ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 33 - LIFOTNTᤏᤠᤖᤠᤑᤥᤔᤠ ᤛᤧᤘᤠᤛᤠᤶᤗᤥ 1 ᤛᤠᤶᤕᤥᤒᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤛᤡᤰᤛᤶᤗ ᤛᤠᤶᤗᤥᤖᤧᤶᤔᤧ᤹ᤀᤥ॥ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ ᤁᤧᤃᤵᤐᤠᤜᤠ᤹ᤖᤧ ᤂᤢᤏᤧ᤹ ᤁᤢᤏᤠᤖᤠ ᤑᤥᤔᤠ ᤗᤠ᤹ᤖᤢᤖᤥ॥ 2 ᤔᤢᤰᤗᤠ ᤔᤢᤰᤂᤧᤶᤔᤧ᤹ᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ. ᤋᤢᤱᤏᤠ ᤜᤡᤵᤋᤧᤶᤔᤧ᤹ ᤜᤧᤰᤁᤩᤠᤱ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤖ ᤛᤠᤶᤗᤥᤖᤧᤶᤔᤧ᤹ᤀᤥ॥ 3 ᤂᤢᤏᤧ᤹ ᤁᤢᤗᤠᤃᤡ ᤁᤢᤛᤱ ᤛᤧᤘᤠᤛᤠᤶᤗᤥᤎᤡᤰ ᤛᤠᤶᤔᤧᤳᤋᤧᤶᤔᤧ᤹ᤀᤥ. ᤏᤢᤖᤡᤰᤁᤠᤱ ᤔᤢᤰᤗᤠᤜᤠ᤹ ᤔᤢᤰᤂᤧᤶᤔᤧ᤹ᤀᤠᤱ ᤀ᤺ᤰᤋᤧᤶᤔᤧ᤹ᤖ ᤛ᤺ᤳᤋᤧᤶᤔᤧ᤹ᤀᤥ॥ 4 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤏᤛᤠᤴ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤏᤢ ᤛᤧᤰᤂᤠᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤁᤢᤕᤠ᤺ᤶᤒᤰᤜᤠ᤹ ᤁᤧᤖᤧᤰ ᤏᤛᤠ᤺ᤴᤛᤠᤒᤠ ᤆᤥᤰᤗᤥ॥ 5 ᤕᤜᤘᤣ ᤍᤠᤱᤒᤧᤸᤗᤧ ᤛᤠᤶᤕᤥᤒᤠ ᤏᤢ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ॥ ᤂᤢᤏᤧ᤹ ᤛᤧᤰᤂᤠᤒᤠ ᤁᤢᤔᤡ᤺ᤶᤈᤡ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤌᤡᤶᤛᤢᤀᤠᤱ ᤘᤠ᤹ᤖᤥ॥ 6 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤋᤖ᤺ᤱᤃᤧᤴ ᤋᤠᤱᤛᤠᤰᤐᤠᤴ ᤆᤥᤃᤢᤖᤥ. ᤜᤧᤰᤁᤩᤠᤱ ᤛᤠ᤺ᤱᤃᤢᤃᤧᤴ ᤁᤢᤛᤰᤔᤠ᤺ᤸᤗᤧ ᤂᤣ᤺ᤶᤛᤡᤰᤐᤠᤜᤠ᤹ ᤆᤥᤃᤢᤛᤡᤖᤥ॥ 