ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 42 - LIFOTNT

ᤁᤢᤗᤰ ᤏᤧᤳᤇᤡ ( ᤏᤡᤱ ᤛᤢᤶ ᥊᥈–᥍᥈ ) ᤔᤠ᤺ᤱᤄᤠᤒᤠ ᤔᤏᤠ᤺ᤸᤗᤧ ᤁᤢᤒᤣᤗᤡ

ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤔᤛ᤻ᤁᤡᤗ ᤔᤧᤵᤔᤏᤠᤒᤠ ᤁᤥᤖᤜᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ ᤛᤠᤶᤗᤥ

¹ ᤐᤧ᤺ᤱᤘᤠᤴ ᤘᤠᤔᤡᤔᤠᤸᤗᤧ ᤋᤖᤢᤸᤗᤧ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤌᤢᤅᤢᤱᤃᤥ ᤗ᤹ᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤣ ᤀᤠᤕᤠᤶᤛᤠᤶᤔᤡᤸᤗᤧ ᤂᤧᤏᤧ᤹ ᤀᤥᤔᤧᤵᤔᤠ ᤏᤢ ᤋᤢᤶᤔᤠ ᤛᤠ᤹ᤖᤡᤰᤁᤣ ᤏᤡᤱᤘᤠ᤹ ᤆᤥᤃᤢᤖᤥ॥

² ᤀᤠᤕᤠᤶᤛᤠᤶᤔᤡᤸᤗᤧ ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤥᤔᤧᤵᤔᤠ ᤏᤢ ᤋᤢᤶᤔᤠ ᤛᤠ᤹ᤖᤡᤰᤁᤣ ᤁᤢᤛᤡᤖᤠ᤹ ᤌᤠᤱᤗᤥ॥ ᤀᤠᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣ᤺ᤰᤔᤠᤀᤠᤱ ᤋᤢᤶᤔᤠ ᤛᤢᤰᤋᤢᤱᤒᤣ᥅

³ ᤀᤠᤱᤃᤠ᤹ ᤛᤧᤴᤍᤡᤰ ᤗᤧᤴᤍᤡᤰ ᤜᤠ᤺ᤵᤐᤠᤖᤥ. ᤀᤠᤱᤃᤠ᤹ ᤆᤠᤔᤠ ᤌᤢᤱᤔᤠᤀᤠᤱ ᤔᤧᤛᤢᤰᤁᤠᤸᤗᤥ. ᤜᤧᤰᤁᤩᤠᤱ ᤀᤠᤏᤡᤱᤔᤡᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤀᤰᤂᤣ ᤔᤧᤔᤧᤳᤋᤠᤖᤥ. “ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤳᤋᤥ ᤘᤠ᤹ᤒᤣ᥅”

⁴ ᤀᤢᤴᤇᤣ᤺ᤶᤒᤠ ᤐᤠ᤺ᤴᤜᤠ᤹ ᤀᤡ᤺ᤳᤋᤢᤱᤅᤡᤸᤗᤧ ᤀᤠᤗᤢᤱᤔᤠ᤹ ᤜᤡ᤺ᤶᤗᤥ. ᤁᤧᤒᤣ᤺ᤰᤐᤠ ᤕᤧᤶᤜᤠ᤹ᤀᤥ ᤔᤏᤠᤜᤠ᤹ᤏᤢ ᤋᤱᤛᤡᤱᤅᤠᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤃᤡᤋᤃᤡ ᤗᤠᤶᤗᤥᤛᤢᤱᤛᤡᤱᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤐᤣᤃᤠᤱᤗᤥ. ᤁᤢᤏᤡᤱᤘᤠ᤹ ᤁᤧᤍᤠᤒᤠ ᤔᤏᤠᤜᤠ᤹ᤏᤢ ᤛᤥᤖᤡᤰ ᤛᤠᤶᤗᤥᤖᤡᤃᤧᤖ ᤀ᤺ᤰᤋᤡᤃᤧᤖ ᤘᤕᤡᤃᤧᤖᤥ॥

⁵ ᤌᤣᤀᤠᤱ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤋᤠ᤹ᤈᤧᤱᤒᤠᤒᤣ᥅ ᤀᤠᤱᤃᤠ᤹ ᤌᤣᤀᤠᤱ ᤀᤰᤂᤣᤗ᤹ᤖᤡᤰ ᤀᤠᤛᤰᤔᤠ ᤜᤡ᤺ᤰᤜᤡ᤺ᤰ ᤗ᤹ᤒᤠᤒᤣ᥅ ᤀᤠᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤥᤔᤧᤳᤋᤢᤱᤗᤥ. ᤜᤧᤰᤁᤩᤠᤱ ᤕᤠᤶᤔᤥᤀᤠᤱ ᤀᤠᤛᤧᤴᤗᤵᤍᤠᤱᤒᤠ ᤏᤢ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤑᤥᤛᤢᤱᤗᤥ॥

