ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 108 - LIFOTNT

ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤐᤣᤗᤡ

ᤍᤠᤀᤢᤍᤖᤧ ᤁᤢᤛᤠᤶᤗᤥ

¹ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤌᤎᤵ ᤔᤧᤸᤗ᤹ᤀᤣ ᤀᤠᤏᤡᤱᤘᤠᤴ ᤂᤧᤏᤧ᤹ᤀᤥ ᤕᤢᤰᤂᤢᤱᤗᤥ. ᤛᤠᤶᤗᤥᤀᤠᤖ ᤁᤧᤖᤧᤰ ᤀᤠᤛᤡᤰᤗᤢᤱᤔᤥᤗᤠᤶᤔᤣ ᤀᤠᤱᤃᤠ᤹ ᤁᤧᤏᤠᤖᤠ ᤑᤥᤛᤢᤱᤗᤥ॥

² ᤀᤠᤍᤢ᤺ᤱᤃᤣ ᤀᤴᤔᤣ ᤂᤡᤱᤔᤏᤠᤒᤠ ᤀᤠᤔᤢᤰᤗᤠᤜᤠ᤹ ᤀᤠᤱᤃᤠ᤹ ᤔᤢᤰᤂᤢᤱᤗᤥ. ᤀᤠᤱᤃᤠ᤹ ᤋᤠᤏᤠᤶᤛᤠ ᤏᤠᤶ ᤁᤧᤳᤗ ᤕᤠ᤺ᤴᤍᤢᤱᤗᤥ॥

³ ᤕᤜᤘᤣ ᤍᤠᤱᤒᤠᤀᤣ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤗᤢᤶᤔᤥ ᤏᤢᤃᤧᤴ ᤐᤡᤏᤧᤖᤥ. ᤔᤧᤴᤇᤠᤶ ᤕᤠᤵᤔᤡᤗᤢᤶᤔᤥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤠᤖᤠ ᤑᤥᤛᤢᤱᤗ ᤛᤠᤶᤗᤥᤀᤠᤖᤥ॥

⁴ ᤆᤰᤔᤧᤸᤗ᤹ᤀᤣ ᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠ ᤐᤠ᤺ᤴᤏᤡᤴ ᤛᤠᤱᤃᤪᤠᤶᤐᤣᤍᤠᤱᤏᤢ᤺ᤸᤗᤧᤀᤠᤱ ᤌᤠ᤺ᤱ ᤁᤧᤳᤗᤥ. ᤏᤛᤠ᤺ᤴᤛᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤏᤡᤸᤗᤧ ᤋᤠᤱᤛᤠᤰᤐᤠᤴ ᤛᤢᤛᤢᤖᤥ॥

⁵ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤛᤠᤱᤃᤪᤠᤶᤐᤣᤍᤠᤱᤏᤢ᤺ᤸᤗᤧᤀᤠᤱ ᤌᤠ᤺ᤱ ᤐᤥ᤺ᤰᤂᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤡᤔᤡᤍᤡᤱᤅᤡᤴ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤥᤛᤣ᤺ᤴᤎᤠᤱ ᤆᤥᤃᤧ᤹ᤀᤥ॥

⁶ ᤁᤧᤔᤢᤰᤛᤠᤶᤔᤡᤸᤗᤧ ᤀᤠᤏᤡᤃᤣ ᤀᤠᤛᤧ᤺ᤵᤋᤧ᤹ᤀᤥ. ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧᤒᤠᤴ ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠᤜᤠ᤹ ᤔᤧᤍᤠᤱ ᤔᤧᤕᤠ᤺ᤰᤗᤖᤥ॥

⁷ ᤁᤢᤛᤣᤛᤣᤍᤧᤴᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. “ᤏᤠ᤺ᤴᤍᤢᤱᤅᤠᤱ ᤛᤧᤰᤁᤧᤶᤔᤡᤴ ᤜᤠᤛᤢᤱᤗᤥ. ᤜᤧᤰᤁᤩᤠᤱ ᤛᤢᤰᤁᤥᤋᤒᤠ ᤋᤣᤸᤗᤢᤶᤜᤠ᤹ ᤛᤡ᤺ᤰᤋᤢᤱᤅᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤜᤠ᤺ᤳᤋᤢᤱᤛᤡᤱᤗᤥ॥

