ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 32 - LIFOTNT

ᤗᤧᤵᤔᤡ ᤁᤧᤄᤥᤒᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ

ᤔᤛ᤻ᤁᤡᤗ ᤔᤧᤵᤔᤏᤠᤒᤠ ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤁᤢᤗᤠᤕᤥ ᤗᤧᤵᤔᤡ ᤁᤧᤒᤥᤱᤒᤠ ᤔᤏᤠᤴ ᤔᤢ᤹ᤀᤡᤛᤠᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤓᤧᤴ ᤕᤠ᤺ᤶᤒᤰᤜᤠ᤹ ᤗᤧᤵᤔᤡ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥

² ᤕᤜᤘᤣ ᤍᤠᤱᤒᤧᤸᤗᤧ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤀᤡ᤺ᤳᤋᤢᤒᤠ ᤔᤏᤠ᤺ᤱᤃ ᤔᤢ᤹ᤀᤡᤛᤠᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤏᤡᤱᤘᤠ᤹ᤀᤥ ᤋᤠᤵᤑᤧ᤺ᤶᤒᤠ ᤜᤥᤵᤗᤥ॥

³ ᤗᤠᤕᤥ ᤆᤥᤃᤢᤱᤅᤠᤱ ᤗᤧᤵᤔᤡ ᤔᤧᤴᤏᤠ᤺ᤰᤁᤣ ᤀᤠᤱᤃᤠ᤹ ᤛᤫᤠ᤺ᤳ ᤕᤢᤅᤠᤱᤅᤡᤸᤗᤧ ᤜᤧᤰᤁᤩᤠᤱ ᤗᤧᤴᤍᤡᤰ ᤏᤠᤶᤎᤠᤎᤠ ᤜᤠᤒᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤕᤧᤵᤐᤠᤜᤠ᤹ ᤕᤖᤧᤖᤥ॥

⁴ ᤛᤧᤴᤍᤡᤰ ᤗᤧᤴᤍᤡᤰ ᤀᤠᤱᤃᤠ᤹ ᤂᤢᤶᤍᤡᤱ ᤁᤧᤒᤡᤖᤠᤱᤗᤥ. ᤜᤠᤱᤘᤠᤛᤧ᤺ᤸᤗᤧ ᤆᤫᤠ᤺ᤳᤋᤡᤴ ᤜᤣᤒᤠ ᤁᤢᤀᤡᤛᤡᤰ ᤁᤢᤛ᤻ᤛᤠ᤹ᤀᤡ ᤔᤧᤴᤕᤠᤰᤔᤏᤠᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ ᤛᤣᤗᤠ

⁵ ᤜᤧᤰᤁᤩᤠᤱ ᤗᤠᤕᤥ ᤆᤥᤃᤢᤱᤒᤠ ᤐᤠ᤺ᤴᤜᤠ᤹ ᤁᤧᤍᤃᤡ ᤐᤠ᤺ᤳᤋᤢᤱᤗᤥ॥ ᤑᤧᤴᤕᤠ᤺ᤶᤒᤰ ᤆᤥᤃᤢᤱᤒᤠ ᤐᤠ᤺ᤴᤜᤠ᤹ ᤔᤧᤶᤔᤠ᤹ᤒᤠᤖᤥ. ᤁᤖ ᤀᤠᤱᤃᤠ᤹ ᤀᤠᤗᤠᤕᤥᤜᤠ᤹ ᤏᤢ ᤀᤠᤓᤧᤴ ᤕᤠ᤺ᤶᤒᤰᤜᤠ᤹ ᤁᤧᤍᤃᤡ ᤐᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤗᤠᤕᤥᤜᤠ᤹ ᤁᤧᤄᤧᤳᤋᤢ ᤁᤧᤍᤣᤛᤢᤀᤠᤱ ᤗᤧᤵᤔᤡ ᤁᤧᤒᤡᤖᤠᤱᤗᤥ॥ ᤛᤣᤗᤠ

