ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 109 - LIFOTNTᤔᤏᤠ᤺ᤸᤗᤧ ᤁᤢᤗᤢᤱᤜᤠᤴ ᤐᤠᤴ ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤗᤠᤃᤡ ᤍᤠᤀᤢᤍᤖᤧ ᤁᤢᤛᤠᤶᤗᤥ 1 ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤁᤧᤏᤠᤖᤠ ᤑᤥᤛᤢᤱᤗᤥ. ᤂᤧᤏᤧ᤹ ᤛᤫᤠ᤺ᤳ ᤔᤧᤕᤢᤅᤧᤴᤏᤧ᤹ᤀᤥ॥ 2 ᤋᤠᤰᤁᤧᤓᤧ᤹ᤒᤠ ᤏᤢ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ᤖᤧ ᤀᤠᤱᤃᤠ᤹ ᤔᤧᤍᤖᤠᤱᤅᤠᤱ ᤘᤠ᤹ᤀᤠᤖᤥ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤡᤱᤗᤧᤰ ᤀᤠᤒᤠᤴ ᤔᤧᤒᤠ᤺ᤳᤋᤢᤖᤥ॥ 3 ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤔᤧᤔᤧᤳᤋᤠᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤌᤣᤏᤠᤎᤣ ᤔᤧᤓᤳᤋᤠᤖᤥ॥ 4 ᤀᤠᤱᤃᤠ᤹ᤃ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱᤗᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤃᤡ ᤋᤢᤘᤠ ᤆᤥᤃᤢᤱ ᤐᤡᤖᤢᤱᤛᤡᤱᤗᤥ. ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤀᤳᤋᤠᤖᤥ॥ 5 ᤏᤢᤖᤡᤰ ᤔᤧᤳᤋᤢᤱᤛᤡᤱᤒᤠᤸᤗᤧ ᤁᤢᤗᤧᤰᤘᤠ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤠᤖᤥ. ᤜᤧᤰᤁᤩᤠᤱ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱᤒᤠᤸᤗᤧ ᤁᤢᤗᤧᤰᤘᤠ ᤀᤠᤱᤃᤠ᤹ ᤔᤧᤈᤡ᤺ᤳᤋᤠᤖᤥ॥ 6 ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤂᤢᤏᤧ᤹ ᤀᤵᤔᤠᤖᤧ ᤗᤠᤃᤡ ᤁᤢᤓᤠ ᤁᤢᤀᤡᤃᤧᤓᤧᤶᤒᤠ ᤂᤠᤛᤧᤴᤗᤥ᤺ᤶᤒᤠᤎᤡᤰ ᤛᤣᤃᤧ᤹ᤀᤥ. ᤜᤧᤰᤁᤩᤠᤱ ᤀᤠᤒᤠᤅᤣ ᤁᤢᤏᤡᤱᤔᤡᤜᤠ᤹ᤖᤧ ᤂᤧᤴ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤖᤖᤥ॥ 