ᤂᤠᤜᤢᤴ 7 - LIFOTNT

¹ ᤀᤠᤛ᤻ᤛᤠᤀᤣ. ᤀᤠᤱᤃᤠ᤹ ᤀᤠᤒᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤕᤠᤱᤄᤥᤳᤋᤧ ᤁᤳᤋᤧ᤹ᤀᤥ॥

² ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤏᤠ᤺ᤳᤋᤧ ᤋᤡᤶᤍᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤢᤜᤡᤱᤘᤧᤳ ᤁᤧᤘᤠ᤹ ᤁᤧᤃᤴᤗᤥ. ᤐᤡᤏᤧᤒᤠ ᤂᤠᤜᤢᤴᤜᤠ᤹ ᤁᤧᤔᤡᤰᤜᤠᤱᤔᤠ ᤜᤧᤰᤁᤣ ᤛᤧ᤺ᤵᤋᤧ ᤁᤧᤳᤋᤧ᤹ᤀᤥ॥

³ ᤂᤧᤏᤧ᤹ ᤁᤧᤜᤢᤰᤆᤥᤀᤥ ᤛᤫᤠᤃᤣᤵ ᤜᤧᤰᤁᤣ ᤂᤧᤴ ᤘᤠᤖᤧᤃᤳᤋᤧ᤹ᤀᤥ. ᤂᤧᤏᤧ᤹ ᤁᤧᤛᤡᤰᤗᤢᤱᤔᤥ ᤂᤧᤴ ᤛᤠᤵᤋᤧ ᤑᤳᤇᤧ᤹ᤀᤥ॥

⁴ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤀᤰᤂᤣ ᤔᤧᤳᤋᤧ᤹ᤀᤥ. “ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤴᤈᤣ᤺ᤸᤗᤡᤔᤠᤏᤧᤖᤥ.” ᤜᤧᤰᤁᤩᤠᤱ ᤂᤠᤛᤡᤱᤏᤡ᤺ᤵᤔᤠᤴ “ᤀᤠᤱᤃᤠ᤹ ᤀᤠᤴᤍᤣᤱ ᤀᤠᤴᤈᤢᤶᤏᤧ” ᤔᤧᤳᤋᤧ᤹ᤀᤥ॥

⁵ ᤂᤧᤒᤩᤠᤱ ᤂᤧᤴ ᤐᤠ᤺ᤴᤜᤠ᤹ᤖᤧ ᤂᤧᤏᤧ᤹ ᤕᤧᤶᤒᤠ ᤁᤥ᤺ᤳᤏᤠᤗᤠᤶ ᤏᤢ ᤑᤧᤰᤁᤧᤗᤠ᤹ᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤷᤗᤧ᤺ᤶᤒᤠ ᤐᤠ᤺ᤴᤜᤠ᤹ᤗᤠᤶ ᤂᤧᤏᤧ᤹ ᤗᤠ᤺ᤳᤗᤠ᤺ᤳ ᤋᤠᤱᤃᤧᤛᤧ᤺ᤵ ᤁᤧᤃᤳᤗᤥ॥

ᤆᤠᤃᤧᤖᤠᤶᤔᤠ ᤔᤧᤴᤇᤢᤔᤠᤴᤏᤢ ᤛᤡᤱᤛᤡᤱ ᤔᤧᤳᤇᤡᤱᤔᤠ

⁶ ᤌᤡᤰᤗᤧᤱ ᤀᤠᤱᤃᤠ᤹ ᤀᤠᤜᤡᤶᤔᤥᤒᤠ ᤐᤣᤎᤠ᤺ᤵᤐᤥ ᤕᤢᤅᤠᤱᤗᤥ. ᤜᤧᤰᤁᤩᤠᤱ ᤜᤱᤜᤱᤍᤠᤱᤒᤠ ᤁᤢᤜᤱᤜᤠ᤹ᤀᤥᤗᤠᤶ ᤀᤥᤔᤧᤳᤋᤢᤱᤗᤥ.

