ᤂᤠᤜᤢᤴ 9 - LIFOTNT

ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤀᤍᤱᤐᤠᤴ

¹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤺ᤸᤗᤧ ᤁᤢᤜᤡᤶ ᤆᤥᤃᤢᤀᤠᤱ ᤕᤢᤱᤗᤥ. ᤂᤧᤸᤗᤧ ᤂᤧ᤹ᤕᤥ ᤏᤢᤛᤡ ᤛᤡᤳᤗᤠᤱᤜᤠ᤹ ᤕᤧᤵᤛᤢᤀᤠᤱ ᤕᤧᤵᤗᤥ॥

² ᤂᤧᤸᤗᤧ ᤁᤢᤎᤰᤛᤠᤴ ᤛᤧᤖᤢᤀᤠᤱ ᤘᤠ᤹ᤖᤥ. ᤆᤧᤸᤗᤧᤰᤛᤣ ᤌᤡ ᤔᤠᤖᤢᤰ ᤑᤢᤳᤋᤢᤀᤠᤱ ᤕᤢᤱ᤹ ᤂᤧᤸᤗᤧ ᤁᤢᤈᤵᤋᤧᤴᤏᤡᤴ ᤕᤠᤖᤡᤵ ᤆᤥᤃᤢᤀᤠᤱ ᤕᤢᤱᤗᤥ॥

³ ᤂᤧᤸᤗᤧ ᤁᤢᤛᤧᤘᤠᤖᤥᤔᤠᤜᤠ᤹ ᤐᤠᤱᤄᤢᤍᤣᤛᤢᤛᤡᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤁᤣ᤺ᤶᤒ ᤁᤣ᤺ᤶᤒᤠ ᤋᤧᤴᤏᤥᤗᤠᤶᤒᤠ ᤀᤢ᤺ᤳᤋᤢᤛᤡᤖᤥ.

⁴ “ᤁᤧᤖᤧᤰ ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠᤛᤣ᥄ ᤛᤡᤃᤠᤱ ᤋᤩᤧᤶᤔᤧ᤹ᤀᤥ᥄” ᤑᤠ᤹ᤀᤠᤱ ᤂᤧᤴ ᤏᤢᤒᤠ ᤏᤧᤜᤡ ᤁᤧᤜᤥᤵᤐᤠᤜᤠ᤹ ᤂᤧᤸᤗᤧ ᤔᤧᤳᤋᤢᤛᤡᤖᤥ॥

⁵ “ᤋᤩᤧᤶᤔᤧ᤹ᤀᤥ. ᤀᤠᤱᤃᤠ᤹ᤏᤢ ᤛᤠᤓ᤺ᤱᤈᤠᤴ ᤆᤧᤶᤔᤧ᤹ᤀᤥ. ᤂᤧᤒᤩᤠᤱ ᤔᤠᤖᤢᤰ ᤑᤢᤳᤋᤢᤱᤒᤠ ᤆᤧᤸᤗᤧᤰᤛᤣ ᤌᤡᤴ ᤌᤢᤅᤧᤶᤔᤧ᤹ᤀᤥ॥

⁶ ᤂᤡᤏᤡ᤹ ᤏᤧᤜᤡᤏᤡᤱᤘᤠ᤹ ᤔᤣ᤺ᤴᤏᤣᤒᤠ ᤕᤧᤵᤗᤧᤰᤜᤠ᤹ ᤗᤧᤖᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤡᤏᤡ᤹ ᤜᤡᤱᤔᤴᤏᤥ ᤁᤧᤜᤡᤅᤡᤖᤥ ᤂᤠᤛᤡᤱᤏᤡ᤺ᤵᤔᤠ ᤗᤠᤶᤔᤥ ᤗᤠᤱᤄᤣᤃᤧᤶᤔᤧ᤹ᤀᤥ॥”

