ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 37 - LIFOTNTᤁᤢᤍᤥ᤺ᤵᤔᤠ ᤔᤏᤠᤖᤧᤴ ᤔᤢ᤹ᤀᤡᤛᤠᤶ ᤍᤠᤀᤢᤍᤖᤧ ᤁᤢᤛᤠᤶᤗᤥ 1 ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤁᤧᤏᤡᤛᤢᤛᤡᤸᤗᤧ ᤁᤧᤏᤡᤱᤘᤠ᤹ ᤋᤢᤰᤂᤣ ᤔᤧᤈᤩᤧᤴᤏᤧ᤹ᤀᤥ. ᤂᤧᤴ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤏᤠᤔᤧᤜᤧᤳᤋᤧᤛᤧᤴᤏᤧ᤹ᤀᤥ॥ 2 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤘᤜᤡᤳ ᤔᤧᤎᤠᤏᤧᤴᤏᤡᤸᤗᤧ ᤕᤠ᤺ᤴᤛᤢᤱᤜᤠ᤹ ᤜᤠᤖᤠᤀᤣ ᤜᤣᤒᤣ᤺ᤰᤐᤠ ᤁᤢᤀᤡᤛᤡᤰ ᤜᤠᤖᤠᤀᤣ ᤔᤧᤔᤠ ᤔᤧᤒᤣ᤺ᤰᤗᤥ. ᤂᤠᤖᤰ ᤁᤧᤓᤧᤰᤐᤠ ᤑᤢᤱᤜᤠ᤹ ᤀᤡᤗᤧᤶᤒᤣ᤺ᤰᤐᤠ ᤁᤢᤀᤡᤛᤡᤰ ᤜᤠᤖᤠᤀᤣ ᤔᤧᤛᤡᤖᤥ॥ 3 ᤕᤜᤘᤣ ᤍᤠᤱᤒᤠᤴ ᤋᤠ᤺ᤰᤐᤥ ᤆᤥᤃᤧ᤹ᤀᤠᤱ ᤘᤣ᤹ᤜᤠ᤹ ᤏᤢᤖᤡᤰ ᤔᤧᤳᤋᤧᤛᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤗᤠᤈᤣ᤹ᤀᤥ ᤁᤧᤕᤢᤱᤅᤠᤱ ᤛᤧ᤺ᤵᤛᤡᤱᤔᤠ ᤁᤧᤄᤥᤛᤢᤖᤥ॥ 4 ᤕᤜᤘᤣ ᤍᤠᤱᤒᤠᤀᤥ ᤂᤧᤏᤧ᤹ ᤛ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤏᤡᤱᤘᤠ᤹ᤀᤥ ᤁᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤧᤳᤋᤢ ᤁᤧᤒᤡᤖᤥ॥ 5 ᤁᤧᤗᤠᤶᤔᤡᤴ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤧ᤹ᤀᤥ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤋᤠ᤺ᤰᤐᤥ ᤆᤥᤃᤧ᤹ᤀᤥ. ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤂᤢᤏᤧ᤹ ᤁᤧᤓᤠ᤹ᤖᤥ॥ 6 ᤂᤧᤏᤧ᤹ ᤛᤠᤶᤕᤥᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤏᤡᤴ ᤋᤠᤏᤠᤶᤒᤠ ᤏᤠᤶ ᤁᤢᤀᤡᤛᤡᤰ ᤀᤥ᤺ᤳᤗ ᤕᤠ᤺ᤴᤍᤢᤖᤥ. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤁᤧᤄᤠᤛᤧᤴᤏᤡᤴ ᤗᤧᤴᤍᤡᤰᤐᤠ ᤏᤠᤶ ᤁᤢᤀᤡᤛᤡᤰ ᤆᤥᤃᤢᤖᤥ॥ 