ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 41 - LIFOTNT

ᤁᤧᤍᤢᤰᤐᤠ ᤔᤏᤠ᤺ᤸᤗᤧ ᤑᤠᤰᤋᤢᤒᤠ ᤐᤣᤗᤡ

ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤋᤢᤰᤂᤣᤀᤥ ᤔᤧᤎᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤛᤧ᤺ᤵᤋᤢᤛᤡᤖᤥ॥

² ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤛᤧ᤺ᤵᤋᤢᤛᤡᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤜᤡᤱᤄᤢᤛᤡᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤂᤧᤱᤜᤠ᤹ ᤂᤢᤏᤧ᤹ ᤔᤧᤏᤢ᤹ᤔᤧᤍᤠᤖ ᤕᤠ᤺ᤴᤍᤢᤛᤡᤖᤥ. ᤜᤧᤰᤁᤩᤠᤱ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤂᤧᤱᤜᤠ᤹ ᤌᤠᤔᤠ ᤔᤧᤒᤠᤱᤄᤢᤛᤡᤴᤗᤥ॥

³ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤔᤧᤍᤢᤰ ᤔᤧᤗᤠ᤺ᤰᤁᤡᤸᤗᤧ ᤀᤥᤔᤧᤳᤋᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤘᤣ᤺ᤴᤍᤢᤛᤡᤖᤥ॥

⁴ ᤀᤠᤱᤃᤠ᤹ ᤐᤠ᤺ᤳᤋᤢᤱ. “ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤘᤣ᤺ᤴᤍᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤧᤛᤡᤖᤠ᤹ ᤔᤧᤴᤎᤠᤱᤔᤏᤠ ᤗᤠᤕᤥᤒᤠ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥”

⁵ ᤀᤠᤏᤡᤱᤔᤡᤜᤠ᤹ᤖᤧ ᤀᤠᤱᤃᤠ᤹ ᤔᤧᤈᤡ᤺ᤳᤋᤠᤖᤥ. ᤜᤧᤰᤁᤩᤠᤱ ᤀᤰᤂᤣ ᤔᤧᤗ᤹ᤖᤥ “ᤂᤧᤴ ᤀᤠᤓᤧᤸᤗᤧ ᤛᤡᤀᤠᤱ ᤁᤢᤔᤡᤱ ᤔᤠᤒᤣ᥅”

⁶ ᤀᤠᤛᤠ᤹ᤛᤧ ᤁᤧᤍᤠᤒᤠᤜᤠ᤹ ᤏᤢᤒᤠ ᤏᤡᤱᤘᤠ᤹ᤀᤥ ᤔᤧᤴᤍᤠᤏᤧᤸᤗᤥ. ᤂᤧᤱᤜᤠ᤹ ᤀᤠᤳᤋᤡ ᤔᤧᤒᤣ᤺ᤰᤛᤠᤱ ᤀᤠᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤆᤧ᤹ᤕᤠᤖᤰ ᤔᤧᤒᤠ᤺ᤳᤗᤥ॥

⁷ ᤀᤠᤱᤃᤠ᤹ ᤁᤧᤈᤡ᤺ᤵᤐᤠᤜᤠ᤹ ᤛᤥᤖᤡᤰ ᤔᤧᤈᤢᤶᤔᤠᤱ ᤂᤢᤛᤢᤰ ᤂᤢᤛᤢᤰ ᤔᤧᤈᤧᤱᤅᤠᤖᤥ॥ ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤔᤧᤀᤡ᤺ᤳᤋᤠᤖᤥ.

⁸ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤂᤧᤱᤃ ᤀᤠᤵᤑᤠᤸᤗᤧᤀᤠᤱ ᤔᤧᤴᤘᤣ᤺ᤵᤔᤏᤠᤒᤠ ᤋᤢᤰᤔᤠᤸᤗᤧ ᤕᤠᤱᤄᤢᤀᤠᤱ ᤘᤠ᤹ᤖᤥ. ᤂᤧᤴ ᤀᤠᤵᤑᤠᤸᤗᤧᤀᤠᤱ ᤐᤥ᤺ᤰᤔᤠ ᤔᤧᤛᤢᤰᤏᤧᤸᤗᤥ॥”

⁹ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤕᤢᤰᤂᤢᤱᤒᤠ ᤁᤧᤍᤱᤒᤠ ᤀᤠᤱᤃᤠ᤹ᤏᤢ ᤛᤥᤖᤡᤰ ᤆᤠ ᤁᤧᤈᤠᤒᤠ ᤀᤠᤴᤈᤢᤶᤔᤡᤴᤏᤠᤱ ᤀᤠᤍᤰᤗᤧᤱᤘᤠᤀᤥ ᤐᤥᤃᤧᤀᤠᤱ ᤘᤠ᤹ᤖᤥ॥

¹⁰ ᤁᤖ ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤱᤔᤡᤜᤠ᤹ᤖᤧ ᤔᤧᤔᤧᤳᤋᤠᤱᤒᤠᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤔᤠ ᤛᤢᤰᤋᤢᤱᤗ ᤑᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤠᤱ ᤘᤣ᤺ᤴᤍᤠᤱᤅᤧ᤹ᤀᤥ॥

¹¹ ᤂᤧᤱᤜᤠ᤹ᤖᤧ ᤏᤠ᤺ᤶᤔᤠ ᤔᤧᤴᤇᤢᤰᤁᤠᤴᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ᤏᤢ ᤁᤧᤛ᤺ᤳᤋᤧᤀᤠᤱ ᤁᤧᤘᤠ᤹ᤒᤠᤴ ᤏᤡᤱᤘᤠ᤹ ᤂᤥᤛᤢᤱᤗᤥ॥

¹² ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤆᤥ᤺ᤰᤁᤠᤒᤠᤸᤗᤧ ᤁᤧᤓᤠ᤹ᤀᤠᤖᤥ. ᤜᤧᤰᤁᤩᤠᤱ ᤁᤧᤘᤠ᤹ᤔᤠᤍᤧᤴᤏᤥ ᤛᤍᤠᤍᤡᤱ ᤁᤧᤃᤳᤋᤠᤖᤥ॥

¹³ ᤀᤡᤛᤪᤠᤀᤡᤗᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤸᤗᤥ ᤏᤢ ᤛᤍᤠᤍᤡᤱ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ॥ ᤀᤠᤔᤡᤴ᥄ ᤀᤠᤔᤡᤴ᥄᥄