⁸ ᤃᤡᤗᤠᤍᤧᤱᤃ ᤀᤠᤱᤃᤠ᤹ᤀᤡᤴᤗᤥ. ᤔᤏᤛ᤻ᤛᤣ᤺ᤴᤏᤠᤱ ᤀᤠᤱᤃᤠ᤹ᤀᤡᤴᤏᤣᤖᤥ. ᤀᤣᤑᤪᤠᤀᤡᤶᤔᤧᤴ ᤑᤧᤴᤈᤣ᤹ ᤀᤠᤍᤠᤱᤄᤢ᤺ᤰᤗᤥ. ᤕᤜᤢᤍᤠᤴ ᤀᤠᤜᤠᤱ ᤋᤰᤁᤠ᤺ᤳᤗᤥ॥

⁹ ᤔᤥᤀᤠᤒᤧᤴ ᤀᤠᤜᤵᤛᤡᤱᤔᤠᤍᤧᤴᤗᤥ. ᤀᤣᤍᤥᤔᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤛᤧᤘᤠ ᤁᤧᤈᤥ᤺ᤰᤐᤠ ᤆᤥᤃᤢᤱᤛᤡᤱᤗᤥ. ᤐᤗᤡᤛ᤻ᤋᤡᤜᤠ᤹ ᤏᤠ᤺ᤴᤍᤢᤱᤛᤡᤱᤅᤠᤱ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤁᤠᤖᤥ॥”

¹⁰ ᤜᤠ᤺ᤳᤗᤧ ᤀᤠᤱᤃᤠ᤹ ᤗᤢᤱᤎᤠᤰᤁᤡᤸᤗᤧ ᤁᤒᤢᤒᤠ ᤕᤧᤰᤕᤰᤁᤥ ᤁᤧᤳᤋᤠᤒᤠᤒᤣ᥅ ᤜᤠ᤺ᤳᤗᤧ ᤀᤠᤱᤃᤠ᤹ ᤀᤧᤍᤥᤔ ᤌᤠᤖᤡᤰ ᤗᤠᤶᤗᤥᤀᤠᤒᤠᤒᤣ᥅

¹¹ ᤏᤡᤱᤘᤠ᤹ᤑᤢᤔᤠᤱᤅᤣ. ᤛᤧᤰᤂᤠᤀᤣ ᤕᤠᤵᤔᤡ ᤁᤧᤏᤠ᤹ᤖᤧᤒᤠᤒᤡ᥅ ᤀᤠᤏᤡᤃᤣ ᤌᤰᤛᤢᤒᤠ ᤋᤢᤖᤠᤜᤠ᤹ᤏᤢ ᤗᤠᤱᤁᤧᤱᤄᤣ᤺ᤰᤏᤧᤶᤒᤠᤒᤡ᥅

¹² ᤀᤠᤏᤡᤃᤣ ᤏᤡᤱᤔᤡᤜᤠ᤹ᤏᤢ ᤌᤰᤔᤠ ᤀᤠᤓᤠ᤹ᤖᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶ ᤕᤠᤵᤔᤡᤖᤧ ᤀᤠᤶᤓᤠ᤹ᤒᤠᤱᤃ ᤜᤏᤧ ᤌᤣᤏᤠᤎᤣᤖᤰ ᤐᤥᤱᤗᤥ॥

¹³ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤗᤧᤵᤔᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤌᤱ ᤀᤠᤏᤠ᤺ᤴᤍᤢᤶᤗᤥ. ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡ᤹ ᤏᤡᤱᤔᤡᤜᤠ᤹ ᤂᤢᤏᤧ᤹ ᤜᤠᤖᤡ ᤆᤠ᤺ᤳᤋᤢᤛᤡᤖᤥ॥