7 ᤂᤢᤏᤧ᤹ ᤘᤖᤰᤁᤥᤒᤠ ᤆᤫᤠ᤺ᤳᤋᤡᤴ ᤌᤡᤰᤋᤧᤴᤏᤥ ᤑᤢᤰᤂᤢᤖᤥ. ᤂᤢᤏᤧ᤹ ᤁᤢᤍᤡᤶᤒᤣ ᤁᤣ᤺ᤶᤒᤠ ᤘᤖ᤺ᤱᤜᤠ᤹ ᤔᤏᤠ᤺ᤸᤗᤧ ᤁᤢᤈᤠᤴ ᤆᤠᤕᤠᤱᤍᤧᤴᤏᤥ ᤛᤢᤵᤛᤢᤒᤠ ᤁᤢᤀᤡᤛᤡ᤺ᤰᤁᤣ ᤌᤡᤰᤋᤧᤴᤏᤥ ᤗᤢᤵᤛᤢᤖᤥ॥ 8 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤛᤧᤘᤠ ᤔᤧᤔᤧᤳᤋᤢᤖᤖᤥ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤖᤖᤥ॥ 9 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧ ᤁᤧᤖᤧᤰ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤡᤱᤈᤠᤱᤗᤠᤶᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤖᤥ॥ 10 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢᤒᤠ ᤕᤠ᤺ᤶᤒᤰᤜᤠ᤹ ᤑᤥ᤺ᤳᤋᤢ ᤐᤡᤖᤢᤛᤡᤖᤥ॥ ᤜᤧᤰᤁᤩᤠᤱ ᤔᤧᤛᤥ᤺ᤰᤋᤢᤒᤠ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤆᤥᤃᤢ ᤐᤡᤖᤢᤛᤡᤖᤥ॥ 11 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤛᤣ᤺ᤰᤜᤠ᤹ ᤛᤍᤠᤍᤡᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤢᤛᤡᤰᤗᤢᤱᤔᤥᤒᤠ ᤁᤢᤏᤡᤱᤘᤠ᤹ ᤐᤠ᤺ᤴᤜᤠ᤹ ᤀᤠᤓᤧᤸᤗᤧ ᤌᤠᤖᤡᤰᤛᤠᤱ ᤘᤠ᤹ᤖᤥ॥ 12 ᤕᤜᤘᤣ ᤍᤠᤱᤒᤠᤴ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤥ ᤁᤧᤗ᤹ᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤂᤢᤏᤧ᤹ ᤁᤢᤗᤰ ᤂᤥᤛᤧ ᤛᤣᤃᤢᤛᤡᤒᤠᤜᤠ᤹ᤀᤠᤱ ᤔᤢ᤹ᤀᤡᤛᤠᤒᤠᤛᤡᤖᤥ॥ 13 ᤕᤜᤘᤣ ᤍᤠᤱᤒᤠᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤥ ᤀᤥᤔᤖᤥ. ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤡᤛᤢᤛᤡᤖᤥ॥ 