ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 2 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤒᤠ ᤜᤠᤱ 1 ᤌᤣᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤛᤡᤰ ᤐᤥ᤺ᤰᤐᤠᤒᤣ᥅ ᤌᤣᤀᤠᤱ ᤂᤧᤴ ᤔᤏᤠᤜᤠ᤹ ᤜᤏᤧᤒᤠ ᤆᤧᤶᤓᤴ ᤔᤧᤈᤥ᤺ᤰᤐᤠᤒᤣ᥅ 2 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤀᤡᤱᤔᤧᤍᤱᤄᤢᤖᤥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤏᤢ ᤂᤢᤏᤧ᤹ ᤛᤣᤃᤢᤒᤠ ᤁᤢᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤜᤠᤱᤒᤡᤑᤩᤢᤱ ᤔᤧᤈᤥᤃᤢᤖᤥ॥ 3 ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤂᤢᤴᤇᤡ᤹ ᤕᤢᤰᤁᤥᤗᤠᤶ ᤆᤥ᤺ᤰᤕᤢᤶᤓᤥᤒᤠ ᤐᤥ᤺ᤰᤂᤡᤖᤥ. ᤀᤡᤀᤠᤶᤄᤣ᤺ᤰᤂᤧᤒᤠ ᤀᤡᤄᤣ᤺ᤱᤜᤠ᤹ ᤑᤢ᤹ᤖᤢᤶᤗᤥ॥” 4 ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤂᤧᤵᤛᤢᤛᤡᤖᤥ. ᤜᤧᤰᤁᤩᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤏᤧᤒᤠ ᤆᤧᤶᤓᤴᤏᤡᤴ ᤏᤡᤛᤢᤀᤠᤱ ᤀᤣ᤺ᤳᤗᤥ॥ 5 ᤜᤧᤰᤁᤩᤠᤱ ᤁᤢᤛᤡᤰ ᤐᤥ᤺ᤰᤔᤥ ᤂᤧᤱᤜᤠ᤹ ᤑᤧ᤺ᤰᤋᤢᤛᤡᤖᤥ. ᤛᤠ᤹ᤖᤡᤰ ᤁᤢᤛᤡᤰ ᤐᤥ᤺ᤰᤔᤥ ᤂᤧᤱᤜᤠ᤹ ᤔᤧᤃᤡᤖ ᤕᤠ᤺ᤴᤍᤢᤛᤡᤖᤥ॥ 6 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤓᤴ ᤆᤥᤃᤢᤖᤥ. “ᤀᤠᤱᤃᤠ᤹ ᤀᤠᤜᤠᤱᤅᤡᤴ ᤀᤠᤛᤣᤛᤣ ᤁᤥ᤺ᤰᤔᤠ ᤕᤖᤢᤛᤗᤧ᤺ᤶᤔᤥ ᤜᤠᤱ ᤆᤥᤃᤢᤱᤅᤠᤱ ᤘᤠ᤹ᤖᤥ॥” 7 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤠᤱᤃᤠ᤹ ᤀᤡᤱᤓᤥᤛᤢᤱᤗᤥ. “ᤂᤧᤏᤧ᤹ᤃ ᤀᤠᤒᤢᤃᤧᤴ ᤀᤠᤛ᤻ᤛᤠᤏᤧᤖᤥ. ᤀᤠᤀᤡᤴ ᤀᤠᤱᤃᤠ᤹ ᤐᤠᤏᤢᤍᤡᤱ ᤁᤧᤶᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠ ᤗ᤹ᤖᤡᤰ ᤂᤢᤏᤧ᤹ ᤔᤧᤳᤋᤠᤱᤗᤥ॥ 8 ᤀᤠᤱᤃᤠ᤹ ᤂᤧᤏᤧ᤹ ᤏᤠ᤺ᤰᤋᤠᤱᤅᤧ᤹ᤀᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤛᤢᤘᤠᤱᤜᤠ᤹ ᤁᤧᤗᤰ ᤆᤥᤃᤢᤱᤛᤡᤱ ᤐᤡᤏᤧᤖᤥ. ᤜᤧᤰᤁᤩᤠᤱ ᤁᤠᤰ ᤀᤡᤰᤛᤠ ᤂᤠᤶᤒᤣ᤺ᤰᤁᤡᤴ ᤂᤧᤏᤧ᤹ᤀᤡᤴ ᤆᤥᤃᤢᤱ ᤐᤡᤏᤧᤖᤥ॥ 9 ᤑᤧᤴᤈᤣ᤹ ᤋᤰᤁᤠ᤺ᤳᤏᤢ ᤂᤧᤱᤜᤠ᤹ ᤕᤢᤰ ᤁᤧᤈᤥᤃᤢᤛᤡᤖᤥ. ᤑᤢᤈᤡᤰᤁᤡᤴ ᤁᤢᤀᤡᤛᤡᤰ ᤂᤧᤱᤜᤠ᤹ ᤁᤧᤕ᤺ᤵᤛᤢᤛᤡ᤹ᤖᤥ॥” 10 ᤂᤧᤸᤗᤧᤆᤥᤃᤢᤸᤗᤧ. ᤀᤠᤸᤗ ᤜᤠᤱᤛᤣ. ᤛᤡᤰᤁᤢᤶᤛᤠᤒᤠ ᤐᤥ᤺ᤰᤂᤧᤶᤔᤧ᤹ᤀᤥ. ᤁᤴ ᤀᤡᤰᤛᤠᤀᤥ ᤜᤠᤱᤃᤧᤈᤥ᤺ᤰᤐᤠᤛᤣ. ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ॥ 11 ᤁᤡᤛᤧᤶᤔᤧ᤹ᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠ ᤆᤥᤃᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤕᤰᤂᤧᤶᤔᤧ᤹ᤖ ᤀᤥᤔᤢ ᤗ᤹ᤖᤧᤶᤔᤧ᤹ᤀᤥ॥ 12 ᤀᤠᤒᤢᤃᤧᤴ ᤁᤢᤛ᤻ᤛᤠᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤶᤔᤧ᤹ᤀᤥ. ᤔᤣ᤺ᤴᤏᤧᤓᤃᤪ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴ ᤐᤥ᤺ᤰᤁᤠᤱ ᤜᤰᤆᤄᤳ ᤂᤡᤏᤡ᤹ ᤔᤧᤶᤓᤤ ᤁᤧᤈᤥᤃᤡᤖᤥ॥ ᤁᤖ ᤛᤧ᤺ᤵᤛᤡᤱᤛᤧ ᤂᤢᤏᤧ᤹ᤀᤥ ᤁᤧᤒᤣ᤺ᤰᤐᤠᤜᤠ᤹ ᤁᤧᤖᤧᤰ ᤔᤢ᤹ᤀᤡᤛᤠᤒᤠᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.