ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 36 - LIFOTNT

ᤕᤜᤘᤣ ᤍᤠᤱᤒᤠᤴ ᤁᤢᤛᤢᤳᤏᤠ ᤁᤧᤏᤢ᤹ᤒᤠ ᤆᤥᤰ

ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤋᤠᤰᤁᤧᤓᤧ᤹ᤒᤠ ᤔᤏᤠ᤺ᤸᤗᤧ ᤁᤢᤛᤡᤰᤗᤢᤱᤔᤥ ᤑᤧᤴᤏᤡᤱᤘᤠ᤹ ᤀᤡ᤺ᤳᤋᤢᤖᤥ. ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤴᤗᤥ॥

² ᤂᤧᤴ ᤀᤠᤒᤠᤅᤣ ᤛᤠ᤹ᤖᤡᤰ ᤆᤶᤛᤡᤱᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤗᤠᤕᤥᤴ ᤔᤧᤏᤡᤛᤢᤴᤗᤥ ᤜᤧᤰᤁᤩᤠᤱ ᤀᤠᤵᤋᤡᤰᤁᤠᤱ ᤔᤧᤃᤢ᤺ᤳᤋᤠᤴ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤖᤥ॥

³ ᤂᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤋᤠᤵᤑᤧ᤺ᤶᤒᤠ ᤏᤢ ᤀᤡᤱᤗᤧᤰᤁᤩᤠ ᤆᤥᤰᤗᤥ. ᤂᤧᤸᤗᤧ ᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤧᤖᤢᤍᤣᤛᤢᤀᤠᤱ ᤘᤠ᤹ᤖᤥ॥

⁴ ᤂᤧᤴ ᤁᤢᤏᤧᤳᤏᤠᤀᤥ ᤏᤧ᤺ᤸᤗᤧ ᤑᤧᤴ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤖᤥ. ᤂᤧᤸᤗᤧ ᤏᤢᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤸᤗᤥ. ᤜᤧᤰᤁᤩᤠᤱ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤀᤠᤓᤧᤸᤗᤧᤀᤠᤱ ᤔᤧᤗᤧᤖᤢᤴᤗᤥ॥

ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤏᤢ᤹ᤒᤠ ᤆᤥᤰ

⁵ ᤕᤜᤘᤣ ᤍᤠᤱᤒᤠᤀᤣ. ᤆᤰᤔᤧᤸᤗ᤹ᤀᤣ ᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠ ᤐᤠ᤺ᤴᤏᤡᤴ ᤛᤠᤱᤃᤪᤠᤶᤐᤣᤍᤠᤱ ᤌᤠᤖᤡᤰ ᤁᤧᤖᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤏᤛᤠ᤺ᤴᤛᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤏᤡᤴ ᤋᤠᤱᤛᤠᤰᤐᤥ ᤌᤠᤖᤡᤰ ᤛᤧᤖᤧᤀᤠᤱ ᤘᤠ᤹ᤖᤥ॥

⁶ ᤁᤧᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤴ ᤔᤠ᤺ᤱᤄᤠᤗᤠᤶ ᤏᤡᤃᤧᤍᤧᤵᤐᤠ ᤁᤣ᤺ᤶᤒᤠ ᤁᤥ᤺ᤰᤔᤠ ᤁᤢᤀᤡᤛᤡᤰ ᤆᤥᤰᤗᤥ. ᤜᤧᤰᤁᤩᤠᤱ ᤁᤧᤄᤠᤛᤧᤴ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤁᤣ᤺ᤶᤒᤠ ᤘᤖ᤺ᤱ ᤁᤢᤀᤡᤛᤡᤰ ᤆᤥᤰᤗᤥ॥ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤀᤣ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤢ ᤌᤰᤛᤠᤜᤠ᤹ ᤁᤧᤛᤧ᤺ᤵᤋᤢᤛᤡᤖᤥ॥

