ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 39 - LIFOTNT

ᤋᤢᤰᤂᤣ ᤁᤧᤈᤠᤒᤠ ᤔᤏᤠ᤺ᤸᤗᤧ ᤁᤢᤒᤣᤗᤡ

ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ. ᤕᤍᤢᤌᤢᤴᤗᤧ ᤁᤢᤗᤠᤃᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤀᤠᤱᤃᤠ᤹ ᤐᤠ᤺ᤳᤋᤢᤱ. “ᤀᤠᤱᤃᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤕᤠ᤺ᤶᤒᤰ ᤆᤥ᤺ᤰᤁᤠᤖᤥ. ᤜᤧᤰᤁᤩᤠᤱ ᤐᤠ᤺ᤳᤋᤢᤱᤒᤠ ᤐᤠ᤺ᤴᤗᤠᤶ ᤗᤠᤕᤥ ᤔᤧᤈᤥ᤺ᤰᤁᤠᤸᤗᤥ॥ ᤋᤠᤰᤁᤧᤓᤧ᤹ᤒᤠᤜᤠ᤹ ᤀᤠᤍᤃᤡ ᤔᤧᤕᤢᤱᤗ ᤌᤠᤖᤡᤰ ᤀᤠᤱᤃᤠ᤹ ᤀᤠᤶᤒᤪᤠ ᤔᤧᤓᤠ᤺ᤱᤅᤠᤸᤗᤥ॥”

² ᤁᤖ ᤀᤠᤱᤃᤠ᤹ ᤔᤧᤶᤒᤠ᤺ᤳᤋᤣ ᤛᤫᤠ᤺ᤳ ᤕᤢᤅᤠᤱᤗᤥ. ᤜᤧᤰᤁᤩᤠᤱ ᤏᤢᤒᤠ ᤐᤠ᤺ᤴᤏᤠᤱ ᤔᤧᤶᤒᤠ᤺ᤳᤋᤣ ᤕᤢᤅᤠᤱᤗᤥ. ᤜᤧᤰᤁᤣᤛᤠᤱ ᤀᤠᤍᤢᤰᤂᤣᤴ ᤕᤖᤡᤰ ᤐᤥᤖᤧᤖ ᤐᤣᤖᤥ॥

³ ᤜᤧᤰᤁᤩᤠᤱ ᤀᤠᤛᤡᤰ ᤐᤥᤃᤧᤌᤠᤅᤧᤖᤥ. ᤀᤠᤰᤂᤧᤴ ᤔᤧᤶᤒᤠ᤺ᤳᤋᤣ ᤕᤢᤱᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ ᤜᤧᤰᤁᤣᤛᤠᤱ ᤌ᤺ᤵᤔᤠ ᤔᤧᤴᤇᤢᤰᤐᤠᤀᤠᤱ ᤐᤠᤖᤠᤱᤗᤥ॥

⁴ “ᤕᤜᤘᤣ ᤍᤠᤱᤒᤠᤀᤣ. ᤀᤠᤵᤑᤠᤸᤗᤧ ᤌᤠᤖᤡᤰ ᤜᤡᤱᤅᤠᤒᤣ᥅ ᤜᤧᤰᤁᤩᤠᤱ ᤀᤠᤵᤑᤠᤸᤗᤧ ᤛᤡᤀᤠᤒᤣ᥅ ᤂᤧᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹ᤀᤥ॥

⁵ “ᤂᤧᤏᤧ᤹ᤃ ᤀᤠᤎᤠᤰ ᤛ᤹ᤖᤧᤖ ᤁᤧᤕᤠ᤺ᤴᤍᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤎᤠ᤺ᤰᤁᤡᤱᤃ ᤁᤧᤍᤃᤡ ᤌᤣᤀᤠᤱ ᤔᤣ᤺ᤴᤗᤥ॥ ᤔᤧᤴᤇᤠᤶ ᤕᤠᤵᤔᤡᤖᤧ ᤌᤠ᤺ᤰᤁᤡᤱᤃ ᤌᤡᤰᤗᤧᤱ ᤛᤰᤔᤠ ᤛᤥ᤺ᤶᤔᤏᤠᤒᤠ ᤌᤣᤛᤡᤱᤗᤰᤗᤥ॥ ᤛᤣᤗᤠ

⁶ ᤔᤧᤴᤇᤠᤶ ᤕᤠᤵᤔᤡᤖᤧ ᤌᤠ᤺ᤰᤁᤡᤱᤃ ᤛᤠᤶᤔᤪᤡ᤺ᤵᤐᤠ ᤁᤢᤀᤡᤛᤡ᤺ᤰᤗᤰ ᤘᤠ᤹ᤃᤳᤗᤥ. ᤂᤧᤸᤗᤧ ᤆᤥᤃᤢᤒᤠ ᤐᤠ᤺ᤴᤜᤠ᤹ᤃ ᤌᤣᤏᤠᤎᤣᤖᤰᤗᤥ. ᤂᤧᤸᤗᤧ ᤗᤢᤵᤛᤢᤒᤠ ᤕᤠᤱᤛᤠᤁᤢᤴᤎᤣᤴ ᤜᤠ᤺ᤳᤗᤧ ᤂᤥᤛᤢᤀᤡ ᤂᤧᤸᤗᤧ ᤔᤧᤏᤡᤛᤢᤴᤗᤥ॥

