ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 38 - LIFOTNTᤋᤢᤰᤂᤣ ᤁᤧᤍᤢᤶᤒᤠ ᤔᤏᤠ᤺ᤸᤗᤧ ᤁᤢᤒᤣᤗᤡ ᤐᤣᤗᤡᤃᤧᤴ ᤋᤢᤘᤠᤖᤧ ᤗᤠᤃᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ 1 ᤕᤜᤘᤣ ᤍᤠᤱᤒᤠᤀᤣ. ᤁᤧᤛᤡᤰ ᤐᤥ᤺ᤰᤁᤡᤸᤗᤧ ᤔᤧᤓᤧ᤺ᤰᤋᤠᤱᤅᤡᤴᤏᤧ᤹ᤀᤥ. ᤀᤡᤃᤪ ᤁᤧᤛᤡᤰ ᤐᤥ᤺ᤰᤁᤡᤸᤗᤧ ᤔᤧᤄᤢᤶᤛᤠᤱᤅᤡᤴᤏᤧ᤹ᤀᤥ॥ 2 ᤌᤣᤀᤠᤱᤓᤧᤸᤗᤧ ᤋᤥ᤺ᤱᤜᤠ᤹ᤖᤧ ᤁᤧᤀᤠᤒᤠᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤧᤜᤢᤰᤜᤠ᤹ᤖᤧ ᤁᤧᤄᤠ᤺ᤴᤍᤠᤱᤅᤠᤱ ᤘᤠ᤹ᤖᤥ॥ 3 ᤁᤧᤛᤡᤰᤁᤡᤸᤗᤧ ᤆᤥᤃᤢᤸᤗᤧ ᤀᤠᤕᤠᤶ ᤋᤢᤰᤁᤠᤱ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤀᤠᤗᤠᤕᤥᤸᤗᤧ ᤆᤥᤃᤢᤸᤗᤧ ᤋᤢᤰᤁᤠᤀᤠᤱ ᤘᤠ᤹ᤀᤠᤖᤥ॥ 4 ᤀᤠᤗᤠᤕᤥᤀᤥ ᤀᤠᤱᤃᤠ᤹ ᤜᤢᤔᤠᤱᤅᤠᤱ ᤘᤠ᤹ᤀᤠᤖᤥ. ᤀᤠᤱᤃᤠ᤹ ᤀᤠᤗᤠᤕᤥᤜᤠ᤹ ᤁᤢᤔᤠ ᤔᤧᤴᤇᤢᤰᤁᤣ ᤕᤠᤖᤡᤰ ᤁᤧᤗᤡ᤺ᤵᤐᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ 5 ᤀᤍᤱᤐᤠᤴ ᤆᤥᤃᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤕᤠᤱᤄᤣ᤺ᤰᤜᤠ᤹ ᤁᤡᤖᤧᤀᤠᤱ ᤏᤠᤶᤛᤢᤔᤠ ᤜᤣ᤺ᤰᤋᤧᤀᤠᤱ ᤘᤠ᤹ᤖᤥ॥ 6 ᤀᤠᤱᤃᤠ᤹ᤃ ᤋᤢ᤺ᤰᤂᤠᤱᤅᤠᤱ ᤀ᤺ᤰᤂᤢᤶ ᤗ᤹ᤀᤠᤖᤥ ᤜᤧᤰᤁᤩᤠᤱ ᤗᤧᤴᤍᤡᤰ ᤏᤠᤶᤎᤠᤎᤠ ᤔᤧᤖᤡᤱ ᤌᤰᤁᤠᤖᤥ॥ 7 ᤀᤠᤎᤠᤔᤠᤖᤧ ᤀᤠᤎᤰᤁᤡᤴ ᤜᤠ᤺ᤶᤜᤠᤶ ᤗ᤹ᤖᤡᤰ ᤀᤥ᤹ᤖᤢᤖᤥ. ᤜᤧᤰᤁᤩᤠᤱ ᤀᤠᤎᤰᤁᤡᤴ ᤋᤢᤰᤁᤠᤱ ᤘᤠ᤹ᤀᤠᤖᤥ॥ 8 ᤛᤠ᤹ᤖᤡᤰ ᤏᤠᤛᤠᤱᤅᤠᤱ ᤀᤠᤛᤰᤔᤠ ᤐᤢ᤹ᤖᤧᤀᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ ᤋᤢᤰᤔᤠᤖᤧ ᤕᤠ᤺ᤳᤋᤠᤖᤥ॥ 