7 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤛᤫᤠ᤺ᤳ ᤕᤢᤅᤧ᤹ᤀᤥ ᤜᤧᤰᤁᤩᤠᤱ ᤏᤠᤛᤡ ᤌ᤺ᤳᤋᤧ᤹ᤖ ᤂᤢᤏᤧ᤹ ᤜᤠᤱᤄᤧ᤹ᤀᤥ॥ ᤔᤏᤠ᤺ᤸᤗᤧ ᤋᤠᤵᤑᤧ᤺ᤶᤒᤠ ᤗᤠᤶ ᤏᤠ᤺ᤵᤔᤠ ᤌᤠ᤺ᤳᤋᤢᤸᤗᤧ ᤜᤧᤰᤁᤩᤠᤱ ᤂᤧᤸᤗᤧ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤆᤥᤃᤢᤸᤗᤧ ᤂᤧᤏᤧ᤹ ᤁᤧᤏᤡᤱᤘᤠ᤹ ᤋᤢᤰᤂᤣ ᤔᤧᤈᤩᤧᤴᤏᤧ᤹ᤀᤥ॥ 8 ᤁᤧᤕᤠ᤺ᤰ ᤔᤧᤗᤧ᤹ᤖᤧᤴᤏᤧ᤹. ᤁᤧᤛᤡᤰ ᤔᤧᤓᤥ᤺ᤰᤂᤧᤴᤏᤧ᤹ᤀᤥ. ᤔᤢᤖᤠ ᤔᤧᤍᤥᤛᤧᤴᤏᤧ᤹. ᤂᤧᤸᤗᤧᤃ ᤋᤠᤵᤑᤧ᤺ᤶᤒᤠ ᤆᤥ᤺ᤰᤔᤠ ᤀᤠᤒᤠᤱᤗᤥ॥ 9 ᤌᤣᤀᤠᤱᤓᤧᤸᤗᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤔᤧᤔᤧᤰᤗᤥ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶ ᤀᤥᤃᤧᤔᤧᤵᤐᤠᤜᤠ᤹ᤖᤧ ᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤔᤧᤕᤢᤰᤋᤢᤖᤥ॥ 10 ᤛᤵᤑᤠᤀᤠᤱ ᤁᤢᤀᤡᤃᤧᤓᤧᤶᤒᤠᤜᤠ᤹ᤃ ᤂᤧᤵᤔᤥ ᤔᤧᤴᤘᤠ᤹ᤏᤧᤸᤗᤥ. ᤂᤧᤱᤜᤠ᤹ ᤂᤧᤏᤧ᤹ ᤁᤧᤃᤥ᤺ᤳᤋᤢᤛᤡᤛᤠᤱ ᤁᤧᤱᤄᤥᤛᤢᤴᤇᤡᤸᤗᤥ॥ 11 ᤁᤖ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠᤜᤠ᤹ᤖᤧ ᤗᤠᤈᤣ᤹ᤛᤡᤱᤒᤢᤱ ᤔᤧᤕᤢᤰᤋᤢᤖᤥ. ᤜᤧᤰᤁᤩᤠᤱ ᤛᤠ᤹ᤖᤡᤰ ᤔᤧᤏᤢ᤹ᤔᤧᤍᤠᤀᤠᤱ ᤔᤧᤛ᤺ᤳᤗᤥ॥ 12 ᤁᤢᤀᤡᤃᤧᤓᤧᤶᤒᤠᤜᤠ᤹ᤖᤧ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤀᤡᤈᤥᤀᤥ ᤌᤠᤔᤠ ᤔᤧᤃᤥ᤺ᤳᤋᤢᤛᤡᤖᤥ ᤜᤧᤰᤁᤩᤠᤱ ᤂᤢᤏᤡ᤹ ᤜᤠᤒᤥ᤹ᤒᤠᤴ ᤔᤧᤕᤧ᤺ᤰᤂᤢᤖ ᤛᤠ᤹ᤖᤡᤰ ᤔᤧᤈᤡ᤺ᤳᤋᤢᤛᤡᤖᤥ॥ 13 ᤁᤖ ᤍᤠᤱᤒᤠᤴ ᤂᤧᤱᤜᤠ᤹ ᤏᤡᤛᤢᤛᤡᤀᤠᤱ ᤀᤣ᤺ᤳᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤧᤰᤔᤠ ᤕᤧᤴ ᤋᤠᤖ ᤐᤳᤗᤥ॥ 