ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 27 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤆᤥ᤺ᤰᤔᤠ

ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤕᤜᤘᤣ ᤍᤠᤱᤒᤠᤴ ᤀᤠᤀᤥ᤺ᤳᤋᤡ ᤏᤢ ᤀᤠᤛᤧᤴᤗᤵᤍᤠᤱᤒᤠᤖᤥ. ᤜᤧᤰᤁᤣ᤺ᤸᤗᤧ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤃᤡᤖᤢᤱᤛᤡᤱᤅᤡᤴᤗᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤡᤵᤔᤠ ᤁᤧᤄᤢᤒᤠ ᤐᤠ᤺ᤴᤜᤠ᤹ᤀᤥ ᤌᤠᤔᤠᤗᤠᤶ ᤛᤧ᤺ᤵᤐᤠᤖᤥ. ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤀᤠᤓᤧᤸᤗᤧᤀᤠᤱ ᤔᤧᤃᤡᤀᤠᤴᤗᤥ॥

² ᤁᤢᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤛᤧᤵᤔᤠ ᤔᤧᤃᤥ᤺ᤳᤋᤠᤸᤗᤧ. ᤜᤧᤰᤁᤩᤠᤱ ᤀᤠᤍᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠ ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ᤖᤧ ᤔᤧᤓᤳᤋᤠᤸᤗᤧ. ᤂᤧᤱᤜᤠ᤹ ᤔᤧᤓᤳᤇᤡᤱᤅᤠᤱ ᤔᤧᤃᤧᤱᤗᤥ॥

³ ᤕᤖᤡᤰ ᤌᤰᤛᤢᤒᤠᤜᤠ᤹ᤖᤧ ᤁᤒᤪᤡᤱ ᤔᤧᤃᤵᤐᤠᤛᤠᤱ ᤀᤠᤱᤃᤠ᤹ ᤆᤡᤈᤡᤱᤅᤠᤱ ᤔᤧᤗ᤹ᤀᤠᤴᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤓᤳᤋᤠᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤠᤏᤡᤱᤘᤠ᤹ ᤕᤢᤰᤂᤢᤱᤗᤥ॥

⁴ ᤕᤜᤘᤣ ᤍᤠᤱᤒᤠᤴ ᤗᤳᤌᤡᤰ ᤐᤠᤴ ᤏᤠ᤺ᤰᤋᤢᤱᤗᤥ. ᤛᤠ᤹ᤖᤡᤰᤁᤣ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤁᤥ᤺ᤳᤋᤢᤱᤒᤠ ᤐᤠ᤺ᤴᤏᤡᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤀᤠᤜᤡᤱᤜᤡᤱ ᤌᤠᤖᤡᤰ ᤘᤠ᤹ᤔᤠ. ᤂᤢᤏᤧ᤹ ᤛᤠ᤹ᤖᤡᤰ ᤁᤧᤏᤢ᤹ᤒᤠ ᤆᤥ᤺ᤰᤐᤠ ᤐᤠ᤺ᤴᤏᤡᤴ ᤀᤥᤔᤧᤵᤔᤠ ᤜᤧᤰᤁᤩᤠᤱ ᤁᤢᤔᤠᤱᤜᤡᤶᤔᤥ ᤋᤢᤘᤠ ᤆᤥ᤺ᤰᤔᤠ ᤂᤥᤛᤢᤱᤗᤖᤥ॥

⁵ ᤌᤣᤀᤠᤱᤓᤧᤸᤗᤧ ᤋᤢᤰᤂᤣ ᤗᤠᤰᤂᤣᤜᤠ᤹ ᤋᤠ᤺ᤸᤗᤧ ᤂᤢᤏᤧ᤹ ᤁᤢᤕᤢᤱᤔᤠᤍᤧᤴᤏᤥ ᤀᤠᤱᤃᤠ᤹ ᤏᤠᤱᤅᤠ ᤌᤣ᤺ᤰᤁᤠᤖᤥ. ᤛᤣᤛᤣ ᤁᤢᤕᤢᤱᤔᤠᤍᤧᤴᤏᤥ ᤀᤠᤱᤃᤠ᤹ ᤆᤡᤱᤅᤠᤖᤥ. ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤗᤢᤱ ᤛᤶᤎᤠᤱ ᤕᤢᤱᤅᤠᤖᤥ॥

⁶ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤃᤒᤪᤡᤱ ᤁᤧᤘᤠ᤹ᤒᤠ ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ ᤏᤠ᤺ᤴᤍᤢᤱᤛᤡᤱᤗᤥ ᤂᤧᤒᤩᤠᤱ ᤛᤣᤛᤣ ᤁᤢᤕᤢᤱᤔᤠᤍᤧᤴᤏᤥ ᤀᤠᤱᤃᤠ᤹ ᤀᤠᤛᤡᤰ ᤐᤛᤶᤛᤶᤗ ᤛᤡᤍᤢᤱᤈᤓᤠ ᤆᤥᤃᤢᤱᤗᤥ. ᤀᤠᤱᤃᤠ᤹ ᤛᤧᤘᤠᤛᤠᤶᤗᤥ ᤛᤠᤶᤔᤧᤳᤋᤢᤱᤗ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤢᤱᤗᤥ॥

