ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 17 - LIFOTNT

ᤑᤥᤋᤩᤠ ᤔᤣ᤺ᤴᤏᤣᤒᤠ ᤔᤏᤠ᤺ᤸᤗᤧ ᤁᤢᤒᤣᤗᤡ

ᤍᤠᤀᤢᤍᤖᤧ ᤁᤢᤒᤣᤗᤡ

¹ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤑᤠ᤹ᤖᤠᤱᤅᤧ᤹ ᤑᤠ᤹ᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤁᤠᤸᤗᤧ ᤂᤧᤵᤛᤧ᤹ᤀᤥ᥄ ᤀᤠᤱᤃᤠ᤹ ᤁᤢᤍᤥ᤺ᤵᤔᤠ ᤂᤠᤛᤧᤴᤏᤡᤴ ᤂᤥᤛᤢᤱᤗ ᤑᤠ᤹ᤀᤠᤱ ᤁᤢᤍᤥ᤺ᤵᤔᤠᤀᤠᤱ ᤆᤥᤃᤢᤱᤒᤠ ᤀᤠᤒᤣᤗᤡᤴ ᤂᤧᤵᤛᤧ᤹ᤀᤥ॥

² ᤑᤥᤋᤩᤠ ᤔᤣ᤺ᤴᤏᤣᤒᤠ ᤆᤥ᤺ᤰᤁᤠᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ᤀᤣ ᤐᤠ᤺ᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤀᤣ ᤛᤧᤰᤂᤠ ᤐᤠ᤺ᤴᤏᤡᤴ ᤁᤧᤏᤡᤛᤢᤖᤥ॥

³ ᤂᤧᤏᤧ᤹ ᤀᤠᤛᤡᤰᤗᤢᤱᤔᤠᤴ ᤁᤧᤏᤡᤛᤢᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤛᤧᤴᤍᤡᤰᤁᤠᤱ ᤁᤧᤍᤩᤧᤖᤥ ᤜᤧᤰᤁᤩᤠᤱ ᤁᤧᤛᤠ᤹ᤖᤠᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤣᤛᤠᤱ ᤌᤣᤀᤠᤱ ᤑᤥᤋᤩᤠ ᤀᤠᤱᤃᤠ᤹ᤀᤥ ᤁᤧᤱᤄᤥᤛᤢᤸᤗᤥ. ᤌᤣᤀᤠᤱ ᤑᤧᤴᤐᤠᤴ ᤔᤧᤒᤠ᤺ᤳᤋᤠᤴ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤳᤋᤢᤱᤗᤥ॥

⁴ ᤁᤧᤒᤠ᤺ᤴᤈᤠ᤺ᤰᤜᤠ᤹ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ. ᤂᤧᤔᤠ᤹ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤜᤧᤰᤁᤣ ᤋᤠᤵᤑᤧ᤺ᤶᤒᤠ ᤗᤠᤶᤔᤥ ᤔᤧᤘᤠ᤹ᤀᤠᤴᤗᤥ॥

⁵ ᤂᤧᤏᤧ᤹ ᤀᤥᤛᤣ᤺ᤴᤃᤧᤎᤠᤰᤋᤠᤱᤒᤠ ᤗᤠᤶᤔᤥ ᤏᤢᤖᤡᤰᤁᤠᤱ ᤗᤠᤱᤄᤣ᤺ᤰᤁᤠᤖ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤂᤧᤴ ᤗᤠᤶᤔᤡᤴ ᤀᤠᤓᤧᤸᤗᤧᤀᤠᤱ ᤔᤧᤴᤗᤧᤳᤋᤣ ᤘᤠ᤹ᤀᤠᤖᤥ॥

⁶ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤂᤧᤏᤧ᤹ ᤀᤢ᤺ᤳᤏᤧᤖᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤏᤢᤃᤵ ᤁᤧᤒᤡᤀᤠᤖᤥ॥ ᤀᤠᤱᤃᤠ᤹ ᤗᤧᤵᤔᤠᤱ ᤜᤡᤛᤡᤱᤅᤧ᤹ᤀᤠᤱ ᤀᤠᤱᤃᤠ᤹ ᤀᤠᤒᤣᤗᤡᤴ ᤂᤧᤵᤛᤠᤱ ᤐᤡᤖᤠᤱᤅᤧ᤹ᤀᤥ॥