14 ᤋᤢᤰᤂᤣ ᤁᤧᤈᤠᤒᤠᤜᤠ᤹ ᤏᤢ ᤕᤠᤱᤃᤧᤛᤠ᤹ᤒᤠᤜᤠ᤹ ᤜᤧᤰᤁᤩᤠᤱ ᤛᤧᤰᤂᤠᤒᤠ ᤗᤠᤶᤔᤥ ᤗᤠᤱᤃᤧᤄᤣ᤺ᤰᤐᤠᤜᤠ᤹ ᤛᤧᤵᤔᤠᤛᤡ ᤑᤠ᤹ᤀᤠᤱ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤋᤠᤓᤣᤴ ᤔᤧᤓᤡ᤺ᤰᤂᤢᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤡᤀᤥ ᤋᤥ᤺ᤱᤅᤡᤴ ᤔᤧᤓᤳᤇᤢᤖᤥ॥ 15 ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤠᤓᤣ᤺ᤸᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤗᤢᤱᤔᤠᤴ ᤗᤛ᤻ᤛᤢᤖᤥ. ᤜᤧᤰᤁᤩᤠᤱ ᤂᤢᤏᤡ᤹ ᤋᤥᤱ ᤗᤡᤜᤠ᤹ ᤀᤧᤰᤗᤥ॥ 16 ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤔᤧᤃᤳᤋᤢᤒᤠ ᤕᤖᤡᤰ ᤕᤠᤱᤛᤠᤁᤢᤴᤎᤣ᤺ᤴᤏᤢ᤺ᤸᤗᤧᤃ ᤛᤠᤔᤩᤥᤏᤡᤒᤠᤜᤠ᤹ᤖᤧ ᤔᤧᤃᤳᤋᤢᤒᤠ ᤆᤩ᤹ᤛᤡᤰ ᤐᤠ᤺ᤴᤜᤠ᤹ᤀᤣ ᤏᤢᤒᤠᤖᤥ॥ 17 ᤌᤣᤀᤠᤱᤓᤧᤸᤗᤧ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤜᤠ᤹ ᤀᤧᤰᤗᤥ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤛᤠᤶᤕᤥᤒᤠᤜᤠ᤹ ᤛᤧ᤺ᤵᤋᤢᤛᤡᤖᤥ॥ 18 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤀᤥᤔᤧᤳᤋᤢᤛᤡᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤐᤡᤖᤢᤛᤡᤒᤠ ᤗᤰᤁᤡᤴ ᤛᤍᤠᤍᤡᤱᤗᤧ ᤗᤠᤃᤡ ᤂᤧᤱᤜᤠ᤹ᤖᤧᤴ ᤐᤥᤱᤗᤥ॥ 19 ᤕᤧᤳᤋᤢᤰᤂᤣ ᤆᤠᤔᤠ ᤕᤧᤶ ᤋᤠ᤺ᤸᤗᤧ ᤂᤧᤱᤜᤠ᤹ ᤛᤡᤖᤡᤱᤔᤔᤥ ᤔᤧᤴᤎᤠᤏᤧᤴᤗᤥ. ᤜᤧᤰᤁᤩᤠᤱ ᤛᤠᤰ ᤋᤠᤛᤠᤱ ᤂᤧᤱᤜᤠ᤹ᤖᤧ ᤕᤖᤡᤰ ᤁᤢᤈᤠ ᤔᤧᤃᤳᤋᤢᤖᤥ॥ 20 ᤁᤖ ᤋᤠᤰᤁᤧᤓᤧ᤹ᤒᤠᤜᤠ᤹ᤃ ᤔᤧᤛᤡ ᤔᤧᤒᤣ᤺ᤰᤗᤥ. ᤋᤠᤶᤓᤢᤱᤅᤥᤒᤠ ᤑᤢᤱ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤔᤡᤜᤠ᤹ ᤔᤧᤔᤠ ᤔᤧᤒᤣ᤺ᤰᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤡ᤺ᤰᤂᤢ᤹ ᤜᤧᤰᤁᤣ ᤔᤧᤔᤠ ᤔᤧᤒᤣ᤺ᤰᤗᤥ॥ 