7 ᤂᤢᤏᤧ᤹ ᤁᤢᤄᤠᤛᤧᤴ ᤐᤥᤱᤅᤡᤸᤗᤧ ᤂᤧᤴ ᤀᤠᤵᤋᤡᤰᤁᤥ ᤌᤠᤖᤖᤥ. ᤂᤧᤸᤗᤧ ᤐᤣᤗᤡ ᤑᤠᤰᤋᤢᤒᤠᤴ ᤗᤠᤕᤥ ᤐᤥᤱᤗᤖᤥ॥ 8 ᤜᤠᤖᤠ᤹ ᤂᤧᤸᤗᤧ ᤁᤢᤎᤠ᤺ᤰ ᤛ᤹ᤖᤖᤥ. ᤔᤠᤱᤛᤧᤘᤠ ᤆᤥ᤺ᤰᤔᤠ ᤁᤢᤗᤰᤁᤡᤴ ᤘᤣ᤹ ᤔᤏᤠ᤺ᤸᤗᤧ ᤂᤥᤛᤢᤖᤖᤥ॥ 9 ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤕᤧᤳᤇᤠᤒᤠ ᤕᤧᤳᤇᤠᤔᤠ ᤔᤧᤒᤥᤱᤗᤖᤥ. ᤜᤧᤰᤁᤩᤠᤱ ᤁᤢᤔᤣ᤺ᤳᤋᤡᤴ ᤔᤣᤔᤣᤍᤢᤔᤠ ᤐᤥᤱᤗᤖᤥ॥ 10 ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤆᤠᤃᤧᤏᤠ᤺ᤰᤐᤠ ᤁᤧᤈᤠᤒᤠ ᤔᤧᤒᤥᤱᤗᤖᤥ. ᤂᤢᤴᤇᤡ᤹ ᤔᤧᤕᤢᤱᤒᤠ ᤐᤠᤱᤕᤰ ᤜᤡᤶᤜᤠ᤹ᤀᤥᤗᤠᤶᤒᤠ ᤂᤧᤱᤜᤠ᤹ ᤔᤧᤏᤠ᤺ᤳᤋᤢᤛᤡᤖᤖᤥ॥ 11 ᤂᤧᤸᤗᤧ ᤁᤳᤋᤢᤒᤠ ᤁᤠᤰ ᤕᤠᤱᤛᤠᤁᤢᤴᤎᤣᤴ ᤛᤡᤱᤏᤠᤳ ᤁᤧᤒᤡᤒᤠᤸᤗᤧ ᤋᤣ᤹ᤖᤢᤏᤡᤖᤥ. ᤂᤧᤸᤗᤧ ᤛᤩᤠᤱᤔᤧᤴᤍᤠᤱ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤕᤠᤵᤔᤡᤜᤠ᤹ᤖᤧ ᤔᤧᤏᤠᤵᤋᤢᤏᤡᤖᤥ॥ 12 ᤂᤢᤏᤧ᤹ ᤜᤠ᤺ᤳᤗᤧᤀᤠᤱ ᤗᤢᤱᤔᤠ᤹ ᤔᤧᤍᤢᤰᤋᤢᤸᤗᤖᤥ. ᤂᤢᤏᤧ᤹ ᤗᤧᤖᤢᤎᤛᤡᤒᤠ ᤕᤧᤳᤇᤠᤒᤠ ᤕᤧᤳᤇᤠᤔᤠ ᤁᤢᤛ᤻ᤛᤠᤜᤠ᤹ ᤜᤠ᤺ᤳᤗᤧᤀᤠᤱ ᤀᤥᤔᤧᤔᤧᤳᤋᤢᤛᤡᤸᤗᤖᤥ॥ 13 ᤂᤧᤸᤗᤧ ᤁᤢᤛ᤻ᤛᤠ ᤁᤢᤶᤔᤧᤴᤇᤠ᤹ᤜᤠ᤹ ᤔᤧᤛᤡᤖᤖᤥ. ᤜᤧᤰᤁᤩᤠᤱ ᤁᤧᤍᤠᤒᤠ ᤌᤠ᤺ᤰᤜᤠ᤹ᤖᤧ ᤂᤢᤏᤡ᤹ ᤔᤡᤱᤅᤠᤱ ᤔᤠᤒᤣ᤺ᤰᤗᤖᤥ॥ 14 ᤂᤧᤸᤗᤧ ᤁᤢᤎᤠ᤺ᤰᤌᤧᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤑᤧᤴᤕᤠ᤺ᤶᤒᤰᤁᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹ ᤛᤢᤶᤗ᤹ᤖᤖᤥ. ᤂᤧᤸᤗᤧ ᤁᤢᤶᤔᤠᤖᤧ ᤆᤥᤃᤢᤒᤠ ᤗᤠᤕᤥᤴ ᤀᤠᤓᤧᤸᤗᤧᤀᤠᤱ ᤏᤡᤱᤘᤠ᤹ ᤔᤧᤓᤣ᤺ᤴᤏᤧᤸᤗᤖᤥ॥ 15 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤴ ᤛᤍᤠᤍᤡᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤌᤠ᤺ᤵᤗᤖᤥ. ᤂᤠᤶᤒᤣ᤺ᤰᤔᤥᤗᤠᤶᤒᤠ ᤂᤧᤱᤜᤠ᤹ ᤏᤡᤱᤘᤠ᤹ ᤔᤧᤔᤢ᤺ᤴᤗᤖᤥ॥ 