ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶ 107 - LIFOTNTᤁᤢᤗᤰ ᤅᤠᤛᤡ ( ᤏᤡᤱ ᤛᤢᤶ ᥇᥆᥍–᥇᥋᥆ ) ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤑᤥᤔᤠ 1 ᤕᤜᤘᤣ ᤍᤠᤱᤒᤠᤴ ᤏᤢᤃᤧᤴ ᤐᤡᤖᤧᤶᤔᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤧᤏᤢ᤹ᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤆᤰᤔᤧᤸᤗ᤹ᤀᤣ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ॥ 2 ᤂᤡᤏᤡ᤹ ᤀᤠᤳᤋᤡᤴᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤛᤧ᤺ᤵᤋᤡᤀᤠᤱ ᤁᤧᤘᤕᤡ. ᤁᤴ ᤐᤠ᤺ᤴᤜᤠ᤹ ᤂᤢᤏᤧ᤹ ᤁᤢᤏᤠᤖᤠ ᤁᤧᤓᤥᤛᤢᤶᤔᤡᤸᤗᤧ ᤕᤠᤶᤔᤥ ᤔᤧᤳᤋᤧᤶᤔᤧ᤹ᤀᤥ॥ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥᤗᤠᤶᤒᤠ ᤂᤢᤏᤧ᤹ ᤂᤡᤏᤡ᤹ ᤁᤧᤛᤧ᤺ᤵᤋᤡᤀᤠᤱ ᤘᤠ᤹ᤖᤥ॥ 3 ᤂᤢᤏᤧ᤹ ᤕᤠᤵᤔᤡ ᤗᤠᤈᤣ᤹ᤒᤠ ᤏᤠᤱᤃᤧᤴ ᤏᤢ ᤏᤠᤶᤎᤠ ᤐᤡᤛᤠᤱᤗᤠᤶᤒᤠ ᤁᤧᤛᤢᤵᤛᤡᤖᤥ. ᤜᤧᤰᤁᤩᤠᤱ ᤌᤠᤱᤃᤧᤳ ᤏᤢ ᤗᤠᤱᤃᤧᤳ ᤐᤡᤛᤠᤱᤒᤠ ᤔᤠ᤺ᤱᤄᤠ ᤗᤠᤈᤣ᤹ᤗᤠᤶ ᤁᤧᤓᤢᤰᤂᤡᤖᤥ॥ 4 ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤢᤓᤠ ᤗᤠᤶᤒᤣ ᤔᤧᤗᤧᤰᤋᤧᤀᤠᤱ ᤔᤧᤀᤡᤖᤧᤖᤥ. ᤂᤧᤱᤜᤠ᤹ ᤕᤧᤰᤕᤰᤁᤥ ᤐᤣ᤺ᤰᤔᤠᤀᤠᤱ ᤕᤠᤱᤎᤥ᤺ᤰᤔᤠ ᤗᤠᤶ ᤔᤧᤱᤄᤥᤛᤢᤸᤗᤥ॥ 5 ᤂᤧᤱᤜᤠ᤹ ᤛᤧᤳᤗᤠ᤺ᤰᤔᤠ ᤏᤢ ᤘᤠᤔᤡᤔᤠᤸᤗᤧ ᤕᤠ᤺ᤴᤍᤢᤛᤡᤀᤠᤱ ᤘᤕᤧᤖᤥ. ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤛᤠᤱ ᤐᤢᤃᤧᤀᤠᤱ ᤘᤕᤧᤖᤥ॥ 6 ᤂᤧᤒᤩᤠᤱ ᤂᤧᤱᤜᤠ᤹ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤔᤧᤓᤠᤰᤋᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤢᤛᤡᤖᤥ॥ 7 ᤂᤢᤏᤧ᤹ ᤂᤧᤱᤜᤠ᤹ ᤋᤥ᤺ᤴᤍᤥᤶᤒᤠ ᤗᤠᤶᤔᤥ ᤗᤠᤶᤗᤥᤛᤢᤛᤡᤖᤥ. ᤜᤧᤰᤁᤩᤠᤱ ᤕᤠᤱᤎᤥ᤺ᤰᤛᤧ ᤕᤧᤰᤕᤰᤁᤥ ᤁᤧᤳᤋᤢᤛᤡᤖᤥ॥ 8 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤸᤗᤧ ᤗᤠᤃᤡ ᤂᤢᤏᤧ᤹ ᤏᤢᤃᤧᤴ ᤔᤧᤒᤡᤖᤢᤖ ᤐᤥᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢ ᤐᤡᤖᤢᤛᤡᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤗᤧ ᤗᤠᤃᤡ ᤏᤢᤃᤧᤴ ᤔᤧᤍᤥᤴᤍᤢᤖ ᤐᤥᤱᤗᤥ॥ 9 ᤌᤣᤀᤠᤱᤓᤧᤸᤗᤧ ᤁᤢᤘᤠᤃᤧᤔᤡᤒᤠᤜᤠ᤹ ᤂᤢᤏᤡ᤹ ᤘᤠᤔᤡ᤺ᤰᤔᤠᤴ ᤆᤡᤵᤛᤢ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤁᤢᤛᤡᤰ ᤁᤧᤗᤠ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤛᤧᤳᤗᤠ᤺ᤰᤔᤠᤴ ᤆᤡᤵᤛᤢ ᤐᤡᤖᤢᤛᤡᤖᤥ॥ 10 ᤁᤢᤓᤠ ᤂᤧᤱᤜᤠ᤹ ᤏᤠᤔᤠᤰᤔᤠ ᤏᤢ ᤂᤠᤔᤠᤰᤔᤠᤗᤢᤶᤔᤥ ᤔᤧᤕᤠᤃᤧᤖᤥ. ᤑᤧᤴᤌᤰᤁᤪᤱᤅᤡᤸᤗᤧ ᤀᤡᤄᤣ᤺ᤱᤅᤥ ᤔᤧᤎᤩᤧᤀᤠᤱ ᤛᤠᤰᤐᤠ ᤁᤧᤎᤠᤒᤠ ᤜᤧᤰᤁᤣ ᤋᤢᤰᤂᤣ ᤔᤧᤈᤩᤧᤀᤠᤱ ᤔᤧᤘᤕᤧᤖᤥ॥ 11 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤜᤠ᤹ ᤔᤧᤀᤳᤋᤢᤖᤥ. ᤜᤧᤰᤁᤩᤠᤱ ᤐᤡᤖᤢᤛᤡᤒᤠ ᤛᤡᤘᤠᤍᤡᤱ ᤂᤠᤜᤢᤴᤜᤠ᤹ ᤔᤧᤱᤄᤧᤵᤛᤢᤸᤗᤥ॥ 12 ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤁᤧᤛᤠᤰᤐᤠ ᤕᤠ᤺ᤶᤒᤰᤁᤥ ᤌᤠᤛᤢᤛᤡᤀᤠᤱ ᤐᤏᤠ ᤔᤧᤏᤠᤛᤧᤖᤥ. ᤂᤧᤱᤜᤠ᤹ ᤜᤷᤈᤢ᤹ ᤜᤷᤈᤢ᤹ ᤔᤧᤈᤥ᤺ᤴᤍᤧ. ᤁᤖ ᤁᤧᤓᤠ᤹ᤒᤠ ᤜᤠ᤺ᤳᤋᤠᤱ ᤜᤥ᤺ᤵᤋᤧᤖᤥ॥ 13 ᤂᤧᤒᤩᤠᤱ ᤂᤧᤱᤜᤠ᤹ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤔᤧᤓᤠᤰᤋᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤢᤛᤡᤖᤥ॥ 14 ᤂᤢᤏᤧ᤹ ᤏᤠᤔᤠᤰᤔᤠ ᤏᤢ ᤂᤠᤔᤠᤰᤔᤠ ᤗᤢᤶᤔᤥᤗᤠᤶ ᤂᤧᤱᤜᤠ᤹ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡᤖᤥ. ᤜᤧᤰᤁᤩᤠᤱ ᤀᤡᤔᤧᤄᤣ᤺ᤰᤂᤢᤛᤡᤒᤠ ᤂᤢᤴᤇᤡ᤹ ᤑᤧᤴᤌᤰᤁᤪᤱᤜᤠ᤹ ᤛᤩᤠᤰ ᤘᤕᤠᤰ ᤑᤢ᤹ᤖᤢ ᤐᤡᤖᤢᤛᤡᤖᤥ॥ 