ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 34 - LIFOTNTᤕᤜᤘᤣ ᤍᤠᤱᤒᤠᤴ ᤁᤧᤏᤢ᤹ᤒᤠ ᤆᤥᤰ ᤍᤠᤀᤢᤍᤖᤧ ᤁᤢᤛᤠᤶᤗᤥ 1 ᤀᤠᤓᤧᤸᤗᤧᤛᤠᤱ ᤕᤜᤘᤣ ᤍᤠᤱᤒᤠᤴ ᤏᤢᤃᤧᤴ ᤐᤡᤖᤢᤱᤗᤥ. ᤆᤰᤔᤧᤸᤗ᤹ᤀᤣ ᤁᤢᤏᤠᤖᤠ ᤑᤥᤛᤢᤱᤗᤥ॥ 2 ᤀᤠᤱᤃᤠ᤹ᤃ ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤁᤢᤏᤠᤖᤠ ᤑᤥᤛᤢᤱᤗᤥ॥ ᤋᤢᤰᤂᤣ ᤗᤠᤰᤂᤣ ᤁᤧᤈᤠᤒᤠᤜᤠ᤹ᤖᤧ ᤁᤢᤏᤠᤖᤠ ᤑᤥᤛᤢᤱᤒᤠᤴ ᤔᤧᤄᤧᤵᤛᤢᤀᤠᤱ ᤔᤧᤛ᤺ᤳᤗᤖᤥ॥ 3 ᤀᤠᤱᤃᤠ᤹ᤏᤢ ᤛᤥᤖᤡᤰ ᤕᤜᤘᤣ ᤍᤠᤱᤒᤠᤴ ᤔᤡᤔᤡᤍᤡᤱ ᤐᤡᤖᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤀᤠᤏᤡ᤹ ᤛᤥᤛᤥᤖᤡᤰ ᤁᤢᤔᤡᤱᤅᤡᤴ ᤌᤠ᤺ᤱ ᤑᤥ᤺ᤰᤂᤢᤶᤗᤥ॥ 4 ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤁᤥ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢᤃᤵ ᤐᤡᤖᤠᤱᤗᤥ. ᤁᤧᤖᤧᤰ ᤀᤠᤃᤡᤔᤠ ᤀᤠᤕᤱᤔᤠᤜᤠ᤹ ᤂᤧᤳᤋᤢᤍᤣᤛᤢᤖᤥ॥ 5 ᤂᤢᤏᤧ᤹ ᤀᤥᤃᤧᤔᤧᤵᤐᤠᤜᤠ᤹ᤖᤧ ᤂᤢᤏᤡ᤹ ᤏᤠᤖᤠᤴ ᤛ᤺ᤵᤔᤠᤖᤧ ᤆᤠᤱᤈᤠᤱ ᤗ᤹ᤖᤥ. ᤜᤧᤰᤁᤩᤠᤱ ᤀᤠᤓᤧᤸᤗᤧᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤖᤠᤴ ᤏᤠᤎᤠᤔᤠᤸᤗᤧ ᤛᤥᤖᤥ ᤔᤧᤗ᤹ᤏᤧᤸᤗᤥ॥ 6 ᤆᤢᤱᤈᤡᤃᤧᤴ ᤕᤧᤳᤇᤠ ᤛᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤔᤧᤓᤠᤰᤋᤢᤒᤧᤴ ᤂᤧᤵᤛᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤧᤖᤧᤰ ᤂᤢᤏᤡ᤹ ᤋᤢᤰᤂᤣ ᤗᤠᤰᤂᤣᤜᤠ᤹ ᤂᤧᤳᤋᤢᤍᤣᤛᤢ ᤐᤡᤖᤢᤛᤡᤀᤠᤱ ᤛᤧ᤺ᤵᤋᤢᤛᤡᤖᤥ॥ 7 ᤕᤜᤘᤣ ᤍᤠᤱᤒᤠᤴ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ ᤂᤢᤏᤧ᤹ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤁᤒᤪᤡᤱ ᤁᤒᤢᤛᤡᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤛᤧ᤺ᤵᤋᤢᤛᤡᤖᤥ॥ 