ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 44 - LIFOTNTᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤐᤣᤗᤡ ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤁᤥᤖᤜᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ ᤔᤛ᤻ᤁᤡᤗ 1 ᤏᤡᤱᤘᤠ᤹ᤑᤢᤔᤠᤱᤅᤣ. ᤕᤖᤡᤰ ᤋᤱᤒᤣ ᤋᤃᤡ ᤂᤧᤏᤧ᤹ ᤁᤧᤈᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤧᤰᤋᤡᤃᤧᤖᤥ. ᤂᤧᤴ ᤀᤠᤏᤡᤃᤣ ᤀᤠᤒᤠᤅᤣ ᤏᤧᤰᤂᤥᤒᤠᤸᤗᤧ ᤂᤧᤵᤛᤢᤶᤒᤧᤀᤠᤱ ᤘᤠ᤹ᤖᤥ॥ 2 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤛᤢᤘᤠᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤔᤢᤰᤛᤠᤶᤔᤡᤸᤗᤧ ᤁᤧᤏᤠ᤺ᤳᤋᤢ ᤁᤧᤍᤣᤛᤢᤛᤡᤖᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ ᤁᤧᤕᤢᤰᤂᤢᤛᤡᤖᤥ॥ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤔᤡᤜᤠ᤹ ᤕᤥ ᤁᤧᤎᤠᤛᤢᤛᤡᤖᤥ ᤂᤧᤒᤩᤠᤱ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ ᤏᤢ᤹ᤔᤠ ᤋᤠᤔᤠ ᤁᤧᤒᤡᤖᤢᤛᤡᤖᤥ॥ 3 ᤁᤧᤔᤏᤠᤜᤠ᤹ᤖᤧ ᤗᤠᤈᤣᤴ ᤑᤧᤈᤠ᤺ᤸᤗᤧ ᤔᤧᤏᤠ᤺ᤴᤍᤢᤒᤠ ᤔᤣ᤺ᤴᤗᤥ ᤜᤧᤰᤁᤩᤠᤱ ᤀᤠᤒᤠᤅᤣ ᤔᤧᤎᤢᤶᤍᤧᤀᤠᤱ ᤔᤧᤏᤠ᤺ᤴᤍᤢᤒᤠᤀᤠᤱ ᤔᤣ᤺ᤴᤗᤥ ᤁᤖ ᤁᤧᤔᤢᤰᤛᤠᤶ ᤏᤢ ᤁᤧᤎᤢᤶᤔᤡᤸᤗᤧ ᤔᤧᤏᤠ᤺ᤴᤍᤢᤒᤠᤖᤥ॥ ᤜᤧᤰᤁᤩᤠᤱ ᤂᤧᤏᤧ᤹ ᤂᤢᤴᤇᤡ᤹ᤏᤢ ᤁᤧᤘᤠ᤹ ᤁᤧᤗ᤹ᤒᤠ ᤏᤧᤜᤡᤏᤡᤱᤘᤠ᤹ᤖᤧ ᤏᤡ᤺ᤴᤎᤥ ᤔᤧᤃᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤌᤱ ᤔᤧᤏᤠ᤺ᤴᤍᤢᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤂᤧᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤖᤥ॥ 