15 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤸᤗᤧ ᤗᤠᤃᤡ ᤂᤢᤏᤧ᤹ ᤏᤢᤃᤧᤴ ᤔᤧᤒᤡᤖᤢᤖ ᤐᤥᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢ ᤐᤡᤖᤢᤛᤡᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤗᤧ ᤗᤠᤃᤡ ᤏᤢᤃᤧᤴ ᤔᤧᤍᤥᤴᤍᤢᤖ ᤐᤥᤱᤗᤥ॥ 16 ᤂᤧᤒᤩᤠᤱ ᤂᤧᤱᤜᤠ᤹ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤔᤧᤓᤠᤰᤋᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤁᤧᤖᤧᤰ ᤋᤠᤱᤛᤧ᤺ᤵᤋᤢᤛᤡᤖᤥ॥ 17 ᤁᤢᤓᤠ ᤀᤠᤒᤠᤅᤣ ᤗᤠᤕᤥ ᤏᤢ ᤁᤢᤀᤡᤓᤧᤶᤔᤠᤖᤧ ᤀᤍᤱ ᤔᤧᤒᤥ᤺ᤰᤂᤧᤖᤥ. ᤜᤧᤰᤁᤩᤠᤱ ᤀᤠᤒᤠᤅᤣ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤁᤧᤛᤠᤰᤐᤥ ᤔᤧᤎᤩᤧᤖᤥ॥ 18 ᤂᤧᤱᤜᤠ᤹ ᤁᤧᤖᤧᤰ ᤁᤢᤈᤠᤖᤧ ᤂᤢᤏᤡ᤹ ᤏᤡᤱᤗᤧ᤹ᤖᤢᤀᤠᤱ ᤘᤕᤧᤖᤥ. ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤛᤡᤔᤠᤗᤡᤱᤎᤥᤀᤥ ᤔᤧᤃᤧᤖᤧᤀᤠᤱ ᤔᤧᤘᤕᤧᤖᤥ॥ 19 ᤂᤧᤒᤩᤠᤱ ᤂᤧᤱᤜᤠ᤹ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤔᤧᤓᤠᤰᤋᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤢᤛᤡᤖᤥ॥ 20 ᤁᤢᤒᤠ᤺ᤴᤈᤠᤰᤁᤡᤸᤗᤧ ᤂᤧᤱᤜᤠ᤹ ᤏᤢᤛᤢᤛᤡᤖᤥ. ᤜᤧᤰᤁᤩᤠᤱ ᤛᤡᤔᤧᤸᤗᤧ ᤗᤢᤶᤒᤠ᤺ᤳᤋᤥᤗᤠᤶ ᤛᤧ᤺ᤵᤋᤢᤛᤡᤖᤥ॥ 21 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤸᤗᤧ ᤗᤠᤃᤡ ᤂᤢᤏᤧ᤹ ᤏᤢᤃᤧᤴ ᤔᤧᤒᤡᤖᤢᤖ ᤐᤥᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢ ᤐᤡᤖᤢᤛᤡᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤗᤧ ᤗᤠᤃᤡ ᤏᤢᤃᤧᤴ ᤔᤧᤍᤥᤴᤍᤢᤖ ᤐᤥᤱᤗᤥ॥ 