ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 25 - LIFOTNTᤗᤠᤶᤗᤥᤔᤠ ᤏᤢ ᤛᤧ᤺ᤵᤛᤡᤱᤔᤠ ᤐᤣᤗᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ 1 ᤕᤜᤘᤣ ᤍᤠᤱᤒᤠᤀᤣ. ᤀᤠᤛᤡᤰᤗᤢᤱᤔᤥᤗᤠᤶ ᤀᤠᤱᤃᤠ᤹ ᤂᤧᤏᤧ᤹ ᤐᤣᤗᤡ ᤑᤠᤰᤏᤧᤖᤥ. 2 ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤂᤧᤏᤧ᤹ᤀᤥᤀᤣ ᤀᤠᤏᤡᤱᤘᤠᤴ ᤕᤢᤰᤂᤢᤱᤅᤠᤱ ᤘᤠ᤹ᤖᤥ. ᤀᤠᤏᤡᤱᤔᤡᤜᤠ᤹ᤖᤧ ᤀᤠᤱᤃᤠ᤹ ᤔᤧᤴᤏᤠ᤺ᤴᤏᤠᤸᤗᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤠ ᤔᤧᤎᤠᤏᤧᤸᤗᤖᤥ॥ 3 ᤂᤧᤏᤧ᤹ ᤁᤧᤗᤠᤶ ᤀᤥᤃᤧᤔᤧᤵᤐᤠ ᤀᤠᤳᤋᤡᤴᤜᤠ᤹ᤀᤠᤱ ᤛᤡᤖᤡᤱᤔᤔᤥ ᤔᤧᤴᤎᤠᤏᤧᤴᤗᤥ. ᤁᤖ ᤂᤧᤏᤧ᤹ ᤀᤡᤱᤃᤧᤗᤧᤰᤐᤠᤜᤠ᤹ ᤏᤠᤎᤠᤔᤥ ᤔᤧᤎᤠᤖᤥ॥ 4 ᤕᤜᤘᤣ ᤍᤠᤱᤒᤣ. ᤁᤧᤗᤠᤶᤔᤥ ᤗᤠᤱᤄᤣ᤺ᤰᤔᤠ ᤜᤢ᤹ᤖᤠᤱᤅᤧ᤹ᤀᤥ. ᤀᤠᤱᤃᤠ᤹ ᤗᤠᤱᤄᤣ᤺ᤰᤔᤠ ᤁᤧᤒᤥᤱᤒᤠ ᤗᤠᤶᤔᤥ ᤋᤥ᤺ᤴᤍᤠᤱᤅᤧ᤹ᤀᤥ॥ 5 ᤁᤧᤛᤧᤰᤂᤠᤒᤠ ᤗᤠᤶᤔᤥ ᤗᤠᤶᤗᤥᤛᤠᤱᤅᤧ᤹ᤀᤠᤱ ᤜᤢ᤹ᤖᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤀᤠᤱᤃᤠ᤹ ᤁᤧᤛᤧ᤺ᤵᤐᤠ ᤀᤠᤏᤡᤱᤘᤠ᤹ᤑᤢᤔᤠᤱᤏᤧᤖᤥ. ᤜᤧᤰᤁᤩᤠᤱ ᤀᤠᤓᤧᤸᤗᤧᤛᤠᤱ ᤂᤧᤏᤧ᤹ ᤁᤧᤗᤠᤶ ᤀᤥᤔᤧᤳᤋᤢᤱᤗᤥ॥ 6 ᤕᤜᤘᤣ ᤍᤠᤱᤒᤠᤀᤣ. ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤁᤧᤍᤢᤰᤋᤠᤱᤒᤠᤴ ᤏᤢ ᤔᤡ᤺ᤶᤈᤡ ᤁᤧᤔᤧᤳᤋᤠᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤃ ᤀᤢᤏᤠᤜᤢᤖᤡᤀᤠᤱᤎᤥᤀᤣ ᤀᤥᤛᤣ᤺ᤴᤍᤠᤱ ᤁᤧᤈᤥᤃᤢᤀᤠᤱ ᤁᤧᤘᤠ᤹ᤖᤥ॥ 7 ᤀᤠᤱᤃᤠ᤹ ᤌᤠᤱᤒᤧᤴ ᤘᤕᤠᤱᤅᤡᤸᤗᤧ ᤆᤥᤃᤢᤱᤒᤠ ᤗᤠᤕᤥᤜᤠ᤹ ᤏᤡᤱᤘᤠ᤹ ᤔᤧᤀᤡ᤺ᤳᤋᤧᤴᤏᤧ᤹ᤀᤥ. ᤂᤧᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤁᤠᤒᤠ ᤁᤢᤀᤡᤛᤡᤰ ᤁᤢᤏᤢ᤹ᤁᤢᤍᤠᤀᤥ ᤏᤡᤱᤘᤠ᤹ ᤀᤡ᤺ᤳᤋᤠᤱᤅᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ. ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤗᤢᤱᤃᤢᤶᤍᤠᤱᤒᤠ ᤁᤧᤈᤥ᤺ᤰᤗᤥ॥ 8 ᤕᤜᤘᤣ ᤍᤠᤱᤒᤠᤴ ᤛᤠᤶᤕᤥᤒᤠ ᤏᤢ ᤁᤧᤏᤢ᤹ᤒᤠ ᤆᤥᤰᤗᤥ. ᤂᤧᤸᤗᤧᤆᤥᤃᤢᤸᤗᤧ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤏᤢ᤺ᤰᤋᤢᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤠ᤺ᤵᤔᤠ ᤁᤧᤒᤥᤱᤒᤠ ᤏᤢᤒᤠ ᤗᤠᤶᤔᤡᤴ ᤀᤥᤛᤣ᤺ᤴᤎᤠᤰᤋᤢᤛᤡᤖᤥ॥ 9 ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠᤜᤠ᤹ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤗᤠᤶᤗᤥᤛᤢᤛᤡᤖᤥ. ᤜᤧᤰᤁᤩᤠᤱ ᤜᤧᤰᤋᤱᤒᤠᤜᤠ᤹ ᤁᤢᤗᤠᤶᤔᤡᤴ ᤏᤠ᤺ᤵᤔᤠ ᤜᤢ᤹ᤖᤢᤛᤡᤖᤥ॥ 10 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤏᤢ ᤁᤢᤀᤡᤱᤈᤠᤱᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤌᤎᤵ ᤔᤧᤸᤗᤀᤣ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤏᤢᤖᤡᤰᤁᤠᤱ ᤗᤠᤶᤗᤥᤛᤢᤛᤡᤖᤥ॥ 11 ᤕᤜᤘᤣ ᤍᤠᤱᤒᤠᤀᤣ. ᤁᤧᤔᤡᤱᤛᤥ ᤀᤡᤱᤎᤠᤱᤅᤡᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤆᤥᤃᤢᤱᤒᤠ ᤕᤖᤡᤰ ᤗᤠᤕᤥᤜᤠ᤹ ᤂᤧᤳᤋᤠᤱ ᤐᤡᤖᤠᤱᤅᤧ᤹ᤀᤥ॥ 12 ᤀᤠᤳᤋᤡᤴᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢ ᤂᤢᤏᤧ᤹ ᤂᤧᤱᤜᤠ᤹ ᤗᤠᤱᤄᤣ᤺ᤰᤔᤠ ᤁᤧᤒᤥᤱᤒᤠ ᤗᤠᤶᤔᤡᤴ ᤀᤥᤛᤣ᤺ᤴᤎᤠᤰᤋᤢᤛᤡᤖᤥ॥ 13 ᤂᤧᤱᤜᤠ᤹ ᤔᤧᤏᤢ᤹ᤔᤧᤍᤠᤀᤠᤱ ᤔᤧᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤧᤕᤢᤰᤋᤢᤖᤥ॥ 14 ᤕᤜᤘᤣ ᤍᤠᤱᤒᤠᤱᤃ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ᤖᤧ ᤂᤢᤏᤡ᤹ ᤆᤢᤶᤗᤥ. ᤂᤢᤏᤧ᤹ ᤂᤧᤱᤜᤠ᤹ ᤁᤢᤔᤠᤱᤜᤢᤵᤐᤡᤴ ᤜᤢ᤹ᤖᤢᤛᤡᤖᤥ॥ 