21 ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤛᤡᤱᤏᤠᤳ ᤔᤧᤍᤣ᤹ᤖᤢᤀᤠᤱ ᤂᤢᤴᤇᤡ᤹ ᤀᤠᤓᤧᤸᤗᤧᤀᤠᤱ ᤔᤧᤴᤜᤢᤅᤢᤴᤗᤥ. ᤁᤖ ᤛᤠᤶᤕᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤜᤴᤏᤠᤱ ᤘᤣ᤹ᤜᤠ᤹ ᤔᤧᤒᤡᤖᤢᤛᤡᤖᤥ॥ 22 ᤕᤜᤘᤣ ᤍᤠᤱᤒᤧᤸᤗᤧ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤒᤠᤜᤠ᤹ᤖᤧ ᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤔᤧᤕᤢᤰᤋᤢᤖᤥ. ᤁᤖ ᤂᤢᤏᤧ᤹ ᤛᤠᤱᤃᤪᤠ ᤔᤧᤳᤋᤢᤛᤡᤒᤠᤜᤠ᤹ ᤔᤧᤔᤧᤰᤗᤥ॥ 23 ᤕᤜᤘᤣ ᤍᤠᤱᤒᤧᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤏᤠ᤺ᤳᤋᤢᤒᤠ ᤗᤠᤶᤔᤡᤴ ᤁᤢᤛᤡᤖᤠ᤹ ᤌᤠᤱᤏᤧᤓᤃᤪ ᤂᤧᤱᤜᤠ᤹ ᤛᤧ᤺ᤵᤋᤢᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤴᤈᤥ᤺ᤴᤏᤧᤸᤗᤥ॥ 24 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤱᤜᤠ᤹ ᤋᤥ᤺ᤰᤛᤠᤱ ᤔᤧᤴᤈᤥ᤺ᤴᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤂᤧᤱᤜᤠ᤹ ᤋᤧᤶᤛᤢᤛᤡᤖᤥ॥ 25 ᤌᤠᤱᤒᤧᤴ ᤘᤕᤠᤱ. ᤀᤠᤸᤗ ᤁᤠᤵᤐᤥ ᤋᤢᤶᤛᤠᤱᤅᤠᤱ ᤘᤠ᤹ᤀᤠᤖᤥ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤛᤠᤶᤕᤥᤒᤠ ᤔᤏᤠᤜᤠ᤹ ᤗᤠᤵᤑᤢᤛᤢᤛᤡᤒᤠ ᤏᤢ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠᤔᤧᤴᤇᤠ᤹ᤜᤠ᤹ᤖᤧ ᤔᤧᤏᤠ᤺ᤰᤋᤢ ᤔᤧᤈᤒᤠ ᤔᤧᤴᤏᤡᤀᤣ ᤘᤠ᤹ᤀᤠᤖᤥ॥ 26 ᤀᤠᤓᤧᤸᤗᤧᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤜᤴᤏᤠᤱ ᤘᤣ᤹ᤜᤠ᤹ ᤔᤧᤛ᤺ᤳᤗ ᤌᤧᤳᤗᤠ ᤔᤧᤒᤡᤖᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠᤔᤧᤴᤇᤠ᤹ᤜᤠ᤹ᤖᤧ ᤜᤠᤱᤘᤠᤔᤢ᤹ᤀᤡ ᤔᤧᤄᤥᤛᤢᤖᤥ॥ 