22 ᤂᤧᤱᤜᤠ᤹ᤖᤧ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤖ ᤂᤢᤏᤧ᤹ ᤏᤢᤃᤧᤴ ᤔᤧᤒᤡᤖᤢᤖ ᤐᤥᤱᤗᤥ. ᤜᤧᤰᤁᤩᤠᤱ ᤏᤡᤱᤘᤠ᤹ ᤁᤧᤍᤠᤒᤠ ᤛᤠᤶᤗᤥᤜᤠ᤹ ᤛᤠᤶᤔᤧᤔᤧᤳᤋᤢᤖ ᤂᤢᤏᤧ᤹ ᤁᤢᤕᤠ᤺ᤶᤒᤰᤜᤠ᤹ ᤔᤧᤒᤠ᤺ᤳᤋᤢ ᤔᤧᤈᤧᤰᤂᤢᤖᤖᤥ॥ 23 ᤁᤢᤓᤠᤃ ᤘᤠᤗᤠᤎᤠᤜᤠ᤹ᤀᤥ ᤔᤧᤗᤠᤛᤧᤀᤠᤱ ᤐᤕᤶ ᤕᤶᤒᤠ ᤘᤖ᤺ᤱᤅᤥ ᤔᤧᤒᤣᤖᤥ. ᤜᤧᤰᤁᤩᤠᤱ ᤛᤠᤵᤐᤥᤰ ᤜᤡᤱᤔᤠᤖᤧ ᤗᤠᤃᤡ ᤘᤖ᤺ᤱᤅᤥ ᤕᤠ᤺ᤶᤒᤰ ᤔᤧᤈᤥᤃᤧᤖᤥ॥ 24 ᤕᤜᤘᤣ ᤍᤠᤱᤒᤧᤸᤗᤧ ᤌᤣ ᤆᤥ᤺ᤰᤔᤠ ᤛᤢᤰᤋᤢ ᤂᤧᤴ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤖᤥ. ᤁᤢᤍᤡᤶᤒᤣ ᤁᤣ᤺ᤶᤒᤠ ᤘᤖ᤺ᤱᤅᤥ ᤂᤢᤏᤧ᤹ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤖᤥ॥ 25 ᤂᤢᤏᤧ᤹ ᤁᤢᤀᤡᤱᤈᤠᤱᤅᤡᤸᤗᤧ ᤁᤡᤵᤔᤠᤃᤧᤄᤢᤒᤠ ᤛᤢᤖᤡᤳ ᤁᤣᤈᤱ ᤜᤢᤔᤠ ᤜᤣ᤺ᤰᤋᤧᤖᤥ. ᤘᤖ᤺ᤱᤅᤥ ᤘᤠᤓᤧᤸᤗᤧᤱᤅᤡᤴ ᤐᤥ᤺ᤰᤔᤠ ᤜᤣ᤺ᤰᤋᤧᤖᤥ॥ 26 ᤘᤠᤓᤧᤸᤗᤧᤱᤅᤡᤸᤗᤧ ᤘᤠᤗᤠᤎᤠᤜᤠ᤹ ᤌᤠ᤺ᤱ ᤐᤰᤂᤢᤛᤡᤖᤥ. ᤜᤧᤰᤁᤩᤠᤱ ᤘᤖ᤺ᤱᤅᤡᤸᤗᤧ ᤕᤠᤱᤕᤥ ᤏᤡ᤺ᤵᤛᤢᤛᤡᤖᤥ. ᤀᤰᤋᤱᤒᤠ ᤁᤧᤛᤠᤰᤐᤠ ᤋᤢᤰᤂᤣᤀᤥ ᤘᤠᤗᤠᤎᤠ ᤁᤧᤗᤥᤱᤒᤠᤜᤠ᤹ ᤀᤠ᤺ᤴᤇᤡᤱᤔᤠ ᤔᤧᤴᤇᤢᤰᤋᤧᤸᤗᤥ॥ 27 ᤂᤧᤱᤜᤠ᤹ ᤌᤡ᤺ᤸᤗᤧ ᤔᤕᤢᤛᤡᤒᤠ ᤔᤏᤠ ᤁᤢᤀᤡᤛᤡᤰ ᤆᤥᤏᤠ᤺ᤶ ᤆᤥᤏᤠ᤺ᤶ ᤔᤧᤗ᤹ᤖᤧᤖ ᤔᤧᤈᤥ᤺ᤴᤍᤧᤖᤥ. ᤂᤧᤱᤜᤠ᤹ᤖᤧ ᤌᤣ ᤆᤥ᤺ᤰᤔᤠᤀᤠᤱ ᤂᤢᤏᤡ᤹ ᤏᤧᤜᤡᤖᤧ ᤔᤧᤎᤠᤵᤋᤢᤸᤗᤥ॥ 28 ᤂᤧᤒᤩᤠᤱ ᤂᤧᤱᤜᤠ᤹ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤔᤧᤓᤠᤰᤋᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤢᤛᤡᤖᤥ॥ 29 ᤂᤢᤏᤧ᤹ ᤛᤢᤖᤡᤳ ᤁᤣᤈᤱᤅᤡᤴ ᤆᤡᤈᤡ ᤕᤧᤶᤕᤧᤶ ᤆᤥᤃᤢᤖᤥ. ᤜᤧᤰᤁᤩᤠᤱ ᤘᤖ᤺ᤱᤅᤥᤒᤠ ᤘᤠᤓᤧᤸᤗᤧᤱᤜᤠ᤹ ᤆᤡ᤺ᤰᤋᤢ ᤗᤠᤛᤧᤖᤥ॥ 