ᤂᤠᤜᤢᤴ 2 - LIFOTNT

ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤗᤠᤶ ᤂᤥᤃᤧᤍᤧᤵᤐᤠ ᤌᤢᤶᤄᤥᤜᤠ᤹

¹ ᤀᤠᤛ᤻ᤛᤠᤀᤣ. ᤀᤠᤱᤃᤠ᤹ ᤜᤢ᤹ᤏᤧᤒᤠ ᤀᤠᤒᤠ᤺ᤴᤜᤠ᤹ ᤂᤧᤶᤔᤠ ᤁᤧᤍᤧᤴᤏᤧᤓᤃᤪ ᤜᤧᤰᤁᤩᤠᤱ ᤀᤠᤀᤡᤱᤈᤠᤱᤜᤠ᤹ ᤁᤧᤏᤡᤱᤘᤠ᤹ᤀᤥ ᤁᤧᤕᤢᤰᤂᤢᤏᤧᤓᤃᤪ.

² ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤒᤠ ᤐᤠ᤺ᤴᤜᤠ᤹ ᤏᤢᤖᤡᤰᤁᤠᤱ ᤁᤧᤄᤧᤵᤛᤢᤏᤧᤓᤃᤪ ᤜᤧᤰᤁᤩᤠᤱ ᤁᤧᤛᤡᤰᤗᤢᤱᤔᤧᤴ ᤂᤠᤛᤡᤱᤏᤡ᤺ᤵᤔᤠ ᤗᤧᤵᤔᤠᤱ ᤁᤧᤜᤡᤛᤢᤏᤧᤓᤃᤪ.

³ ᤀᤡ᤺ᤳᤇᤡᤱᤛᤠᤶᤗᤧ ᤗᤠᤃᤡ ᤐᤣᤗᤡᤃᤧᤴ ᤋᤢᤘᤠ ᤁᤧᤈᤥᤃᤢᤏᤧᤓᤃᤪ ᤂᤠᤛᤡᤱᤏᤡ᤺ᤵᤔᤠᤖᤧ ᤗᤠᤃᤡ ᤕᤶᤒᤠ ᤀᤡᤰᤗᤠᤀᤥ ᤐᤣᤗᤡ ᤁᤧᤓᤠᤰᤁᤠᤏᤧᤓᤃᤪ.

⁴ ᤜᤧᤰᤁᤩᤠᤱ ᤂᤧᤏᤧ᤹ ᤕᤢᤵᤐᤠ ᤜᤧᤰᤁᤣ ᤂᤧᤴ ᤁᤧᤃᤥᤳᤋᤢᤏᤧᤓᤃᤪ ᤂᤶᤓᤩᤠᤱ ᤆᤡᤱᤔᤏᤠᤒᤠ ᤕᤠᤱᤓᤢ ᤁᤢᤀᤡᤛᤡᤰ ᤂᤧᤴ ᤁᤧᤍᤕᤢᤏᤧᤓᤃᤪ.

⁵ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤴ ᤁᤡᤵᤔᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤧᤜᤡ ᤁᤢᤏᤡᤱᤘᤠᤴ ᤁᤧᤄᤥᤛᤢᤖᤥ॥

⁶ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤛᤡᤰᤁᤢᤶ ᤏᤡᤱᤘᤠ᤹ ᤀᤠᤒᤡᤖᤥ. ᤂᤢᤏᤧ᤹ ᤁᤢᤶᤒᤪᤠᤀᤥᤗᤠᤶ ᤏᤧᤜᤡᤏᤡᤱᤘᤠ᤹ ᤏᤢ ᤂᤠᤛᤡᤱᤏᤡ᤺ᤵᤔᤠ ᤐᤠ᤺ᤴᤜᤠ᤹ ᤗ᤺ᤴᤗᤥ॥

⁷ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤖᤧ ᤗᤠᤃᤡ ᤌᤱ ᤁᤧᤏᤠ᤺ᤶᤒᤠ ᤆᤥ᤺ᤰᤔᤠᤛᤡ ᤐᤠ᤺ᤴᤏᤡᤴ ᤁᤢᤎᤠ᤺ᤱᤅᤥ ᤆᤡᤰᤂᤢᤀᤠᤱ ᤕᤢᤱᤗᤥ. ᤀᤠᤳᤋᤡᤴᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤗᤧᤰᤁᤡᤴ ᤁᤢᤍᤥ᤺ᤵᤔᤠ ᤆᤥᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤢᤏᤧ᤹ᤃ ᤀᤠᤎᤣ᤺ᤰᤌᤣ᤺ᤰᤐᤠ ᤂᤥᤖᤥ.

⁸ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤠᤶᤔᤡᤴ ᤛᤧ᤺ᤵᤋᤢᤖᤥ. ᤜᤧᤰᤁᤩᤠᤱ ᤏᤛᤠ᤺ᤴᤏᤠᤱ ᤁᤢᤔᤠᤱᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤔᤡᤴ ᤂᤢᤏᤧ᤹ ᤁᤶᤒᤪᤠᤱ ᤔᤧᤳᤋᤢᤖᤥ॥

⁹ ᤂᤧᤒᤩᤠᤱ ᤛᤠᤶᤕᤥᤏᤡᤔᤠ ᤂᤠᤛᤧᤴᤏᤡᤴ ᤏᤢ ᤁᤧᤘᤠ᤹ᤒᤠ ᤐᤠ᤺ᤴᤏᤡᤴ ᤌᤧᤔᤠᤒᤣ— ᤂᤧᤴᤏᤢ ᤛᤥᤖᤡᤰ ᤁᤧᤖᤧᤰ ᤏᤢᤒᤠ ᤗᤠᤶᤔᤡᤴ ᤌᤣᤒᤣ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤖᤥ॥

¹⁰ ᤌᤣᤀᤠᤱᤓᤧᤸᤗᤧ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤂᤧᤏᤧ᤹ ᤁᤧᤛᤡᤰᤗᤢᤱᤔᤥ ᤗᤠ᤺ᤳᤗᤥ. ᤜᤧᤰᤁᤩᤠᤱ ᤏᤧᤜᤡᤏᤡᤱᤘᤠᤴ ