ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 35 - LIFOTNTᤁᤢᤍᤥ᤺ᤵᤔᤠ ᤂᤠᤛᤧᤴᤗᤧ ᤗᤠᤃᤡ ᤐᤣᤗᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ 1 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤁᤧᤀᤵᤐᤠᤜᤠ᤹ ᤂᤧᤏᤧ᤹ᤀᤠᤱ ᤀᤳᤋᤧᤛᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ᤏᤢ ᤌᤱ ᤁᤧᤈᤥ᤺ᤰᤐᤠᤜᤠ᤹ᤏᤢ ᤌᤰᤋᤧ᤹ᤀᤥ॥ 2 ᤛᤧ᤺ᤵᤛᤡᤱᤔᤠ ᤆᤠᤱ ᤆᤠᤰᤂᤧ᤹ᤀᤠᤱ ᤂᤥᤴ ᤕᤠᤱᤛᤡᤅᤧ᤹ᤀᤥ. ᤜᤧᤰᤁᤩᤠᤱ ᤀᤠᤓᤠ᤹ᤛᤧ ᤕᤧᤶᤛᤡᤱᤅᤧ᤹ᤀᤥ॥ 3 ᤀᤠᤱᤃᤠ᤹ ᤁᤧᤏᤠ᤺ᤵᤐᤠᤜᤠ᤹ ᤌᤢᤵᤔᤠᤛᤡ ᤗᤰᤔᤠᤛᤡᤖᤧ ᤗᤠᤃᤡ ᤗᤠ᤺ᤰ ᤏᤢ ᤕᤧᤴᤜᤠ᤹ ᤕᤠᤱᤛᤡᤅᤧ᤹ᤀᤥ. ᤜᤧᤰᤁᤩᤠᤱ ᤀᤠᤕᤠᤶᤛᤠᤶᤔᤡᤴ ᤔᤧᤳᤋᤧ᤹ᤀᤥ. “ᤀᤠᤱᤃᤠ᤹ ᤁᤧᤛᤧᤴᤗᤵ ᤍᤠᤱᤒᤠᤀᤠᤖᤥ॥” 4 ᤀᤠᤱᤃᤠ᤹ ᤛᤧᤵᤔᤠ ᤁᤧᤃᤥ᤺ᤵᤐᤠᤜᤠ᤹ ᤛᤡᤖᤡᤱᤔᤔᤥ ᤔᤧᤎᤠᤖᤖᤥ. ᤜᤧᤰᤁᤩᤠᤱ ᤂᤢᤏᤡ᤹ ᤆᤠ᤺ᤳᤌᤡ ᤐᤣ᤺ᤰᤗᤖᤥ॥ ᤀᤠᤱᤃᤠ᤹ ᤀᤡᤈᤥᤀᤥ ᤌᤠᤔᤠ ᤁᤧᤃᤥ᤺ᤵᤐᤠᤜᤠ᤹ ᤂᤧᤳᤇᤡᤱᤔᤠ ᤐᤥᤱᤗᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤏᤠᤰᤗᤖᤥ॥ 5 ᤂᤧᤱᤜᤠ᤹ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤑᤧᤛᤢᤒᤠ ᤕᤠ᤹ᤛᤡᤵ ᤁᤢᤀᤡᤛᤡᤰ ᤔᤧᤒᤥᤱᤗᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤂᤧᤱᤜᤠ᤹ ᤏᤠ᤺ᤳᤋᤢᤍᤣᤛᤢᤛᤡᤖᤖᤥ॥ 6 ᤂᤠᤃᤧᤔᤠᤰᤐᤠ ᤏᤢ ᤁᤧᤗᤧ᤺ᤶᤒᤠ ᤗᤠᤶᤔᤥ ᤂᤧᤱᤜᤠ᤹ ᤗᤠᤱᤄᤣ᤺ᤰᤔᤠ ᤐᤥᤱᤗᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤂᤧᤱᤜᤠ᤹ ᤛᤠᤘᤠ ᤕᤧᤰᤁᤵ ᤏᤠ᤺ᤳᤋᤢᤛᤡᤖᤖᤥ॥ 