⁷ ᤏᤡᤱᤘᤠ᤹ᤔᤠᤖ ᤂᤧᤏᤧ᤹ ᤕᤠᤵᤔᤡ ᤗᤢᤱᤔᤠ᤹ ᤀᤠᤃ᤻ᤍᤢᤰᤗᤥ. ᤜᤧᤰᤁᤩᤠᤱ ᤔᤏᤠᤜᤠ᤹ ᤂᤢᤏᤡ᤹ ᤏᤡᤱᤔᤡᤜᤠ᤹ᤗᤠᤶᤒᤠ ᤛᤧ᤺ᤵᤛᤡᤱᤛᤧ ᤂᤧᤏᤧ᤹ᤀᤥ ᤔᤧᤍᤠ᤺ᤸᤗᤧ ᤁᤧᤛᤧ᤺ᤵᤋᤢᤛᤡᤖᤥ॥

⁸ ᤁᤧᤔᤡᤰᤜᤠᤱᤔᤠ ᤁᤢᤀᤡᤛᤡ᤺ᤰᤁᤣ ᤛᤧ᤺ᤵᤋᤠᤱ ᤁᤳᤋᤠᤱᤅᤧ᤹ᤀᤥ. ᤁᤧᤒᤣᤛᤠᤱ ᤁᤳᤋᤠᤱᤅᤧ᤹ᤀᤥ ᤜᤧᤰᤁᤣ᤺ᤸᤗᤧ ᤛᤧ᤺ᤵᤛᤡᤱᤅᤠᤖᤥ॥

⁹ ᤁᤢᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤗᤠᤶ ᤜᤧᤰᤁᤩᤠᤱ ᤕᤠᤵᤔᤡ ᤁᤧᤏᤠᤵᤐᤠ ᤛᤧᤵᤔᤠ ᤑᤠ᤹ᤀᤠᤱ ᤕᤠᤵᤔᤡ ᤁᤡᤷᤃᤵ ᤁᤧᤃᤵᤐᤠ ᤏᤢ ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ᤗᤠᤶᤒᤠ ᤆᤡᤰᤂᤠᤱᤅᤧ᤹ᤀᤥ॥

¹⁰ ᤂᤧᤱᤜᤠ᤹ᤖᤧ ᤘᤣ᤹ᤜᤠ᤹ ᤗᤢᤱᤔᤠ᤹ ᤔᤧᤴᤍᤢᤰᤋᤢᤴᤛᤡᤴᤗᤥ. ᤜᤧᤰᤁᤩᤠᤱ ᤔᤧᤜᤧᤴᤇᤡᤱᤅᤠᤱ ᤔᤧᤒᤠ᤺ᤳᤗᤥ॥

¹¹ ᤂᤧᤱᤜᤠ᤹ᤖᤧ ᤔᤧᤏᤠ᤺ᤳᤋᤠᤱ ᤔᤧᤏᤠ᤺ᤳᤋᤠᤱᤅᤠᤱ ᤀᤠᤱᤃᤠ᤹ ᤔᤧᤛᤡ᤹ᤖᤠᤱᤅᤠᤱ ᤘᤠ᤹ᤀᤠᤖᤥ॥ ᤂᤧᤱᤜᤠ᤹ᤖᤧ ᤛᤥ᤺ᤶᤔᤠ ᤏᤢ ᤌᤠᤶᤔᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤧᤛᤢᤰᤁᤠᤖ ᤔᤧᤘᤠ᤹ᤖᤥ॥

¹² ᤂᤧᤱᤜᤠ᤹ᤃ ᤛᤠᤰᤁᤡᤸᤗᤧ ᤁᤧᤕᤱᤒᤠ ᤁᤣᤒᤠ ᤜᤧᤰᤋᤱᤒᤠ ᤔᤧᤈᤥᤰᤗᤥ. ᤂᤧᤱᤜᤠ᤹ᤖᤧ ᤌᤧ᤺ᤱᤔᤠ ᤛᤧᤵᤔᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤧᤛᤢᤰᤁᤠᤖ ᤔᤧᤘᤠ᤹ᤖᤥ॥