8 ᤕᤜᤘᤣ ᤍᤠᤱᤒᤠᤴ ᤛᤠ᤹ᤖᤡᤰ ᤁᤧᤏᤢ᤹ᤒᤠ ᤆᤥ᤺ᤰᤐᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤀᤠᤒᤠᤅᤣ ᤛᤠ᤹ᤖᤧᤀᤠᤱ ᤀᤥᤔᤧᤳᤋᤧ᤹ᤀᤥ. ᤂᤢᤏᤧ᤹ᤀᤥ ᤁᤧᤀᤡ᤺ᤶᤛᤡᤱᤒᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ॥ 9 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤔᤏᤠᤛᤣ. ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ᤖᤧ ᤆᤠᤜᤠᤒ᤻ ᤁᤧᤈᤥ᤺ᤰᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤄᤥᤛᤢᤖᤥ॥ 10 ᤁᤧᤎᤢᤶᤒᤠ ᤁᤣᤒᤠᤜᤠ᤹ ᤛᤠᤰᤔᤧᤴᤈᤠ ᤐᤥᤱᤔᤠ ᤔᤧᤛᤢᤰᤗᤥ. ᤁᤖ ᤕᤜᤘᤣ ᤍᤠᤱᤒᤠᤴ ᤁᤧᤃᤥ᤺ᤵᤐᤠᤜᤠ᤹ᤃ ᤀᤠᤰᤋᤱᤒᤠ ᤏᤢᤒᤠ ᤐᤠ᤺ᤴᤜᤠ᤹ ᤂᤥᤔᤠ ᤁᤧᤒᤥᤱᤒᤠ ᤘᤠ᤹ᤛᤠᤱ ᤁᤧᤛᤠᤰᤐᤥ ᤔᤧᤴᤎᤠᤏᤧᤴᤗᤥ॥ 11 ᤀᤠᤛ᤻ᤛᤠᤛᤣ. ᤋᤩᤧᤶᤔᤧ᤹ᤀᤠᤱ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤠᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤜᤢ᤹ᤏᤡᤱᤗᤥ॥ 12 ᤂᤡᤏᤡ᤹ ᤗᤢᤶᤔᤥ ᤜᤠ᤺ᤳᤗᤧ ᤕᤖᤡᤰ ᤜᤡᤱᤔᤠ ᤁᤢᤛᤡᤖᤠ᤹ᤌᤠᤱᤒᤣ ᤜᤧᤰᤁᤩᤠᤱ ᤏᤢ᤹ᤔᤠᤍᤠᤔᤠ ᤏᤡᤱᤘᤠ᤹ ᤆᤥᤃᤢᤒᤣ᥅ 13 ᤂᤧᤴ ᤋᤠᤵᤑᤧ᤺ᤶᤒᤠ ᤐᤠᤴ ᤔᤧᤒᤠ᤺ᤳᤏᤧᤸᤗᤖᤥ ᤜᤧᤰᤁᤩᤠᤱ ᤀᤡᤱᤗᤧᤰ ᤐᤠ᤺ᤴᤏᤠᤱ ᤔᤧᤒᤠ᤺ᤳᤏᤧᤸᤗᤖᤥ॥ 14 ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤏᤢ᤺ᤰᤂᤧ᤹ᤀᤠᤱ ᤏᤢᤒᤠ ᤕᤠ᤺ᤶᤒᤰ ᤆᤥᤃᤧ᤹ᤀᤥ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤏᤢ ᤛᤏᤠᤖᤢᤱᤅᤥ ᤘᤕᤧ᤹ᤀᤥ॥ 15 ᤕᤜᤘᤣ ᤍᤠᤱᤒᤧᤸᤗᤧ ᤛᤠᤶᤕᤥᤒᤠᤜᤠ᤹ ᤀᤥᤔᤧᤳᤋᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤐᤣᤗᤡᤴ ᤂᤧᤵᤛᤢᤖᤥ॥ 