ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 49 - LIFOTNTᤕᤠᤱᤛᤠᤁᤢᤴᤎᤣ᤺ᤸᤗᤧ ᤛᤧ᤺ᤵᤔᤠ ᤀᤠᤴᤇᤢᤰᤏᤧᤴ ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤁᤥᤖᤜᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ ᤛᤠᤶᤗᤥ 1 ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤛᤣ. ᤂᤧᤵᤛᤧᤶᤔᤧ᤹ᤀᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤕᤢᤱᤒᤠᤛᤣ. ᤂᤧᤵᤛᤧᤶᤔᤧ᤹ᤀᤥ᥄ 2 ᤕᤶᤒᤠ ᤏᤢ ᤆᤢᤰᤐᤠ ᤕᤠᤱᤛᤠᤁᤢᤴᤎᤣᤛᤠᤒᤠ ᤏᤢ ᤕᤠᤱᤃᤧᤛᤠ᤹ᤒᤠ ᤁᤧᤖᤧᤰᤗᤧ ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ᥄ 3 ᤛᤡᤰᤁᤢᤶ ᤏᤡᤱᤘᤠ᤹ᤒᤠ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤀᤠᤏᤡᤱᤘᤠ᤹ᤗᤠᤶᤒᤠ ᤐᤠ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ᤖᤧ ᤂᤠᤛᤡᤱᤏᤡ᤺ᤵᤔᤠ ᤐᤠ᤺ᤴᤜᤠ᤹ ᤋᤠᤖᤢᤖᤥ॥ 4 ᤛᤡᤘᤠᤍᤡᤱ ᤂᤠᤜᤢᤴᤏᤥ ᤏᤡᤱᤘᤠ᤹ ᤐᤡᤖᤢᤱᤗᤥ. ᤋᤢᤱᤏᤠ ᤜᤡᤵᤋᤢᤱᤗ ᤀᤠᤵᤋᤥ᤺ᤰᤁᤡᤸᤗᤧ ᤁᤢᤒᤣᤴ ᤑᤠ᤺ᤰᤂᤢᤱᤗᤥ॥ 5 ᤀᤡᤏᤥᤃᤧᤴ ᤋᤢᤰᤂᤣ ᤋᤠ᤺ᤸᤗᤧ. ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤠᤵᤔᤡ ᤁᤧᤄᤢᤶᤒᤠᤜᤠ᤹ᤖᤧ ᤔᤧᤃᤵᤐᤠᤀᤠᤱ ᤋᤢᤰᤂᤣ ᤔᤧᤈᤠ᤺ᤳᤋᤠᤸᤗᤧ ᤀᤠᤱᤃᤠ᤹ ᤔᤧᤃᤡᤀᤠᤴᤗᤥ॥ 6 ᤂᤧᤱᤜᤠ᤹ᤖᤧ ᤔᤧᤃᤳᤋᤢᤒᤠ ᤕᤠᤱᤛᤠᤁᤢᤴᤎᤣᤴ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤔᤧᤗᤣ᤺ᤳᤋᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤃᤳᤋᤢᤒᤠ ᤕᤠᤱᤛᤠᤀᤥ ᤀᤠᤱᤍᤡᤱ ᤔᤧᤗ᤹ᤖᤥ॥ 7 ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤘᤣ᤹ ᤔᤏᤠᤴ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤌᤧ᤹ᤔᤠ ᤔᤧᤛᤢᤰᤋᤢᤴᤗᤥ. ᤀᤡᤃᤪ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤜᤡᤱᤔᤴᤏᤡᤸᤗᤧ ᤁᤢᤔᤧᤸᤗᤢᤱ ᤜᤢᤱᤔᤠ ᤔᤧᤛᤢᤰᤋᤢᤴᤗᤥ॥ 