4 ᤂᤧᤏᤧ᤹ᤃ ᤀᤠᤜᤠᤱ ᤏᤢ ᤀᤠᤏᤡᤱᤘᤠ᤹ᤑᤢᤔᤠᤱᤏᤧᤖᤥ. ᤂᤧᤏᤧ᤹ ᤕᤠᤁᤢᤒᤖᤧ ᤁᤢᤛᤢᤘᤠᤱᤜᤠ᤹ ᤏᤡᤱᤔᤡ ᤁᤧᤏᤠ᤺ᤶᤒᤠ ᤁᤧᤈᤥᤃᤢᤛᤡᤖᤥ॥ 5 ᤂᤧᤏᤧ᤹ ᤁᤧᤔᤢᤰᤛᤠᤶᤗᤠᤶᤒᤠ ᤀᤠᤏᤡᤃᤣ ᤏᤡᤱᤔᤡᤜᤠ᤹ ᤏᤠ᤺ᤴᤍᤢᤶᤛᤡᤶᤒᤧᤖᤥ. ᤁᤧᤔᤡᤱᤅᤥᤗᤠᤶᤒᤠ ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤁᤧᤒᤥᤰᤐᤠᤜᤠ᤹ ᤀᤠᤏᤡᤃᤣ ᤗᤠ᤺ᤰᤋᤢᤶᤛᤡᤶᤒᤧᤖᤥ॥ 6 ᤁᤳᤋᤢᤱᤒᤠ ᤗᤡ᤺ᤸᤗᤧ ᤛᤧ᤺ᤵᤐᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤠᤸᤗᤥ. ᤜᤧᤰᤁᤩᤠᤱ ᤁᤳᤋᤢᤱᤒᤠ ᤋᤠᤓᤣ᤺ᤸᤗᤧᤀᤠᤱ ᤀᤠᤱᤃᤠ᤹ ᤌᤱ ᤁᤧᤏᤠ᤺ᤶᤒᤠ ᤔᤧᤈᤥ᤺ᤰᤁᤠᤸᤗᤥ॥ 7 ᤁᤖ ᤂᤧᤏᤧ᤹ᤏᤣ ᤀᤠᤏᤡᤃᤣ ᤏᤡᤱᤔᤡᤜᤠ᤹ ᤁᤧᤏᤠ᤺ᤶᤒᤠ ᤀᤠᤃᤧᤈᤥᤃᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤏᤠᤃᤧᤎᤠᤛᤢ ᤁᤧᤒᤡᤖᤢᤛᤡᤖᤥ॥ 8 ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤃᤧᤃ ᤛᤍᤠᤍᤡᤱ ᤁᤧᤏᤠᤖᤠ ᤑᤥᤛᤢᤶᤒᤧᤖᤥ. ᤜᤧᤰᤁᤩᤠᤱ ᤀᤠᤓᤧᤸᤗᤧᤛᤠᤱ ᤂᤧᤏᤧ᤹ ᤏᤢᤃᤧᤴ ᤐᤡᤀᤠᤛᤡᤃᤧᤖᤥ॥ ᤛᤣᤗᤠ 9 ᤁᤖ ᤀᤠᤸᤗᤥᤃ ᤂᤧᤏᤧ᤹ ᤕᤠᤵᤔᤡ ᤁᤧᤏᤠ᤹ᤖᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤜᤠᤖᤡ ᤋᤩᤧ᤹ᤀᤡᤃᤧᤖ ᤁᤧᤕᤠ᤺ᤴᤍᤢᤀᤠᤱ ᤘᤠ᤹ᤖᤥ. ᤀᤠᤏᤡᤃᤣ ᤌᤰᤛᤢᤒᤠᤜᤠ᤹ ᤌᤱ ᤆᤥ᤺ᤰᤔᤠ ᤁᤧᤶᤓᤠ᤹ᤖᤢᤴᤇᤡᤸᤗᤥ॥ 10 ᤏᤡᤱᤔᤡᤜᤠ᤹ᤏᤢ ᤌᤰᤋᤡᤃᤧᤸᤗᤧ ᤜᤠᤖᤡᤃᤧᤍᤠᤒᤠᤀᤠᤱ ᤁᤧᤄᤧᤳᤇᤡᤱᤒᤠ ᤕᤠᤵᤔᤡ ᤁᤧᤈᤥᤃᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠᤜᤠ᤹ᤖᤧ ᤌᤩᤠᤱᤎᤩᤠᤱ ᤔᤧᤏᤠᤵᤋᤡᤃᤧ ᤔᤧᤍᤣ᤹ᤖᤡᤃᤧᤀᤠᤱ ᤘᤠ᤹ᤖᤥ॥ 11 ᤔᤧᤸᤗᤢᤰ ᤁᤢᤀᤡᤛᤡᤰ ᤀᤠᤏᤡᤃᤣ ᤔᤧᤛᤧᤖᤡᤃᤧᤖ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤕᤠᤵᤔᤡ ᤁᤧᤒᤡᤖᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤜᤠ᤹ᤀᤥ ᤀᤠᤏᤡᤃᤣ ᤕᤠᤵᤔᤡ ᤜᤳᤇᤧ ᤁᤧᤛᤧᤛᤧᤀᤠᤱ ᤘᤠ᤹ᤖᤥ॥ 