14 ᤂᤢᤏᤧ᤹ ᤀᤠᤒᤠᤅᤣ ᤁᤢᤕᤢᤱᤔᤠᤍᤧᤴᤏᤥᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤕᤢᤱᤒᤠ ᤁᤧᤖᤧᤰ ᤔᤏᤠᤜᤠ᤹ ᤀᤥᤔᤧᤳᤋᤢᤛᤡᤖᤥ॥ 15 ᤂᤢᤏᤧ᤹ ᤁᤧᤖᤧᤰᤗᤧ ᤂᤢᤏᤡ᤹ ᤏᤡᤱᤘᤠ᤹ ᤁᤧᤀᤡ᤺ᤵᤐᤠ ᤛᤡᤰᤗᤢᤱᤔᤠᤴ ᤆᤥᤃᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤢᤖᤥ॥ 16 ᤜᤠᤱᤅᤡᤸᤗᤧ ᤕᤖᤡᤰ ᤌᤰᤛᤢᤒᤠᤜᤠ᤹ ᤁᤳᤋᤢᤛᤡᤒᤠᤸᤗᤧᤖᤰ ᤌᤱ ᤏᤠ᤺ᤶᤔᤠ ᤔᤧᤛᤢᤰᤋᤢᤴᤗᤥ. ᤜᤧᤰᤁᤩᤠᤱ ᤌᤰᤛᤢᤒᤠᤴ ᤁᤧᤎᤢᤶᤒᤠ ᤆᤥ᤺ᤰᤛᤠᤱ ᤂᤢᤏᤧ᤹ ᤛᤧ᤺ᤵᤛᤡᤱᤔᤠ ᤔᤧᤛᤢᤰᤏᤧᤸᤗᤥ॥ 17 ᤀᤴᤜᤠ᤹ᤗᤠᤶᤒᤠ ᤌᤱ ᤆᤥ᤺ᤰᤔᤠ ᤏᤠ᤺ᤴᤍᤧᤳ ᤑᤠ᤹ᤀᤠᤱ ᤀᤡ᤺ᤵᤔᤠᤃ ᤜᤏᤧᤖᤰᤗᤥ. ᤂᤧᤴ ᤀᤴᤜᤠ᤹ ᤁᤧᤎᤢᤶᤒᤠ ᤔᤧᤈᤥ᤺ᤰᤛᤠᤱ ᤜᤠ᤺ᤳᤋᤠᤱ ᤛᤧ᤺ᤵᤔᤠ ᤔᤧᤴᤇᤢᤰᤋᤢᤸᤗᤥ॥ 18 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤜᤧᤰᤁᤩᤠᤱ ᤂᤢᤏᤧ᤹ ᤛᤧᤰᤂᤠ ᤗᤢᤱᤔᤠ᤹ ᤀᤠᤍᤢᤰ ᤑᤠ᤹ᤀᤠᤱ ᤂᤢᤏᤧ᤹ᤀᤥ ᤏᤡᤱᤘᤠ᤹ ᤁᤧᤕᤢᤱᤒᤠᤜᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ॥ 19 ᤂᤢᤏᤧ᤹ ᤂᤧᤱᤜᤠ᤹ ᤛᤡᤔᤠᤗᤠᤶ ᤛᤧ᤺ᤵᤋᤢᤛᤡᤖᤥ. ᤜᤧᤰᤁᤩᤠᤱ ᤛᤠᤰᤘᤠ᤺ᤴᤏᤥ ᤁᤢᤜᤡᤱᤘᤧᤳ ᤁᤳᤋᤢᤛᤡᤖᤥ॥ 20 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶᤔᤡᤴ ᤀᤥᤔᤧᤳᤋᤢᤶᤒᤧᤖᤥ. ᤂᤢᤏᤧ᤹ᤀᤣ ᤀᤠᤏᤡᤃᤣ ᤑᤠ᤹ᤖᤡᤃᤧ ᤜᤧᤰᤁᤩᤠᤱ ᤌᤣ᤺ᤰᤋᤡᤃᤧᤖᤥ॥ 21 ᤂᤢᤏᤧ᤹ ᤆᤥᤃᤢᤒᤠ ᤐᤠ᤺ᤴᤜᤠ᤹ᤖᤧ ᤆᤥᤃᤢᤸᤗᤧ ᤛ᤺ᤳᤋᤡᤃᤧᤖᤥ. ᤌᤣᤀᤠᤱᤓᤧᤸᤗᤧ ᤁᤢᤛᤣᤛᤣ ᤔᤡᤱᤅᤥ ᤋᤠ᤺ᤰᤐᤥ ᤆᤥᤃᤢᤶᤒᤧᤖᤥ॥ 22 ᤕᤜᤘᤣ ᤍᤠᤱᤒᤠᤀᤣ. ᤀᤠᤏᤡᤃᤣ ᤂᤧᤏᤧ᤹ᤀᤥ ᤏᤡᤱᤛᤠᤱ ᤆᤥᤃᤢᤶᤒᤧᤖᤥ. ᤛᤧᤰᤂᤠᤒᤠ ᤁᤧᤔᤡ᤺ᤶᤈᤡᤴ ᤛᤍᤠᤍᤡᤱ ᤀᤠᤏᤡᤃᤧᤏᤢ ᤘᤠ᤹ᤖᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.