ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 30 - LIFOTNT

ᤏᤥᤃᤧᤴ ᤐᤡᤔᤠ ᤛᤠᤶᤗᤥ

ᤏᤡᤱᤘᤠ᤹ᤑᤢᤔᤠᤱᤜᤡᤶ ᤋᤥ᤺ᤶᤔᤠᤖᤧ ᤗᤠᤃᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤁᤧᤏᤠᤖᤠ ᤑᤥᤛᤢᤱᤗᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤥ ᤁᤣ᤺ᤶᤒᤠ ᤗᤢᤶᤒᤠ᤺ᤳᤗᤠᤶᤒᤠ ᤌᤠ᤺ᤱ ᤁᤧᤒᤰᤂᤠᤱ ᤁᤧᤗ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤜᤠᤖᤡ ᤋᤩᤠᤱ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ ᤛ᤺ᤵᤔᤠ ᤁᤧᤶᤒᤠᤱᤄᤢᤴᤛᤡᤸᤗᤥ॥

² ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤑᤠ᤹ᤖᤠᤱᤅᤧ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤀ᤺ᤰᤋᤠᤱᤗ ᤐᤣᤗᤡ ᤑᤠᤰᤏᤧᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤏᤢᤛᤠᤱᤗᤥ॥

³ ᤕᤜᤘᤣ ᤍᤠᤱᤒᤠᤀᤣ. ᤀᤡᤐᤢᤱᤗᤠᤶᤒᤠ ᤁᤧᤗ᤺ᤳᤋᤠᤱᤗᤥ. ᤜᤧᤰᤁᤩᤠᤱ ᤂᤧᤔᤠ ᤕᤱᤛᤱᤅᤥ ᤐᤣ᤺ᤰᤔᤠᤗᤠᤶ ᤁᤧᤛᤧ᤺ᤵᤋᤠᤱᤗᤥ॥

⁴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤔᤏᤠᤛᤣ. ᤛᤠᤶᤗᤥᤖᤧᤶᤔᤧ᤹ᤖ ᤂᤢᤏᤧ᤹ ᤛᤠᤶᤔᤧᤳᤋᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤁᤢᤛᤣᤛᤣ ᤔᤡᤱᤅᤡᤴ ᤀᤡᤱᤎᤠᤱ ᤐᤡᤖᤧᤶᤔᤧ᤹ᤖ ᤂᤢᤏᤧ᤹ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ॥

⁵ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤛᤵᤑᤠᤎᤡᤰᤗᤰ ᤁᤢᤛᤡᤰ ᤐᤥ᤺ᤰᤗᤥ. ᤁᤖ ᤀᤠᤏᤡ᤹ ᤜᤡᤱᤜᤡᤱ ᤌᤠᤖᤡᤰ ᤂᤢᤏᤧ᤹ ᤀᤠᤓᤧᤸᤗᤧᤛᤠᤱ ᤀᤠᤏᤡ᤹ ᤗᤢᤱᤔᤠ᤹ ᤀᤠᤍᤢᤰᤗᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡ᤹ ᤛᤧᤴᤍᤡᤰ ᤀᤠᤜᤠ᤺ᤵᤛᤠᤱ ᤋᤠᤏᤠᤶᤃ ᤀᤠᤏᤡ᤹ ᤀᤠᤛ᤺ᤳᤗᤥ॥

⁶ ᤀᤠᤱᤃᤠ᤹ ᤏᤠᤱᤛᤡᤱᤔᤠ ᤌᤣ᤺ᤰᤛᤡᤱᤔᤠ ᤆᤠᤜᤠᤒ᤻ ᤔᤧᤴᤈᤥ᤺ᤰᤁᤣ ᤘᤕᤠᤱᤅᤡᤸᤗᤧ ᤀᤠᤓᤧᤸᤗᤧᤀᤠᤱ ᤜᤠᤖᤡ ᤔᤧᤍᤠᤀᤠᤴ ᤗ᤹ᤖᤡᤰ ᤐᤠ᤺ᤳᤋᤢᤱᤗᤥ॥