16 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤀᤳᤋᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤏᤡᤱᤘᤠ᤹ᤀᤠᤱ ᤔᤧᤴᤕᤠᤰᤁᤣ ᤌᤠᤖᤡᤰ ᤀᤡᤰᤛᤠ ᤂᤠᤶᤒᤣ᤺ᤰᤁᤥᤗᤠᤶ ᤔᤠᤛᤢᤛᤡᤖᤥ॥ 17 ᤛᤠᤶᤕᤥᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤔᤧᤓᤠᤰᤋᤢᤸᤗᤧ ᤂᤢᤏᤧ᤹ ᤂᤧᤵᤛᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤁᤧᤖᤧᤰ ᤋᤢᤰᤂᤣ ᤗᤠᤰᤂᤣᤜᤠ᤹ ᤂᤧᤳᤋᤢᤍᤣᤛᤢᤀᤠᤱ ᤛᤧ᤺ᤵᤋᤢᤛᤡ᤹ᤖᤥ॥ 18 ᤁᤢᤏᤡᤱᤘᤠ᤹ ᤁᤧᤍᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤐᤣᤛᤠᤱ ᤕᤜᤘᤣ ᤍᤠᤱᤒᤠᤴ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤢᤏᤡᤱᤛᤠᤱ ᤁᤧᤒᤢᤰᤐᤠᤜᤠ᤹ ᤁᤧᤖᤧᤰ ᤂᤢᤏᤧ᤹ ᤛᤧ᤺ᤵᤋᤢᤛᤡᤖᤥ॥ 19 ᤛᤠᤶᤕᤥᤒᤠ ᤔᤏᤠᤴ ᤕᤖᤡᤰ ᤀᤡᤏᤥᤃᤧᤴ ᤋᤢᤰᤂᤣ ᤗᤠᤰᤂᤣᤖᤧ ᤋᤧᤳᤋᤢᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤐᤡᤛᤠᤱᤗᤠᤶ ᤂᤧᤴ ᤛᤧ᤺ᤵᤋᤢᤖᤥ॥ 20 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤸᤗᤧ ᤁᤧᤖᤧᤰ ᤁᤢᤕᤧᤵᤐᤠᤜᤠ᤹ ᤛᤧ᤺ᤵᤋᤢᤖᤥ. ᤂᤧᤴ ᤁᤢᤕᤧᤵᤐᤠᤜᤠ᤹ ᤌᤡᤰᤁᤠᤱ ᤔᤧᤈᤧᤰᤏᤧᤸᤗᤥ॥ 21 ᤁᤢᤀᤡᤃᤧᤓᤧᤶᤒᤠ ᤔᤏᤠᤜᤠ᤹ ᤂᤢᤏᤡ᤹ ᤀᤠᤒᤠᤅᤣ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤔᤧᤰᤂᤢᤛᤡᤖᤥ. ᤜᤧᤰᤁᤩᤠᤱ ᤛᤠᤶᤕᤥᤒᤠ ᤔᤏᤠ ᤁᤧᤈᤡ᤺ᤵᤐᤠᤜᤠ᤹ᤖᤧ ᤂᤢᤶᤍᤡᤱ ᤔᤧᤄᤥᤛᤢᤖᤥ॥ 22 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ ᤛᤧ᤺ᤵᤋᤢᤛᤡᤖᤥ. ᤂᤢᤏᤧ᤹ᤀᤥ ᤀᤡ᤺ᤶᤛᤡᤱᤛᤧ ᤁᤧᤍᤠᤒᤠᤜᤠ᤹ ᤔᤧᤍᤠᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.