ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 50 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤠᤛᤣ᤺ᤴᤗᤥᤶᤒᤠ

ᤀᤠᤛᤠᤑᤖᤧ ᤁᤢᤛᤠᤶᤗᤥ

¹ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤠᤴ ᤐᤠ᤺ᤳᤗᤥ. ᤂᤢᤏᤧ᤹ ᤏᤠᤶᤃᤧᤳ ᤐᤡᤛᤠᤱ ᤏᤢ ᤏᤠᤶᤎᤠ ᤐᤡᤛᤠᤱ ᤌᤠᤖᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤢ᤺ᤳᤋᤢᤛᤡᤖᤥ॥

² ᤛᤡᤕᤥᤏ ᤕᤧᤰᤕᤰᤁᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤰ ᤆᤧᤔᤢᤖ ᤀᤥ᤺ᤳᤗᤥ. ᤂᤧᤴ ᤕᤧᤰᤕᤰᤁᤡᤴ ᤛᤠ᤹ᤖᤡᤰ ᤏᤢᤒᤠ ᤆᤥᤰᤗᤥ॥

³ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤢᤖᤥ. ᤁᤖ ᤛᤫᤠ᤺ᤳ ᤔᤧᤕᤢᤱᤏᤧᤸᤗᤥ॥ ᤂᤢᤏᤧ᤹ ᤁᤢᤍᤃᤡᤃ ᤜᤢᤖᤢᤖᤢ ᤁᤧᤍᤡ᤺ᤵᤐᤠ ᤔᤡ ᤘᤠ᤹ᤖᤥ ᤜᤧᤰᤁᤩᤠᤱ ᤁᤢᤄᤡᤖᤡ ᤁᤡᤵᤔᤠ ᤁᤧᤄᤢᤒᤠ ᤛᤢᤖᤡᤳ ᤁᤣᤈᤱ ᤜᤢᤖᤥ॥

⁴ ᤀᤠᤒᤠᤅᤣ ᤁᤢᤔᤏᤠᤜᤠ᤹ ᤗᤧᤵᤔᤠᤱ ᤂᤠᤛᤧᤴ ᤗᤥ᤺ᤶᤔᤠ ᤑᤠ᤹ᤀᤠᤱ ᤋᤥ᤺ᤴᤍᤡᤖᤧ ᤗᤠᤃᤡ ᤋᤗᤰᤁᤧᤴ ᤋᤠᤱᤛᤠᤰᤐᤠᤴ ᤀᤢ᤺ᤳᤋᤢᤖᤥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴᤏᤠᤱ ᤀᤢ᤺ᤳᤋᤢᤖᤥ॥

⁵ ᤂᤢᤏᤧ᤹ ᤐᤠ᤺ᤳᤋᤢ. “ᤀᤠᤱᤃᤠ᤹ᤀᤥ ᤛᤡᤍᤢᤱᤈᤓᤠ ᤁᤧᤈᤥ᤺ᤰᤐᤠᤖ ᤔᤠᤱᤜᤢᤵ ᤁᤧᤈᤥ᤺ᤰᤐᤠ ᤏᤛᤠ᤺ᤴᤛᤠᤒᤠ ᤀᤠᤔᤏᤠᤜᤠ᤹ ᤀᤠᤱᤃᤠ᤹ᤀᤥ ᤛᤢᤵᤛᤧᤛᤧ᤹ᤀᤥ॥”

⁶ ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤶᤕᤥᤒᤠ ᤆᤥ᤺ᤰᤐᤠ ᤐᤠ᤺ᤴᤏᤡᤴ ᤛᤠᤱᤃᤪᤠᤶᤐᤣᤍᤠᤱᤅᤡᤸᤗᤧ ᤀᤡᤱᤓᤴ ᤆᤥᤃᤢᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤒᤠᤅᤣᤀᤣ ᤂᤠᤛᤧᤴᤍᤠᤱᤒᤠ ᤆᤥᤰᤗᤥ॥ ᤛᤣᤗᤠ

⁷ ᤂᤢᤏᤧ᤹ ᤐᤠ᤺ᤳᤋᤢ. “ᤀᤠᤔᤏᤠᤛᤣ. ᤂᤧᤵᤛᤧᤶᤔᤧ᤹ᤀᤥ. ᤀᤠᤱᤃᤠ᤹ ᤂᤡᤏᤡ᤹ᤏᤢ ᤐᤠ᤺ᤳᤋᤠᤖ ᤐᤳᤋᤠᤖᤥ᥄ ᤀᤡᤛᤪᤠᤀᤡᤗᤒᤠ ᤀᤠᤔᤏᤠᤛᤣ. ᤂᤡᤏᤡ᤹ ᤐᤠ᤺ᤴᤎᤡᤰᤏᤡᤱᤗᤥ ᤀᤠᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤀᤠᤱᤃᤠ᤹ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥

⁸ ᤁᤧᤈᤥᤃᤢᤒᤠ ᤛᤡᤍᤢᤱᤈᤓᤠ ᤏᤢ ᤔᤡᤃᤧᤎᤡᤰᤂᤢᤀᤠᤱ ᤁᤧᤍᤥ᤺ᤴᤍᤢᤒᤠ ᤛᤡᤍᤢᤱᤈᤓᤠᤜᤠ᤹ᤀᤥ ᤂᤧᤏᤧ᤹ ᤐᤠ᤺ᤴᤔᤧᤎᤡᤰᤏᤧᤸᤗᤥ. ᤂᤧᤴ ᤛᤡᤍᤢᤱᤈᤓᤠᤜᤠ᤹ᤃ ᤀᤠᤍᤃᤡᤀᤣ ᤘᤠ᤹ᤖᤥ॥

⁹ ᤁᤧᤒᤡᤳᤌᤠ᤺ᤱᤅᤥᤒᤠ ᤁᤢᤶᤒᤠᤒᤠ ᤐᤡᤳ. ᤜᤧᤰᤁᤩᤠᤱ ᤁᤧᤔᤧ᤺ᤴᤍᤠ ᤂᤖᤜᤠ᤹ᤀᤥᤒᤠ ᤔᤧ᤺ᤴᤍᤠᤜᤠ᤹ ᤀᤠᤱᤃᤠ᤹ ᤆᤠᤜᤠᤒ᤻ ᤔᤧᤈᤥ᤺ᤰᤁᤠᤸᤗᤥ॥

¹⁰ ᤌᤣᤀᤠᤱᤓᤧᤸᤗᤧ ᤋᤠᤶᤓᤢᤱᤅᤥ ᤁᤧᤕᤠᤰᤐᤠ ᤁᤧᤖᤧᤰ ᤌᤰᤛᤠᤜᤠ᤹ ᤀᤠᤱᤃᤠ᤹ᤀᤧᤴᤇᤡᤖᤥ॥ ᤜᤧᤰᤁᤩᤠᤱ ᤜᤧᤴᤇᤡᤱ ᤜᤧᤴᤇᤡᤱ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤀᤥ ᤆᤠᤃᤧᤖᤠᤶᤒᤠ ᤐᤡᤳᤜᤠ᤹ᤀᤠᤱ ᤀᤠᤱᤃᤠ᤹ᤀᤧᤴᤇᤡᤖᤥ॥

¹¹ ᤌᤧᤃᤢᤜᤠ᤹ᤀᤥᤒᤠ ᤁᤧᤖᤧᤰ ᤐᤢᤛᤠᤜᤠ᤹ ᤀᤠᤱᤃᤠ᤹ᤜᤠ᤹ᤖᤥ. ᤜᤧᤰᤁᤩᤠᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤁᤢᤒᤢ ᤌᤰᤛᤠᤜᤠ᤹ ᤀᤠᤱᤃᤠ᤹ᤜᤠ᤹ᤖᤥ॥

¹² “ᤀᤠᤱᤃᤠ᤹ ᤛᤠᤰᤔᤧᤴᤈᤠ ᤘᤕᤠᤱᤛᤠᤱ ᤀᤠᤱᤃᤠ᤹ ᤂᤧᤏᤧ᤹ ᤔᤧᤔᤧᤳᤏᤧᤶᤒᤠ ᤘᤕᤧᤖᤥ. ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ᤀᤡᤴᤗᤥ॥

¹³ ᤌᤣ ᤀᤠᤱᤃᤠ᤹ ᤐᤡᤳᤇᤠ ᤆᤠᤱᤒᤡ᥅ ᤀᤡ ᤔᤧ᤺ᤴᤍᤠ ᤔᤠᤰᤂᤡ᤹ ᤌᤢᤅᤢᤱᤒᤡ᥅

¹⁴ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤢᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤧ᤹ᤀᤥ. ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤂᤧᤏᤧ᤹ ᤁᤧᤈᤥᤃᤢᤒᤠ ᤔᤠᤱᤜᤧᤰᤜᤠ᤹ ᤁᤧᤳᤋᤧ᤹ᤀᤥ॥

¹⁵ ᤋᤢᤰᤂᤣ ᤗᤠᤰᤂᤣ ᤁᤧᤈᤠ᤺ᤸᤗᤧ ᤔᤧᤳᤋᤠᤱᤅᤧ᤹ᤀᤥ. ᤀᤠᤱᤃᤠ᤹ ᤂᤧᤏᤧ᤹ ᤛᤧ᤺ᤵᤏᤧᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤔᤡᤔᤡᤍᤡᤱ ᤁᤧᤈᤥᤃᤢᤖᤥ॥”

¹⁶ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠᤰᤁᤧᤓᤧ᤹ᤒᤠᤜᤠ᤹ ᤔᤧᤳᤋᤢᤛᤡᤖᤥ. “ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤌᤣᤀᤠᤱ ᤁᤧᤏᤡᤖᤢᤶᤒᤠᤒᤣ᥅ ᤀᤠᤔᤠᤱᤜᤢᤵᤐᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤌᤣ ᤕᤢᤰ ᤁᤧᤃᤳᤋᤢᤶᤒᤣ᥅

