ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 46 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ᤏᤢ ᤘᤠ᤹

ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤀᤗᤠᤔᤥᤋ ᤁᤢᤀᤡᤛᤡᤰ ᤁᤥᤖᤜᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ ᤛᤠᤶᤗᤥ

¹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤀᤡ᤺ᤶᤛᤡᤱᤔᤠᤍᤧᤴ ᤜᤧᤰᤁᤩᤠᤱ ᤀᤠᤏᤡ᤹ ᤔᤢᤰᤛᤠᤶᤗᤥ. ᤀᤠᤏᤡ᤹ ᤛᤠ᤹ᤖᤡᤰ ᤋᤢᤰᤂᤣ ᤀᤠᤈᤠ᤺ᤸᤗᤧ ᤀᤠᤏᤡ᤹ ᤑᤠ᤹ᤔᤠᤖᤧ ᤗᤠᤃᤡ ᤂᤢᤏᤧ᤹ ᤀᤠᤓᤧᤸᤗᤧᤛᤠᤱ ᤕᤠᤖᤡᤵ ᤘᤠ᤹ᤖᤥ॥

² ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤗᤧᤱᤎᤠᤱᤛᤠᤱ. ᤀᤡᤃᤪ ᤌᤧᤃᤢᤜᤠ᤹ ᤘᤜ᤺ᤱ ᤘᤖᤰᤁᤥ ᤜᤢᤶᤛᤠᤱ ᤀᤠᤏᤡᤃᤣ ᤔᤧᤃᤡᤛᤡᤃᤧᤴᤗᤥ॥

³ ᤘᤖ᤺ᤱᤅᤡᤴ ᤀᤢ᤺ᤰᤁᤠᤱ ᤁᤢᤒᤢ᤺ᤳᤌᤢᤱᤘᤠ ᤗ᤺ᤴᤇᤠᤱ ᤜᤧᤰᤁᤩᤠᤱ ᤂᤧᤴ ᤗᤧᤱᤎᤠᤱᤅᤠᤱ ᤏᤠᤱᤈᤱᤗᤢᤱᤜᤠ᤹ ᤕᤰᤂᤢᤛᤠᤱ ᤀᤠᤏᤡᤃᤣ ᤔᤧᤃᤡᤛᤡᤃᤧᤴᤗᤥ॥ ᤛᤣᤗᤠ

⁴ ᤗᤳᤇᤠ ᤘᤜ᤺ᤱᤎᤡᤰ ᤏᤧᤖᤥ. ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤧᤰᤕᤰᤁᤥ ᤛ᤺ᤵᤔᤠ ᤀᤣ᤺ᤵᤔᤠ ᤋᤠᤖᤢᤖᤥ॥ ᤂᤧ᤹ᤕᤥ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤣᤛᤣ ᤜᤡᤶᤔᤥ ᤕᤢᤱᤗᤥ॥

⁵ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧ᤹ᤕᤥ ᤘᤠ᤹ᤖᤥ. ᤂᤧᤴ ᤕᤧᤰᤕᤰᤁᤡᤴ ᤔᤧᤔᤧᤰᤏᤧᤸᤗᤥ॥ ᤋᤠᤏᤠᤶᤛᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤕᤧᤰᤕᤰᤁᤡᤴ ᤛᤧ᤺ᤵᤋᤢᤖᤥ॥

⁶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤗᤢᤶᤔᤥ ᤜᤕᤱ ᤁᤡᤸᤗᤡᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤂᤠᤶᤄᤢ ᤗᤠᤈᤣ᤹ᤜᤠ᤹ ᤔᤧᤔᤧᤰᤗᤥ. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤗᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤕᤥ᤺ᤶᤒᤣ᤺ᤰᤗᤥ॥

⁷ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤀᤠᤏᤡ᤹ᤏᤢ ᤘᤠ᤹ᤖᤥ. ᤜᤧᤰᤁᤩᤠᤱ ᤕᤠᤁᤢᤒᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤛᤧ᤺ᤵᤛᤡᤱᤔᤠᤍᤧᤴ ᤕᤰᤗᤥ॥ ᤛᤣᤗᤠ

⁸ ᤕᤜᤘᤣ ᤍᤠᤱᤒᤧᤸᤗᤧ ᤌᤣ ᤆᤥᤃᤢᤀᤠᤱ ᤘᤠ᤹. ᤋᤩᤧᤶᤔᤧ᤹ᤀᤠᤱ ᤀᤥᤔᤧᤳᤋᤧᤶᤔᤧ᤹ᤀᤥ॥ ᤀᤥᤔᤧᤳᤋᤧᤶᤔᤧ᤹. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤔᤡᤰ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹ᤖᤥ॥

⁹ ᤂᤢᤏᤧ᤹ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤌᤱ ᤐᤥᤱᤔᤠ ᤔᤧᤓᤠ᤺ᤰᤋᤢᤴᤗᤥ॥ ᤂᤢᤏᤧ᤹ᤃ ᤗᤡ ᤋᤥᤱ ᤏᤢ ᤕᤧᤴᤜᤠ᤹ ᤀᤧᤰᤂᤢᤖᤥ. ᤜᤧᤰᤁᤩᤠᤱ ᤂᤥᤜᤠ᤹ ᤔᤡᤀᤥ ᤜᤠ᤺ᤴᤍᤢᤍᤣᤛᤢᤖᤥ॥

¹⁰ ᤂᤢᤏᤧ᤹ ᤐᤠ᤺ᤳᤋᤢ᤹. “ᤔᤧᤱᤄᤣ ᤔᤧᤴᤎᤰᤁᤣ ᤛᤫᤠ᤺ᤳ ᤘᤕᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤀᤠ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤢᤛᤡᤱ ᤏᤠ᤺ᤳᤋᤧᤶᤔᤧ᤹ᤀᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤀᤠᤱᤃᤠ᤹ ᤁᤧᤖᤧᤰᤏᤢ᤺ᤸᤗᤧ ᤌᤥᤎᤥᤰᤐᤠ ᤐᤥᤱᤅᤠᤖᤥ॥”

¹¹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤀᤠᤏᤡ᤹ᤏᤢ ᤘᤠ᤹ᤖᤥ. ᤜᤧᤰᤁᤩᤠᤱ ᤕᤠᤁᤢᤒᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤛᤧ᤺ᤵᤛᤡᤱᤔᤠᤍᤧᤴ ᤕᤰᤗᤥ॥ ᤛᤣᤗᤠ