ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 45 - LIFOTNT

ᤜᤠᤱ ᤔᤣ᤺ᤰᤂᤡᤶ ᤛᤠᤶᤗᤥ

ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤁᤥᤖᤜᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ ᤔᤛ᤻ᤁᤡᤗ. “ᤗᤧᤰᤘᤠᤓᤢᤱ” ᤀᤡᤳᤗᤠᤀᤥ ᤔᤣ᤺ᤰᤂᤡᤶ ᤛᤠᤶᤗᤥ

¹ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤁᤴ ᤛᤠᤶᤗᤥᤴ ᤛᤠᤵᤋᤢᤱᤅᤡᤸᤗᤧ ᤛᤠ᤹ᤖᤡᤰ ᤏᤢᤒᤠ ᤐᤠ᤺ᤴᤇᤣ᤺ᤰᤘᤠᤜᤠ᤹ ᤀᤠᤏᤡᤱᤘᤠ᤹ᤀᤥ ᤋᤠᤖᤥ॥ ᤁᤢᤓᤠ ᤏᤢᤖᤡᤰ ᤛᤠᤵᤗᤠ ᤁᤧᤛᤠᤵᤐᤠᤸᤗᤧ ᤁᤢᤏᤠᤰᤆᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤀᤠᤶᤒᤪᤠᤀᤥ ᤛᤠᤶᤀᤡ᤺ᤳᤗᤠ᤺ᤴ ᤕᤠᤖᤡᤵ ᤘᤠ᤹ᤖᤥ॥

² ᤂᤧᤏᤧ᤹ᤃ ᤁᤧᤖᤧᤰᤏᤢ᤺ᤸᤗᤧ ᤛᤠ᤹ᤖᤡᤰ ᤏᤢᤒᤠ ᤜᤧᤰᤁᤩᤠᤱ ᤁᤢᤀᤡᤳ ᤁᤧᤍᤠᤒᤠ ᤁᤧᤈᤥ᤺ᤰᤗᤥ. ᤂᤧᤏᤧ᤹ ᤛᤠ᤹ᤖᤡᤰ ᤏᤢᤖᤡᤰᤁᤠᤱ ᤂᤧᤶᤍᤢ ᤗᤠ᤹ᤖᤢᤖ ᤁᤧᤒᤠ᤺ᤳᤗᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤍᤠᤍᤡᤱᤗᤧ ᤗᤠᤃᤡ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤧᤀᤠᤱ ᤘᤠ᤹ᤖᤥ॥

³ ᤔᤢᤰᤛᤠᤶᤍᤠᤱᤒᤠ ᤜᤠᤱᤅᤣ. ᤁᤧᤍᤠᤓᤣ᤺ᤴ ᤜᤣ᤹ᤛᤡᤱᤅᤧ᤹ᤀᤥ. ᤂᤧᤏᤧ᤹ ᤔᤡᤔᤡᤍᤡᤱᤛᤠᤒᤠ ᤏᤢ ᤜᤠᤱᤘᤠ ᤔᤠᤱᤘᤠᤛᤠᤒᤠ ᤁᤧᤈᤥ᤺ᤰᤗᤥ॥

⁴ ᤛᤧᤰᤂᤠᤴ ᤜᤧᤰᤁᤩᤠᤱ ᤛᤠᤶᤕᤥᤒᤠ ᤏᤢ ᤂᤠᤛᤧᤴᤏᤡᤴ ᤛᤧ᤺ᤵᤔᤠ ᤁᤵᤔᤠᤖᤧ ᤗᤠᤃᤡ. ᤌᤱ ᤁᤧᤏᤠ᤺ᤶᤒᤠᤴ ᤜᤧᤰᤁᤣ ᤀᤴ ᤕᤢᤰᤁᤡ ᤔᤡᤔᤡᤍᤡᤱᤏᤢ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧ᤹ᤀᤥ᥄ ᤔᤢᤰᤛᤠᤶᤒᤠ ᤁᤧᤈᤢᤰᤘᤠ ᤜᤢᤰᤁᤡᤸᤗᤧ ᤕᤶᤒᤕᤶᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤧ᤹ᤀᤥ॥

⁵ ᤂᤧᤏᤧ᤹ ᤁᤧᤍᤥ᤺ᤱᤜᤠ᤹ ᤜᤠᤛᤶᤛᤶᤒᤠ ᤆᤥᤰᤗᤥ. ᤂᤧᤴ ᤋᤥ᤺ᤱᤜᤠ᤹ᤖᤧ ᤁᤧᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤗᤢᤱᤔᤠᤴ ᤗᤛ᤻ᤛᤢᤖᤥ. ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤧᤏᤧ᤹ ᤁᤧᤍᤃᤡ ᤔᤧᤈᤥᤴᤗᤥ॥