7 ᤂᤧᤱᤜᤠ᤹ ᤌᤣᤀᤠᤱ ᤔᤧᤶᤔᤧᤳᤇᤡᤱᤅᤣ ᤀᤡᤔᤧᤕᤢᤰᤋᤠᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤌᤣᤏᤠᤎᤣ ᤀᤠᤱᤃᤠ᤹ ᤛᤧᤵᤔᤠ ᤑᤠ᤹ᤀᤠᤱ ᤗᤢᤶᤒᤠᤳ ᤔᤧᤍᤕᤢᤖᤥ॥ 8 ᤜᤰᤆᤄᤳ ᤂᤧᤱᤜᤠ᤹ᤀᤥ ᤛᤡᤔᤠ ᤔᤧᤰᤔᤠ ᤋᤠᤖᤖᤥ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤧᤳᤇᤧ ᤔᤧᤴᤏᤡᤀᤣ ᤔᤧᤕᤢᤰᤋᤠᤱᤒᤠ ᤀᤡᤈᤥᤀᤥ ᤀᤠᤒᤠᤅᤣ ᤔᤧᤎᤠᤖᤖᤥ. ᤜᤧᤰᤁᤩᤠᤱ ᤀᤠᤒᤠᤅᤣ ᤂᤧᤴ ᤗᤢᤶᤒᤠ᤺ᤳᤋᤥ ᤔᤧᤎᤠᤀᤠᤱ ᤔᤧᤔᤧᤰᤗᤖᤥ॥ 9 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤢᤸᤗᤧ ᤀᤠᤏᤡᤱᤘᤠ᤹ ᤋᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤛᤧ᤺ᤵᤋᤠᤱᤒᤠᤀᤥ ᤛᤠ᤹ᤖᤡᤰ ᤛ᤺ᤳᤋᤠᤖᤥ॥ 10 ᤀᤠᤛᤡᤰᤗᤢᤱᤔᤥᤗᤠᤶ ᤕᤜᤘᤣ ᤍᤠᤱᤒᤠᤴ ᤀᤰᤂᤣ ᤔᤧᤳᤋᤢᤱᤗᤥ. “ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤜᤧᤰᤋᤱᤒᤠ ᤜᤠᤳ ᤘᤠ᤹ᤀᤠᤱᤒᤣ᥅ ᤁᤧᤎᤢᤶᤒᤠᤜᤠ᤹ᤖᤧ ᤔᤧᤴᤎᤢᤶᤔᤏᤠᤒᤠᤜᤠ᤹ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡᤸᤗᤧ ᤂᤧᤏᤧ᤹ ᤔᤧᤴᤎᤢᤶᤔᤏᤠᤒᤠᤜᤠ᤹ ᤁᤧᤛᤧ᤺ᤵᤋᤢᤛᤡᤖᤥ. ᤜᤧᤰᤁᤩᤠᤱ ᤁᤢᤀᤡᤃᤧᤓᤧᤶᤒᤠᤜᤠ᤹ᤖᤧ ᤕᤠᤱᤃᤧᤛᤠ᤹ᤒᤠᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤸᤗᤧ ᤂᤧᤏᤧ᤹ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤏᤠᤅᤢᤛᤡᤖᤥ॥” 11 ᤁᤢᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤐᤠ᤺ᤴᤔᤧᤎᤡᤰᤁᤠᤖᤥ. ᤜᤧᤰᤁᤩᤠᤱ ᤀᤠᤏᤡᤱᤘᤠ᤹ᤖᤧ ᤔᤧᤎᤠᤵᤋᤢᤶᤒᤠ ᤐᤠ᤺ᤴᤜᤠ᤹ᤀᤥ ᤀᤠᤱᤃᤠ᤹ ᤀᤠᤵᤋᤡᤰ ᤔᤧᤃᤢ᤺ᤳᤋᤠᤖᤥ॥ 