ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 129 - LIFOTNT

ᤏᤡᤱᤔᤡᤜᤠ᤹ ᤏᤠ᤺ᤶᤔᤠᤛᤡ ᤐᤣᤗᤡ

ᤗᤠᤶᤍᤡᤰ ᤆᤥ᤺ᤰᤔᤠ ᤛᤠᤶᤗᤥ

¹ ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤌᤠᤱᤒᤧᤴ ᤁᤧᤘᤕᤧᤀᤠᤱᤎᤥ ᤀᤠᤸᤗᤥ ᤌᤠᤖᤡᤰ ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ᤖᤧ ᤂᤧᤏᤧ᤹ ᤋᤢᤰᤂᤣ ᤁᤧᤶᤈᤠ᤺ᤳᤋᤧᤖᤥ. ᤂᤧᤴ ᤐᤠ᤺ᤴᤏᤡᤴ ᤆᤧᤰᤂᤧ ᤐᤠ᤺ᤳᤋᤧ᤹ᤀᤥ॥

² “ᤀᤠᤱᤃᤠ᤹ ᤌᤠᤱᤒᤧᤴ ᤘᤕᤠᤱᤅᤠᤱᤎᤥᤀᤣ ᤀᤠᤏᤡᤱᤔᤡᤜᤠ᤹ᤖᤧ ᤆᤒᤧ᤺ᤳᤇᤡᤰᤁᤠᤱ ᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤀᤣ ᤋᤢᤰᤂᤣ ᤔᤧᤈᤠ᤺ᤳᤋᤠᤱᤗᤥ. ᤁᤖ ᤂᤧᤱᤜᤠ᤹ᤖᤧ ᤀᤠᤵᤑᤠᤸᤗᤧᤀᤠᤱ ᤀᤠᤱᤃᤠ᤹ ᤏᤠ᤺ᤶᤔᤠ ᤔᤧᤴᤇᤢᤰᤋᤠᤱᤅᤡᤸᤗᤥ॥

³ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤀᤣ᤺ᤰᤌᤠ᤺ᤰᤔᤥ ᤛᤠ᤹ᤖᤡᤰ ᤕᤶᤒᤠ ᤔᤧᤄᤠ᤺ᤴᤍᤠᤱᤗᤥ॥ ᤜᤧᤰᤁᤩᤠᤱ ᤀᤠᤀᤣ᤺ᤰᤁᤡᤴ ᤁᤢᤕᤥ᤺ᤰᤁᤣ ᤁᤢᤕᤥᤰ ᤁᤧᤃᤠ᤺ᤶᤒᤠ ᤔᤧᤈᤥᤃᤢᤖᤥ॥

⁴ ᤁᤖ ᤕᤜᤘᤣ ᤍᤠᤱᤒᤠᤱᤃ ᤛᤠᤶᤕᤥᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤀᤡᤃᤧᤓᤧᤶᤒᤠ ᤏᤢ ᤕᤥ᤺ᤰᤗᤠᤶᤒᤠ ᤆᤥ᤺ᤰᤕᤢᤶᤓᤥ ᤐᤡᤖᤠᤱᤅᤠᤱ ᤘᤠ᤹ᤖᤥ॥”

⁵ ᤛᤡᤕᤥᤏᤧᤴ ᤁᤧᤈᤡ᤺ᤵᤐᤠ ᤁᤧᤖᤧᤰ ᤔᤏᤠᤜᤠ᤹ ᤜᤠᤖᤡ ᤔᤧᤍᤠᤖᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤄᤧᤳᤇᤡᤱᤅᤠᤱ ᤔᤧᤒᤣ᤺ᤰᤗᤖᤥ॥

⁶ ᤂᤧᤱᤜᤠ᤹ᤃ ᤜᤡᤶ ᤂᤠᤶᤒᤢᤀᤥ ᤁᤧᤗᤡᤱᤒᤠ ᤕᤠ᤺ᤴᤛᤢᤱ ᤁᤢᤀᤡᤛᤡᤰ ᤔᤧᤒᤥᤱᤗᤖᤥ. ᤂᤧᤱᤜᤠ᤹ ᤐᤥᤔᤠᤎᤠᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤀᤡᤔᤧᤗᤧᤶᤗᤥ॥

⁷ ᤂᤧ᤹ᤕᤥ ᤕᤠᤴ ᤁᤧᤜᤧᤰᤐᤠᤸᤗᤧ ᤜᤢᤰᤐᤰᤎᤡᤰ ᤜᤧᤰᤔᤠ ᤔᤧᤛᤢᤰᤋᤢᤸᤗᤥ. ᤜᤧᤰᤁᤩᤠᤱ ᤁᤰ ᤁᤧᤄᤣ᤺ᤱᤒᤠᤸᤗᤧ ᤑᤰᤋᤠᤱᤎᤡᤰᤁᤠᤱ ᤑᤢᤱᤔᤠ ᤔᤧᤛᤢᤰᤋᤢᤴᤗᤥ॥

⁸ ᤂᤧᤵᤔᤥᤏᤢ ᤗᤠᤱᤃᤧᤄᤣ᤺ᤰᤐᤠᤀᤠᤱ ᤁᤧᤒᤣ᤺ᤰᤐᤠ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤀᤰᤂᤣ ᤔᤧᤶᤒᤠ᤺ᤳᤋᤢᤸᤗᤖᤥ. “ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤜᤠᤱᤘᤠᤔᤢ᤹ᤀᤡ ᤁᤧᤒᤡᤖᤡᤖᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤂᤡᤏᤡ᤹ ᤜᤠᤱᤘᤠᤔᤢ᤹ᤀᤡ ᤐᤡᤀᤠᤛᤡᤃᤧᤖᤥ॥”