⁷ ᤂᤧᤏᤧ᤹ ᤆᤰᤔᤧᤸᤗ᤹ᤀᤣ ᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠ ᤐᤠ᤺ᤴᤏᤡᤴ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤆᤥᤰᤗᤥ᥄ ᤔᤧᤴᤇᤠᤶ ᤕᤠᤵᤔᤡᤛᤠᤜᤠ᤹ᤖᤧ ᤁᤧᤗᤠᤵᤜᤠ᤹ᤀᤥ ᤀᤡ᤺ᤶᤛᤡᤱᤔᤠ ᤔᤧᤄᤥᤛᤢᤖᤥ॥

⁸ ᤁᤧᤜᤡᤶᤔᤥ ᤘᤧᤳᤋᤧᤛᤖᤧ ᤁᤧᤘᤠ᤹ᤒᤠ ᤕᤖᤡᤰ ᤁᤢᤈᤠᤜᤠ᤹ ᤂᤧᤱᤜᤠ᤹ ᤆᤠᤔᤠ ᤁᤧᤒᤡᤖᤢᤛᤡᤖᤥ. ᤜᤧᤰᤁᤩᤠᤱ ᤘᤜ᤺ᤱ ᤁᤢᤀᤡᤛᤡᤰ ᤁᤧᤃᤢᤱᤒᤠ ᤁᤧᤕᤢᤒᤠ ᤁᤧᤏᤢ᤹ᤔᤠ ᤁᤧᤍᤠᤔᤠᤗᤠᤶ ᤂᤧᤱᤜᤠ᤹ ᤆᤫᤠ᤺ᤳ ᤁᤧᤎᤢᤱᤄᤢᤛᤡᤖᤥ॥

⁹ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤀᤣ ᤁᤧᤖᤧᤰ ᤏᤧᤳᤋᤡᤃᤧᤴ ᤜᤡᤱᤔᤴᤗᤧ ᤁᤢᤒᤢᤴᤏᤧᤖᤥ. ᤁᤧᤀᤥ᤺ᤳᤋᤡ᤺ᤸᤗᤧ ᤀᤠᤏᤡᤃᤣ ᤌᤥ᤹ᤖᤡᤃᤧᤀᤠᤱ ᤏᤡᤛᤢᤶᤒᤧᤖᤥ॥

¹⁰ ᤀᤠᤳᤋᤡᤴᤜᤠ᤹ᤖᤧ ᤂᤧᤏᤧ᤹ ᤁᤢᤛᤡᤱ ᤁᤧᤶᤏᤡ᤺ᤳ ᤂᤧᤱᤜᤠ᤹ ᤂᤧᤏᤧ᤹ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤥ. ᤜᤧᤰᤁᤩᤠᤱ ᤁᤧᤛᤠᤶᤕᤥᤒᤠ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ ᤁᤧᤃᤵᤐᤠᤜᤠ᤹ ᤔᤧᤏᤢ᤹ᤔᤧᤍᤠᤖ ᤕᤠ᤺ᤴᤍᤧᤛᤧ᤹ᤀᤥ॥

¹¹ ᤀᤠᤱᤍᤡᤱ ᤁᤧᤗ᤹ᤒᤠ ᤔᤏᤠᤜᤠ᤹ᤖᤧ ᤗᤠ᤺ᤰᤔᤠ ᤔᤧᤱᤄᤥᤀᤠᤴᤗᤖᤥ. ᤜᤧᤰᤁᤩᤠᤱ ᤁᤢᤀᤡᤃᤧᤓᤧᤶᤒᤠᤜᤠ᤹ᤖᤧ ᤏᤠ᤺ᤵᤔᤠᤍᤣᤔᤠ ᤔᤧᤱᤄᤥᤀᤠᤴᤗᤖᤥ॥

¹² ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤔᤧᤈᤥ᤺ᤴᤍᤧᤀᤠᤱ ᤛᤸᤗᤡᤰ ᤔᤧᤛ᤻ᤛᤖᤧᤀᤠᤱ ᤔᤧᤏᤧᤖᤥ. ᤂᤧᤱᤜᤠ᤹ᤃ ᤐᤥ᤺ᤰᤔᤤ ᤔᤧᤴᤇᤢᤰᤁᤣ ᤌᤠᤖᤡᤰ ᤔᤧᤎᤠᤶᤛᤡᤱᤗᤥ॥