⁶ ᤂᤧᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤛᤧᤘᤠᤛᤠᤶᤒᤠᤜᤠ᤹ᤖᤧ. ᤕᤧᤶᤔᤡᤴ ᤘᤠ᤹ᤖ ᤌᤠᤖᤡᤰ ᤐᤣᤗᤡᤃᤧᤴ ᤋᤢᤘᤠ ᤁᤧᤶᤈᤥ᤺ᤰᤗᤖᤥ॥ ᤜᤧᤰᤁᤩᤠᤱ ᤘᤠᤓᤧᤸᤗᤧᤱ ᤜᤧᤰᤋᤱᤒᤠ ᤋᤢᤰᤂᤣ ᤗᤠᤰᤂᤣᤜᤠ᤹ ᤂᤧᤱᤜᤠ᤹ᤀᤥ ᤋᤠᤔᤠ ᤔᤧᤛᤢᤰᤏᤧᤸᤗᤥ॥

⁷ ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤈᤡᤱᤛᤡᤱᤔᤠ ᤋᤧᤴᤏᤧᤖᤥ. ᤂᤧᤏᤧ᤹ᤃ ᤋᤢᤰᤂᤣᤗᤠᤰᤂᤣᤀᤥ ᤁᤧᤛᤧ᤺ᤵᤐᤠᤖᤥ. ᤀᤠᤱᤃᤠ᤹ ᤁᤧᤛᤧ᤺ᤵᤋᤠᤱᤒᤠᤸᤗᤧ ᤆᤥᤃᤢᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤛᤠᤶᤗᤥᤀᤠᤖᤥ॥ ᤛᤣᤗᤠ

⁸ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤂᤧᤏᤧ᤹ ᤗᤠᤱᤄᤣ᤺ᤰᤔᤠ ᤁᤧᤒᤥᤱᤒᤠ ᤗᤠᤶᤔᤡᤴ ᤀᤠᤱᤃᤠ᤹ ᤀᤥᤛᤣ᤺ᤴᤎᤠᤰᤏᤧᤖᤥ ᤂᤧᤏᤧ᤹ ᤛᤢᤈᤠ ᤐᤡᤏᤧᤀᤠᤱ ᤀᤥᤔᤧᤳᤏᤧᤖᤥ॥

⁹ ᤁᤢᤏᤧᤜᤡ ᤁᤧᤜᤥᤵᤐᤠ ᤀᤴ ᤀᤡᤃᤪ ᤀᤍᤱ ᤜᤧᤰᤋᤱᤒᤠ ᤔᤧᤒᤥ᤺ᤰᤂᤧᤴᤏᤧ᤹ᤀᤥ. ᤂᤧᤱᤜᤠ᤹ ᤂᤢᤶᤔᤠᤛᤡᤖᤧ ᤗᤠᤃᤡ ᤁᤖᤣᤗᤡ ᤏᤢ ᤁᤢᤀᤢ᤺ᤱᤔᤠ ᤁᤢᤍᤧᤶᤔᤠ ᤆᤠᤜᤠᤒ᤻ ᤆᤥᤰᤗᤥ ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ ᤁᤧᤜᤢᤰᤁᤥ ᤔᤧᤴᤍᤠᤏᤧᤴᤗᤥ॥”

¹⁰ ᤁᤢᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤕᤖᤡᤰ ᤋᤢᤰᤂᤣ ᤗᤠᤰᤂᤣᤜᤠ᤹ ᤔᤧᤍᤢᤔᤢᤖᤥ. ᤁᤖ ᤕᤜᤘᤣ ᤍᤠᤱᤒᤠᤀᤥ ᤋᤠ᤺ᤰᤐᤥ ᤁᤧᤈᤥ᤺ᤰᤐᤠᤜᤠ᤹ᤃ ᤂᤢᤏᤧ᤹ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ॥

¹¹ ᤛᤠᤶᤕᤥᤒᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤢᤒᤠ ᤐᤠ᤺ᤴᤜᤠ᤹ᤖᤧ ᤆᤥᤃᤢᤸᤗᤧ ᤛ᤺ᤳᤋᤧᤶᤔᤧ᤹ᤀᤠᤱ ᤏᤡᤱᤘᤠ᤹ ᤋᤠᤛᤧᤶᤔᤧ᤹ᤀᤥ॥ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ ᤁᤧᤃᤵᤐᤠᤛᤣ. ᤂᤡᤏᤡ᤹ ᤁᤧᤖᤧᤰ ᤛ᤺ᤳᤋᤧᤶᤔᤧ᤹ᤀᤠᤱ ᤛᤡᤰᤛᤶᤗ ᤀ᤺ᤰᤋᤧᤶᤔᤧ᤹ᤀᤥ॥