ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 31 - LIFOTNTᤕᤧᤳᤋᤢᤰᤂᤣ ᤀᤠᤍᤢᤶᤔᤡᤸᤗᤧᤒᤠ ᤐᤣᤗᤡ ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ 1 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤂᤧᤏᤧ᤹ᤀᤥ ᤀᤡ᤺ᤶᤛᤡᤱᤛᤧ ᤋᤩᤠᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤱᤃᤠ᤹ᤃ ᤀᤠᤓᤧᤸᤗᤧᤀᤠᤱ ᤛᤡᤖᤡᤱᤔᤔᤠ ᤔᤧᤒᤥᤱᤏᤧᤸᤗᤖᤥ. ᤛᤠᤶᤕᤥᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ ᤛᤧ᤺ᤵᤋᤠᤱᤅᤧ᤹ᤀᤥ॥ 2 ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧᤒᤠᤴ ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤂᤡᤔᤥ ᤛᤧ᤺ᤵᤋᤠᤱᤅᤧ᤹ᤀᤥ॥ ᤂᤧᤏᤧ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤏᤢ ᤕᤠᤵᤔᤡ ᤀᤠᤎᤣ᤺ᤰᤌᤣ᤺ᤰᤐᤠ ᤕᤰ ᤐᤥ᤺ᤰᤂᤧ᤹ᤀᤥ॥ ᤂᤧᤏᤧ᤹ᤀᤣ ᤕᤠᤰᤐᤣ᤹ ᤁᤢᤀᤡᤛᤡᤰ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ ᤌᤣ᤺ᤰᤋᤠᤱᤅᤧ᤹ᤀᤥ॥ 3 ᤂᤧᤏᤧ᤹ᤀᤣ ᤀᤠᤱᤃᤠ᤹ ᤀᤠᤕᤠᤰᤐᤣ᤹ ᤏᤢ ᤀᤠᤱᤃᤠ᤹ ᤀᤠᤛᤧ᤺ᤵᤛᤡᤱᤔᤠ ᤕᤰᤏᤧᤖᤥ॥ ᤁᤧᤔᤡᤱᤛᤥ ᤀᤡᤱᤎᤠᤱᤗᤧ ᤗᤠᤃᤡ ᤀᤠᤱᤃᤠ᤹ ᤗᤠᤶᤗᤥᤛᤠᤱᤅᤧ᤹ ᤗᤠᤱᤄᤣ᤺ᤰᤂᤠᤱᤅᤧ᤹ᤀᤥ॥ 4 ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ᤖᤧ ᤔᤧᤕᤢᤰᤋᤠᤱᤒᤠ ᤀᤡᤈᤥᤀᤥᤗᤠᤶ ᤀᤠᤱᤃᤠ᤹ ᤗ᤺ᤳᤋᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤀᤣ ᤀᤠᤀᤡ᤺ᤶᤛᤡᤱᤔᤠ ᤋᤧᤴᤏᤧᤖᤥ॥ 5 ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤂᤧᤏᤧ᤹ ᤜᤢᤰᤛᤢᤵᤏᤧᤖᤥ॥ ᤕᤜᤘᤣ ᤍᤠᤱᤒᤠᤀᤣ. ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ॥ 6 ᤜᤏᤧᤒᤠ ᤏᤠᤘᤠᤀᤡᤳᤗᤠ ᤔᤠᤱᤃᤧᤄᤒᤠᤜᤠ᤹ ᤆᤡ᤺ᤳᤋᤢᤱᤛᤡᤱᤗᤥ. ᤁᤖ ᤀᤠᤱᤃᤠ᤹ᤃ ᤕᤜᤘᤣ ᤍᤠᤱᤒᤠᤴᤏᤣ ᤋᤠ᤺ᤰᤐᤥ ᤆᤥᤃᤢᤱᤗᤥ॥ 