⁶ ᤏᤡᤱᤘᤠ᤹ᤑᤢᤔᤠᤱᤅᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤧᤒᤠ ᤜᤠᤱᤈᤢᤶᤔᤡᤴ ᤛᤍᤠᤍᤡᤱ ᤏᤧᤖᤥ. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤗᤥ᤺ᤴᤍᤢᤖ ᤁᤧᤔᤏᤠᤜᤠ᤹ᤀᤥ ᤜᤠᤱᤕᤢᤰ ᤁᤧᤈᤥᤃᤢᤖᤥ॥

⁷ ᤀᤠᤳᤋᤡᤴ ᤐᤠ᤺ᤴᤏᤡᤴ ᤛᤠᤶᤕᤥᤒᤠ ᤆᤥᤰ. ᤂᤧᤴ ᤂᤧᤏᤧ᤹ ᤁᤧᤛᤡᤖᤠ᤹ ᤌᤠᤱᤗᤥ. ᤜᤧᤰᤁᤩᤠᤱ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤰ. ᤂᤧᤴ ᤂᤧᤏᤧ᤹ ᤁᤧᤈᤡ᤺ᤳᤋᤢᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤁᤧᤏᤡᤱᤘᤠ᤹ᤑᤢᤔᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤛᤣᤃᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤧᤴᤈᤢᤶᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤧᤏᤧ᤹ ᤁᤧᤛ᤺ᤵᤐᤠ ᤁᤧᤈᤥᤃᤧᤀᤠᤱ ᤘᤠ᤹ᤖᤥ॥

⁸ ᤁᤧᤈᤠᤱᤜᤠ᤹ ᤁᤧᤖᤧᤰ ᤐᤠᤱᤒ᤺ᤳᤑᤢᤱ. ᤛᤧᤶᤓᤢᤱ ᤏᤢ ᤀᤴᤍᤱᤓᤢᤱ ᤜᤧᤰᤁᤣ ᤁᤢᤏᤠᤶᤏᤢ᤹ᤖᤥ॥ ᤋᤰᤔᤡᤒᤠᤸᤗᤧ ᤁᤣ᤺ᤱᤅᤡᤸᤗᤧ ᤆᤥ᤺ᤰᤔᤏᤠᤒᤠ ᤜᤠᤱᤜᤡᤶᤔᤥ ᤔᤢᤰᤗᤠ ᤁᤧᤔᤢᤱᤒᤠᤜᤠ᤹ᤖᤧ ᤁᤧᤛᤡᤖᤠ᤹ᤌᤠᤱᤗ ᤁᤧᤶᤕᤠ᤺ᤴᤗᤥ॥

⁹ ᤂᤧᤏᤧ᤹ ᤁᤧᤜᤡᤶᤔᤥ ᤔᤡᤱᤛᤥᤀᤡᤱᤎᤠ᤺ᤱ ᤁᤧᤄᤥᤔᤠ ᤔᤧᤴᤇᤢᤔᤠ᤹ᤜᤠ᤹ᤀᤥ ᤁᤢᤓᤠ ᤜᤠᤱᤛᤠᤔᤠᤜᤠ᤹ ᤔᤧᤘᤠ᤹ᤖᤥ॥ ᤂᤧᤏᤧ᤹ ᤁᤧᤒᤣᤛᤠᤱ ᤗᤧᤵᤔᤠᤱ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤘᤠ᤺ᤳᤋᤡᤴ ᤘᤠᤖᤢᤀᤠᤱ ᤁᤧᤔᤣ᤺ᤰᤂᤡᤶᤛᤠᤔᤧᤴ ᤕᤧᤵᤗᤥ॥

¹⁰ ᤜᤠᤱᤛᤠᤔᤠᤀᤣ. ᤂᤧᤵᤛᤧ᤹ᤀᤥ᥄ ᤜᤧᤰᤁᤩᤠᤱ ᤏᤢᤖᤡᤰᤁᤠᤱ ᤂᤧᤵᤛᤧ᤹ᤀᤥ. ᤁᤧᤃᤠ᤹ᤀᤡᤜᤠ᤹ ᤏᤢ ᤁᤧᤶᤒᤠᤖᤧ ᤁᤢᤜᤡᤶᤔᤡᤴ ᤏᤡᤱᤘᤠ᤹ᤑᤣ᤺ᤳᤇᤧ᤹ᤀᤥ॥