⁷ “ᤀᤠᤸᤗ. ᤕᤜᤘᤣ ᤍᤠᤱᤒᤠᤀᤣ. ᤌᤧᤔᤠ᤺ᤴ ᤜᤠᤱᤄᤢᤱᤒᤠᤒᤣ᥅ ᤀᤠᤱᤃᤠ᤹ᤃ ᤂᤧᤏᤧ᤹ᤖᤰ ᤏᤡᤱᤛᤠᤱ ᤆᤥ᤺ᤰᤏᤧᤖᤥ॥

⁸ ᤀᤠᤗᤠᤕᤥᤜᤠ᤹ᤗᤠᤶᤒᤠ ᤛᤧ᤺ᤵᤋᤠᤱᤅᤧ᤹ᤀᤥ. ᤀᤍᤱᤜᤠ᤹ᤖᤧ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤔᤧᤱᤄᤥᤀᤠᤴᤗᤖᤥ॥

⁹ ᤀᤠᤱᤃᤠ᤹ ᤛᤫᤠ᤺ᤳ ᤕᤢᤱᤅᤠ. ᤌᤣᤀᤠᤱ ᤔᤧᤒᤠ᤺ᤳᤋᤠᤸᤗᤥ ᤌᤣᤀᤠᤱᤓᤧᤸᤗᤧ ᤀᤰᤂᤣ ᤐᤥᤱᤗ ᤁᤧᤕᤠ᤺ᤶᤒᤧᤱᤃ ᤂᤧᤏᤧ᤹ᤀᤣᤖᤥ॥

¹⁰ ᤀᤠᤸᤗ ᤕᤠᤶᤔᤥ ᤂᤢᤶᤍᤡᤱ ᤔᤧᤒᤡᤖᤠᤱᤅᤡᤴᤏᤧ᤹ᤀᤥ. ᤀᤠᤱᤃᤠ᤹ᤀᤥ ᤁᤧᤍᤠᤖᤢᤒᤠ ᤋᤢᤰᤂᤣ᤺ᤸᤗᤧ ᤀᤠᤱᤃᤠ᤹ ᤛᤡᤔᤠᤗᤡᤱᤎᤥ ᤁᤧᤖᤠᤱᤅᤠᤱ ᤘᤠ᤹ᤀᤠᤖᤥ॥

¹¹ ᤂᤧᤏᤧ᤹ᤃ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤁᤧᤓᤧ᤺ᤰᤋᤢᤛᤡᤀᤠᤱ ᤁᤧᤄᤢᤶᤛᤢᤛᤡᤖᤥ. ᤁᤢᤒᤢ᤺ᤸᤗᤧ ᤆᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤔᤧᤰᤂᤢ ᤁᤧᤒᤡᤖᤢᤛᤡᤖᤥ॥ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤃ ᤌᤡᤰᤗᤧᤱ ᤛᤰᤔᤠ ᤛᤥ᤺ᤶᤔᤏᤠᤒᤠ ᤁᤢᤀᤡᤛᤡ᤺ᤰᤗᤰ ᤔᤧᤈᤥᤰᤗᤥ॥ ᤛᤣᤗᤠ

¹² “ᤕᤜᤘᤣ ᤍᤠᤱᤒᤠᤀᤣ. ᤀᤠᤒᤣᤗᤡᤴ ᤂᤧᤵᤛᤧ᤹ᤀᤥ. ᤑᤠ᤹ᤖᤠᤱᤅᤧ᤹ ᤑᤠ᤹ᤀᤠᤱ ᤀ᤺ᤰᤁᤠᤸᤗᤧ ᤂᤧᤵᤛᤧ᤹ᤀᤥ॥ ᤀᤠᤱᤃᤠ᤹ ᤜᤠ᤺ᤵᤐᤠᤀᤠᤱ ᤛᤢᤰᤛᤢᤰ ᤗ᤹ᤀᤠᤸᤗᤧ ᤔᤧᤱᤄᤧᤶᤔᤏᤠ ᤔᤧᤗᤧᤱᤛᤡᤱᤅᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤀᤠᤛᤢᤎᤧᤒᤠ ᤀᤠᤍᤠᤰᤌᤧᤒᤠᤜᤠ᤹ ᤜᤧᤰᤁᤣ ᤀᤠᤱᤃᤠ᤹ᤃ ᤂᤧᤏᤧ᤹ᤏᤢ ᤁᤧᤘᤠ᤹ᤒᤠ ᤋᤖᤣᤒᤠᤀᤠᤖᤥ. ᤗᤳᤇᤠ ᤘᤣ᤹ ᤗᤠᤈᤣ᤹ ᤁᤧᤕᤢᤱᤒᤠ ᤜᤧᤰᤁᤣ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤕᤠᤱᤎᤥ᤺ᤰᤁᤠᤖᤥ॥

¹³ ᤀᤠᤱᤃᤠ᤹ ᤀᤣ᤺ᤰ ᤗᤧᤖᤠᤱᤅᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤛᤡᤔᤠᤏᤢ᤺ᤸᤗᤧ ᤋᤃᤡ ᤛ᤺ᤵᤔᤠ ᤛᤢᤰᤁᤠᤖᤖᤥ॥”