12 ᤂᤧᤱᤜᤠ᤹ᤖᤧ ᤏᤢᤒᤠ ᤕᤠ᤺ᤶᤒᤰ ᤆᤥᤃᤢᤱᤛᤠᤱ ᤀᤠᤱᤃᤠ᤹ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤠᤖᤥ. ᤜᤧᤰᤁᤩᤠᤱ ᤀᤠᤏᤡᤱᤛᤠᤱ ᤐᤢᤰᤗ ᤔᤧᤕᤠ᤺ᤴᤏᤠᤖᤥ॥ 13 ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤔᤧᤍᤢᤃᤧ ᤔᤧᤗᤠ᤺ᤰᤋᤧᤸᤗᤧ ᤀᤠᤱᤃᤠ᤹ ᤔᤧᤖᤡᤱ ᤌᤰᤔᤠ ᤆᤠᤱ ᤆᤠᤰᤛᤡᤱᤅᤠᤱᤗᤥ॥ ᤜᤧᤰᤁᤩᤠᤱ ᤋ᤺ᤰᤏᤧᤳᤋᤥ ᤕᤢᤅᤠᤱᤅᤠᤱ ᤋᤢᤰᤂᤣ ᤆᤠ᤺ᤳᤇᤡᤱᤅᤠᤱᤗᤥ. ᤀᤠᤎᤣᤃᤣ᤺ᤰᤁᤡᤴ ᤀᤡᤷᤄᤢ᤹ ᤔᤧᤳᤋᤢᤱᤅᤠᤱ ᤋᤢᤘᤠ ᤆᤥᤃᤠᤱᤗᤥ॥ 14 ᤀᤠᤱᤃᤠ᤹ ᤀᤠᤴᤈᤢᤶ ᤀᤡᤃᤪ ᤀᤠᤴᤛᤠ᤹ᤖᤧ ᤁᤢᤗᤠᤃᤡ ᤔᤧᤖᤡᤱ ᤌᤰᤋᤠᤱᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤧᤖᤡᤱ ᤆᤥ᤺ᤰᤏᤢ ᤗᤠᤱᤄᤣᤃᤠᤱᤗᤥ॥ ᤀᤠᤒᤠᤅᤣ ᤀᤠᤶᤔᤠᤖᤧ ᤁᤢᤗᤠᤃᤡ ᤜᤠᤒᤠᤱᤒᤠ ᤁᤢᤀᤡᤛᤡᤰ ᤀᤠᤏᤠᤖᤠᤴ ᤛᤥᤖᤥ ᤔᤧᤳᤋᤢᤱᤅᤠᤱ ᤔᤧᤖᤡᤱ ᤌᤰᤋᤠᤱᤗᤥ॥ 15 ᤁᤖ ᤁᤧᤛᤠᤰᤐᤠ ᤋᤢᤔᤠᤱᤅᤡᤸᤗᤧ ᤔᤧᤛ᤺ᤳᤋᤧᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤀᤠᤃᤒᤪᤡᤱ ᤔᤧᤈᤢᤵᤛᤧᤖᤥ॥ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤛᤡᤱᤅᤡᤴᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤆᤰᤔᤧᤸᤗ᤹ᤀᤣ ᤔᤧᤜᤡᤵᤋᤠᤱᤗᤥ॥ 16 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤴᤏᤡᤵᤏᤠᤒᤠ ᤔᤏᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤠᤱᤗᤥ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤠᤒᤥ᤹ᤒᤠᤴ ᤔᤧᤕᤧ᤺ᤰᤂᤢᤖ ᤀᤠᤱᤃᤠ᤹ ᤛᤠ᤹ᤖᤡᤰ ᤔᤧᤈᤡ᤺ᤳᤋᤠᤱᤗᤥ॥ 17 ᤕᤜᤘᤣ ᤍᤠᤱᤒᤠᤀᤣ. ᤀᤠᤓᤧᤸᤗᤧ ᤌᤠᤖᤡᤰ ᤀᤥᤖᤰᤁᤧᤔᤒᤣ᥅ ᤂᤧᤴ ᤁᤣᤒᤠ ᤜᤧᤰᤋᤱᤒᤠᤜᤠ᤹ᤖᤧ ᤛᤧᤵᤔᤠ ᤔᤧᤃᤥ᤺ᤳᤋᤠᤖᤥ. ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ॥ 18 ᤜᤧᤰᤁᤩᤠᤱ ᤂᤧᤏᤧ᤹ ᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤁᤧᤈᤢᤶᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤀᤠᤱᤃᤠ᤹ ᤂᤧᤏᤧ᤹ ᤏᤢᤃᤧᤴ ᤐᤡᤏᤧᤖᤥ. ᤕᤖᤡᤰ ᤔᤏᤠᤜᤠ᤹ ᤗᤢᤶᤔᤥᤗᤠᤶ ᤁᤧᤏᤠᤖᤠ ᤑᤥᤛᤢᤱᤗᤥ॥ 19 ᤔᤧᤴᤘᤠ᤹ᤔᤏᤠ ᤐᤠᤴ ᤁᤧᤒᤠ᤺ᤵᤐᤠ ᤀᤠᤏᤡᤱᤔᤡᤜᤠ᤹ ᤀᤠᤱᤃᤠ᤹ ᤜᤠᤖᤡ ᤋᤠᤀᤠᤸᤗᤧ ᤛ᤺ᤵᤔᤠ ᤔᤧᤱᤄᤥᤏᤧᤸᤗᤖᤥ॥ ᤌᤣᤏᤠᤎᤣ ᤀᤠᤱᤃᤠ᤹ ᤁᤧᤈᤡ᤺ᤵᤐᤠᤜᤠ᤹ᤖᤧ ᤋᤢᤰᤂᤣ ᤆᤠᤀᤠᤸᤗᤧ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤔᤧᤱᤄᤥᤀᤠᤴᤗᤖᤥ॥ 20 ᤂᤧᤱᤜᤠ᤹ ᤋᤱᤔᤠ ᤐᤠ᤺ᤴᤏᤣ ᤔᤧᤶᤒᤠ᤺ᤳᤏᤧᤸᤗᤥ. ᤁᤖ ᤛᤫᤠ᤺ᤳ ᤁᤧᤕᤢᤱᤒᤠ ᤔᤏᤠᤜᤠ᤹ ᤔᤧᤴᤘᤠ᤹ᤔᤏᤠᤒᤠ ᤐᤠᤴ ᤔᤧᤔᤧᤳᤋᤢᤛᤡᤀᤠᤱ ᤀᤡᤀᤥ ᤔᤧᤎᤠᤛᤢᤛᤡᤖᤥ॥ 21 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤴ ᤜᤠ ᤔᤧᤔᤧᤳᤋᤢᤀᤠᤱ ᤀᤠᤱᤃᤠ᤹ ᤀᤰᤂᤣᤗ᤹ᤖᤡᤰ ᤐᤠ᤺ᤴᤔᤧᤎᤡᤰᤁᤠᤖᤥ. “ᤂᤧᤏᤧ᤹ ᤌᤣ ᤁᤧᤈᤥᤃᤢ. ᤂᤧᤴ ᤀᤠᤏᤡᤃᤣ ᤏᤡᤛᤢᤶᤒᤧᤖᤥ᥄” 22 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤴ ᤁᤧᤏᤡᤛᤢᤀᤠᤱ ᤁᤧᤘᤠ᤹ᤖᤥ. ᤁᤸᤗᤧᤆᤥᤃᤢᤸᤗᤧ ᤍᤠᤱᤒᤣ. ᤛᤫᤠ᤺ᤳ ᤔᤧᤕᤢᤅᤧᤴᤏᤧ᤹ᤀᤥ. ᤀᤠᤱᤃᤠ᤹ᤗᤠᤶ ᤔᤠ᤺ᤱᤄᤠ ᤔᤧᤒᤣᤃᤧᤴᤏᤧ᤹ᤀᤥ॥ 23 ᤐᤥᤃᤧ᤹ᤀᤥ. ᤍᤠᤱᤒᤣ᥄ ᤜᤧᤰᤁᤩᤠᤱ ᤛᤧ᤺ᤵᤋᤠᤱᤅᤧ᤹ᤀᤥ. ᤀᤠᤏᤡᤱᤘᤠ᤹ᤑᤢᤔᤠᤱᤅᤣ᥄ ᤏᤠᤅᤠᤱᤅᤧ᤹ᤖ ᤐᤠᤖᤧ᤹ᤀᤥ॥ 