⁷ ᤀᤠᤳᤋᤡᤸᤗᤧ ᤂᤡᤛᤠᤳ ᤀᤠᤒᤡᤒᤡᤒᤠ ᤔᤏᤠᤴ ᤋᤥ᤺ᤴᤍᤢ᤹. ᤂᤧᤸᤗᤧ ᤁᤢᤏᤠᤔᤧᤴᤇᤠ᤹ ᤐᤥᤱᤔᤠᤴ ᤋᤠᤖᤢᤖᤥ. ᤀᤠᤳᤋᤡᤸᤗᤧ ᤋᤠᤰᤁᤧᤓᤧ᤹ᤒᤠ ᤔᤏᤠᤴ ᤑᤧ᤺ᤰᤋᤢ᤹. ᤂᤧᤸᤗᤧ ᤀᤠᤒᤠᤅᤣ ᤏᤡᤱᤘᤠ᤹ ᤋᤢᤰᤔᤧᤴ ᤋᤢᤔᤢᤖᤥ॥

⁸ ᤁᤡᤏᤠ᤺ᤴᤍᤡ ᤀᤠᤒᤡᤒᤡᤒᤠᤜᤠ᤹ ᤔᤧᤓᤧ᤺ᤰᤋᤧᤛᤧᤴᤏᤧ᤹ᤀᤥ. ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤶᤈᤡ᤺ᤳᤗᤥ॥ ᤛᤡᤰᤁᤢᤶᤏᤡᤒᤠ ᤔᤏᤠᤜᤠ᤹ ᤑᤧ᤺ᤰᤋᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤗᤢᤱᤔᤠ᤹ ᤁᤧᤶᤍᤢᤰᤗᤥ॥

⁹ ᤛᤡᤰᤁᤢᤶᤏᤡᤒᤠᤜᤠ᤹ ᤂᤠᤜᤢᤴ ᤐᤡᤖᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤸᤗᤛᤠᤱ ᤛᤡᤰᤁᤢᤶᤛᤠᤒᤠ ᤔᤧᤒᤥᤱᤗᤥ॥ ᤛᤠᤶᤕᤥᤒᤠ ᤔᤏᤠᤜᤠ᤹ ᤏᤡᤛᤠᤶ ᤐᤡᤖᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤧᤜᤡᤏᤡᤱᤘᤠ᤹ ᤀᤠᤸᤗᤛᤠᤱ ᤔᤧᤓᤥᤛᤢᤖᤥ॥

¹⁰ ᤕᤜᤘᤣ ᤍᤠᤱᤒᤧᤴᤏᤢ ᤁᤡᤔᤠᤀᤣ ᤛᤡᤰᤁᤢᤶᤏᤡᤱᤘᤠ᤹ᤸᤗᤧ ᤁᤢᤜᤣ᤺ᤰᤛᤡᤱᤔᤠᤀᤥ. ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤛᤣᤛᤣᤒᤧᤸᤗᤧ ᤁᤢᤏᤧᤜᤡ ᤏᤡᤱᤘᤠᤴᤏᤣ ᤂᤠᤛᤡᤱᤏᤡ᤺ᤵᤔᤠᤖᤥ॥

¹¹ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤗᤠᤶᤒᤠᤀᤣ ᤁᤧᤜᤡᤱᤔᤴᤏᤥᤒᤠ ᤕᤧᤴᤜᤠ᤹ ᤐᤥᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤢᤎᤠ᤺ᤰ ᤁᤧᤈᤠ᤹ᤒᤠ ᤁᤧᤒᤥᤱᤗᤥ॥

¹² ᤂᤧᤏᤧ᤹ ᤛᤡᤰᤁᤢᤶᤛᤠᤒᤠ ᤁᤧᤒᤥᤱᤏᤧᤓᤃᤪ ᤁᤧᤛᤡᤰᤁᤢᤶᤏᤡᤱᤘᤠ᤺ᤸᤗᤧᤀᤣ ᤌᤢᤶᤄᤥ ᤋᤠᤖᤢᤖᤥ. ᤂᤧᤏᤧ᤹ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤠ ᤔᤏᤠ ᤁᤧᤒᤥᤱᤏᤧᤓᤃᤪ ᤂᤧᤏᤧ᤹ ᤋᤢᤰᤂᤣᤖᤰ ᤁᤧᤍᤢᤔᤢᤖᤥ॥

