ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 116 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤔᤠ

¹ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ ᤔᤡ᤺ᤶ ᤔᤧᤳᤋᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤢᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤱᤒᤠᤴ ᤏᤡᤱᤘᤠ᤹ ᤐᤡᤖᤢᤖᤥ॥

² ᤀᤠᤱᤃᤠ᤹ ᤀᤠᤒᤣᤗᤡᤴ ᤂᤧᤶᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤳᤏᤠ ᤜᤡᤛᤡᤱᤗᤥ. ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤜᤡᤱᤜᤡᤱ ᤌᤠᤖᤡᤰ ᤂᤢᤏᤧ᤹ ᤐᤣᤗᤡ ᤑᤠᤰᤋᤢᤱᤗᤥ॥

³ ᤛᤡᤔᤠᤗᤡᤱᤎᤥᤀᤥ ᤁᤧᤖᤠᤱᤅᤠᤱ ᤘᤠ᤹ᤀᤠᤖᤥ. ᤂᤧᤔᤠᤕᤱᤛᤱᤅᤥᤒᤠ ᤁᤡᤔᤠᤸᤗᤧ ᤛᤢ᤺ᤵᤋᤠᤱᤗᤥ॥ ᤛᤠ᤹ᤖᤡᤰ ᤋᤢᤰᤂᤣ ᤏᤢ ᤔᤧᤖᤡᤱᤗᤧ ᤀᤠᤱᤃᤠ᤹ ᤕᤠ᤺ᤴᤍᤠᤱᤅᤠᤱ ᤘᤕᤧᤖᤥ॥

⁴ ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ ᤐᤣᤗᤡ ᤑᤠᤰᤋᤢᤱᤗᤥ. “ᤕᤜᤘᤣ ᤍᤠᤱᤒᤠᤀᤣ. ᤋᤠᤱᤛᤧ᤺ᤵᤋᤠᤱᤅᤧ᤹ᤀᤥ॥”

⁵ ᤕᤜᤘᤣ ᤍᤠᤱᤒᤠᤴ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤜᤧᤰᤁᤩᤠᤱ ᤁᤧᤏᤢ᤹ᤒᤠ ᤆᤥᤰᤗᤥ. ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢᤖᤡᤰ ᤀᤠᤔᤧᤵᤔᤧᤵᤐᤠ ᤆᤥᤰᤗᤥ॥

⁶ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ ᤁᤧᤃᤵᤐᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ. ᤀᤠᤱᤃᤠ᤹ ᤁᤧᤛᤠᤰᤐᤥ ᤌᤩᤠᤱᤅᤠᤱ ᤘᤕᤠᤱᤅᤡᤸᤗᤧ ᤂᤢᤏᤧ᤹ ᤛᤧ᤺ᤵᤋᤠᤱᤗᤥ॥

⁷ ᤕᤠᤶᤔᤥ ᤌᤡᤰᤗᤧᤱ ᤀᤠᤛᤡᤰᤗᤢᤱᤔᤥ ᤀᤠᤱᤃᤠ᤹ ᤜᤠᤱᤜᤠᤱ ᤗ᤹ᤀᤠᤖᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ ᤀᤠᤗᤠᤃᤡ ᤁᤧᤏᤢ᤹ᤒᤠ ᤆᤥᤰᤗᤥ॥

⁸ ᤕᤜᤘᤣ ᤍᤠᤱᤒᤧᤸᤗᤧ ᤛᤡᤔᤠᤗᤠᤶ ᤛᤧ᤺ᤵᤋᤠᤱᤗᤥ. ᤀᤠᤔᤡᤰᤘᤠ ᤋᤢᤃᤠᤱ ᤐᤡᤖᤠᤱᤗᤥ. ᤜᤧᤰᤁᤩᤠᤱ ᤀᤠᤗᤠᤱᤜᤠ᤹ ᤔᤧᤴᤍᤥ᤺ᤰᤁᤣ ᤀᤠᤱᤃᤠ᤹ ᤁᤶᤒᤪᤠᤱ ᤔᤧᤳᤋᤠᤱᤗᤥ॥

⁹ ᤂᤧᤸᤗᤧᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤡᤱᤅᤠᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤀᤠᤱᤃᤠ᤹ ᤘᤠ᤹ᤀᤠᤖᤥ॥