8 ᤔᤏᤠᤖᤧ ᤜᤡᤱᤔᤴᤏᤡᤱᤃ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤆᤥᤰᤗᤥ. ᤀᤠᤰᤂᤩᤠᤖᤡᤰ ᤁᤢᤔᤧᤸᤗᤢᤱ ᤜᤢᤱᤔᤠᤀᤠᤱᤛᤠᤱ. 9 ᤛᤍᤠᤍᤡᤱ ᤁᤧᤜᤡᤱᤒᤠᤀᤠᤱ ᤔᤧᤴᤇᤡᤔᤏᤠᤒᤠ ᤔᤏᤠᤃ ᤜᤠ᤺ᤳᤋᤠᤱ ᤜᤥᤵᤗᤥ॥ 10 ᤌᤣᤀᤠᤱᤓᤧᤸᤗᤧ ᤛᤡᤰᤁᤢᤶᤍᤠᤱᤒᤠ ᤔᤏᤠ᤺ᤴᤏᤠᤱ ᤛᤡᤖᤥ ᤑᤠ᤹ᤀᤠᤱ ᤁᤧᤖᤧᤰᤗᤧ ᤀᤠᤏᤡᤛᤢᤶᤗᤥ. ᤀᤍᤱ ᤏᤢ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤔᤏᤠᤜᤠ᤹ᤀᤠᤱ ᤔᤧᤛᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤁᤧᤖᤧᤰ ᤔᤧᤛᤡᤀᤠᤱ ᤂᤢᤏᤡ᤹ ᤕᤠᤱᤛᤠᤁᤢᤴᤎᤣᤴ ᤘᤣ᤹ᤜᤠ᤹ᤖᤧᤗᤠᤃᤡ ᤔᤧᤗᤧᤖᤢᤔᤧᤎᤖᤥ॥ 11 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤡ᤺ᤵᤐᤢᤱᤅᤡᤴ ᤛᤍᤠᤍᤡᤱᤗᤧ ᤗᤠᤃᤡ ᤂᤢᤏᤡ᤹ ᤜᤡᤶ ᤐᤥᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤍᤠᤍᤡᤱ ᤂᤧᤵᤔᤥ ᤔᤧᤘᤠ᤹ᤖᤥ. ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤈᤣᤴ ᤀᤠᤒᤠᤅᤣ ᤂᤢᤏᤡ᤹ ᤔᤡᤱᤅᤥ ᤔᤧᤏᤧᤛ᤻ᤛᤢᤀᤠᤱ ᤘᤕᤧᤖᤥ॥ 12 ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤕᤖᤡᤰ ᤕᤠᤱᤛᤠᤁᤢᤴᤎᤣ ᤁᤳᤋᤢᤛᤠᤱ ᤂᤧᤸᤗᤧ ᤀᤡᤖᤡᤰ ᤔᤧᤍᤰᤋᤢᤴᤗᤥ. ᤂᤧᤱᤃ ᤌᤰᤛᤠ ᤁᤢᤀᤡᤛᤡᤰ ᤛᤡᤔᤠᤀᤣ ᤐᤥᤱᤗᤥ॥ 13 ᤀᤠᤒᤠᤅᤣ ᤕᤠ᤺ᤶᤒᤰᤁᤡᤴᤏᤣ ᤕᤶᤒᤠ ᤁᤧᤀᤡ᤺ᤵᤐᤠᤜᤠ᤹ ᤜᤠᤒᤠ ᤀᤰᤂᤣ ᤔᤧᤒᤥᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠᤴ ᤁᤧᤄᤧᤶᤒᤠᤜᤠ᤹ᤀᤠᤱ ᤜᤠᤒᤠ ᤀᤰᤂᤣᤀᤣ ᤔᤧᤒᤥᤱᤗᤥ॥ ᤛᤣᤗᤠ 14 ᤛᤡᤔᤧᤸᤗᤧ ᤂᤧᤱᤜᤠ᤹ ᤔᤧᤸᤗᤢᤰ ᤁᤢᤀᤡᤛᤡᤰ ᤂᤧᤔᤠᤕᤱᤛᤱ ᤗᤧᤵᤛᤠᤱ ᤋᤣ᤹ᤖᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤛᤡᤖᤥ॥ ᤛᤠᤶᤕᤥᤒᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤠ᤺ᤴᤍᤢᤛᤡᤖᤥ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤂᤢᤏᤡ᤹ ᤜᤡᤶᤔᤡᤴᤏᤢ᤺ᤸᤗᤧ ᤔᤠ᤺ᤱᤄᤠ ᤀᤡ᤺ᤵᤐᤢᤱᤍᤧᤴᤏᤥ ᤁᤡᤒᤣ᤺ᤰᤗᤥ॥ 15 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤀᤠᤜᤡᤱᤔᤴᤏᤡᤴ ᤂᤧᤔᤠ ᤕᤱᤛᤱᤗᤠᤶᤒᤠ ᤌᤧ᤹ᤖᤢᤖᤥ. ᤜᤧᤰᤁᤩᤠᤱ ᤛᤧᤰᤂᤠᤀᤣ ᤂᤢᤏᤧ᤹ ᤀᤠᤱᤃᤠ᤹ ᤋᤠ᤺ᤰᤁᤠᤖᤥ॥ ᤛᤣᤗᤠ 16 ᤁᤢᤓᤠ ᤔᤏᤠᤜᤠ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤧᤒᤥᤱᤗᤥ. ᤜᤧᤰᤁᤩᤠᤱ ᤔᤧᤏᤢ᤹ᤔᤧᤍᤠᤀᤠᤱ ᤁᤧᤃᤵᤐᤠ ᤔᤧᤒᤥᤱᤅᤡᤸᤗᤧ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥ 17 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤛᤡ᤺ᤸᤗᤧ ᤌᤣᤀᤠᤱ ᤔᤧᤴᤍᤣ᤹ᤀᤣ ᤔᤧᤒᤣ᤺ᤰᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤃᤳᤋᤢᤒᤠ ᤕᤠᤱᤛᤠᤁᤢᤴᤎᤣᤴ ᤂᤢᤴᤇᤡ᤹ᤏᤢ ᤔᤧᤒᤣ᤺ᤰᤏᤧᤸᤗᤥ॥ 18 ᤂᤧᤱᤜᤠ᤹ ᤂᤢᤴᤇᤡ᤹ ᤜᤡᤱᤜᤡᤱ ᤌᤠᤖᤡᤰ ᤔᤢ᤹ᤀᤡᤛᤠᤒᤠᤛᤡᤃᤧ ᤑᤠ᤹ᤀᤠᤱ ᤔᤧᤀᤡ᤺ᤳᤇᤡᤱᤗᤥ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ ᤁᤢᤗᤡᤱᤍᤥ ᤔᤧᤃᤧᤳᤋᤡᤸᤗᤧ ᤘᤣ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤠᤖᤠ ᤔᤧᤓᤥᤛᤢᤖᤥ॥ 19 ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤜᤧᤰᤁᤣ ᤔᤧᤛᤡᤀᤠᤱ ᤔᤧᤒᤣ᤺ᤰᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤀᤥ᤺ᤳᤋᤡ᤺ᤴ ᤔᤧᤴᤏᤡᤛᤢᤴᤗᤥ॥ 20 ᤔᤡᤱᤛᤥᤎᤠ᤺ᤱᤛᤥᤖᤧ ᤔᤏᤠᤴ ᤛᤡᤔᤠᤗᤠᤶ ᤛᤧ᤺ᤵᤔᤠ ᤔᤧᤛᤢᤰᤋᤢᤴᤗᤥ. ᤌᤰᤛᤠ ᤁᤢᤀᤡᤛᤡᤰ ᤂᤧᤴ ᤛᤡᤔᤠᤀᤣ ᤐᤥᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.