⁷ ᤁᤢᤍᤥ᤺ᤵᤔᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ. ᤌᤠᤱᤒᤧᤴᤜᤠ᤹ᤀᤥ ᤗᤳᤇᤠ ᤁᤢᤏᤧᤜᤡ ᤁᤧᤜᤥᤵᤐᤠ ᤌᤡᤰ ᤀᤠᤱᤃᤠ᤹ ᤏᤡᤛᤢᤱᤗᤥ॥

⁸ ᤔᤧᤴᤇᤢᤔᤠ ᤁᤧᤕᤢᤱᤒᤠ ᤔᤠᤖᤠᤶᤔᤥ ᤂᤧᤴ ᤗᤠᤱᤄᤣᤃᤧᤀᤠᤱ ᤘᤕᤧᤒᤠ ᤏᤢ ᤂᤧᤸᤗᤧ ᤁᤢᤜᤡᤶᤔᤥ ᤗᤧᤵᤔᤠᤱ ᤋᤃᤡ ᤌᤠᤛᤡᤱᤗ ᤐᤳᤇᤧᤒᤠ ᤏᤡᤛᤢᤱᤗᤥ—

⁹ ᤕᤢ᤺ᤴᤇᤡᤰ. ᤕᤧᤴᤏᤡᤴ ᤗᤧᤰᤗ ᤐᤣ᤺ᤰᤁᤡᤸᤗᤧ ᤛᤧᤴᤍᤡᤰ ᤂᤠᤔᤠᤰᤗ ᤐᤣ᤺ᤰᤗᤥ॥

¹⁰ ᤂᤧᤒᤩᤠᤱ ᤗᤳᤇᤠ ᤔᤧᤴᤇᤢᤔᤠᤎᤡᤰ ᤂᤧᤸᤗᤧ ᤁᤢᤍᤢᤶᤛᤧ ᤗ᤺ᤴᤍᤧᤓᤧᤖᤧᤖᤥ. ᤂᤧᤴ ᤕᤧᤶᤒᤠ ᤁᤧᤃᤥ᤺ᤵᤔᤠ ᤜᤧᤰᤁᤣ ᤆᤠᤱ ᤁᤧᤈᤠᤱᤔᤠ ᤏᤢ ᤆᤠ᤺ᤳᤆᤠ᤺ᤵᤔᤠ ᤏᤡᤱᤘᤠ᤹ ᤁᤧᤃᤵᤔᤠ ᤆᤥᤃᤧᤖᤥ॥

¹¹ ᤆᤧᤸᤗᤧᤰᤗᤧᤰᤔᤠ ᤏᤢ ᤜᤠᤍᤡᤱ ᤁᤧᤎᤰᤔᤠ ᤆᤥᤃᤧᤖᤥ. ᤂᤧᤴ ᤀᤠᤓᤧᤸᤗᤧᤀᤠᤱ ᤁᤢᤜᤡᤶᤔᤥ ᤔᤧᤴᤕᤢᤱᤔᤏᤠᤔᤠ ᤘᤕᤧᤖᤥ.

¹² ᤁᤢᤓᤠ ᤕᤧᤶᤔᤥ. ᤁᤢᤓᤠ ᤕᤧᤶᤔᤥ ᤗᤰᤂᤢᤶᤜᤠ᤹ᤀᤥ. ᤁᤧᤖᤧᤰ ᤁᤢᤛᤢᤰᤐᤠ ᤌᤰᤔᤠ ᤂᤧᤴ ᤆᤡᤱᤛᤡᤱᤅᤠᤱ ᤕᤢᤅᤧᤖᤥ॥

¹³ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤂᤢᤏᤧ᤹ ᤋᤧᤶᤛᤢᤀᤠᤱ ᤆᤢᤵ ᤔᤧᤳᤋᤢᤖᤥ. ᤜᤧᤰᤁᤩᤠᤱ ᤁᤢᤏᤠᤖᤠᤀᤥ ᤔᤧᤴᤏᤢ᤺ᤴᤏᤣ ᤀᤰᤂᤣ ᤔᤧᤳᤋᤢᤖᤥ.

