ᤁᤧᤗᤥ᤺ᤴᤏᤠᤒᤠᤴᤏᤠᤱ ᤕᤠᤖᤢᤖᤥ॥

⁵ ᤛᤧᤰᤂᤠᤀᤣ. ᤛᤠᤘᤠ᤺ᤴᤇᤡᤱᤅᤠᤗᤧᤀᤣ ᤗᤠᤕᤥᤒᤠ ᤘᤕᤠᤱᤗᤥ. ᤀᤠᤶᤔᤠᤖᤧ ᤁᤢᤛᤠᤵᤐᤥ᤺ᤰᤁᤥ ᤕᤠᤃᤠᤱᤒᤠ ᤕᤧᤴᤏᤠᤱᤎᤥᤀᤣ ᤀᤠᤱᤃᤠ᤹ ᤗᤠᤕᤥᤒᤠ ᤆᤥ᤺ᤰᤁᤠᤖᤥ॥

⁶ ᤛᤧᤰᤂᤠᤛᤠᤱ ᤂᤧᤏᤧ᤹ᤃ ᤛᤧᤰᤂᤠ ᤏᤢ ᤏᤛᤠ᤺ᤴᤛᤠᤒᤠ ᤐᤥᤱᤅᤠᤒᤠ ᤁᤧᤛᤡᤖᤠ᤹ᤎᤠᤱᤗᤥ. ᤜᤧᤰᤁᤩᤠᤱ ᤀᤠᤛᤡᤰᤗᤢᤱᤔᤥᤀᤣ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤐᤠ᤺ᤴᤜᤠ᤹ ᤁᤧᤜᤢ᤹ᤀᤠᤖᤥ॥

⁷ ᤜᤡᤛᤵᤐᤡᤴ ᤀᤠᤱᤃᤠ᤹ ᤀᤠᤛᤶᤍᤠᤱ ᤛᤠᤰᤂᤧ᤹ᤀᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤢᤳᤌᤥ ᤐᤥᤱᤅᤠᤖᤥ॥ ᤘᤠᤜᤵᤋᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤏᤠ᤺ᤱ ᤁᤢᤀᤡᤛᤡᤰ ᤀᤠᤱᤃᤠ᤹ ᤑᤃᤧᤗ᤹ᤒᤠ ᤐᤥᤱᤅᤠᤖᤥ॥

⁸ ᤛ᤺ᤵᤔᤠ ᤏᤢ ᤛᤡᤖᤠ᤹ᤃᤧᤎᤠᤱᤒᤠ ᤀᤡᤰᤗᤠᤜᤠ᤹ ᤀᤠᤱᤃᤠ᤹ ᤂᤧᤶᤔᤠ ᤂᤥᤛᤢᤱᤗᤖᤥ. ᤜᤧᤰᤁᤩᤠᤱ ᤀᤠᤕᤧᤵᤐᤠᤜᤠ᤹ ᤕᤖᤧᤖ ᤁᤧᤕᤠ᤺ᤴᤍᤢᤖᤥ. ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤛ᤺ᤳᤋᤠᤖᤖᤥ॥

⁹ ᤀᤠᤗᤠᤕᤥᤜᤠ᤹ ᤗᤧᤵᤔᤠᤱ ᤁᤧᤏᤠᤖᤠᤴ ᤔᤧᤜᤡᤛᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤁᤧᤖᤧᤰ ᤔᤠᤱᤍᤣ ᤛᤠᤱᤃᤪᤠᤖᤧ ᤀᤠᤱᤃᤠ᤹ ᤋᤧᤳᤋᤠᤱᤒᤠᤜᤠ᤹ ᤋᤢᤃᤧᤍᤣᤛᤧ᤹ᤀᤥ॥

¹⁰ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤛᤡᤰᤗᤢᤱᤔᤠᤴ ᤛᤢᤳᤌᤥ ᤆᤥᤃᤠᤱ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤁᤢᤛᤱ ᤏᤢ ᤂᤧᤏᤧ᤹ ᤗᤧᤵᤔᤠᤱ ᤁᤧᤘᤠ᤹ᤒᤠ ᤕᤠᤶᤛᤠᤶ ᤐᤡᤖᤠᤱᤅᤧ᤹ᤀᤥ॥

¹¹ ᤁᤧᤍᤃᤡᤗᤠᤶ ᤀᤠᤱᤃᤠ᤹ ᤔᤧᤄᤧᤳᤋᤠᤱᤅᤡᤴᤏᤧ᤹ᤀᤥ. ᤜᤧᤰᤁᤣᤗ᤹ᤖᤡᤰᤁᤣ ᤁᤧᤛᤣᤛᤣᤔᤠᤱᤅᤡᤴ ᤀᤠᤱᤃᤠ᤹ᤀᤥᤏᤢ ᤔᤧᤍᤣ᤹ᤖᤧᤴᤏᤧ᤹ᤀᤥ॥

