ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 19 - LIFOTNT

ᤏᤠᤘᤠᤃᤧᤴ ᤆᤀᤡ᤺ᤳᤋᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤛᤥ

ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤋᤠᤱᤛᤠᤰᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤖᤥ॥ ᤜᤧᤰᤁᤩᤠᤱ ᤂᤣ᤺ᤶᤛᤡᤰᤐᤠᤜᤠ᤹ᤗᤠᤶ ᤂᤢᤏᤧ᤹ ᤁᤢᤜᤢᤰᤁᤡᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤏᤡᤍᤧᤳᤗᤥ॥

² ᤔᤏᤠᤜᤠ᤹ ᤋᤠ᤹ᤔᤧᤈᤧᤱᤒᤠ ᤜᤧᤰᤁᤣ ᤌᤡᤰᤕᤠ᤺ᤴᤎᤰᤐᤠ ᤕᤧᤴᤏᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤋᤠ᤺ᤴᤍᤡᤰᤐᤠ ᤕᤧᤴᤏᤡᤴ ᤆᤧᤰᤋᤢᤖᤥ॥ ᤜᤧᤰᤁᤩᤠᤱ ᤛᤧᤴᤍᤡᤰᤁᤡᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰᤁᤢᤶ ᤏᤡᤱᤘᤠᤴ ᤋᤠ᤺ᤴᤍᤡᤰᤐᤠ ᤛᤧᤴᤍᤡᤰᤁᤡᤴ ᤆᤧᤰᤋᤢᤖᤥ॥

³ ᤂᤧᤸᤗᤧ ᤛᤢᤳᤗᤠ ᤔᤣ᤺ᤴᤏᤣ ᤐᤠᤴ ᤐᤠ᤺ᤳᤋᤢᤖᤥ. ᤂᤢᤏᤧ᤹ ᤁᤢᤀᤡᤰᤗᤠᤀᤠᤱ ᤂᤧᤶᤔᤧᤍᤧᤳᤏᤧᤸᤗᤥ॥

⁴ ᤜᤧᤰᤁᤣᤛᤠᤱ ᤂᤧᤸᤗᤧ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤗᤥ᤺ᤰᤂᤢᤖᤥ. ᤂᤧᤴ ᤀᤡᤱᤄᤱᤅᤡᤴ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤕᤠᤀᤥ ᤌᤧᤶᤒᤠ ᤁᤧᤖᤧᤀᤠᤱ ᤘᤠ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠᤱᤛᤠᤰᤐᤥ ᤏᤠᤶᤔᤡᤸᤗᤧ ᤁᤢᤗᤠᤃᤡ ᤕᤠᤱᤎᤥ᤺ᤰᤔᤠᤍᤧᤴ ᤆᤥᤃᤢ ᤐᤡᤖᤢᤀᤠᤱ ᤐᤳᤗᤥ॥

⁵ ᤏᤠᤶᤔᤡᤱᤃ ᤔᤣ᤺ᤰᤂᤡᤶ ᤛᤠ᤺ᤱᤃᤠᤗᤠᤶ ᤁᤧᤗ᤺ᤶᤒᤠ ᤔᤣ᤺ᤰᤂᤡᤶᤛᤠᤒᤠ ᤜᤧᤰᤁᤣ ᤋᤠᤏᤠᤶᤛᤠ ᤗ᤺ᤴᤗᤥ. ᤜᤧᤰᤁᤩᤠᤱ ᤗᤥ᤺ᤰᤔᤠ ᤁᤧᤏᤠ᤺ᤶᤒᤠᤀᤠᤱ ᤁᤧᤛ᤺ᤵᤐᤠ ᤜᤧᤰᤁᤣ ᤗ᤹ᤖᤥ॥

⁶ ᤋᤠᤱᤛᤠᤰᤐᤠᤸᤗᤧ ᤌᤡᤰ ᤁᤢᤕᤠᤀᤥ ᤂᤧᤴ ᤗᤡᤱᤅᤠᤱ ᤘᤣ᤹ᤛᤔᤠ ᤁᤢᤕᤠᤀᤥ ᤌᤠᤖᤡᤰ ᤂᤡᤷᤗᤡ ᤁᤒᤢᤖᤥ. ᤜᤧᤰᤁᤩᤠᤱ ᤛᤧ᤺ᤰᤁᤡᤸᤗᤧ ᤌᤣ᤺ᤴᤏᤠᤱ ᤆᤡᤱᤛᤡᤱᤔᤠ ᤔᤧᤛᤢᤰᤏᤧᤸᤗᤥ॥

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ

⁷ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤜᤠ᤹ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤆᤥᤰᤗᤥ. ᤂᤧᤴ ᤀᤡᤱᤈᤠᤱᤜᤠ᤹ᤖᤧ ᤔᤏᤠᤜᤠ᤹ ᤕᤠᤶᤔᤥ ᤁᤧᤎᤢᤶᤒᤠ ᤆᤥᤃᤢᤛᤡᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤛᤠᤶᤜᤠ᤹ ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤖᤥ ᤜᤧᤰᤁᤩᤠᤱ ᤏᤡᤱᤘᤠ᤹ ᤁᤧᤛᤢ᤺ᤶᤒᤠᤜᤠ᤹ ᤛᤡᤰᤁᤢᤶ ᤏᤡᤱᤘᤠ᤹ ᤐᤡᤖᤢᤛᤡᤖᤥ॥