¹¹ ᤏᤢᤔᤠᤍᤠᤔᤠ ᤁᤧᤈᤥ᤺ᤰᤐᤠᤀᤥ ᤜᤠᤱᤅᤡᤸᤗᤧ ᤂᤧᤏᤧ᤹ ᤁᤢᤛᤡᤖᤠ᤹ ᤁᤧᤎᤠᤅᤧᤀᤠᤱ ᤁᤧᤘᤠ᤹ᤖᤥ॥ ᤂᤢᤏᤧ᤹ ᤔᤡᤱᤛᤥᤀᤡᤱᤎᤠ᤺ᤱ ᤐᤡᤖᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤣ ᤁᤧᤴᤍᤠᤱᤒᤠᤖᤥ॥

¹² ᤋᤢᤖᤥᤛ ᤗᤠᤈᤣ᤹ ᤁᤧᤕᤢᤱᤔᤠ ᤜᤠᤱᤛᤠᤔᤠᤴ ᤆᤧᤛᤢᤱᤏᤢ ᤂᤧᤏᤧ᤹ᤀᤥ ᤕᤢᤖᤥ. ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ ᤂᤧᤏᤧ᤹ᤏᤢ ᤏᤡ᤺ᤳᤋᤠᤱ ᤐᤥᤱᤔᤠ ᤔᤧᤃᤥ᤺ᤳᤗᤥ॥

¹³ ᤜᤠᤱᤛᤠᤔᤠᤴ ᤜᤠᤱᤜᤡᤶᤔᤥ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤏᤧ᤹ᤃ ᤛᤠ᤹ᤖᤡᤰ ᤏᤢᤔᤠ ᤆᤥᤰᤗᤥ. ᤁᤢᤈᤠᤱᤜᤠ᤹ ᤛᤠᤶᤔᤩᤠᤱ ᤂᤡ᤺ᤸᤗᤧ ᤌᤠᤰᤔᤏᤠᤒᤠ ᤆᤥᤰᤗᤥ॥

¹⁴ ᤑᤢᤱ ᤗᤰᤔᤏᤠᤒᤠ ᤐᤖᤡᤰ ᤐᤖᤡᤰᤐᤠ ᤆᤠᤱᤜᤠ᤹ ᤔᤧᤈᤠᤰᤋᤢᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤔᤣ᤺ᤳᤁᤧᤛᤠᤔᤠᤜᤠ᤹ᤖᤧ ᤔᤧᤍᤡᤶᤍᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤱᤅᤡᤸᤗᤥ ᤔᤧᤛᤔᤧᤎᤖᤥ॥

¹⁵ ᤂᤧᤱᤜᤠ᤹ ᤔᤧᤛ᤺ᤳᤗ. ᤂᤢᤏᤡ᤹ ᤏᤡᤱᤘᤠ᤹ ᤋᤠᤖ ᤔᤧᤍᤠᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠᤱᤜᤡᤶᤔᤥ ᤔᤧᤗᤠ᤺ᤳᤗᤥ॥

¹⁶ ᤜᤠᤱᤅᤣ. ᤂᤧᤏᤧ᤹ ᤁᤧᤛᤢᤎᤧᤒᤠ ᤁᤧᤍᤠᤰᤌᤧᤒᤠᤜᤠ᤹ ᤜᤧᤰᤁᤣ ᤁᤧᤛ᤻ᤛᤠ ᤁᤧᤶᤔᤧᤴᤇᤠ᤹ᤜᤠ᤹ᤀᤠᤱ ᤜᤠᤱ ᤔᤧᤒᤥᤱᤗᤥ॥ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ ᤁᤧᤖᤧᤰ ᤗᤠᤈᤣ᤹ᤜᤠ᤹ᤀᤥ ᤜᤠᤱᤃᤧᤈᤥ᤺ᤰᤐᤠ ᤁᤧᤈᤥᤃᤢᤛᤡᤖᤥ॥

¹⁷ ᤌᤠ᤺ᤰᤌᤠ᤺ᤰᤁᤥ ᤁᤧᤔᤡᤱᤛᤥ ᤀᤡᤱᤎᤠᤱ ᤁᤧᤒᤥᤱᤒᤠ ᤆᤥᤃᤢᤱᤗᤥ. ᤂᤧᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤛᤍᤠᤍᤡᤱ ᤁᤧᤏᤠᤖᤠ ᤔᤧᤓᤥᤛᤢᤖᤥ॥