⁷ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤠᤱᤗᤥ. ᤜᤧᤰᤁᤩᤠᤱ ᤁᤧᤏᤠᤅᤠᤱ ᤁᤧᤎᤣ᤺ᤰᤋᤠᤱᤗᤥ ᤌᤧᤃᤢ ᤁᤢᤀᤡᤛᤡᤰ ᤀᤠᤱᤃᤠ᤹ ᤀᤡᤍᤡ᤹ ᤘᤍᤡ᤹ ᤔᤧᤸᤗ᤹ᤔᤏᤠ ᤁᤧᤈᤥᤃᤠᤱᤗᤥ. ᤁᤖ ᤀᤠᤱᤃᤠ᤹ᤗᤠᤶ ᤁᤧᤈᤡᤱᤛᤡᤱᤅᤡᤸᤗᤧ ᤁᤡᤛᤠᤱᤗᤥ॥

⁸ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤀᤢ᤺ᤳᤏᤧᤖᤥ. ᤗᤢᤱᤔᤠ᤹ ᤋᤢᤰᤋᤠᤅᤧ᤹ᤀᤥ ᤗ᤹ᤖᤡᤰ ᤐᤣᤗᤡ ᤑᤠᤰᤏᤧᤖᤥ॥

⁹ “ᤀᤠᤱᤃᤠ᤹ ᤂᤧᤔᤠ ᤕᤱᤛᤱᤅᤥ ᤐᤣ᤺ᤰᤁᤠᤀᤠᤱ ᤀᤠᤱᤃᤠ᤹ ᤔᤧᤰᤁᤠᤸᤗᤧ ᤌᤣ ᤁᤧᤄᤥᤛᤢᤒᤣ᥅ ᤂᤠᤶᤒᤢᤋᤪᤠ᤺ᤸᤗᤧ ᤂᤧᤏᤧ᤹ ᤁᤧᤏᤠᤖᤠ ᤑᤥᤛᤢᤒᤡ᥅ ᤂᤧᤴ ᤂᤠᤶᤒᤢᤋᤪᤠ᤺ᤸᤗᤧ ᤂᤧᤏᤧ᤹ ᤏᤛᤠ᤺ᤴᤛᤠᤒᤠ ᤁᤧᤈᤥᤰ ᤑᤠ᤹ᤀᤠᤱ ᤀᤡᤱᤓᤥᤛᤢᤒᤡ᥅

¹⁰ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤀᤠᤒᤣᤗᤡᤃᤧᤴ ᤀᤠᤒᤠ᤺ᤴᤈᤠ᤺ᤴᤏᤡᤴ ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ. ᤕᤜᤘᤣ ᤍᤠᤱᤒᤠᤀᤣ. ᤏᤠᤅᤠᤱᤅᤧ᤹ ᤌᤣ᤺ᤰᤋᤠᤱᤅᤧ᤹ᤀᤥ॥”

¹¹ ᤂᤧᤏᤧ᤹ᤀᤣ ᤀᤠᤱᤃᤠ᤹ ᤀᤠᤔᤧᤖᤡᤱ ᤌᤰᤔᤠᤴ ᤗᤠ᤺ᤱᤔᤠ ᤛ᤺ᤵᤔᤠᤀᤥ ᤁᤧᤗᤧᤰᤂᤢ᤹ᤖᤥ. ᤜᤧᤰᤁᤩᤠᤱ ᤀᤡᤏᤥᤃᤧᤴ ᤀᤠᤍᤢᤰᤂᤣᤴ ᤁᤧᤄᤧᤳᤋᤢᤀᤠᤱ ᤀᤠᤱᤃᤠ᤹ ᤁᤢᤛᤡᤰ ᤁᤧᤛᤶᤒᤠ ᤁᤧᤈᤥᤃᤠᤱᤗᤥ॥

¹² ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤡᤸᤗᤧ ᤆᤰᤔᤧᤸᤗ᤹ᤀᤣ ᤁᤧᤏᤠᤖᤠ ᤑᤥᤛᤢᤖᤖᤥ॥ ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤛᤍᤠᤍᤡᤱ ᤂᤧᤏᤧ᤹ ᤏᤢᤃᤧᤴ ᤐᤡᤏᤧᤖᤥ॥