7 ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤁᤧᤍᤢᤰᤁᤠᤒᤠᤸᤗᤧ ᤆᤥᤃᤢᤸᤗᤧ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤋᤠ᤹᤺ ᤜᤧᤰᤁᤩᤠᤱ ᤛ᤺ᤳᤋᤠᤖᤥ. ᤌᤣᤀᤠᤱᤓᤧᤸᤗᤧ ᤀᤠᤍᤢᤰᤂᤣ ᤀᤠᤗᤠᤰᤂᤣᤜᤠ᤹ ᤁᤧᤏᤡᤛᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤏᤡᤱᤘᤠ᤹ ᤋᤢᤰᤂᤣ ᤆᤠᤒᤧᤴᤏᤠᤱ ᤁᤧᤏᤡᤛᤢᤖᤥ॥ 8 ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤌᤠᤔᤠ ᤁᤧᤶᤒᤠᤱᤄᤠᤱᤅᤡᤸᤗᤥ. ᤁᤖ ᤋᤠᤶᤍᤠᤶᤒᤠ ᤋᤧᤴᤏᤥ ᤁᤧᤕᤧᤵᤛᤠᤱᤅᤠᤱ ᤘᤠ᤹ᤀᤠᤖᤥ॥ 9 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤐᤕᤶ ᤕᤶᤒᤠ ᤋᤢᤰᤂᤣᤀᤥ ᤌᤩᤠᤱᤅᤠᤱ ᤘᤠ᤹ᤀᤠᤖᤥ॥ ᤔᤧᤖᤡᤱ ᤌᤰᤔᤠᤖᤧ ᤀᤠᤔᤡᤰᤁᤡᤴ ᤂᤠᤍᤠᤵᤋᤢᤀᤠᤱ ᤘᤠ᤹ᤖᤥ. ᤀᤠᤏᤡᤱᤘᤠ᤹ᤛᤠᤶᤔᤥ ᤏᤢ ᤏᤠᤛᤡᤱᤃᤧᤴ ᤀᤠᤎᤰᤁᤥ ᤛᤠ᤹ᤖᤡᤰ ᤏᤠᤛᤠᤱᤅᤠᤱ ᤘᤠ᤹ᤀᤠᤖᤥ॥ 10 ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠᤖᤧ ᤏᤠᤛᤠᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤜᤠ᤺ᤵᤔᤠᤖᤧ ᤜᤠ᤺ᤵᤔᤠᤖᤧ ᤀᤠᤱᤃᤠ᤹ ᤀᤠᤎᤠᤰ ᤛ᤹ᤖᤧᤀᤠᤱ ᤘᤠ᤹ᤖᤥ॥ ᤀᤠᤱᤃᤠ᤹ ᤀᤠᤍᤢᤰᤂᤣ᤺ᤸᤗᤧ ᤆᤥᤃᤢᤸᤗᤧ ᤁᤢᤛ᤻ᤛᤠ᤹ᤀᤡ ᤔᤧᤴᤕᤠᤰᤔᤏᤠᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤕᤧᤵᤐᤠᤜᤠ᤹ᤀᤠᤱ ᤕᤖᤧᤒᤣᤀᤠᤱ ᤘᤠ᤹ᤖᤥ॥ 11 ᤁᤧᤖᤧᤰ ᤀᤠᤏᤡᤱᤔᤡᤜᤠ᤹ᤖᤧ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤠᤖᤥ ᤜᤧᤰᤁᤩᤠᤱ ᤀᤠᤒᤠᤱᤓᤣ᤹ᤛᤠᤒᤠᤜᤠ᤹ᤖᤧᤀᤠᤱ ᤀᤠᤱᤃᤠ᤹ ᤁᤢᤛᤢᤶᤔᤧᤴᤍᤶᤔᤏᤠ ᤔᤧᤔᤧᤳᤋᤠᤖᤥ॥ ᤀᤠᤱᤃᤠ᤹ ᤀᤠᤍᤢᤰᤂᤣ᤺ᤸᤗᤧ ᤆᤥᤃᤢᤸᤗᤧ ᤀᤠᤴᤈᤢᤶᤜᤠ᤹ᤖᤧᤀᤠᤱ ᤔᤧᤃᤡᤳᤋᤠᤖᤥ॥ ᤗᤠᤶᤗᤠᤶᤔᤥ ᤔᤏᤠᤜᤠ᤹ᤖᤧ ᤔᤧᤍᤢᤶᤔᤠᤸᤗᤧ ᤂᤧᤱᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤥ॥ 12 ᤀᤠᤱᤃᤠ᤹ ᤛᤩᤠᤱᤅᤠᤱ ᤜᤥ᤺ᤵᤐᤠᤒᤠ ᤁᤢᤀᤡᤛᤡᤰ ᤁᤧᤖᤧᤰᤗᤧ ᤏᤡᤱᤘᤠ᤹ ᤔᤧᤓᤣ᤺ᤳᤇᤠᤱᤗᤥ. ᤀᤠᤱᤃᤠ᤹ᤃ ᤁᤧᤜᤧ᤺ᤵᤐᤠ ᤂᤣ᤺ᤰᤕᤠ ᤋᤧᤖᤧᤱ ᤜᤧᤰᤁᤣ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ 13 ᤕᤖᤡᤰ ᤀᤠᤏᤡᤱᤔᤡᤜᤠ᤹ᤖᤧ ᤆᤧ᤹ᤕᤠ ᤔᤧᤔᤧᤳᤋᤠᤱᤒᤠ ᤀᤠᤱᤃᤠ᤹ ᤂᤧᤵᤛᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ. ᤀᤠᤳᤋᤡᤛᤠᤱ ᤁᤡᤔᤠ ᤕᤱᤔᤠᤖᤰ ᤘᤠ᤹ᤖᤥ॥ ᤂᤧᤱᤜᤠ᤹ ᤔᤧᤍᤱᤅᤠᤱ ᤆᤧᤶᤓᤴ ᤔᤧᤈᤥᤰᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤧᤵᤔᤠ ᤑᤠ᤹ᤀᤠᤱ ᤛᤫᤠ᤺ᤳᤋᤠᤱ ᤐᤠ᤺ᤴᤔᤧᤍᤱᤄᤢᤖᤥ॥ 14 ᤁᤖ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ᤃ ᤂᤧᤏᤧ᤹ᤀᤣ ᤋᤠ᤺ᤰᤐᤥ ᤆᤥ᤺ᤰᤏᤧᤖᤥ. ᤜᤧᤰᤁᤩᤠᤱ ᤐᤠ᤺ᤳᤋᤢᤱᤗᤥ. “ᤂᤧᤏᤧ᤹ᤀᤣ ᤀᤠᤏᤡᤱᤘᤠ᤹ᤑᤢᤔᤠᤱᤏᤧᤖᤥ॥” 15 ᤀᤠᤱᤃᤠ᤹ ᤛᤍᤠᤍᤡᤱ ᤁᤧᤜᤢᤰᤁᤥ ᤘᤠ᤹ᤀᤠᤖᤥ. ᤀᤠᤱᤃᤠ᤹ ᤋᤢᤰᤂᤣ ᤁᤧᤈᤠ᤺ᤵᤐᤠ ᤀᤠᤏᤡᤱᤔᤡᤜᤠ᤹ᤗᤠᤶ ᤛᤧ᤺ᤵᤋᤠᤱᤅᤧ᤹ᤀᤥ॥ 16 ᤂᤧᤏᤧ᤹ ᤁᤧᤏᤠᤖᤠ᤺ᤸᤗᤧ ᤁᤧᤛᤧᤘᤠᤖᤥᤒᤠᤜᤠ᤹ ᤌᤥ᤹ᤖᤢᤛᤡᤖᤖᤥ. ᤜᤧᤰᤁᤩᤠᤱ ᤆᤰᤔᤧᤸᤗ᤹ᤀᤣ ᤀᤠᤱᤃᤠ᤹ ᤗᤢᤱᤔᤠ᤹ ᤁᤧᤍᤢᤰᤁᤠᤒᤠᤸᤗᤧ ᤆᤥᤃᤢᤸᤗᤧ ᤛᤧ᤺ᤵᤋᤠᤱᤅᤧ᤹ᤀᤥ॥ 17 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤀᤢ᤺ᤳᤏᤧᤖᤥ. ᤀᤠᤱᤃᤠ᤹ ᤛᤡᤖᤡᤱᤔᤔᤠ ᤔᤧᤒᤥᤱᤏᤧᤸᤗᤖᤥ॥ ᤁᤖ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤏᤠᤎᤠᤖᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤔᤠ ᤕᤱᤛᤱᤅᤥ ᤔᤧᤒᤣ᤺ᤰᤁᤠᤱ ᤔᤧᤶᤒᤠ᤺ᤳᤋᤣ ᤔᤧᤕᤢᤱᤗᤖᤥ॥ 18 ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤴ ᤆᤢᤵᤗᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤀᤠᤱᤍᤡᤱ ᤔᤧᤗ᤹ᤀᤠᤱ ᤛᤠᤶᤕᤥᤒᤠᤜᤠ᤹ ᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤛᤡᤖᤥ॥ 