ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 48 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤧᤰᤕᤰ ᤁᤥᤖᤜᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ ᤛᤠᤶᤗᤥ 1 ᤕᤜᤘᤣ ᤍᤠᤱᤒᤠᤴ ᤐᤕᤶ ᤕᤶᤒᤠ ᤆᤥᤰᤗᤥ. ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤧᤰᤕᤰᤁᤥ ᤏᤢ ᤁᤢᤛᤣᤛᤣ ᤁᤥ᤺ᤰᤔᤠᤀᤥ ᤁᤢᤏᤠᤖᤠ ᤑᤥᤔᤠ ᤗᤠ᤹ᤖᤢᤖᤥ॥ 2 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤃᤥ᤺ᤰᤔᤠ ᤛᤡᤕᤥ᤺ᤴᤏᤧᤴ ᤁᤣ᤺ᤶᤒᤠ ᤏᤢ ᤏᤢᤒᤠ ᤆᤥᤰᤗᤥ॥ ᤐᤕᤶ ᤕᤶᤒᤠ ᤜᤠᤱᤅᤡᤸᤗᤧ ᤁᤴ ᤁᤢᤕᤧᤰᤕᤰᤁᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤡᤱᤘᤠ᤹ ᤋᤠᤔᤠ ᤐᤠ᤺ᤴᤜᤠ᤹ ᤋᤠᤖᤢᤖᤥ॥ 3 ᤕᤧᤰᤕᤰᤁᤥᤒᤠ ᤕᤰᤜᤡᤶᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤀᤠᤛᤧ᤺ᤵᤗᤥ. ᤁᤴ ᤐᤠ᤺ᤴᤏᤡᤴ ᤂᤢᤏᤧ᤹ ᤀᤥᤛᤣ᤺ᤴᤍᤠᤱ ᤆᤥᤃᤢᤀᤠᤱ ᤘᤠ᤹ᤖᤥ॥ 4 ᤜᤠᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤔᤧᤈᤢᤵᤛᤧᤖᤥ. ᤜᤧᤰᤁᤩᤠᤱ ᤛᤡᤕᤥᤏ ᤁᤥ᤺ᤰᤔᤠᤀᤥ ᤌᤱ ᤆᤥ᤺ᤰᤛᤧ ᤋᤃᤡ ᤔᤧᤒᤥᤖᤧᤖᤥ॥ 5 ᤁᤖ ᤂᤧᤱᤜᤠ᤹ᤖᤧ ᤛᤡᤕᤥᤏ ᤁᤥ᤺ᤰᤔᤠᤴ ᤔᤧᤏᤡᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤱᤔᤠ ᤁᤧᤖᤧᤀᤠᤱ ᤔᤧᤄᤧᤳᤇᤡᤱ ᤔᤧᤒᤣᤖᤥ॥ 6 ᤂᤧᤱᤜᤠ᤹ ᤂᤧᤵᤔᤥᤀᤣ ᤌᤧᤃᤰᤁᤰᤏᤠ ᤕᤱᤔᤠ ᤔᤧᤜᤣ᤺ᤰᤋᤧᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠᤍᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠᤴ ᤜᤧᤰᤁᤣ ᤔᤧᤒᤥ᤺ᤰᤂᤧᤖᤥ॥ 7 ᤏᤠᤶᤃᤧᤳ ᤐᤡᤛᤠᤱᤗᤠᤶ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤕᤶᤒᤕᤶᤒᤠ ᤘᤠᤗᤠᤎᤠᤜᤠ᤹ ᤐᤰᤂᤢᤛᤡ ᤗᤧᤰᤂᤢᤛᤡᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤂᤧᤱᤜᤠ᤹ ᤔᤧᤰᤂᤢᤛᤡᤖᤥ॥ 8 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤰᤕᤰᤁᤥ. ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠᤱᤈᤢᤶᤔᤥ. ᤂᤧᤵᤛᤢᤶᤒᤧᤒᤠ ᤁᤢᤀᤡᤛᤡ᤺ᤰᤁᤣ ᤏᤡᤛᤢᤶᤒᤧᤀᤠᤱ ᤘᤕᤡᤃᤧᤖᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤍᤠᤍᤡᤱ ᤂᤧᤴ ᤕᤧᤰᤕᤰᤁᤡᤴ ᤛᤧ᤺ᤵᤋᤢᤖᤥ॥ ᤛᤣᤗᤠ 9 ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤃᤣ ᤁᤧᤜᤡᤶᤔᤥ ᤘᤕᤡᤃᤧᤸᤗᤧ ᤆᤰᤔᤧᤸᤗ᤹ᤀᤣ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤐᤠ ᤐᤠ᤺ᤴᤏᤡᤴ ᤀᤠᤏᤡᤃᤣ ᤏᤡᤱᤘᤠ᤹ ᤀᤡ᤺ᤳᤋᤢᤶᤒᤧᤖᤥ॥ 10 ᤔᤏᤠᤜᤠ᤹ᤖᤧ ᤀᤠᤳᤋᤡᤛᤠᤱ ᤁᤧᤏᤠᤖᤠ ᤔᤧᤓᤥᤛᤢᤖᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤖᤧᤰ ᤐᤡᤛᤠᤱ ᤂᤧᤏᤧ᤹ ᤁᤧᤔᤡᤱ ᤋᤡᤖᤧᤀᤠᤱ ᤘᤠ᤹ᤖᤥ॥ ᤂᤧᤏᤧ᤹ᤃ ᤁᤧᤈᤢᤰᤘᤠ ᤜᤢᤰᤁᤡᤸᤗᤧ ᤛᤠᤶᤕᤥᤒᤠ ᤂᤠᤛᤧᤴᤗᤥ᤺ᤶᤔᤥ ᤜᤠᤱᤕᤢᤰ ᤁᤧᤈᤥᤃᤢᤖᤥ॥ 11 ᤛᤡᤕᤥᤏ ᤁᤥ᤺ᤰᤔᤠᤀᤥᤒᤠ ᤔᤏᤠᤜᤠ᤹ ᤔᤧᤛ᤺ᤳᤗᤖᤥ. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤗᤥ᤺ᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤕᤜᤢᤍᤠ ᤐᤠᤱᤓᤣ᤹ᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤖᤖᤥ॥ 12 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤀᤣ. ᤛᤡᤕᤥᤏ ᤁᤥ᤺ᤰᤔᤠᤴ ᤁᤒᤪᤡᤱ ᤁᤒᤧ᤹ᤀᤥ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤆᤱᤜᤡᤶᤜᤠ᤹ ᤏᤡᤖᤧ᤹ᤀᤥ॥ 13 ᤜᤧᤰᤁᤩᤠᤱ ᤗᤢᤱᤎᤠᤰᤜᤠ᤹ ᤏᤢᤖᤡᤰᤁᤠᤱ ᤀᤥᤔᤧᤳᤋᤧ᤹ᤀᤥ. ᤂᤧ᤹ᤕᤥᤒᤠ ᤕᤰᤜᤡᤶᤜᤠ᤹ ᤏᤢᤖᤡᤰᤁᤠᤱ ᤛᤠ᤹ᤖᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤋᤠ᤺ᤴᤍᤡ ᤁᤧᤍᤠᤒᤠ ᤌᤠ᤺ᤰᤜᤠ᤹ ᤔᤧᤵᤔᤠ ᤁᤧᤛᤢᤰᤋᤢᤛᤡᤖᤖᤥ॥ 14 ᤌᤣᤀᤠᤱᤓᤧᤸᤗᤧ ᤜᤠᤒᤠ ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤀᤠᤏᤡ᤹ ᤛᤍᤠᤍᤡᤱᤒᤠ ᤏᤡᤱᤘᤠ᤹ᤑᤢᤔᤠᤱᤗᤥ. ᤂᤢᤏᤧ᤹ᤀᤣ ᤀᤠᤓᤧᤸᤗᤧᤛᤠᤱ ᤗᤠᤶᤀᤠᤗᤥᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.