¹⁰ “ᤛᤠ᤹ᤖᤡᤰ ᤏᤠᤕᤥᤒᤠ ᤐᤥ᤺ᤰᤂᤠᤱᤅᤠᤱ ᤐᤠ᤺ᤳᤋᤢᤱᤗᤥ” ᤜᤧᤰᤁᤣᤛᤠᤱ ᤏᤛᤠᤴ ᤆᤥᤃᤢᤱᤅᤠᤱ ᤐᤳᤋᤠᤖᤥ॥

¹¹ ᤀᤠᤱᤃᤠ᤹ ᤁᤡᤛᤠᤱᤅᤠᤱ ᤐᤠ᤺ᤳᤋᤢᤱᤗᤥ. “ᤜᤠ᤺ᤳᤋᤠᤱ ᤁᤢᤏᤠᤛᤠ᤹ᤔᤠ ᤔᤧᤛᤢᤰᤁᤠᤸᤗᤥ॥”

¹² ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤠᤗᤠᤃᤡ ᤕᤖᤡᤰ ᤏᤢᤒᤠ ᤐᤠ᤺ᤴᤜᤠ᤹ ᤆᤥᤃᤠᤱ ᤐᤡᤖᤠᤱᤗᤥ. ᤂᤧᤸᤗᤧ ᤁᤢᤗᤧᤰᤘᤠ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ ᤌᤧᤔᤠ ᤐᤡᤔᤠ ᤛᤢᤰᤋᤢᤱᤒᤣ᥅

¹³ ᤀᤠᤱᤃᤠ᤹ ᤛᤧ᤺ᤵᤋᤠᤱᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤴ ᤏᤢᤃᤧᤴ ᤐᤡᤖᤢᤱᤗᤥ. ᤂᤢᤏᤧ᤹ᤀᤥ ᤆᤧᤸᤗᤧᤰᤛᤣᤸᤗᤧ ᤁᤢᤘᤠᤴ ᤆᤥ᤺ᤵᤑᤠ ᤋᤥ᤺ᤴᤍᤢᤱᤗᤥ॥

¹⁴ ᤁᤧᤖᤧᤰ ᤁᤢᤔᤏᤠᤜᤠ᤹ ᤆᤢᤶᤗᤢᤱ ᤔᤧᤈᤥ᤺ᤰᤐᤠ ᤋᤧᤴᤏᤥ. ᤂᤢᤏᤧ᤹ᤏᤢ ᤆᤥᤃᤢᤱᤒᤠ ᤔᤠᤱᤜᤧᤰᤁᤡᤴ ᤁᤧᤳᤋᤢᤱᤗᤥ॥

¹⁵ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤔᤏᤠᤴ ᤛᤡ᤺ᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤢᤰᤗᤥ. ᤂᤢᤏᤧ᤹ ᤁᤢᤏᤡᤔᤥ ᤂᤧᤴ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤆᤥᤰᤗᤥ॥

¹⁶ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ᤃ ᤂᤧᤏᤧ᤹ᤀᤥ ᤛᤧᤘᤠ ᤁᤧᤈᤥ᤺ᤰᤐᤠᤀᤠᤖᤥ. ᤀᤠᤶᤔᤠᤖᤧ ᤁᤧᤛᤧᤘᤠ ᤆᤥᤃᤢᤒᤠ ᤜᤧᤰᤁᤣᤀᤣ ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤧᤘᤠ ᤆᤥᤃᤢᤱᤗᤥ. ᤛᤡᤔᤧᤴᤗᤠᤶ ᤀᤠᤱᤃᤠ᤹ ᤁᤧᤛᤧ᤺ᤵᤋᤠᤱᤗᤥ॥

¹⁷ ᤂᤧᤏᤧ᤹ᤀᤥ ᤀᤠᤱᤃᤠ᤹ ᤏᤢᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤱᤗᤥ. ᤜᤧᤰᤁᤩᤠᤱ ᤂᤧᤏᤧ᤹ᤀᤥ ᤐᤣᤗᤡᤃᤧᤴ ᤋᤢᤘᤠ ᤋᤥ᤺ᤴᤍᤢᤱᤗᤥ॥

^18-19 ᤕᤜᤘᤣ ᤍᤠᤱᤒᤠᤀᤥ ᤆᤥᤃᤢᤱᤒᤠ ᤔᤠᤱᤜᤧᤰᤁᤡᤴ ᤁᤧᤖᤧᤰ ᤁᤧᤔᤏᤠᤜᤠ᤹ ᤔᤧᤈᤢᤶᤒᤠ ᤋᤧᤴᤏᤥ. ᤕᤖᤢᤛᤗᤧ᤺ᤶᤔᤥ. ᤁᤧᤜᤡᤶᤔᤥᤒᤠ ᤛᤣᤛᤣᤍᤧᤴᤏᤥ. ᤁᤧᤳᤋᤢᤱᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