¹³ ᤂᤠᤛᤡᤱ ᤔᤧᤴᤏᤡ᤺ᤵᤔᤠᤴ ᤁᤧᤀᤠ᤺ᤵᤔᤠ ᤔᤧᤴᤇᤢᤔᤠᤖᤥ. ᤂᤧᤴ ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤔᤠ ᤏᤢ ᤌᤣᤀᤠᤱ ᤔᤧᤸᤗᤧ᤺ᤶᤏᤠᤔᤠᤖᤥ॥

¹⁴ ᤂᤧᤴ ᤁᤢᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ. ᤕᤧᤰᤕᤰᤁᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤆᤶᤈᤶᤒᤠ ᤋᤧᤴᤜᤠ᤹ᤀᤥ ᤁᤧᤏᤧᤒᤠ ᤕᤢᤰᤏᤠᤀᤥ ᤕᤢᤱᤛᤡᤱᤗᤥ॥

¹⁵ ᤂᤧᤸᤗᤧ ᤁᤢᤒᤣᤛᤠᤱᤗᤠᤶ ᤗᤠᤶᤔᤥ ᤁᤢᤍᤥ᤺ᤵᤔᤠ ᤗᤠᤱᤃᤧᤄᤣ᤺ᤰᤐᤠᤖ ᤁᤧᤒᤵᤐᤠ ᤔᤏᤠᤜᤠ᤹ ᤂᤧᤸᤗᤧ ᤀᤢ᤺ᤳᤋᤢᤛᤡᤖᤥ.

¹⁶ “ᤁᤧᤖᤧᤰ ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠᤜᤠ᤹ ᤁᤳᤏᤠ ᤔᤧᤓᤧᤴᤗᤖᤥ᥄” ᤗ᤹ᤖᤡᤰ ᤂᤧᤴ ᤂᤠᤛᤡᤱ ᤔᤧᤴᤏᤡ᤺ᤵᤏᤠᤒᤠᤜᤠ᤹ ᤂᤧᤸᤗᤧ ᤔᤧᤳᤋᤢᤛᤡ᤹.

¹⁷ “ᤂᤢ᤺ᤵᤔᤏᤠᤀᤠᤱ ᤌᤢᤱᤔᤏᤠᤒᤠ ᤆᤫᤠ᤺ᤳᤋᤡᤴ ᤁᤢᤈᤠ ᤏᤢ᤹ᤖᤥ. ᤆᤡᤱᤛᤡᤱᤔᤏᤠᤀᤠᤱ ᤆᤠᤔᤏᤠᤒᤠ ᤂᤖᤧ᤺ᤱᤅᤡᤴ ᤁᤢᤈᤠ ᤏᤢ᤹ᤖᤥ॥”

¹⁸ ᤁᤖ ᤁᤧᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤎᤥ᤺ᤰᤔᤠᤍᤧᤴ ᤂᤧᤵᤔᤥ ᤐᤥᤱᤗᤥ. ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤍᤖᤣᤒᤠᤜᤠ᤹ᤖᤧ ᤂᤧᤔᤠᤍᤡᤱ ᤕᤱᤛᤱᤅᤥᤒᤠ ᤗᤢᤶᤒᤠ᤺ᤳᤋᤥ ᤔᤧᤃᤧᤖᤧᤀᤠᤱ ᤔᤧᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤀᤠᤰᤂᤩᤠᤖᤡᤰᤁᤠᤱ ᤏᤧᤜᤡᤏᤡᤱᤘᤠ᤹ ᤔᤧᤱᤃᤳᤋᤢᤴᤗᤥ॥