12 ᤀᤠᤒᤠᤅᤣ ᤁᤧᤔᤏᤠ ᤀᤠᤏᤡᤃᤧᤃ ᤛᤠ᤹ᤖᤡᤰ ᤛᤢ᤺ᤸᤗᤡᤰ ᤁᤢᤔᤧᤸᤗᤢᤱᤅᤥ ᤀᤠᤃ᤻ᤛᤱᤄᤧᤖᤥ. ᤂᤧ᤹ᤕᤥᤗᤠᤶᤒᤠ ᤌᤣᤀᤠᤱ ᤀᤡᤴᤎᤠ᤺ᤰ ᤁᤧᤱᤄᤥᤛᤢᤸᤗᤥ॥ 13 ᤀᤠᤏᤡᤃᤣ ᤐᤠᤱᤓᤣ᤹ᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤀᤠᤏᤡᤃᤣ ᤁᤢᤏᤠᤔᤧᤴᤇᤠ᤹ ᤕᤠᤵᤔᤡ ᤁᤧᤈᤥ᤺ᤰᤗᤥ. ᤀᤠᤏᤡᤃᤣ ᤂᤡᤷᤗᤡ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧᤀᤠᤱ ᤏᤠᤔᤧᤴᤇᤠ᤹ ᤔᤧᤔᤧᤳᤋᤡᤃᤧᤀᤠᤱ ᤔᤧᤀᤣ᤺ᤳᤗᤥ॥ 14 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤆᤧᤱᤔᤠᤗᤠᤶ ᤀᤠᤏᤡᤃᤣ ᤕᤠᤵᤔᤡ ᤁᤧᤈᤥᤃᤧᤀᤠᤱ ᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤀᤠᤏᤡᤃᤣ ᤔᤧᤏᤡᤛᤡᤃᤧᤀᤠᤱ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤡᤃᤧᤖ ᤂᤢᤴᤇᤡ᤹ ᤌᤧᤃᤣ᤺ᤰᤁᤡᤴ ᤋᤄᤢᤶᤋᤄᤢᤶ ᤔᤧᤔᤧᤳᤋᤢᤖᤥ॥ 15 ᤗᤧᤴᤍᤡᤰ ᤏᤠᤶᤎᤠᤎᤠ ᤀᤠᤈᤠ᤺ᤳᤌᤡ ᤐᤣ᤺ᤰᤔᤠ ᤏᤢ ᤏᤠᤔᤧᤴᤇᤠ᤹ ᤔᤧᤔᤧᤳᤋᤠᤒᤠ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤂᤧᤵᤛᤢᤱᤅᤠᤱ ᤀᤠᤏᤠᤎᤠᤎᤠ ᤗ᤹ᤖᤥ॥ 16 ᤀᤠᤓᤧᤸᤗᤧᤛᤠᤱ ᤁᤢᤏᤠᤔᤧᤴᤇᤠ᤹ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ ᤏᤢ ᤀᤠᤱᤃᤠ᤹ ᤁᤧᤈᤡ᤺ᤵᤐᤠᤜᤠ᤹ᤖᤧ ᤔᤧᤔᤧᤳᤋᤠᤒᤠ ᤂᤢᤏᤡ᤹ ᤏᤠᤔᤧᤴᤇᤠ᤹ ᤐᤠ᤺ᤴᤏᤡᤴ ᤂᤧᤶᤔᤠᤖᤧ ᤂᤧᤶᤔᤠᤖᤧ ᤀᤠᤱᤃᤠ᤹ ᤀᤠᤏᤠᤎᤩᤧᤀᤠᤱ ᤘᤠ᤹ᤖᤥ॥ 17 ᤀᤠᤏᤡᤃᤣ ᤂᤧᤏᤧ᤹ ᤏᤡᤱᤘᤠ᤹ᤔᤧᤶᤔᤢ᤺ᤴᤏᤣ ᤘᤕᤡᤃᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤏᤡᤃᤧᤏᤢ ᤁᤧᤈᤥᤃᤢᤒᤠ ᤔᤠᤱᤜᤢᤵᤐᤡᤴ ᤁᤧᤳᤋᤢᤶᤒᤧᤀᤠᤱ ᤘᤕᤡᤃᤧᤖᤥ. ᤜᤧᤰᤁᤣᤛᤠᤱ ᤁᤴ ᤁᤧᤖᤧᤰ ᤋᤢᤰᤂᤣᤜᤠ᤹ ᤋᤢᤔᤢᤶᤒᤧᤀᤠᤱ ᤘᤕᤡᤃᤧᤖᤥ॥ 