⁷ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤐᤣᤗᤡ ᤑᤠᤰᤏᤧᤸᤗᤧ ᤂᤧᤵᤛᤧ᤹ᤀᤥ. ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤠᤱ ᤐᤣᤗᤡᤗᤠᤶᤒᤠ ᤀᤠᤱᤃᤠ᤹ ᤏᤠ᤺ᤰᤋᤢᤱᤒᤠ ᤐᤠ᤺ᤴᤜᤠ᤹ ᤐᤡᤖᤠᤱᤅᤧ᤹ᤀᤥ॥

⁸ ᤀᤠᤛᤡᤰᤗᤢᤱᤔᤠᤸᤗᤧ ᤁᤧᤕᤠ᤺ᤶᤒᤣᤀᤥ “ᤂᤢᤏᤧ᤹ ᤛᤧᤘᤠ ᤔᤧᤳᤋᤧ᤹” ᤐᤠ᤺ᤳᤋᤢᤖᤥ. ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤛᤧᤘᤠ ᤔᤧᤳᤏᤧᤖᤥ॥

⁹ ᤁᤧᤏᤡᤀᤠᤸᤗᤧ ᤁᤧᤏᤠᤖᤠᤴ ᤔᤧᤈᤡᤰᤂᤧᤴᤏᤧ᤹ᤀᤥ. ᤁᤧᤛᤡᤰᤐᤥ᤺ᤰᤁᤡᤸᤗᤧ ᤔᤧᤏᤠ᤺ᤳᤋᤠᤱ ᤔᤧᤍᤣᤛᤠᤱᤅᤡᤴᤏᤧ᤹ᤀᤥ॥ ᤂᤧᤏᤧ᤹ᤃ ᤀᤠᤓᤧᤸᤗᤧᤛᤠᤱ ᤀᤠᤱᤃᤠ᤹ ᤁᤧᤓᤠ᤹ᤀᤠᤖᤥ. ᤀᤠᤛᤧᤴᤗᤵᤍᤠᤱᤒᤠ. ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤔᤣᤗᤧᤖᤠᤱᤅᤡᤴᤏᤧ᤹. ᤔᤧᤏᤠ᤹ᤖᤠᤱᤅᤡᤴᤏᤧ᤹ᤀᤥ॥

¹⁰ ᤀᤠᤶᤔᤠ ᤀᤠᤶᤒᤠᤛᤡᤖᤧ ᤀᤠᤱᤃᤠ᤹ ᤔᤧᤗᤧᤳᤋᤠᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤁᤳᤋᤠᤖᤥ॥

¹¹ ᤕᤜᤘᤣ ᤍᤠᤱᤒᤠᤀᤣ. ᤁᤧᤗᤠᤶᤔᤥ ᤗᤠᤱᤄᤣ᤺ᤰᤔᤠ ᤜᤢ᤹ᤖᤠᤱᤅᤧ᤹ᤀᤥ. ᤀᤠᤏᤡᤱᤔᤡᤜᤠ᤹ᤖᤧ ᤀᤠᤱᤃᤠ᤹ ᤔᤧᤛᤢᤰᤁᤠᤒᤠᤸᤗᤧ ᤆᤥᤃᤢᤸᤗᤧ ᤁᤢᤍᤥ᤺ᤵᤔᤠ ᤗᤠᤶᤔᤥ ᤀᤠᤱᤃᤠ᤹ ᤗᤠᤶᤗᤥᤛᤠᤱᤅᤧ᤹ᤀᤥ॥

¹² ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤀᤠᤱᤃᤠ᤹ ᤌᤠᤔᤠ ᤔᤧᤒᤠᤄᤠᤱᤅᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤐᤠ᤺ᤴᤔᤧᤎᤡᤰᤁᤠᤖᤥ ᤜᤧᤰᤁᤩᤠᤱ ᤛᤧᤳᤋᤠᤛᤡᤃᤧ ᤗ᤹ᤖᤡᤰ ᤔᤧᤓᤧ᤺ᤰᤁᤠᤖᤥ॥

¹³ ᤀᤠᤸᤗᤥ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤀᤥ ᤘᤠ᤹ᤀᤠᤸᤗᤧ ᤁᤧᤏᤢ᤹ᤒᤠ ᤕᤜᤘᤣ ᤍᤠᤱᤒᤠᤴ ᤏᤡᤛᤢᤱ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥

¹⁴ ᤕᤜᤘᤣ ᤍᤠᤱᤒᤠᤴ ᤜᤠᤱᤄᤧ᤹ᤀᤥ॥ ᤁᤧᤎᤢᤶᤒᤠ ᤐᤥ᤺ᤰᤂᤧ᤹ᤀᤥ. ᤜᤧᤰᤁᤩᤠᤱ ᤁᤧᤛᤡᤰᤗᤢᤱᤔᤥ ᤜᤠᤱᤜᤠᤱ ᤗ᤹ᤖᤧᤖ ᤀᤠ᤺ᤴᤇᤡᤱᤅᤧ᤹ᤀᤥ॥ ᤕᤜᤘᤣ ᤍᤠᤱᤒᤠᤴ ᤜᤠᤱᤄᤧ᤹ᤀᤥ॥