24 ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤛᤠᤶᤕᤥᤒᤠ ᤁᤧᤈᤥ᤺ᤰᤗᤥ. ᤀᤠᤱᤃᤠ᤹ ᤀᤠᤀᤠᤵᤋᤡᤰ ᤜᤥᤵ ᤑᤠ᤹ᤀᤠᤱ ᤀᤠᤱᤃᤠ᤹ ᤗᤧᤵᤛᤠᤱ ᤂᤠᤛᤧᤴ ᤗᤥ᤺ᤴᤍᤠᤱ ᤐᤡᤖᤠᤱᤅᤧ᤹ᤀᤥ. ᤀᤠᤏᤡᤱᤔᤡᤜᤠ᤹ᤖᤧ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤔᤧᤱᤄᤥᤀᤠᤴᤗᤖᤥ॥ 25 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤥ. “ᤗᤢ. ᤆᤥ᤺ᤰᤔᤠ ᤁᤥ᤺ᤳᤋᤢᤶᤒᤧᤒᤠ ᤐᤠ᤺ᤴᤏᤡᤴ ᤁᤧᤖᤧᤖᤥ” ᤗ᤹ᤔᤠ ᤔᤧᤱᤄᤥᤏᤧᤸᤗᤖᤥ॥ ᤀᤡᤃᤪ “ᤀᤠᤏᤡᤃᤣ ᤂᤧᤴ ᤏᤠ᤺ᤳᤋᤢᤶᤍᤣᤛᤢᤶᤒᤧᤖᤥ᥄” ᤗ᤹ᤔᤠ ᤔᤧᤱᤄᤥᤏᤧᤸᤗᤖᤥ॥ 26 ᤀᤠᤱᤃᤠ᤹ ᤁᤧᤛᤠᤰᤐᤠ ᤋᤢᤔᤢᤱᤅᤡᤸᤗᤧ ᤁᤧᤀᤣ᤺ᤵᤐᤠᤜᤠ᤹ ᤁᤧᤖᤧᤰ ᤂᤢᤏᤡ᤹ ᤏᤠᤎᤠᤖᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤏᤠᤰᤔᤧᤒᤣ᤺ᤰᤗᤖᤥ॥ ᤀᤠᤱᤃᤠ᤹ ᤁᤧᤏᤠ᤺ᤶᤒᤠᤜᤠ᤹ ᤁᤧᤖᤧᤰ ᤛᤡᤖᤡᤱᤔᤔᤠ ᤐᤥᤱᤅᤠᤱ ᤂᤢᤏᤡ᤹ ᤏᤠᤎᤠᤖᤖᤥ॥ 27 ᤀᤠᤳᤋᤡᤴᤜᤠ᤹ᤖᤧ ᤛᤠᤶᤕᤥᤒᤠ ᤆᤥ᤺ᤰᤁᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤀᤡ᤺ᤳᤋᤢ ᤂᤧᤱᤜᤠ᤹ ᤔᤧᤛ᤺ᤳᤋᤠᤱ ᤔᤧᤀ᤺ᤰᤗᤖᤥ॥ ᤂᤧᤱᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤀᤰᤂᤣ ᤔᤧᤒᤠ᤺ᤳᤋᤢᤖᤖᤥ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤐᤥᤖᤖᤥ. ᤂᤢᤏᤧ᤹ ᤁᤧᤛᤧᤘᤠᤖᤥᤒᤠᤴ ᤏᤢ᤹ᤍᤠ᤺ᤸᤗᤧ ᤁᤢᤏᤡᤱᤘᤠ᤹ ᤋᤠᤖᤥ॥” 28 ᤀᤠᤱᤃᤠ᤹ ᤂᤧᤏᤧ᤹ ᤛᤠᤶᤕᤥᤒᤠ ᤁᤧᤈᤥᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤐᤠ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤗᤧᤴᤍᤡᤰ ᤏᤠᤶᤎᤠᤎᤠ ᤁᤧᤏᤠᤖᤠ ᤑᤥᤛᤢᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.