ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 28 - LIFOTNT

ᤏᤢᤃᤧᤴ ᤏᤢ ᤐᤣᤗᤡᤃᤧᤴ ᤋᤢᤘᤠ

ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤀᤠᤱᤃᤠ᤹ ᤕᤠᤵᤔᤡ ᤁᤶᤒᤪᤠᤱ ᤁᤧᤔᤧᤵᤐᤠ ᤀᤠᤕᤠᤰᤐᤣ᤹ᤏᤧᤖᤥ. ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧᤸᤗᤧ ᤂᤧᤵᤛᤧ᤹ᤀᤥ॥ ᤂᤧᤏᤧ᤹ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤁᤧᤱᤄᤧᤵᤛᤢᤴᤏᤧᤓᤃᤪ ᤀᤠᤱᤃᤠ᤹ᤀᤠᤱ ᤂᤧᤔᤠᤍᤡᤱ ᤕᤱᤛᤱᤅᤥ ᤁᤧᤒᤣ᤺ᤰᤐᤠᤜᤠ᤹ ᤁᤢᤀᤡᤛᤡᤰ ᤐᤥᤱᤅᤠᤖᤥ॥

² ᤜᤧᤰᤁᤩᤠᤱ ᤑᤠ᤹ᤖᤠᤱᤅᤧ᤹ᤀᤥ ᤑᤠ᤹ᤀᤠᤱ ᤀ᤺ᤰᤁᤠᤸᤗᤧ ᤂᤧᤒᤩᤠᤱ ᤐᤕᤶ ᤕᤶᤒᤠ ᤁᤧᤛᤣᤛᤣᤍᤧᤴ ᤗᤧᤵᤔᤠᤱ ᤀᤠᤱᤃᤠ᤹ ᤀᤠᤜᤢᤰᤜᤠ᤹ ᤛᤴᤇᤢᤱᤅᤡᤸᤗᤧ ᤆᤥᤃᤢᤱᤒᤠ ᤐᤣᤗᤡᤃᤧᤴ ᤀᤠᤍᤢᤘᤠᤴ ᤂᤧᤵᤛᤧ᤹ᤀᤥ॥

³ ᤀᤠᤱᤃᤠ᤹ ᤁᤢᤀᤡᤃᤧᤓᤧᤶᤒᤠ ᤔᤏᤠᤜᤠ᤹ ᤜᤧᤰᤁᤩᤠᤱ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤏᤢ ᤀᤠᤱᤃᤠ᤹ ᤛᤡᤛᤧ ᤔᤧᤍᤣ᤹ᤖᤠᤱᤅᤡᤴᤏᤧ᤹ᤀᤥ॥ ᤂᤧᤱᤜᤠ᤹ ᤂᤢᤏᤡ᤹ ᤐᤠᤱᤓᤣ᤹ᤛᤠᤒᤠᤜᤠ᤹ᤏᤢ ᤏᤢᤖᤡᤰᤁᤠᤱ ᤔᤧᤒᤠ᤺ᤳᤗᤥ ᤁᤖ ᤂᤢᤏᤡ᤹ ᤏᤡᤱᤘᤠ᤹ᤀᤥ ᤏᤢᤒᤠ ᤜᤥᤵᤗᤥ॥

⁴ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤐᤡᤖᤧᤛᤧ᤹ᤀᤥ. ᤜᤧᤰᤁᤩᤠᤱ ᤑᤧᤴ ᤕᤠ᤺ᤶᤒᤰ ᤔᤧᤈᤥᤃᤢᤒᤠᤸᤗᤧ ᤁᤢᤗᤧᤰᤘᤠ ᤂᤧᤱᤜᤠ᤹ ᤛᤠᤶᤒᤠᤴ ᤆᤠ᤺ᤳᤋᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤂᤥᤔᤠ ᤔᤧᤕᤠᤖᤢᤒᤠ ᤂᤢᤶᤍᤡᤱᤅᤡᤴ ᤐᤡᤖᤧᤛᤧ᤹ᤀᤥ॥

⁵ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤏᤢ ᤂᤢᤏᤧ᤹ ᤀᤠᤒᤠᤅᤣ ᤁᤢᤜᤢᤰᤁᤡᤸᤗᤧ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤴᤀᤡ᤺ᤳᤋᤢᤴᤗᤥ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤔᤧᤰᤂᤢᤛᤡᤖᤥ. ᤜᤧᤰᤁᤩᤠᤱ ᤕᤠᤶᤔᤥ ᤔᤧᤓᤥ᤺ᤰᤂᤢᤴᤛᤡᤴᤗᤥ॥

⁶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤐᤥᤖᤖᤥ. ᤌᤣᤀᤠᤱᤓᤧᤸᤗᤧ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤱᤒᤠᤴ ᤂᤧᤵᤛᤢᤀᤠᤱ ᤘᤠ᤹ᤖᤥ॥

⁷ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ ᤀᤠᤔᤢᤰᤛᤠᤶ ᤏᤢ ᤀᤠᤱᤃᤠ᤹ ᤀᤠᤎᤣ᤺ᤰᤛᤡᤱᤔᤠ ᤀᤠᤄᤥᤖᤥ. ᤀᤠᤱᤃᤠ᤹ ᤂᤢᤏᤧ᤹ᤀᤥ ᤀᤠᤏᤡᤱᤘᤠ᤹ ᤕᤢᤰᤂᤢᤱᤗᤥ॥ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤀᤠᤱᤃᤠ᤹ ᤑᤠ᤹ᤀᤠᤖᤥ ᤜᤧᤰᤁᤩᤠᤱ ᤀᤠᤛᤡᤰ ᤛᤔᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤛᤧᤘᤠᤛᤠᤶᤗᤥᤗᤠᤶᤒᤠ ᤂᤢᤏᤧ᤹ ᤏᤢᤃᤧᤴ ᤐᤡᤖᤢᤱᤗᤥ॥

⁸ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤁᤧᤎᤢᤶᤒᤠ ᤆᤥᤃᤢᤛᤡᤖᤥ. ᤜᤧᤰᤁᤩᤠᤱ ᤛᤣ᤺ᤴᤍᤢᤒᤠ ᤜᤠᤱᤅᤡᤴ ᤌᤣ᤺ᤰᤋᤢᤀᤠᤱ ᤛᤧ᤺ᤵᤋᤢᤖᤥ॥

⁹ ᤂᤧᤏᤧ᤹ ᤁᤧᤔᤏᤠᤜᤠ᤹ ᤛᤧ᤺ᤵᤋᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤛᤧ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤃᤶᤒᤠ ᤐᤥ᤺ᤰᤂᤧ᤹ᤀᤠᤱ ᤛᤍᤠᤍᤡᤱ ᤀᤥᤔᤧᤳᤋᤧᤛᤧ ᤁᤳᤋᤧᤛᤧ᤹ᤀᤥ॥