ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 24 - LIFOTNT

ᤐᤕᤶ ᤕᤶᤒᤠ ᤜᤠᤱ

ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤁ᤹ᤕᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧᤴᤗᤥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤢᤏᤧ᤹ ᤁᤢᤔᤏᤠᤛᤡᤖᤥ॥

² ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤘᤖ᤺ᤱᤛᤶᤎᤠᤱ ᤏᤧᤛ᤻ᤛᤢᤀᤠᤱ ᤏᤧᤖᤥ. ᤁᤢᤍᤡᤶᤒᤣ ᤁᤣ᤺ᤶᤒᤠ ᤆᤫᤠ᤺ᤳ ᤛᤡᤃᤠᤱ ᤁᤸᤗᤧ ᤁᤢᤒᤢᤱ ᤕᤢᤰᤂᤢᤀᤠᤱ ᤕᤢᤱᤗᤥ॥

³ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤃᤥ᤺ᤰᤔᤠᤀᤥ ᤀᤠᤳᤋᤡᤴ ᤌᤠ᤺ᤱ ᤐᤣ᤺ᤰᤔᤠ ᤛᤢᤰᤐᤣ᥅ ᤜᤧᤰᤁᤩᤠᤱ ᤁᤢᤛᤣᤛᤣᤍᤧᤴᤏᤥ ᤜᤠᤳ ᤕᤧᤵᤔᤠ ᤛᤢᤰᤐᤣ᥅

⁴ ᤀᤠᤳᤋᤡᤴᤜᤠ᤹ᤖᤧ ᤏᤢᤒᤠ ᤕᤠ᤺ᤶᤒᤰ ᤔᤧᤈᤥᤃᤢ. ᤏᤡᤱᤘᤠ᤹ ᤛᤣᤛᤣ ᤔᤧᤃᤳᤋᤢ ᤜᤧᤰᤁᤩᤠᤱ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤶᤔᤧᤳᤋᤢᤴᤇᤡᤴ. ᤀᤡᤱᤗᤧᤰᤐᤠ ᤐᤠ᤺ᤴᤏᤥ ᤔᤠᤱᤔᤧᤴᤜᤧᤰᤛᤡᤱᤅᤡᤴ ᤜᤠᤒᤠ ᤂᤧᤱᤜᤠ᤹ᤀᤣ ᤌᤠ᤺ᤱ ᤐᤣ᤺ᤰᤔᤠᤀᤠᤱ ᤕᤧᤵᤔᤠ ᤔᤧᤛᤢᤰᤗᤥ᥄

⁵ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤂᤢᤏᤡ᤹ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤛᤠᤶᤕᤥᤒᤠᤛᤡ ᤑᤠ᤹ᤀᤠᤱ ᤔᤧᤳᤋᤢᤛᤡᤖᤥ॥ ᤛᤣᤗᤠ

⁶ ᤀᤰᤋᤱᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤃᤥ᤺ᤳᤋᤢᤖᤥ. ᤂᤧᤱᤜᤠ᤹ ᤕᤠᤁᤢᤒᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤔᤧᤍᤠᤖᤥ॥ ᤛᤣᤗᤠ

⁷ ᤋᤠ᤺ᤰᤜᤴᤜᤠ᤹ ᤜᤖᤧᤶᤔᤧ᤹᥄ ᤀᤢᤏᤠᤜᤢᤖᤡᤒᤠ ᤗᤠᤶᤎᤣ᤺ᤵᤐᤠᤜᤠ᤹ ᤜᤖᤧᤶᤔᤧ᤹ᤀᤥ. ᤔᤡᤔᤡᤍᤡᤱᤃᤧᤴ ᤐᤕᤶ ᤜᤠᤱᤅᤡᤴ ᤂᤧᤵᤔᤥᤗᤠᤶᤒᤠ ᤗᤠ᤺ᤳᤗᤖᤥ॥

⁸ ᤔᤡᤔᤡᤍᤡᤱᤃᤧᤴ ᤐᤕᤶ ᤜᤠᤱᤅᤡᤴ ᤜᤠ᤺ᤵᤐᤣ᥅ ᤂᤢᤏᤧ᤹ᤃ ᤌᤱ ᤁᤧᤏᤠ᤺ᤶᤒᤠ ᤔᤢᤰᤛᤠᤶᤍᤠᤱᤒᤠ ᤏᤢ ᤔᤢᤰᤁᤧᤃᤢᤒᤠ ᤀᤠᤏᤡ᤹ ᤕᤜᤘᤣ ᤍᤠᤱᤒᤠᤴᤗᤥ॥

⁹ ᤋᤠ᤺ᤰᤜᤴᤜᤠ᤹ ᤜᤖᤧᤶᤔᤧ᤹᥄ ᤀᤢᤏᤠᤜᤢᤖᤡᤒᤠ ᤗᤠᤶᤎᤣ᤺ᤵᤐᤠᤜᤠ᤹ ᤜᤖᤧᤶᤔᤧ᤹ᤀᤥ. ᤔᤡᤔᤡᤍᤡᤱᤃᤧᤴ ᤐᤕᤶ ᤜᤠᤱᤅᤡᤴ ᤂᤧᤵᤔᤥᤗᤠᤶᤒᤠ ᤗᤠ᤺ᤳᤗᤖᤥ॥

¹⁰ ᤔᤡᤔᤡᤍᤡᤱᤃᤧᤴ ᤐᤕᤶ ᤜᤠᤱᤅᤡᤴ ᤜᤠ᤺ᤵᤐᤣ᥅ ᤁᤧᤖᤧᤰᤏᤢ᤺ᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴᤏᤣ ᤔᤡᤔᤡᤍᤡᤱᤃᤧᤴ ᤐᤕᤶ ᤜᤠᤱᤗᤥ॥ ᤛᤣᤗᤠ