¹³ ᤕᤜᤘᤣ ᤍᤠᤱᤒᤠᤀᤣ ᤋᤩᤧ᤹ᤀᤥ. ᤀᤠᤏᤡᤱᤔᤡᤜᤠ᤹ᤏᤢ ᤌᤰᤋᤧ᤹ᤀᤠᤱ ᤂᤧᤱᤜᤠ᤹ ᤏᤠ᤺ᤴᤍᤧᤛᤧ᤹ᤀᤥ॥ ᤀᤠᤒᤠᤅᤣ ᤁᤧᤍᤠᤓᤣ᤺ᤸᤗᤧ ᤁᤢᤀᤡᤃᤧᤓᤧᤶᤒᤠᤜᤠ᤹ᤗᤠᤶ ᤀᤠᤱᤃᤠ᤹ ᤋᤠᤱᤛᤧ᤺ᤵᤋᤠᤱᤅᤧ᤹ᤀᤥ॥

¹⁴ ᤕᤜᤘᤣ ᤍᤠᤱᤒᤠᤀᤣ. ᤁᤴ ᤀᤡᤰᤛᤠ ᤂᤠᤶᤒᤣ᤺ᤰᤁᤥ ᤕᤠᤱᤛᤠᤁᤢᤴᤎᤣ᤺ᤴᤏᤣ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤐᤠᤴ ᤗ᤹ᤖᤡᤰ ᤁᤧᤀᤡ᤺ᤵᤐᤠ ᤔᤏᤠᤜᤠ᤹ᤗᤠᤶᤒᤠ ᤁᤧᤜᤢᤰᤁᤡᤸᤗᤧ ᤛᤧ᤺ᤵᤋᤠᤱᤅᤧ᤹ᤀᤥ॥ ᤁᤖ ᤁᤧᤛᤡᤖᤠ᤹ ᤁᤧᤎᤠᤱᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤧᤳᤗᤠ᤺ᤰᤁᤡᤸᤗᤧ ᤁᤧᤄᤠ᤺ᤳᤋᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠᤜᤠ᤹ᤖᤧ ᤕᤖᤡᤰ ᤔᤧᤄᤥᤛᤢᤖᤥ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤧᤴᤇᤠ᤹ᤜᤠ᤹ᤖᤧ ᤗᤠᤃᤡᤀᤠᤱ ᤕᤖᤡᤰ ᤕᤠᤱᤛᤠᤁᤢᤴᤎᤣ ᤔᤧᤛᤢᤵᤛᤢᤀᤠᤱ ᤔᤧᤗᤢᤵᤛᤢᤖᤥ॥

¹⁵ ᤜᤧᤰᤁᤩᤠᤱ ᤀᤠᤱᤃᤠ᤹ᤃ ᤂᤧᤏᤧ᤹ ᤏᤡᤔᤠ ᤛᤢᤰᤏᤧᤖᤥ ᤌᤣᤀᤠᤱᤓᤧᤸᤗᤧ ᤌᤣᤀᤠᤱ ᤋᤠᤵᤑᤧ᤺ᤶᤒᤠ ᤐᤠᤴ ᤀᤠᤱᤃᤠ᤹ ᤔᤧᤴᤈᤥ᤺ᤰᤁᤣ ᤘᤠ᤹ᤀᤠᤖᤥ॥ ᤀᤠᤱᤃᤠ᤹ ᤀᤡᤶᤔᤠᤀᤠᤱ ᤛᤥᤀᤠᤸᤗᤧ ᤂᤧᤏᤧ᤹ ᤁᤧᤏᤠᤖᤠᤴ ᤏᤡᤛᤢᤱᤅᤠᤱ ᤀᤠᤏᤡᤱᤘᤠ᤹ ᤋᤠᤖᤥ॥