¹² ᤁᤧᤛᤧᤴᤗᤵᤗᤠᤶᤒᤠ ᤁᤧᤍᤠᤒᤠ ᤛ᤺ᤵᤔᤠᤴ ᤕᤠᤶᤔᤥ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤀᤠᤕᤠᤶᤛᤠᤶᤔᤡᤴ ᤂᤧᤏᤧ᤹ ᤁᤧᤒᤠᤴ ᤂᤧᤶᤔᤠ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤆᤥᤃᤠᤱ ᤐᤡᤖᤠᤱᤅᤧ᤹ᤀᤥ॥

¹³ ᤂᤧᤒᤩᤠᤱ ᤗᤠᤕᤥᤒᤠᤜᤠ᤹ ᤁᤧᤏᤡᤛᤠᤶᤔᤡᤴ ᤜᤢ᤹ᤖᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤏᤧ᤹ᤀᤥ ᤔᤧᤏᤢ᤺ᤱᤗᤥ॥

¹⁴ ᤏᤡᤱᤘᤠ᤹ᤑᤢᤔᤠᤱᤅᤣ. ᤛᤧᤴᤗᤵᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ ᤔᤠᤰᤂᤡ᤹ ᤛᤧᤔᤠ ᤀᤠᤵᤋᤡᤰᤁᤥ ᤌᤠᤔᤠᤗᤠᤶ ᤛᤧ᤺ᤵᤋᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤧ᤹ ᤛᤠᤶᤕᤥᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤏᤡᤸᤗᤧ ᤛᤠᤶᤗᤥᤴ ᤛᤠᤶᤔᤧᤳᤋᤢᤱᤗᤥ॥

¹⁵ ᤍᤠᤱᤒᤠᤀᤣ. ᤀᤠᤶᤒᤪᤠ ᤜᤴᤍᤠᤱ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤀᤠᤸᤛᤥ᤺ᤵᤐᤠᤸᤗᤧ ᤁᤧᤏᤠᤖᤠ ᤑᤥᤛᤢᤱᤗᤥ॥

¹⁶ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤛᤡᤍᤢᤱᤈᤓᤠᤀᤥ ᤁᤧᤴᤇ᤺ᤳᤏᤧᤸᤗᤥ. ᤔᤣ᤺ᤴᤏᤧᤓᤃᤪ ᤂᤧᤏᤧ᤹ᤀᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤱᤒᤠ ᤔᤧᤴᤗᤥ. ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤂᤧᤏᤧ᤹ ᤁᤧᤛᤡᤖᤠ᤹ ᤔᤧᤎᤠᤱᤏᤧᤸᤗᤥ॥

¹⁷ ᤏᤡᤱᤘᤠ᤹ᤑᤢᤔᤠᤱᤅᤣ. ᤁᤧᤏ᤺ᤶᤛᤡᤱᤒᤠ ᤕᤠᤶᤛᤠᤶᤔᤡᤸᤗᤧ ᤛᤡᤍᤢᤱᤈᤓᤠᤴ ᤂᤧᤏᤧ᤹ ᤋᤠ᤺ᤰᤔᤠ ᤁᤧᤛᤡᤖᤠ᤹ᤎᤠᤱᤗᤥ. ᤜᤧᤰᤁᤩᤠᤱ ᤁᤢᤛᤡᤰ ᤁᤧᤏ᤺ᤶᤒᤠᤀᤠᤱ ᤗᤠᤕᤥᤗᤠᤶ ᤁᤧᤏᤢ᤺ᤱᤒᤠ ᤛᤡᤰᤗᤢᤱᤔᤠᤴ ᤁᤧᤴᤏᤠ᤹ᤖᤢᤴᤗᤥ॥

¹⁸ ᤂᤧᤏᤧ᤹ ᤁᤧᤏᤡᤱᤘᤠ᤹ ᤁᤢᤀᤡᤛᤡᤰ ᤛᤡᤕᤥᤏ ᤁᤥ᤺ᤰᤔᤠᤀᤥ ᤏᤢ᤹ᤔᤠᤍᤠᤔᤠ ᤋᤠᤖᤧ᤹ᤀᤥ. ᤕᤖᤢᤛᤗᤧ᤺ᤶᤒᤠ ᤗᤢᤱᤎᤠᤰᤜᤠ᤹ ᤕᤠᤶᤔᤥ ᤛᤧᤳᤋᤧ᤹ᤀᤥ॥

¹⁹ ᤂᤧᤒᤩᤠᤱ ᤏᤢᤒᤠ ᤏᤡᤱᤘᤠ᤹ᤗᤠᤶᤒᤠ ᤋᤥ᤺ᤶᤔᤏᤠᤒᤠ. ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤁᤧᤛᤡᤖᤠ᤹ ᤌᤠᤱᤗᤥ. ᤁᤧᤖᤧᤰ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤜᤧᤰᤁᤩᤠᤱ ᤛᤧᤃᤶᤒᤠᤜᤠ᤹ᤖᤧᤴ ᤛᤡᤍᤢᤱᤈᤓᤠᤴ ᤂᤧᤏᤧ᤹ ᤁᤧᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤕᤠᤶᤔᤥ ᤋᤥ᤺ᤴᤍᤢᤶᤒᤧᤖᤥ॥