15 ᤁᤢᤓᤠ᤹ ᤂᤥᤔᤠᤖᤧ ᤗᤠᤃᤡ ᤛᤍᤠᤍᤡᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤀᤥᤔᤧᤳᤋᤢᤱᤗᤥ. ᤀᤠᤏᤡᤱᤔᤡᤜᤠ᤹ᤖᤧ ᤔᤧᤃᤧᤛᤢᤒᤠ ᤀᤡᤈᤥᤀᤥ ᤀᤠᤱᤃᤠ᤹ ᤌᤠᤀᤠᤸᤗᤧ ᤂᤢᤏᤧ᤹ᤀᤣ ᤗ᤺ᤳᤋᤠᤖᤥ॥ 16 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤗᤧᤵᤔᤠᤱ ᤜᤡᤛᤡᤱᤅᤧ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤠᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤧᤓᤠ᤹ᤒᤠ ᤋᤣ᤺ᤱᤈᤢᤶ ᤔᤣ᤺ᤴᤏᤣ ᤀᤣ᤺ᤰ ᤋᤢᤰᤂᤣ ᤋᤢᤔᤠᤱᤅᤠᤱ ᤘᤠ᤹ᤀᤠᤖᤥ॥ 17 ᤀᤠᤍᤢᤰᤂᤣ ᤀᤠᤗᤠᤰᤂᤣᤜᤠ᤹ ᤐᤥᤖᤧᤀᤠᤱ ᤘᤠ᤹ᤖᤥ. ᤁᤴ ᤕᤧᤳᤋᤢᤰᤂᤣ ᤆᤠᤔᤠᤗᤠᤶ ᤛᤧᤴᤍᤠᤱᤅᤧ᤹ᤀᤥ॥ 18 ᤀᤠᤱᤃᤠ᤹ ᤀᤠᤍᤢᤰᤔᤠ ᤀᤠᤗᤠ᤺ᤰᤔᤠ ᤏᤢ ᤀᤠᤱᤃᤠ᤹ ᤀᤠᤍᤢᤰᤂᤣᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤁᤧᤖᤧᤰ ᤀᤠᤗᤠᤕᤥᤜᤠ᤹ ᤂᤧᤳᤋᤧᤍᤣᤛᤧ᤹ᤀᤥ॥ 19 ᤀᤥᤔᤧᤳᤋᤧ ᤛᤠ᤹ᤖᤧᤛᤧ. ᤀᤠᤏᤡᤱᤔᤡᤜᤠ᤹ ᤀᤠᤰᤂᤧᤴ ᤕᤖᤡᤰ ᤔᤧᤘᤠ᤹᥄ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤔᤧᤀᤡ᤺ᤳᤋᤠᤖᤥ ᤔᤧᤈᤡ᤺ᤳᤋᤠᤖᤥ॥ 20 ᤌᤣ᤺ᤰᤋᤠᤱᤅᤧ᤹ᤀᤠᤱ ᤀᤠᤱᤃᤠ᤹ ᤁᤶᤒᤪᤠᤱ ᤔᤧᤳᤋᤠᤱᤅᤧ᤹ᤀᤥ. ᤀᤠᤱᤃᤠ᤹ ᤛᤡᤖᤡᤱᤔᤔᤥ ᤌᤠᤔᤠ ᤔᤧᤒᤥᤱᤏᤧᤸᤗᤖᤥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤀᤡ᤺ᤶᤛᤡᤱᤛᤧ ᤋᤠᤀᤠᤖᤥ॥ 21 ᤏᤢᤒᤠ ᤏᤢ ᤁᤢᤍᤥ᤺ᤵᤔᤠ ᤀᤠᤕᤠ᤺ᤶᤒᤰᤁᤡᤸᤗᤧ ᤛᤧ᤺ᤵᤐᤠᤖᤖᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ᤃ ᤂᤧᤏᤧ᤹ ᤏᤛᤠᤴ ᤆᤥ᤺ᤰᤏᤧᤖᤥ॥ 22 ᤏᤡᤱᤘᤠ᤹ᤑᤢᤔᤠᤱᤅᤣ. ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤋᤢᤰᤂᤣ ᤗᤠᤰᤂᤣᤜᤠ᤹ᤀᤥ ᤔᤧᤎᤠ᤺ᤸᤗᤧ ᤛᤧ᤺ᤵᤋᤧᤛᤧ᤹ᤀᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.