¹⁷ ᤀᤠᤱᤃᤠ᤹ ᤐᤡᤏᤡᤱᤒᤠ ᤀᤠᤏᤡᤛᤠᤶᤔᤡᤴ ᤁᤧᤈᤡ᤺ᤳᤋᤢᤶᤗᤥ ᤜᤧᤰᤁᤩᤠᤱ ᤀᤠᤒᤠ᤺ᤴᤈᤠ᤺ᤰᤁᤡᤴ ᤁᤧᤏᤠ᤹ᤖᤢᤶᤗᤥ॥

¹⁸ ᤂᤢ᤺ᤴᤍᤪᤡᤰᤐᤠᤴ ᤁᤧᤍᤢᤔᤢᤶᤔᤡᤸᤗᤧ ᤜᤠᤒᤠ ᤂᤧᤴᤏᤣ ᤆᤢᤶ ᤁᤧᤔᤧᤳᤋᤢᤶᤗᤥ. ᤜᤧᤰᤁᤩᤠᤱ ᤆᤠᤃᤧᤗᤠᤶᤒᤠᤴᤏᤢᤀᤣ ᤁᤧᤄᤧ᤺ᤵᤐᤠᤛᤡᤖᤥ॥

¹⁹ “ᤋᤠᤵᤑᤧ᤺ᤶᤒᤠ ᤐᤠᤴ ᤐᤠ᤺ᤵᤔᤠ ᤂᤡᤏᤡ᤹ ᤔᤢᤖᤠ ᤔᤧᤕᤠᤏᤧᤸᤗᤥ. ᤜᤧᤰᤁᤩᤠᤱ ᤀᤠᤓᤧᤸᤗᤧᤛᤠᤱ ᤀᤡᤱᤗᤧᤰ ᤁᤧᤒᤠᤖᤡᤖᤥ॥

²⁰ ᤆᤰᤔᤧᤸᤗ᤹ᤀᤣ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ ᤁᤧᤈᤧᤰᤂᤢᤶᤛᤡᤶᤗᤥ. ᤜᤧᤰᤁᤩᤠᤱ ᤀᤠᤒᤠᤅᤣ ᤏᤢᤛᤠ᤹ᤜᤠ᤹ ᤆᤧ᤹ᤕᤠ ᤁᤧᤔᤧᤳᤋᤢᤶᤛᤡᤶᤗᤥ॥

²¹ ᤂᤡᤏᤡ᤹ ᤁᤴ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤶᤔᤠᤱ ᤁᤧᤘᤕᤡᤸᤗᤧ ᤀᤠᤱᤃᤠ᤹ ᤛᤫᤠ᤺ᤳ ᤘᤕᤠᤱᤗᤥ॥ ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ᤀᤠᤱ ᤂᤡᤏᤡ᤹ ᤜᤧᤰᤁᤣ ᤕᤠᤵᤔᤡ ᤁᤧᤀᤡ᤺ᤳᤋᤡᤖᤥ. ᤁᤖ ᤀᤠᤸᤗ ᤂᤡᤏᤡ᤹ ᤑᤧᤴᤕᤠ᤺ᤶᤒᤰᤜᤠ᤹ ᤂᤡᤏᤡ᤹ ᤋᤃᤡ ᤀᤥᤛᤣ᤺ᤴᤎᤠᤰᤏᤡᤱᤗᤥ॥

²² “ᤀᤠᤱᤃᤠ᤹ ᤕᤠᤵᤔᤡ ᤏᤡᤱᤘᤠ᤹ ᤁᤧᤓᤣ᤺ᤶᤒᤠᤛᤣ. ᤁᤴ ᤀᤠᤒᤠ᤺ᤴᤜᤠ᤹ ᤏᤢᤖᤡᤰᤁᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ. ᤔᤣ᤺ᤴᤏᤧᤓᤃᤪ ᤀᤠᤱᤃᤠ᤹ ᤂᤡᤏᤡ᤹ ᤔᤧᤱᤏᤡᤱᤗᤥ. ᤜᤧᤰᤁᤩᤠᤱ ᤜᤠ᤺ᤳᤗᤧᤀᤠᤱ ᤛᤧ᤺ᤵᤔᤠ ᤁᤧᤴᤇᤢᤰᤋᤡᤴᤗᤥ॥

²³ ᤏᤢᤃᤧᤴ ᤛᤡᤍᤢᤱᤈᤓᤠ ᤁᤧᤍᤥ᤺ᤶᤒᤠᤜᤠ᤹ᤖᤧᤀᤣ ᤀᤠᤱᤃᤠ᤹ ᤀᤠᤔᤡᤱᤛᤥ ᤀᤡᤱᤎᤠᤱ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤍᤧᤶᤒᤠᤜᤠ᤹ ᤛᤧ᤺ᤵᤔᤠᤛᤡᤖᤧ ᤗᤠᤃᤡ ᤀᤠᤔᤢᤰᤛᤠᤶᤔᤡᤴ ᤀᤥᤛᤣ᤺ᤴᤎᤠᤰᤋᤢᤱᤛᤡᤱᤗᤥ॥”