19 ᤂᤧᤏᤧ᤹ ᤁᤧᤏᤢ᤹ᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤏᤡᤴ ᤛᤧᤰᤂᤠᤀᤣ ᤐᤕᤶ ᤕᤶᤒᤠ ᤆᤥᤰᤗᤥ. ᤂᤧᤱᤃ ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤧᤍᤠᤱᤄᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤃ ᤂᤧᤏᤧ᤹ᤀᤥ ᤀᤡ᤺ᤶᤛᤡᤱᤛᤧ ᤁᤧᤍᤠᤒᤠᤜᤠ᤹ ᤔᤏᤠ ᤋᤃᤡ ᤁᤧᤒᤡᤖᤢᤛᤡᤖᤥ॥ 20 ᤂᤧᤏᤧ᤹ ᤁᤧᤘᤠ᤹ᤔᤠᤍᤧᤴᤏᤥ ᤂᤧᤱᤜᤠ᤹ ᤁᤧᤈᤡᤰᤂᤢᤛᤡᤖᤥ. ᤔᤏᤠᤜᤠ᤹ᤖᤧ ᤂᤢᤏᤡ᤹ ᤆᤧᤶᤓᤴᤏᤥ ᤌᤠᤔᤠ ᤁᤧᤶᤒᤠᤱᤄᤢᤴᤛᤡᤴᤗᤥ ᤐᤠᤴ ᤁᤧᤎᤡᤰᤐᤠ ᤔᤏᤠᤜᤠ᤹ᤗᤠᤶ ᤂᤧᤱᤜᤠ᤹ ᤗᤠ᤺ᤳᤗᤠ᤺ᤳ ᤁᤧᤃᤳᤋᤢᤛᤡᤀᤠᤱ ᤁᤧᤛᤧ᤺ᤵᤋᤢᤛᤡᤖᤥ॥ 21 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤐᤥᤖᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤔᤡᤜᤠ᤹ᤖᤧ ᤌᤩ᤺ᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤔᤧᤃᤒᤢᤒᤠ ᤕᤧᤰᤕᤰᤁᤥ ᤀᤠᤱᤃᤠ᤹ ᤘᤕᤠᤱᤅᤡᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤠᤱᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤰᤋᤠᤱᤗᤥ॥ 22 ᤀᤠᤱᤃᤠ᤹ᤃ ᤕᤜᤘᤣ ᤍᤠᤱᤒᤧᤸᤗᤧ ᤗᤧᤖᤠᤱᤍᤣᤛᤠᤱᤒᤡ ᤗ᤹ᤖᤠᤱᤅᤠᤱ ᤀᤠᤕᤱᤔᤠ ᤁᤧᤖᤧᤖᤥ॥ ᤁᤖ ᤑᤠ᤹ᤖᤠᤱᤅᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤱᤅᤡᤸᤗᤧ ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤠᤱ ᤀᤠᤒᤣᤗᤡᤴ ᤂᤧᤵᤛᤢᤖᤥ॥ 23 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤔᤏᤠᤛᤣ. ᤂᤢᤏᤧ᤹ ᤔᤡ᤺ᤶ ᤔᤧᤳᤋᤧᤶᤔᤧ᤹ᤀᤥ᥄ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤛᤧ᤺ᤵᤋᤢᤛᤡᤖᤥ. ᤁᤖ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ᤃ ᤂᤢᤏᤧ᤹ ᤂᤢᤶᤍᤡᤱ ᤐᤡᤖᤢᤛᤡᤖᤥ॥ 24 ᤕᤜᤘᤣ ᤍᤠᤱᤒᤠᤀᤥ ᤏᤡᤱᤛᤠᤱ ᤁᤧᤈᤥ᤺ᤰᤐᤠᤛᤣ. ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤜᤠᤱᤜᤠᤱ ᤗ᤹ᤖᤧᤶᤔᤧ᤹ᤀᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.