⁸ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶᤜᤠ᤹ ᤏᤢᤒᤠ ᤆᤥᤰᤗᤥ. ᤛᤡᤰᤗᤢᤱᤔᤥ ᤛ᤺ᤵᤔᤠ ᤀᤣ᤺ᤵᤔᤠ ᤁᤧᤍᤠ᤺ᤵᤐᤠ ᤆᤥᤰᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤜᤠ᤹ ᤛᤧᤍᤡᤱᤍᤡᤱ ᤁᤧᤀᤥ᤺ᤵᤐᤠ ᤆᤥᤰᤗᤥ ᤜᤧᤰᤁᤩᤠᤱ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤀᤠᤒᤡᤖᤥ॥

⁹ ᤕᤜᤘᤣ ᤍᤠᤱᤒᤠᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠᤃ ᤏᤢᤒᤠ ᤐᤠ᤺ᤴᤗᤥ. ᤂᤧᤱᤃ ᤀᤠᤓᤧᤸᤗᤧᤛᤠᤱ ᤐᤥᤱᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶᤜᤠ᤹ ᤛᤧᤰᤂᤠᤒᤠ ᤏᤢ ᤛᤠᤶᤕᤥᤒᤠ ᤆᤥᤰᤗᤥ॥

¹⁰ ᤂᤧᤱᤜᤠ᤹ ᤁᤢᤔᤧᤸᤗᤢᤱ ᤁᤧᤄᤡ᤺ᤰᤐᤠ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤛᤡᤖᤠ᤹ᤃᤧᤎᤠᤱᤒᤠ ᤆᤥᤰᤗᤥ ᤜᤧᤰᤁᤩᤠᤱ ᤛᤰᤘᤠᤄᤢᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤁᤧᤗᤡᤶᤒᤠ ᤆᤥᤰᤗᤥ॥

¹¹ ᤂᤧᤱᤜᤠ᤹ᤗᤠᤶᤒᤠᤀᤣ ᤁᤧᤛᤧᤘᤠᤖᤥᤒᤠᤜᤠ᤹ᤖᤧ ᤂᤠᤜᤢᤴ ᤔᤧᤄᤥᤛᤢᤖᤥ. ᤂᤧᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤸᤗᤧ ᤏᤢᤒᤠ ᤐᤠ᤺ᤴᤜᤠ᤹ ᤂᤥᤍᤧᤳᤗᤥ॥

¹² ᤀᤠᤒᤠᤅᤣ ᤑᤣ᤺ᤶᤔᤏᤠᤒᤠ ᤕᤠ᤺ᤶᤒᤰᤜᤠ᤹ ᤜᤠ᤺ᤳᤗᤧᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢᤴᤗᤥ॥ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤏᤡᤱᤘᤠ᤹ ᤔᤧᤱᤄᤥᤀᤣ ᤑᤣ᤺ᤴᤍᤢᤱᤒᤠ ᤐᤠ᤺ᤴᤜᤠ᤹ᤗᤠᤶ ᤛᤧ᤺ᤵᤋᤠᤱᤅᤧ᤹ᤀᤥ॥

¹³ ᤏᤡᤏᤡᤒᤠ ᤗᤠᤕᤥ ᤆᤥ᤺ᤰᤔᤠᤗᤠᤶ ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤴ ᤌᤣ᤺ᤰᤋᤠᤱᤅᤧ᤹ᤀᤥ. ᤜᤧᤰᤋᤱᤒᤠ ᤗᤠᤕᤥᤜᤠ᤹ᤖᤧ ᤀᤠᤱᤃᤠ᤹ ᤔᤧᤕᤢᤰᤁᤠᤴᤗᤖᤥ॥ ᤜᤧᤰᤁᤩᤠᤱᤗᤰ ᤀᤠᤱᤃᤠ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤥᤱᤅᤠᤖᤥ. ᤜᤧᤰᤁᤣᤗ᤹ᤖᤡᤰ ᤕᤶᤒᤠ ᤗᤠᤕᤥ ᤁᤧᤈᤥ᤺ᤰᤐᤠ ᤔᤧᤒᤥᤱᤅᤠᤸᤗᤖᤥ॥

¹⁴ ᤕᤜᤘᤣ ᤍᤠᤱᤒᤣ. ᤀᤠᤀᤡ᤺ᤶᤛᤡᤱᤔᤠᤍᤧᤴ ᤕᤠᤰᤐᤣ᤹ ᤏᤢ ᤀᤠᤛᤧᤴᤗᤵᤍᤠᤱᤒᤠᤀᤣ. ᤀᤠᤒᤠ᤺ᤴᤛᤢᤳᤗᤠᤜᤠ᤹ ᤏᤢ ᤀᤠᤛᤡᤰᤗᤢᤱᤔᤥ ᤏᤡᤱᤘᤠ᤹ ᤀᤡ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ ᤋᤠ᤺ᤰᤋᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧᤖᤥ॥