16 ᤂᤧᤸᤗᤧ ᤀᤠᤓᤧᤸᤗᤧᤀᤠᤱ ᤘᤣ᤹ᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡ ᤏᤡᤱᤘᤠ᤹ ᤔᤧᤈᤥᤃᤢᤸᤗᤥ. ᤁᤖ ᤕᤠᤱᤃᤧᤛᤠ᤹ᤒᤠ ᤏᤢ ᤆᤢᤱᤈᤡ ᤕᤧᤳᤇᤠᤜᤠ᤹ ᤜᤧᤰᤁᤩᤠᤱ ᤁᤢᤎᤣᤀᤠᤱ ᤁᤧᤜᤥᤵᤐᤠᤜᤠ᤹ ᤋᤢᤰᤂᤣ ᤆᤠ᤺ᤳᤋᤢᤛᤡᤀᤠᤱ ᤛᤧᤖᤢᤛᤡᤖᤥ॥ 17 ᤂᤧᤸᤗᤧ ᤘᤣ᤹ᤜᤠ᤹ ᤔᤠᤱᤍᤣᤔᤠᤛᤡ ᤁᤢᤛᤡᤖᤠ᤹ ᤌᤠᤅᤧᤖᤥ. ᤁᤖ ᤂᤧᤴ ᤛᤠᤰᤔᤢᤖᤠᤜᤠ᤹ ᤂᤢᤏᤧ᤹ ᤁᤢᤛᤶᤎᤠᤱᤅᤣ ᤌᤠᤖᤖᤥ. ᤂᤧᤸᤗᤧ ᤘᤣ᤹ᤜᤠ᤹ ᤔᤢ᤹ᤀᤡᤛᤠᤶ ᤐᤡᤔᤠᤛᤡ ᤏᤡᤱᤘᤠ᤹ ᤔᤧᤈᤥᤃᤢᤴᤗᤥ. ᤜᤧᤰᤁᤣ᤺ᤸᤗᤧ ᤂᤧᤴᤏᤠᤱ ᤘᤣ᤹ᤜᤠ᤹ᤖᤧ ᤔᤢ᤹ᤀᤡᤛᤠᤶ ᤔᤧᤶᤒᤡᤖᤢᤸᤗᤖᤥ॥ 18 ᤂᤧᤸᤗᤧ ᤀᤠᤓᤧᤸᤗᤧᤛᤠᤱ ᤘᤣ᤹ᤜᤠ᤹ ᤔᤠᤱᤍᤣ ᤛᤠᤰᤔᤢᤖᤠᤖᤰ ᤔᤧᤳᤋᤢᤛᤡᤀᤠᤱ ᤐᤳᤇᤧᤖᤥ. ᤁᤢᤛᤠᤵᤐᤥ᤺ᤰᤁᤥ ᤛᤠᤰᤔᤢᤖᤠᤴ ᤆᤫᤠ᤺ᤳ ᤜᤧᤰᤁᤣ ᤋᤡᤶᤛᤧᤖᤥ. ᤜᤧᤰᤁᤩᤠᤱ ᤏᤡ᤺ᤱᤃᤣ᤹ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤕᤧᤵᤐᤠᤜᤠ᤹ᤀᤥ ᤛᤡᤒᤢᤍᤣ᤹ᤖᤢᤖᤥ॥ 19 ᤂᤧᤸᤗᤧ ᤔᤠᤱᤍᤣ ᤛᤠᤰᤔᤢᤖᤠ ᤔᤧᤳᤋᤢᤛᤡᤒᤠᤴ ᤂᤢᤏᤧ᤹ ᤁᤢᤛᤶᤎᤠᤱ ᤌᤠᤖᤖᤥ. ᤜᤧᤰᤁᤩᤠᤱ ᤂᤧᤴ ᤛᤠᤰᤔᤢᤖᤠᤴ ᤑ᤹ᤀᤡ ᤁᤢᤀᤡᤛᤡᤰ ᤀᤠᤓᤧᤸᤗᤧᤛᤠᤱ ᤕᤢᤵᤛᤢᤀᤠᤱ ᤐᤳᤗᤖᤥ॥” 20 ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤂᤢᤶᤍᤡᤱ ᤐᤡᤖᤧᤛᤧ᤹ᤀᤥ. ᤀᤠᤍᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤜᤠᤒᤠ ᤜᤧᤰᤋᤱᤒᤠ ᤁᤢᤗᤧᤰᤘᤠ ᤔᤧᤄᤥᤛᤢᤖᤖᤥ॥ 21 ᤁᤖ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤁᤧᤔᤠᤱᤜᤢᤵ ᤁᤢᤀᤡᤛᤡᤰ ᤀᤠᤱᤃᤠ᤹ ᤑᤠ᤹ᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤏᤛᤠ᤺ᤴᤛᤠᤒᤠ ᤏᤢ ᤁᤧᤏᤢ᤹ᤒᤠ ᤁᤧᤈᤥ᤺ᤰᤗᤥ॥ 22 ᤀᤠᤱᤃᤠ᤹ ᤕᤠᤱᤃᤧᤛᤠ᤹ᤒᤠ ᤆᤥ᤺ᤰᤁᤠᤀᤠᤱ ᤋᤢᤰᤂᤣ ᤆᤠᤀᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹ᤀᤠᤖᤥ॥ 23 ᤀᤠᤱᤃᤠ᤹ᤃ ᤕᤢ᤺ᤴᤎᤥ᤺ᤰᤐᤠ ᤛᤠᤶᤔᤡ᤺ᤰᤂᤢᤱᤒᤠ ᤁᤢᤀᤡᤛᤡᤰ ᤔᤠᤔᤠᤒᤣ᤺ᤰᤔᤠ ᤆᤥ᤺ᤰᤁᤠᤖᤥ. ᤏᤡ᤺ᤱᤄᤢᤰᤘᤠᤴ ᤛᤠᤱᤔᤏᤠᤀᤠᤱ ᤗᤠᤵᤑᤢᤔᤏᤠᤒᤠ ᤜᤧᤰᤁᤣ ᤗ᤹ᤀᤠᤖᤥ॥ 