27 ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤴ ᤗᤧᤖᤧ᤹ᤀᤠᤱ ᤏᤢᤒᤠ ᤕᤠ᤺ᤶᤒᤰ ᤆᤥᤃᤧ᤹ᤀᤥ. ᤜᤧᤰᤁᤩᤠᤱ ᤁᤧᤛ᤻ᤛᤠ ᤁᤧᤶᤔᤧᤴᤇᤠ᤹ᤜᤠ᤹ ᤗᤠᤈᤣ᤹ᤀᤥ ᤛᤍᤠᤍᤡᤱ ᤔᤧᤕᤢᤱᤗᤥ॥ 28 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤥ᤺ᤵᤔᤠ ᤂᤠᤛᤧᤴᤏᤡᤴ ᤁᤢᤛᤡᤖᤠ᤹ ᤌᤠᤱᤗᤥ. ᤜᤧᤰᤁᤩᤠᤱ ᤁᤢᤛᤣᤛᤣ ᤔᤏᤠᤜᤠ᤹ ᤀᤠᤓᤧᤸᤗᤧᤀᤠᤱ ᤔᤧᤗᤧᤖᤢᤴᤛᤡᤴᤗᤥ॥ ᤂᤧᤱᤜᤠ᤹ ᤛᤍᤠᤍᤡᤱ ᤂᤢᤏᤧ᤹ ᤛᤧ᤺ᤵᤋᤢᤛᤡᤀᤠᤱ ᤔᤧᤘᤠ᤹ᤖᤥ. ᤁᤖ ᤋᤠᤰᤁᤧᤓᤧ᤹ᤒᤠᤸᤗᤧ ᤁᤢᤛ᤻ᤛᤠᤜᤠ᤹ᤃ ᤔᤧᤔᤧᤰᤗᤥ॥ 29 ᤛᤠᤶᤕᤥᤒᤠᤜᤠ᤹ᤖᤧ ᤗᤠᤈᤣ᤹ᤛᤡᤱᤒᤢᤱ ᤔᤧᤕᤢᤰᤋᤢᤖᤥ. ᤜᤧᤰᤁᤩᤠᤱ ᤂᤧᤵᤔᤥ ᤛᤍᤠᤍᤡᤱ ᤔᤧᤕᤢᤱᤗᤥ॥ 30 ᤛᤠᤶᤕᤥᤒᤠᤜᤠ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤐᤠᤴ ᤔᤧᤒᤠ᤺ᤳᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤐᤠᤴ ᤔᤧᤒᤠ᤺ᤳᤗᤥ॥ 31 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶᤜᤠ᤹ ᤂᤧᤸᤗᤧ ᤁᤢᤏᤡᤱᤘᤠ᤹ᤀᤥ ᤕᤢᤰᤂᤢᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤔᤥᤗᤠᤶ ᤂᤧᤴ ᤀᤠᤓᤧᤸᤗᤧᤀᤠᤱ ᤔᤧᤗᤧ᤺ᤱᤏᤧᤸᤗᤥ॥ 32 ᤁᤢᤀᤡᤃᤧᤓᤧᤶᤒᤠᤜᤠ᤹ᤖᤧ ᤛᤠᤶᤕᤥᤒᤠ ᤔᤏᤠᤜᤠ᤹ ᤛᤧᤵᤔᤠᤛᤡᤖᤧ ᤗᤠᤃᤡ ᤔᤧᤛᤢᤃᤢᤛᤡᤀᤠᤱ ᤔᤧᤕᤢᤱᤗᤥ॥ 33 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤂᤢᤏᤡ᤹ ᤏᤡᤱᤔᤡᤜᤠ᤹ᤖᤧ ᤜᤢᤰᤁᤥ ᤌᤠᤔᤠ ᤔᤧᤒᤠᤱᤄᤢᤛᤡᤴᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤠᤛᤧᤴᤏᤥ ᤔᤧᤎᤠ᤺ᤸᤗᤧ ᤀᤠᤵᤋᤡᤰ ᤁᤢ᤺ᤵᤔᤠ ᤔᤧᤒᤠᤱᤄᤢᤛᤡᤴᤗᤥ॥ 34 ᤕᤜᤘᤣ ᤍᤠᤱᤒᤠᤴ ᤜᤠᤱᤄᤠᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤠᤶᤔᤥ ᤗᤠᤱᤄᤣᤃᤧᤶᤔᤧ᤹ᤀᤥ॥ ᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤕᤢᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤌᤠ᤺ᤱ ᤁᤧᤓᤥᤰᤂᤡᤖᤥ. ᤁᤢᤀᤡᤃᤧᤓᤧᤶᤒᤠ ᤔᤏᤠᤴ ᤔᤧᤰᤐᤠ ᤂᤡᤏᤡ᤹ ᤔᤡᤰᤁᤡᤸᤗᤧᤀᤣ ᤏᤡᤛᤢᤖᤥ॥ 35 ᤌᤡᤰᤗᤧᤱ ᤁᤢᤀᤡᤃᤧᤓᤧᤶᤒᤠ ᤔᤏᤠᤎᤡᤰ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤅᤠᤱ ᤘᤕᤧᤖᤥ. ᤂᤧᤸᤗᤧ ᤕᤠᤵᤔᤡᤜᤠ᤹ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤳᤋᤢᤛᤡᤖᤥ. ᤂᤧᤱᤃ ᤏᤢᤒᤠ ᤂᤠᤶᤔᤥ ᤁᤧᤗᤡᤱᤒᤠ ᤁᤣ᤺ᤶᤒᤠ ᤛᤡᤱᤒᤢᤱ ᤁᤢᤀᤡᤛᤡᤰ ᤆᤥᤃᤧᤖᤥ॥ 36 ᤁᤖ ᤂᤧᤴ ᤜᤠᤖᤠᤀᤣ ᤛᤩᤧᤀᤠᤱ ᤜᤥ᤺ᤵᤋᤧᤖᤥ᥄ ᤀᤠᤱᤃᤠ᤹ ᤁᤥ᤺ᤳᤋᤢᤱᤛᤠᤱ ᤂᤥᤔᤠ ᤔᤧᤴᤇᤢᤰᤐᤠᤖᤥ॥ 37 ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤔᤏᤠᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤔᤏᤠᤴ ᤀᤥᤔᤧᤳᤋᤧ᤹ᤀᤥ. ᤔᤧᤱᤄᤣᤔᤏᤠ ᤔᤧᤴᤎᤰᤔᤏᤠ ᤔᤏᤠ᤺ᤸᤗᤧ ᤁᤢᤛ᤻ᤛᤠᤁᤢᤀᤣ ᤔᤧᤘᤠ᤹ᤖᤥ॥ 38 ᤁᤖ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤔᤧᤔᤧᤰᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠᤜᤠ᤹ᤖᤧ ᤔᤡᤱ ᤔᤠᤖᤥ॥ 39 ᤕᤜᤘᤣ ᤍᤠᤱᤒᤧᤸᤗᤧ ᤛᤠᤶᤕᤥᤒᤠ ᤔᤏᤠᤜᤠ᤹ ᤛᤧ᤺ᤵᤋᤢᤛᤡᤖᤥ. ᤜᤧᤰᤁᤩᤠᤱ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤶᤔᤡᤸᤗᤧ ᤌᤣ᤺ᤰᤋᤢᤛᤡ ᤛᤧ᤺ᤵᤋᤢᤛᤡᤖᤥ॥ 40 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤑᤠ᤹ᤖᤢᤛᤡ ᤜᤧᤰᤁᤩᤠᤱ ᤛᤧ᤺ᤵᤋᤢᤛᤡᤖᤥ. ᤂᤢᤏᤧ᤹ ᤂᤧᤱᤜᤠ᤹ ᤁᤢᤀᤡᤃᤧᤓᤧᤶᤒᤠᤜᤠ᤹ᤗᤠᤶ ᤛᤧᤴᤍᤢᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤂᤢᤏᤧ᤹ᤀᤥ ᤀᤡ᤺ᤶᤛᤡᤱᤛᤧ ᤔᤧᤒᤣ᤺ᤰᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.