¹⁴ “ᤀᤠᤱᤃᤠ᤹ ᤀᤠᤔᤠᤱᤜᤧᤰᤁᤡᤴ ᤁᤧᤳᤋᤢᤱᤗᤥ. ᤀᤠᤀᤡᤴ ᤀᤠᤜᤡᤶᤔᤥ ᤋᤱᤈᤢᤶ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤱᤅᤠᤱ ᤘᤠ᤹ᤖᤥ॥

¹⁵ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁᤧᤍᤢᤶᤛᤧ ᤗᤠ᤺ᤰᤁᤠᤳ ᤗ᤺ᤴᤍᤠᤱᤒᤠᤖᤥ. ᤀᤠᤱᤃᤠ᤹ ᤂᤧᤏᤧ᤹ ᤁᤥ᤺ᤳᤏᤧ. ᤀᤠᤸᤗᤥ ᤋᤢᤶᤏᤧᤀᤠᤱ ᤘᤠ᤹ᤖᤥ᥄

¹⁶ ᤀᤠᤱᤃᤠ᤹ ᤀᤠᤀᤡᤵᤏᤠᤍᤧᤴᤏᤥ. ᤔᤡᤛᤪ ᤗᤠᤈᤣ᤹ᤒᤠ ᤐᤖᤡᤰ ᤐᤖᤡᤰᤗᤧ ᤆᤠ᤺ᤶᤔᤏᤠᤒᤠ ᤗᤥ᤺ᤶᤓᤣ᤺ᤳᤋᤡᤴ ᤑᤧᤛᤢᤱᤅᤠᤱ ᤏᤧᤖᤥ॥

¹⁷ ᤀᤠᤱᤃᤠ᤹ ᤀᤠᤏᤧᤳᤏᤠᤴ ᤔᤠᤖᤢᤰ. ᤂᤠᤶᤍᤥᤗᤡ ᤏᤢ ᤏᤠᤶᤛᤡᤱ ᤛᤧᤛᤢᤱᤅᤠᤱ ᤁᤢᤏᤠᤶᤃᤧᤏᤢ᤹ᤒᤠ ᤆᤥᤃᤢᤱᤅᤠᤱ ᤏᤧᤖᤥ॥

¹⁸ ᤑᤧᤖᤧ᤹ᤀᤥ. ᤋᤠᤏᤠᤶ ᤌᤠᤖᤡᤰ ᤀᤠᤴᤇᤡ᤹ ᤏᤠᤏᤢ᤹ᤏᤧᤛᤡᤖᤥ. ᤀᤠᤴᤇᤡ᤹ ᤗᤢᤱᤔᤠ᤹ ᤜᤡ᤺ᤵᤏᤧᤛᤡᤖ ᤕᤧᤕᤧ ᤗ᤹ᤛᤡᤖᤥ᥄

¹⁹ ᤀᤠᤱᤃᤠ᤹ ᤀᤠᤕᤧᤶᤒᤠᤴ ᤜᤡᤶᤔᤥ ᤜᤥᤵᤗᤥ. ᤂᤢᤏᤧ᤹ᤃ ᤔᤠ᤺ᤱᤄᤠᤒᤠ ᤗᤠᤶᤍᤡ᤺ᤰᤁᤥ ᤐᤣᤀᤠᤱ ᤘᤠ᤹ᤖᤥ॥

²⁰ ᤂᤢᤏᤧ᤹ ᤁᤧᤕᤥᤒᤠ ᤕᤖᤡᤰ ᤕᤠᤱ ᤋᤣ᤹ᤖᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤗᤠᤓᤢᤴ ᤌᤠᤖᤡᤰ ᤂᤢᤏᤧ᤹ ᤜᤡᤶᤔᤥ ᤔᤧᤏᤢ᤺ᤱᤏᤧᤴᤗᤥ॥”

²¹ ᤗᤧᤔᤢ ᤛᤢ᤺ᤴᤍᤢᤀᤠᤱ ᤂᤢᤏᤧ᤹ ᤂᤧᤴ ᤌᤠᤱᤒᤧᤴᤏᤡᤴ ᤔᤢᤍᤥᤂᤠᤶᤍᤥ ᤆᤥᤃᤢᤖᤥ. ᤔᤢᤷᤗᤧ᤺ᤶᤒᤠ ᤐᤠ᤺ᤴᤜᤠ᤹ ᤔᤧᤳᤋᤢᤀᤠᤱ ᤂᤢᤏᤧ᤹ ᤁᤢᤒᤠ᤺ᤴᤏᤥ ᤂᤧᤴ ᤌᤠᤛᤢᤖᤥ॥