9 ᤕᤜᤘᤣ ᤍᤠᤱᤒᤠᤀᤣ᥄ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥᤒᤠ ᤐᤠ᤺ᤴᤜᤠ᤹ ᤁᤧᤖᤧᤰ ᤂᤧᤏᤧ᤹ ᤁᤧᤏᤡᤛᤢᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤠ᤺ᤳᤋᤠᤒᤠᤴ ᤂᤧᤏᤧ᤹ ᤁᤧᤄᤧᤵᤛᤢᤖᤥ॥ 10 ᤀᤠᤛᤡᤰᤗᤢᤱᤔᤠᤴ ᤛᤠ᤹ᤖᤡᤰ ᤕᤱᤗᤥ. ᤀᤠᤱᤃᤠ᤹ ᤔᤧᤴᤎᤢᤶᤔᤏᤠᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ. ᤀᤠᤱᤃᤠ᤹ ᤔᤡᤰᤁᤠᤱ ᤏᤡᤔᤠ ᤔᤧᤛᤢᤰᤁᤠᤸᤗᤥ॥ 11 ᤀᤠᤴᤈᤢᤶ ᤀᤠᤴᤍᤣᤱᤜᤠ᤹ ᤀᤠᤕᤠᤱᤄᤣ᤺ᤰᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤒᤣᤛᤠᤱ ᤔᤧᤴᤕᤢᤱᤏᤧᤴᤗᤥ. ᤜᤧᤰᤁᤩᤠᤱ ᤀᤠᤔᤣᤳ ᤀᤠᤛ᤻ᤛᤠᤜᤠ᤹ᤀᤠᤱ ᤔᤠ᤺ᤱᤄᤠ ᤔᤧᤕᤧᤵᤗᤥ॥ 12 ᤀᤠᤱᤃᤠ᤹ ᤛᤧᤵᤔᤠ ᤁᤧᤃᤥ᤺ᤵᤐᤠᤜᤠ᤹ᤖᤧ ᤀᤡᤔᤧᤕᤢᤰᤋᤠᤱᤅᤠᤱ ᤘᤠ᤹ᤖᤥ. ᤀᤠᤱᤃᤠ᤹ ᤂᤠ᤺ᤶᤔᤠ ᤁᤧᤃᤥ᤺ᤵᤐᤠᤜᤠ᤹ᤖᤧ ᤔᤧᤱᤔᤠ ᤆᤧᤶᤓᤴ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤗᤧᤴᤍᤡᤰ ᤏᤠᤶᤎᤠᤎᤠ ᤀᤠᤱᤃᤠ᤹ ᤀᤡᤱᤗᤧᤰᤔᤠ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥ 13 ᤀᤠᤱᤃᤠ᤹ᤃ ᤏᤠᤎᤧᤰᤁᤪᤧᤱ ᤁᤢᤀᤡᤛᤡᤰ ᤂᤧᤶᤔᤠ ᤔᤧᤴᤇᤢᤰᤔᤏᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤁᤧᤒᤠ ᤁᤢᤀᤡᤛᤡᤰ ᤐᤠ᤺ᤵᤔᤠ ᤔᤧᤴᤇᤢᤰᤔᤏᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ 14 ᤀᤠᤱᤃᤠ᤹ ᤁᤢᤏᤠᤃᤧᤎᤠᤰᤐᤠ ᤜᤧᤰᤁᤣ ᤌᤣᤀᤠᤱ ᤔᤧᤱᤄᤧᤶᤔᤏᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ. ᤁᤢᤒᤠᤴ ᤔᤧᤴᤗ᤺ᤶᤔᤏᤠᤒᤠ ᤜᤧᤰᤁᤣ ᤐᤠ᤺ᤵᤔᤠ ᤔᤧᤴᤇᤢᤰᤔᤏᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ 15 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤜᤠᤱᤏᤧᤖ ᤘᤠ᤹ᤀᤠᤖᤥ. ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ ᤂᤧᤏᤧ᤹ ᤛᤧᤰᤂᤠᤀᤣ ᤀᤠᤒᤣᤗᤡᤴ ᤁᤧᤄᤧᤵᤛᤢᤖᤥ॥ 16 ᤀᤠᤱᤃᤠ᤹ ᤐᤠ᤺ᤳᤋᤢᤱ. “ᤀᤠᤱᤃᤠ᤹ ᤋᤢᤰᤂᤣ ᤆᤠᤀᤠᤸᤗᤧ ᤂᤧᤱᤜᤠ᤹ ᤛ᤺ᤵᤔᤠ ᤔᤧᤱᤄᤥᤏᤧᤸᤗᤥ. ᤆᤥ᤺ᤴᤏᤠᤸᤗᤧ ᤀᤠᤱᤍᤡᤱ ᤗ᤹ᤔᤠ ᤔᤧᤱᤄᤥᤛᤢᤸᤗᤖᤥ॥” 17 ᤌᤣᤀᤠᤱᤓᤧᤸᤗᤧ ᤆᤥ᤺ᤶᤔᤠ ᤀᤡ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤛᤍᤠᤍᤡᤱ ᤋᤢᤰᤂᤣ᤺ᤸᤗᤧ ᤔᤧᤗᤧᤳᤋᤠᤴᤗᤥ॥ 18 ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱᤒᤠ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤱᤗᤥ. ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱᤒᤠᤀᤥ ᤀᤠᤏᤡᤱᤘᤠ᤹ ᤗᤥᤖᤥ॥ 19 ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ ᤕᤖᤡᤰ ᤔᤧᤘᤠ᤹ᤖᤥ. ᤂᤧᤱᤜᤠ᤹ ᤛᤠ᤹ᤖᤡᤰ ᤁᤧᤎᤢᤶᤒᤠ ᤔᤧᤈᤥᤰᤗᤥ. ᤌᤣᤏᤠᤎᤣ ᤀᤠᤱᤃᤠ᤹ ᤕᤖᤡᤰᤗᤧ ᤔᤧᤈᤡ᤺ᤳᤋᤠᤖᤥ॥ 20 ᤏᤢᤒᤠ ᤆᤥᤃᤢᤱᤒᤠᤸᤗᤧ ᤁᤢᤗᤧᤰᤘᤠ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤠᤖᤥ. ᤏᤢᤒᤠ ᤕᤠ᤺ᤶᤒᤰ ᤆᤥᤃᤢᤱᤛᤠᤱ ᤂᤧᤱᤜᤠ᤹ᤖᤧ ᤔᤧᤈᤧᤱᤅᤠᤖᤥ॥ 21 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤔᤧᤗᤧᤖᤠᤱᤅᤡᤴᤏᤧ᤹ᤀᤥ. ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ᤗᤠᤶᤒᤠ ᤔᤠ᤺ᤱᤄᤠ ᤔᤧᤒᤥ᤺ᤰᤂᤧᤴᤏᤧ᤹ᤀᤥ॥ 22 ᤀᤠᤱᤃᤠ᤹ ᤀᤠᤛᤧᤴᤗᤵᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤜᤠᤖᤠ ᤑᤠ᤹ᤖᤠᤱᤅᤧ᤹ᤀᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.