ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 40 - LIFOTNT

ᤁᤢᤓᤠ᤹ᤖᤧ ᤗᤠᤃᤡ ᤐᤣᤗᤡ ᤑᤠᤰᤔᤠ

ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤏᤠᤛᤡ ᤌ᤺ᤳᤋᤢᤱᤅᤠᤱ ᤕᤜᤘᤣ ᤍᤠᤱᤒᤠᤴ ᤜᤠᤱᤄᤢᤱᤗᤥ. ᤀᤠᤱᤃᤠ᤹ ᤑᤠ᤹ᤖᤠᤱᤅᤧ᤹ ᤑᤠ᤹ᤀᤠᤱ ᤀ᤺ᤰᤋᤠᤱᤅᤡᤸᤗᤧ ᤂᤢᤏᤧ᤹ ᤜᤡᤛᤡᤱᤅᤠᤱ ᤑᤠ᤹ᤖᤠᤱᤗᤥ॥

² ᤂᤢᤏᤧ᤹ᤃ ᤁᤡᤵᤔᤠ ᤁᤧᤄᤢᤒᤠ ᤗᤢᤶᤒᤠ᤺ᤳᤋᤥᤗᤠᤶ ᤜᤧᤰᤁᤩᤠᤱ ᤀᤠᤜᤢᤶᤜᤢᤶᤒᤠ ᤘᤠᤈᤡᤶᤒᤣᤗᤠᤶᤒᤠ ᤗ᤺ᤳᤋᤠᤱᤗᤥ॥ ᤂᤢᤏᤧ᤹ᤃ ᤀᤠᤱᤃᤠ᤹ ᤕᤶᤒᤠ ᤗᤢᤱ ᤛᤶᤎᤠᤱ ᤋᤣ᤹ᤖᤠᤱᤗᤥ ᤜᤧᤰᤁᤩᤠᤱ ᤌᤣᤀᤠᤱ ᤔᤧᤸᤗ᤹ᤀᤣ ᤕᤧᤵᤛᤠᤱᤗᤥ॥

³ ᤂᤢᤏᤧ᤹ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤔᤠ ᤁᤢᤛᤱ ᤛᤠᤶᤗᤥᤎᤡᤰ ᤛᤠᤶᤔᤧᤵᤔᤠ ᤜᤢ᤹ᤖᤠᤱᤗᤥ. ᤕᤖᤡᤰ ᤔᤏᤠᤜᤠ᤹ᤖᤧ ᤁᤴ ᤔᤧᤏᤡᤛᤢᤀᤠᤱ ᤕᤜᤘᤣ ᤍᤠᤱᤒᤠᤴ ᤁᤢᤏᤠᤔᤧᤛᤠ᤹ᤖᤢᤖᤥ ᤜᤧᤰᤁᤩᤠᤱ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤖᤥ॥

⁴ ᤕᤜᤘᤣ ᤍᤠᤱᤒᤠᤴ ᤁᤢᤏᤠᤃᤧᤛᤠ᤹ᤒᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ. ᤂᤧᤱᤜᤠ᤹ᤖᤧ ᤁᤧᤜᤧᤴᤇᤡᤱᤒᤠᤜᤠ᤹ ᤀᤠᤓᤠ᤹ᤖᤧ ᤔᤧᤶᤔᤧᤳᤋᤢᤴᤇᤡᤸᤗᤥ. ᤜᤧᤰᤁᤩᤠᤱ ᤏᤠᤘᤠᤀᤡᤳᤜᤠ᤹ ᤗᤧᤵᤔᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤔᤧᤶᤒᤡᤖᤢᤴᤗᤥ॥

⁵ ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤃᤣ ᤗᤠᤃᤡ ᤁᤧᤈᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤕᤖᤡᤰ ᤘᤠ᤹ᤖᤥ. ᤂᤧᤏᤧ᤹ ᤜᤧᤰᤋᤱᤒᤠ ᤜᤠ᤺ᤳᤋᤠᤱ ᤜᤥᤵᤗᤥ॥ ᤜᤧᤰᤁᤩᤠᤱ ᤀᤠᤏᤡᤃᤣ ᤗᤠᤃᤡ ᤕᤖᤡᤰ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤠ᤺ᤵᤔᤠ ᤔᤧᤛᤢᤰᤁᤠᤸᤗᤥ॥

⁶ ᤛᤡᤍᤢᤱᤈᤓᤠ ᤏᤢ ᤗᤧᤳᤋᤡ ᤋᤠ᤺ᤰᤔᤠ ᤁᤧᤛᤡᤖᤠ᤹ ᤔᤧᤎᤠᤅᤧᤸᤗᤥ. ᤁᤖ ᤀᤠᤸᤗ ᤁᤧᤒᤠᤴ ᤁᤧᤄᤧᤶᤒᤠ ᤁᤧᤈᤥᤃᤠᤱᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤀᤡᤃᤪ ᤗᤠᤕᤥᤖᤧ ᤗᤠᤃᤡ ᤋᤥ᤺ᤶᤔᤏᤠᤒᤠ ᤗᤧᤳᤋᤡ ᤆᤠᤜᤠᤒ᤻ ᤁᤧᤴᤈᤥ᤺ᤰᤏᤧᤸᤗᤥ॥

⁷ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤐᤠ᤺ᤳᤋᤢᤱᤗᤥ. “ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤋᤩᤠᤱᤅᤠᤱ ᤘᤠ᤹ᤀᤠᤖᤥ. ᤁᤧᤛᤠᤶᤕᤥᤌᤡᤶ ᤛᤠᤵᤐᤴᤏᤥ ᤁᤧᤒᤵᤐᤠ ᤐᤠ᤺ᤴᤏᤡᤱᤃ ᤀᤠᤱᤃᤠ᤹ᤀᤣᤖᤥ—

⁸ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤁᤧᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤀᤠᤱᤃᤠ᤹ ᤀᤠᤛᤡᤖᤠ᤹ ᤌᤠᤱᤗᤥ॥ ᤌᤣᤀᤠᤱᤓᤧᤸᤗᤧ ᤁᤧᤛᤠᤶᤕᤥᤌᤡᤶᤔᤡᤴ ᤀᤠᤛᤡᤰᤗᤢᤱᤔᤥ ᤘᤠ᤹ᤖᤥ॥”

⁹ ᤀᤠᤱᤃᤠ᤹ ᤁᤧᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤀᤠᤏᤡᤃᤣ ᤕᤠᤵᤔᤡ ᤛᤧᤴᤗᤵ ᤁᤧᤒᤡ ᤑᤠ᤹ᤀᤠᤱ ᤐᤠ᤺ᤳᤋᤢᤱᤗᤥ॥ ᤕᤜᤘᤣ ᤍᤠᤱᤒᤠᤀᤣ. ᤁᤴ ᤐᤠ᤺ᤴᤏᤡᤴ ᤐᤠ᤺ᤵᤔᤠ ᤀᤠᤱᤃᤠ᤹ ᤔᤧᤗᤧᤳᤋᤠᤴ ᤁᤧᤗ᤹ᤒᤠᤴ ᤂᤧᤏᤧ᤹ ᤁᤧᤏᤡᤛᤢᤖᤥ॥

¹⁰ ᤂᤧᤏᤧ᤹ ᤕᤠᤵᤔᤡ ᤛᤧᤴᤗᤵ ᤁᤧᤒᤡᤒᤠ ᤛᤢᤏᤠᤀᤡᤱᤅᤡᤴ ᤔᤏᤠᤜᤠ᤹ ᤔᤧᤶᤔᤧᤳᤇᤡᤱᤅᤣ ᤛᤫᤠ᤺ᤳ ᤔᤧᤕᤢᤱᤅᤠᤴᤗᤥ॥ ᤀᤠᤱᤃᤠ᤹ᤃ ᤂᤧᤏᤧ᤹ ᤏᤛᤠ᤺ᤴᤛᤠᤒᤠ ᤏᤢ ᤛᤧᤴᤗᤵᤍᤠᤱᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤏᤡᤴ ᤐᤠ᤺ᤳᤋᤢᤱᤗᤥ॥ ᤜᤧᤰᤁᤩᤠᤱ ᤌᤎᤵ ᤔᤧᤸᤗ᤹ᤔᤏᤠᤒᤠ ᤁᤧᤔᤡ᤺ᤶᤈᤡᤴ ᤏᤢ ᤂᤧᤏᤧ᤹ ᤛᤧᤰᤂᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤏᤡᤴ ᤁᤧᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤐᤠ᤺ᤳᤋᤢᤱᤗᤥ॥

¹¹ ᤕᤜᤘᤣ ᤍᤠᤱᤒᤠᤀᤣ. ᤗᤢᤱᤔᤠ᤹ ᤋᤢᤰᤔᤠ ᤔᤧᤗᤧᤖᤠᤱᤅᤡᤴᤏᤧ᤹ᤀᤥ. ᤌᤎᤵ ᤔᤧᤸᤗ᤹ᤔᤏᤠᤒᤠ ᤔᤡ᤺ᤶᤈᤡ ᤏᤢ ᤁᤧᤛᤧᤰᤂᤠ᤺ᤸᤗᤧ ᤀᤠᤓᤧᤸᤗᤧᤛᤠᤱ ᤛᤧ᤺ᤵᤐᤠᤖᤥ॥