24 ᤋ᤺ᤰᤏᤧᤳ ᤕᤢᤱᤔᤠᤖᤧ ᤕᤢᤱᤔᤠᤖᤧ ᤀᤠᤎᤢᤱᤒᤥᤜᤠ᤹ ᤕᤱᤗᤥ. ᤀᤠᤱᤃᤠ᤹ ᤀᤠᤎᤰᤁᤡᤴᤏᤠᤱ ᤕᤧᤵ ᤏᤢ ᤜᤥᤖᤡᤰᤗᤰ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ 25 ᤀᤠᤱᤃᤠ᤹ ᤔᤧᤏᤡᤀᤠᤀᤠᤱ ᤔᤏᤠᤜᤠ᤹ ᤔᤧᤀᤣ᤺ᤳᤗᤥ. ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤠᤖ ᤂᤢᤴᤇᤡ᤹ ᤌᤧᤃᤣᤰᤐᤠᤴ ᤋᤄᤢᤶᤋᤄᤢᤶ ᤔᤧᤔᤧᤳᤋᤢᤖᤥ॥ 26 ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤑᤠ᤹ᤖᤠᤱᤅᤧ᤹ᤀᤥ. ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤁᤧᤍᤢᤰᤁᤠᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ॥ 27 ᤀᤠᤱᤃᤠ᤹ ᤕᤠᤵᤔᤡ ᤋᤠᤱᤃᤧᤛᤧ᤺ᤵᤐᤠᤱᤃ ᤂᤧᤏᤧ᤹ᤏᤧᤖᤥ. ᤁᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤈᤥᤃᤢᤒᤠ ᤑᤠ᤹ᤀᤠᤱ ᤀᤠᤏᤡᤱᤔᤡᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤖᤥ॥ 28 ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤠᤱᤍᤣ ᤛᤠᤱᤃᤪᤠ ᤔᤧᤔᤧᤳᤋᤠᤖᤥ. ᤁᤖ ᤂᤧᤏᤧ᤹ᤃ ᤔᤢ᤹ᤀᤡᤛᤠᤶ ᤁᤧᤒᤡᤀᤠᤖᤥ॥ ᤀᤠᤱᤃᤠ᤹ ᤕᤠᤵᤔᤡ ᤁᤧᤄᤢᤶᤒᤠᤜᤠ᤹ ᤜᤠᤖᤡᤔᤧᤍᤠᤖᤥ. ᤁᤖ ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤴ ᤀᤠᤏᤡᤱᤘᤠ᤹ ᤋᤠᤖᤖᤥ॥ 29 ᤀᤠᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤆᤠ᤺ᤳᤌᤡ ᤐᤣ᤺ᤰᤗᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤎᤠᤖᤖᤥ॥ 30 ᤕᤶᤒᤠ ᤀᤡᤰᤗᤠᤀᤥ ᤕᤜᤘᤣ ᤍᤠᤱᤒᤠᤴ ᤏᤢᤃᤧᤴ ᤐᤡᤖᤢᤱᤗᤥ. ᤔᤧᤴᤇᤠᤶ ᤆᤢᤶᤗᤢᤱᤅᤥ ᤂᤢᤏᤧ᤹ ᤁᤢᤏᤠᤖᤠ ᤑᤥᤛᤢᤱᤗᤥ॥ 31 ᤌᤣᤀᤠᤱᤓᤧᤸᤗᤧ ᤕᤠᤱᤃᤧᤛᤠ᤹ᤒᤠᤜᤠ᤹ ᤂᤢᤏᤧ᤹ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ. ᤜᤧᤰᤁᤩᤠᤱ ᤛᤧᤵᤔᤠ ᤁᤧᤃᤥ᤺ᤵᤐᤠᤜᤠ᤹ᤗᤠᤶᤒᤠ ᤂᤧᤱᤜᤠ᤹ ᤛᤧ᤺ᤵᤋᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.