30 ᤛᤢᤖᤡᤳ ᤁᤣᤈᤱᤅᤡᤴ ᤆᤡᤈᤡ ᤕᤧᤶᤕᤧᤶ ᤐᤥ᤺ᤰᤂᤧᤀᤠᤱ ᤂᤧᤱᤜᤠ᤹ ᤔᤧᤛ᤺ᤳᤋᤧᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤈᤥᤃᤢᤒᤠ ᤘᤠᤗᤠᤎᤠ ᤕᤧᤵᤏᤠᤀᤥ ᤁᤧᤳᤋᤢᤛᤡᤖᤥ॥ 31 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤸᤗᤧ ᤗᤠᤃᤡ ᤂᤢᤏᤧ᤹ ᤏᤢᤃᤧᤴ ᤔᤧᤒᤡᤖᤢᤖ ᤐᤥᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢ ᤐᤡᤖᤢᤛᤡᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤗᤧ ᤗᤠᤃᤡ ᤏᤢᤃᤧᤴ ᤔᤧᤍᤥᤴᤍᤢᤖ ᤐᤥᤱᤗᤥ॥ 32 ᤂᤧᤱᤜᤠ᤹ᤖᤧ ᤔᤧᤴᤇᤠᤶ ᤕᤠᤵᤔᤡ ᤆᤢᤶᤗᤢᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥᤛᤢᤖᤖᤥ. ᤜᤧᤰᤁᤩᤠᤱ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤡ᤹ ᤆᤢᤶᤓᤥᤀᤥ ᤂᤢᤏᤧ᤹ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥ ᤔᤧᤈᤥᤃᤢᤖᤖᤥ॥ 33 ᤕᤜᤘᤣ ᤍᤠᤱᤒᤧᤸᤗᤧ ᤕᤱᤄᤱᤜᤠ᤹ ᤆᤵᤐᤪᤧᤰ ᤆᤵᤛᤢᤖᤥ. ᤜᤧᤰᤁᤩᤠᤱ ᤘᤜ᤺ᤱᤜᤠ᤹ ᤆᤫᤠ᤺ᤳ ᤔᤣ᤺ᤴᤏᤣᤒᤠ ᤆᤥᤃᤢᤖᤥ॥ 34 ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤁᤢᤀᤡᤓᤧᤶᤔᤠᤸᤗᤧ ᤆᤥᤃᤢᤸᤗᤧ ᤆᤠ ᤁᤧᤏᤢ᤹ᤒᤠ ᤂᤠᤶᤔᤡᤴ ᤕᤢᤶ ᤁᤧᤗᤠ᤺ᤰᤐᤠ ᤆᤥᤃᤢᤖᤥ. ᤜᤧᤰᤁᤩᤠᤱ ᤂᤧᤴ ᤂᤠᤶᤔᤡᤴ ᤆᤠ ᤔᤧᤴᤏᤢ᤹ᤔᤏᤠᤒᤠ ᤆᤥᤃᤢᤖᤥ॥ 35 ᤂᤢᤏᤧ᤹ ᤕᤧ᤺ᤱᤄᤠᤍᤧᤴᤏᤡᤴ ᤘᤖᤰ ᤐᤥ᤺ᤰᤂᤧᤖ ᤆᤥᤃᤢᤖᤥ. ᤜᤧᤰᤁᤩᤠᤱ ᤁᤧᤜᤣᤒᤠ ᤋᤧᤴᤏᤥ ᤆᤫᤠ᤺ᤳ ᤐᤢᤴᤍᤧᤖ ᤆᤥᤃᤢᤖᤥ॥ 36 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤳᤁᤧᤗᤠ᤺ᤰᤐᤠᤜᤠ᤹ ᤂᤧᤵᤔᤥ ᤕᤢᤱᤔᤠ ᤐᤠᤱᤄᤢᤛᤡᤖᤥ. ᤕᤢᤱᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤂᤧ᤹ᤕᤥ ᤕᤧᤰᤕᤰ ᤔᤧᤈᤥᤃᤢᤖᤥ॥ 