18 ᤀᤠᤏᤡᤃᤣ ᤂᤧᤏᤧ᤹ ᤏᤡᤱᤘᤠ᤹ ᤀᤡ᤺ᤵᤔᤠ ᤔᤧᤴᤗᤧᤳᤋᤣ ᤘᤕᤡᤃᤧᤖᤥ. ᤁᤧᤗᤠᤶᤔᤡᤴ ᤗᤧᤖᤢᤶᤒᤧᤀᤠᤱ ᤘᤣ᤹ ᤗᤠᤶᤔᤥ ᤔᤧᤶᤒᤣ᤺ᤰᤁᤣ ᤘᤕᤡᤃᤧᤖᤥ॥ 19 ᤁᤖ ᤂᤧᤏᤧ᤹ ᤀᤠᤏᤡᤃᤣ ᤌᤧᤕᤢ᤺ᤳ ᤌᤧᤕᤢ᤺ᤳ ᤕᤠᤵᤔᤡ ᤁᤧᤕᤢ᤺ᤳᤋᤧᤀᤠᤱ ᤋᤠᤶᤓᤢᤱ ᤌᤰᤛᤠ ᤂᤠ ᤁᤢᤀᤡᤛᤡᤰ ᤕᤠᤵᤔᤡ ᤁᤧᤗᤧᤖᤧᤖᤥ. ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤂᤠᤔᤠᤰᤔᤥ ᤕᤠᤵᤔᤡ ᤗᤠᤵᤁᤧᤓᤢᤛᤧᤖᤥ॥ 20 ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤴ ᤏᤡᤱᤘᤠ᤹ᤑᤣ᤺ᤳᤇᤢᤶᤒᤧᤀᤠᤱ ᤘᤠ᤹ᤏᤧᤓᤃᤪ ᤀᤡᤃᤪ ᤘᤣ᤹ ᤔᤠᤱᤛᤠᤶᤔᤠᤱ ᤗᤧᤵᤔᤠᤱ ᤀᤠᤏᤡᤃᤣ ᤏᤡᤱᤘᤠ᤹ ᤐᤡᤖᤢᤶᤒᤧᤀᤠᤱ ᤘᤠ᤹ᤏᤧᤓᤃᤪ. 21 ᤛᤧᤰᤂᤠᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤂᤥᤛᤢᤒᤠ ᤘᤕᤧᤔᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ ᤛᤡᤃᤠᤱᤒᤠ ᤛᤡᤒᤡ᤹ ᤐᤠ᤺ᤴᤜᤠ᤹ ᤏᤡᤛᤢᤖᤥ॥ 22 ᤁᤖ ᤂᤧᤏᤧ᤹ ᤏᤛᤠᤴ ᤆᤥ᤺ᤰᤁᤠᤛᤡᤃᤧᤒᤠᤸᤗᤧ ᤗᤧᤴᤍᤡᤰ ᤂᤠᤖᤠᤰ ᤀᤠᤏᤡᤃᤧᤃ ᤛᤧᤵᤔᤠ ᤔᤧᤃᤥ᤺ᤳᤋᤡᤃᤧᤖᤥ. ᤛᤧᤵᤔᤠ ᤁᤧᤒᤥᤱᤒᤠ ᤔᤧᤸᤗᤢᤰ ᤜᤧᤰᤁᤣ ᤔᤧᤀᤡ᤺ᤳᤋᤡᤃᤧᤀᤠᤱ ᤘᤠ᤹ᤖᤥ॥ 23 ᤍᤠᤱᤒᤠᤀᤣ. ᤌᤣᤀᤠᤱ ᤂᤧᤏᤧ᤹ ᤛᤫᤠ᤺ᤳ ᤁᤧᤕᤢᤱᤒᤠᤒᤣ᥄ ᤐᤥᤃᤧ᤹ᤀᤥ. ᤛᤍᤠᤍᤡᤱᤗᤧ ᤗᤠᤃᤡ ᤗᤠᤵᤀᤠᤶᤓᤢᤛᤧᤴᤏᤧ᤹ᤀᤥ॥ 24 ᤌᤣᤀᤠᤱ ᤂᤧᤏᤧ᤹ ᤁᤧᤈᤡᤱᤛᤡᤱᤒᤠᤒᤣ᥄ ᤜᤧᤰᤁᤩᤠᤱ ᤀᤠᤏᤡᤃᤣ ᤋᤢᤰᤂᤣ ᤋᤢᤔᤡᤃᤧᤀᤠᤱ ᤏᤡᤱᤄᤧᤶᤔᤥ ᤌᤩᤧ᤹ᤀᤡᤃᤧᤸᤗᤧ ᤌᤣᤀᤠᤱ ᤔᤧᤴᤏᤡᤔᤏᤠ ᤁᤧᤗᤧᤱᤛᤡᤱᤒᤠᤒᤣ᥅ 25 ᤀᤠᤏᤡᤃᤧᤃ ᤂᤠᤶᤒᤠᤱᤅᤥ ᤆᤥ᤺ᤴᤍᤡᤃᤧᤀᤠᤱ ᤏᤧᤛ᤻ᤛᤡᤃᤧᤖᤥ. ᤜᤧᤰᤁᤩᤠᤱ ᤂᤠᤶᤜᤡ᤺ᤰᤁᤥ ᤋᤅᤡᤃᤧᤀᤠᤱ ᤘᤕᤡᤃᤧᤖᤥ॥ 26 ᤂᤧᤏᤧ᤹ ᤀᤠᤏᤡᤃᤣ ᤑᤠ᤹ᤛᤧ ᤕᤧ᤹ᤀᤥ᥄ ᤆᤰᤔᤧᤸᤗ᤹ᤀᤣ ᤀᤠᤏᤡᤃᤣ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤐᤠᤸᤗᤧ ᤆᤥᤃᤢᤸᤗᤧ ᤀᤠᤛᤧ᤺ᤵᤋᤧ᤹ᤀᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.