²² ᤛᤠᤛᤧᤵᤔᤠᤍᤧᤴᤏᤥ ᤁᤧᤎᤠᤛᤡᤱ ᤁᤧᤒᤣ᤺ᤰᤐᤠ ᤐᤡᤳ ᤜᤧᤰᤁᤣ. ᤆᤧᤴ ᤐᤡᤛᤠᤱ ᤋᤃᤡ ᤁᤧᤒᤣ᤺ᤰᤐᤠ ᤐᤧ᤺ᤱᤘᤠ ᤁᤢᤀᤡᤛᤡᤰ ᤂᤡᤔᤥᤘᤔᤥ ᤂᤢᤏᤧ᤹ ᤂᤧᤴ ᤋᤡᤶᤍᤢᤀᤠᤱ ᤁᤢᤀᤣᤃᤠᤱ ᤐᤣᤖᤥ॥

²³ ᤂᤧᤒᤩᤠᤱ ᤋᤥ᤺ᤱᤅᤡᤸᤗᤧ ᤂᤧᤸᤗᤧ ᤁᤢᤏᤧᤖᤧᤳᤋᤡᤴ ᤑᤩᤠᤰ ᤗᤛ᤻ᤛᤢᤖᤥ. ᤀᤡᤀᤥ ᤗᤧᤵᤔᤠᤱ ᤁᤧᤛᤢᤰᤐᤠ ᤁᤧᤒᤣ᤺ᤰᤐᤠ ᤐᤢ ᤁᤢᤛᤡᤱ. ᤂᤧᤸᤗᤧ ᤛᤡᤀᤠ ᤑᤠ᤹ᤀᤠᤱ ᤏᤡᤱᤘᤠ᤹ᤀᤣ ᤔᤧᤄᤥᤛᤢᤴᤗᤥ॥

²⁴ ᤀᤠᤸᤗ ᤀᤠᤒᤢᤃᤧᤴ ᤀᤠᤛ᤻ᤛᤠᤛᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ. ᤀᤠᤱᤃᤠ᤹ ᤔᤧᤳᤏᤡᤱᤒᤠ ᤀᤠᤒᤠ᤺ᤴᤏᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ॥

²⁵ ᤂᤡᤏᤡ᤹ ᤛᤡᤰᤗᤢᤱᤔᤠᤴ ᤂᤧᤸᤗᤧ ᤁᤢᤕᤧᤵᤗᤧᤰ ᤗᤧᤵᤔᤠᤱ ᤌᤠᤔᤠ ᤔᤧᤓᤠ᤺ᤰᤋᤧᤶᤔᤡᤴᤏᤧ᤹ᤀᤥ. ᤂᤧᤸᤗᤧ ᤁᤢᤗᤠᤶᤔᤥ ᤗᤧᤵᤔᤠᤱ ᤋᤠᤵᤔᤧᤒᤧ᤹ᤖᤧᤶᤔᤡᤴᤏᤧ ᤔᤧᤒᤣᤃᤡᤴᤏᤧᤀᤥ॥

²⁶ ᤂᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤌᤩ᤺ᤱ ᤔᤧᤰᤂᤢᤛᤡᤀᤠᤱ ᤘᤠ᤹ᤖᤥ. ᤂᤧᤸᤗᤧ ᤁᤢᤛᤠᤏᤠ᤺ᤳ ᤁᤧᤒᤥᤱᤒᤠᤜᤠ᤹ ᤛᤠ᤹ᤖᤡᤰ ᤕᤖᤡᤰ ᤔᤧᤘᤠ᤹ᤖᤥ॥

²⁷ ᤂᤧᤸᤗᤧ ᤁᤢᤜᤡᤶᤔᤡᤴ ᤂᤧᤔᤠᤍᤡᤱ ᤕᤱᤛᤱ ᤐᤣ᤺ᤰᤔᤠ ᤗᤠᤶᤗᤥ. ᤂᤧᤸᤗᤧ ᤛᤡᤔᤧᤸᤗᤧᤴ ᤕᤠᤰᤑᤠᤱᤜᤠ᤹ ᤗᤧᤵᤔᤠᤱ ᤀᤠᤃᤧᤳᤗᤥ॥