⁶ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ᥄ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤋᤠ᤹ᤈᤧᤰᤂᤧᤀᤠᤱ ᤘᤠ᤹ᤖᤥ॥ ᤁᤖ ᤕᤷᤍᤏ ᤕᤱᤄᤱᤒᤠ ᤗᤠᤈᤣ᤹ᤗᤠᤶᤒᤠ ᤜᤧᤰᤁᤩᤠᤱ ᤜᤷᤔᤥᤏ ᤏᤢ ᤔᤡᤛᤠᤖ ᤁᤥ᤺ᤰᤔᤠᤗᤠᤶᤒᤠ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤏᤧᤖᤥ॥

⁷ ᤁᤧᤘᤠᤎᤠ᤺ᤶᤗᤠᤶᤒᤠ ᤁᤧᤗ᤺ᤶᤒᤠ ᤀᤡᤰᤗᤠᤀᤥ ᤘᤖ᤺ᤱᤅᤡᤸᤗᤧ ᤘᤖ᤺ᤱᤅᤡᤴ ᤔᤡᤱ ᤗᤥ᤺ᤰᤂᤢᤖᤥ. ᤜᤧᤰᤁᤩᤠᤱ ᤁᤠᤰ ᤘᤠᤓᤧᤸᤗᤧᤱᤅᤡᤴ ᤏᤢ ᤁᤢᤒᤢ᤺ᤳᤌᤢᤱᤘᤠ᤺ᤸᤗᤧ ᤋᤧᤵᤋᤠᤱᤅᤠᤱ ᤘᤠ᤹ᤀᤠᤖᤥ॥

⁸ ᤕᤜᤘᤣ ᤍᤠᤱᤒᤧᤸᤗᤧ ᤌᤡᤰᤕᤠ᤺ᤴᤎᤰ ᤀᤠᤓᤧᤸᤗᤧᤀᤠᤱ ᤔᤧᤶᤒᤢ᤹ᤀᤣ ᤗᤢᤱᤔᤠ᤹ ᤋᤢᤰᤁᤠᤖᤥ॥ ᤜᤧᤰᤁᤩᤠᤱ ᤛᤧᤴᤍᤡᤰ ᤌᤵᤔᤣ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤛᤠᤶᤗᤥᤴ ᤛᤠᤶᤔᤧᤳᤋᤢᤱᤗᤥ. ᤀᤠᤱᤃᤠ᤹ ᤜᤡᤱᤔᤴ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤢᤘᤠ ᤆᤥ᤺ᤰᤁᤠᤖᤥ॥

⁹ ᤀᤠᤱᤃᤠ᤹ ᤀᤠᤕᤠᤰᤐᤣ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣ ᤔᤧᤳᤋᤢᤱᤅᤠᤱ ᤐᤳᤋᤠᤖᤥ. “ᤌᤣᤀᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤓᤣ᤺ᤳᤇᤠᤱᤒᤠᤒᤣ᥅ ᤌᤣᤀᤠᤱ ᤀᤠᤏᤡᤱᤔᤡᤜᤠ᤹ᤖᤧ ᤋᤢᤰᤂᤣ ᤔᤧᤈᤠ᤺ᤳᤋᤠᤖ ᤁᤧᤛᤠᤰᤐᤠ ᤋᤢᤔᤢᤱᤅᤠᤱ ᤘᤠ᤹ᤒᤠᤒᤣ᤹᥅”

¹⁰ ᤀᤠᤏᤡᤱᤔᤡᤜᤠ᤹ᤖᤧ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤳᤋᤥ ᤘᤠ᤹ᤒᤣ᥅ ᤗ᤹ᤖᤡᤰ ᤏᤠᤶᤎᤠᤎᤠ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ᤃ ᤂᤧᤱᤜᤠ᤹ᤖᤧ ᤀᤠᤏᤠᤔᤧᤎᤠᤛᤢᤀᤠᤱ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹ᤀᤠᤖᤥ॥

¹¹ ᤌᤣᤀᤠᤱ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤋᤠ᤹ᤈᤧᤱᤒᤠᤒᤣ᥅ ᤀᤠᤱᤃᤠ᤹ ᤌᤣᤀᤠᤱ ᤀᤰᤂᤣᤗ᤹ᤖᤡᤰ ᤀᤠᤛᤰᤔᤠ ᤜᤡ᤺ᤰᤜᤡ᤺ᤰ ᤗ᤹ᤒᤠᤒᤣ᥅ ᤀᤠᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤥᤔᤧᤳᤋᤢᤱᤗᤥ॥ ᤜᤧᤰᤁᤩᤠᤱ ᤕᤠᤶᤔᤥᤀᤠᤱ ᤀᤠᤛᤧᤴᤗᤵᤍᤠᤱᤒᤠ ᤏᤢ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤑᤥᤛᤢᤱᤗᤥ॥