ᤁᤢᤓᤠ᤹ᤖᤧ ᤗᤠᤃᤡ ᤐᤣᤗᤡ ᤑᤠᤰᤔᤠ

¹² ᤌᤣᤀᤠᤱᤓᤧᤸᤗᤧ ᤏᤡ᤺ᤵᤔᤧᤶᤍᤧᤵᤔᤏᤠᤒᤠ ᤕᤖᤡᤰ ᤋᤢᤰᤂᤣᤗᤠᤰᤂᤣᤀᤥ ᤌᤩᤠᤱᤅᤠᤱ ᤘᤠ᤹ᤀᤠᤖᤥ. ᤂᤠᤏᤡᤔᤠᤀᤣ ᤔᤧᤴᤇᤢᤰᤔᤏᤠ ᤐᤥ᤺ᤰᤂᤠᤱᤗ ᤌᤠᤖᤡᤰ ᤗᤠᤕᤥᤖᤧ ᤔᤧᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤗᤠᤕᤥᤜᤠ᤹ᤃ ᤀᤠᤎ᤻ᤃᤣᤰ ᤀᤡᤏᤢ᤺ᤸᤗᤧᤀᤠᤱ ᤕᤖᤡᤰ ᤘᤠ᤹ᤖᤥ. ᤀᤠᤱᤃᤠ᤹ ᤀᤠᤛᤰᤔᤠ ᤐᤢ᤹ᤖᤧᤀᤠᤱ ᤘᤠ᤹ᤖᤥ॥

¹³ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ. ᤕᤜᤘᤣ ᤍᤠᤱᤒᤠᤀᤣ. ᤜᤠᤖᤠ ᤀᤠᤱᤃᤠ᤹ ᤑᤠ᤹ᤖᤠᤱᤅᤧ᤹ᤀᤥ॥

¹⁴ ᤀᤠᤱᤃᤠ᤹ ᤛᤧᤵᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤜᤠ᤹ ᤛᤡᤖᤡᤱᤔᤔᤥ ᤔᤧᤎᤠᤀᤠᤱ ᤔᤧᤏᤠᤰᤗᤖᤥ॥ ᤀᤠᤱᤃᤠ᤹ ᤔᤧᤱᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤏᤠᤎᤠᤀᤠᤱ ᤔᤧᤏᤢ᤺ᤱ ᤔᤧᤒᤣ᤺ᤰᤗᤖᤥ॥

¹⁵ ᤀᤠᤱᤃᤠ᤹ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤠᤜᤠ᤹ ᤛᤡᤖᤡᤱᤔᤔᤠᤸᤗᤧ ᤐ᤹ᤕᤠ᤺ᤰ ᤋᤖᤢᤛᤡᤖᤖᤥ॥

¹⁶ ᤁᤖ ᤂᤧᤏᤧ᤹ᤀᤥ ᤁᤧᤍᤠᤒᤠᤜᤠ᤹ ᤁᤧᤖᤧᤰ ᤔᤧᤛ᤺ᤳᤗᤖᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤖᤖᤥ॥ ᤂᤧᤱᤜᤠ᤹ ᤁᤧᤛᤧ᤺ᤵᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤏᤢᤃᤧᤴ ᤁᤧᤶᤒᤡᤖ ᤀᤠᤓᤧᤸᤗᤧᤛᤠᤱ ᤔᤧᤀ᤺ᤰᤗᤖᤥ॥

¹⁷ ᤁᤖ ᤀᤠᤱᤃᤠ᤹ᤃ ᤋᤢᤰᤂᤣ ᤁᤧᤈᤠᤒᤠ ᤏᤢ ᤀᤠᤱᤃᤠ᤹ ᤕᤠᤱᤃᤧᤛᤠ᤹ᤒᤠ ᤆᤥ᤺ᤰᤁᤠᤖᤥ. ᤕᤜᤘᤣ ᤍᤠᤱᤒᤣ. ᤏᤡᤱᤘᤠ᤹ ᤔᤧᤓᤣ᤺ᤳᤇᤠᤱᤅᤡᤴᤏᤧ᤹ᤀᤥ॥ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ᤃ ᤀᤠᤱᤃᤠ᤹ ᤁᤧᤓᤠ᤹ᤒᤠ ᤏᤢ ᤛᤧᤴᤗᤵ ᤁᤧᤒᤡᤒᤠᤏᤧᤖᤥ. ᤂᤧᤏᤧ᤹ ᤀᤠᤱᤃᤠ᤹ ᤜᤠᤖᤠ ᤑᤠ᤹ᤖᤠᤱᤅᤧ᤹ᤀᤥ॥