37 ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤠᤜᤠ᤹ᤀᤥ ᤂᤧᤱᤜᤠ᤹ᤖᤧ ᤕᤠ᤹ᤖᤡ᤺ᤶᤒᤠᤴ ᤔᤧᤜᤣ᤹ᤖᤢᤖᤥ. ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤔᤧᤗᤣ᤺ᤳᤋᤢᤖᤥ. ᤂᤧᤒᤩᤠᤱ ᤔᤢᤸᤗᤢᤰ ᤁᤢᤈᤠ ᤔᤧᤛᤢᤵᤛᤢᤖᤥ॥ 38 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤖᤡᤰ ᤔᤧᤒᤥ᤺ᤴᤍᤧ ᤔᤧᤎᤧ᤹ᤖᤧᤖᤥ. ᤂᤧᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤡᤳ ᤛᤠ᤺ᤱᤘᤠᤜᤠ᤹ ᤑᤥᤛᤢᤛᤡᤖᤥ॥ 39 ᤁᤢᤀᤡᤃᤧᤓᤧᤶᤒᤠᤜᤠ᤹ᤖᤧ ᤔᤧᤄᤢᤶᤛᤢᤛᤡ. ᤛᤠ᤹ᤖᤡᤰ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤖᤥ ᤜᤧᤰᤁᤩᤠᤱ ᤔᤡᤰᤘᤠ ᤔᤧᤎᤠᤵᤛᤢ ᤔᤧᤒᤡᤖᤢᤛᤡᤖᤢᤖᤥ. ᤂᤧᤸᤗᤧᤆᤥᤃᤢᤸᤗᤧ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤔᤧᤕᤢᤔᤧᤖᤥ॥ 40 ᤁᤢᤔᤏᤠ ᤋᤢᤰᤂᤣ ᤁᤧᤈᤠ᤺ᤵᤐᤠ ᤕᤢᤰᤛᤠᤒᤠᤜᤠ᤹ ᤂᤢᤏᤧ᤹ ᤛᤡᤖᤡᤱ ᤔᤧᤔᤖ ᤕᤠ᤺ᤴᤍᤢᤛᤡᤖᤥ. ᤜᤧᤰᤁᤩᤠᤱ ᤗᤠᤶ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥ ᤂᤧᤱᤜᤠ᤹ ᤋᤠᤰᤁᤧᤃᤶᤒᤠᤀᤠᤱ ᤁᤧᤘᤠ᤹ᤒᤠ ᤆᤥᤃᤢᤛᤡᤖᤥ॥ 41 ᤁᤖ ᤂᤢᤏᤧ᤹ ᤕᤠᤱᤃᤧᤛᤠ᤹ᤒᤠ ᤏᤢ ᤋᤢᤰᤂᤣᤀᤥ ᤁᤧᤎᤠᤒᤠᤜᤠ᤹ ᤛᤧ᤺ᤵᤋᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤡᤶᤛᤕᤱᤜᤠ᤹ ᤔᤧᤸᤗᤢᤰ ᤗᤢᤵ ᤜᤧᤰᤁᤣ ᤑᤥᤛᤢᤛᤡᤖᤥ॥ 42 ᤁᤢᤍᤥ᤺ᤵᤔᤠᤜᤠ᤹ᤖᤧ ᤁᤴ ᤔᤧᤏᤡᤛᤢᤀᤠᤱ ᤔᤧᤛ᤺ᤳᤗᤥ. ᤁᤖ ᤁᤢᤀᤡᤃᤧᤓᤧᤶᤒᤠᤜᤠ᤹ ᤔᤧᤶᤒᤠ᤺ᤳᤏᤧᤸᤗ ᤕᤠ᤺ᤴᤍᤢᤛᤡᤖᤥ॥ 43 ᤛᤡᤰᤁᤢᤶᤛᤠᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤖᤥ. ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤴ ᤏᤡᤱᤘᤠ᤹ᤀᤥ ᤔᤧᤕᤢᤰᤂᤢᤖᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.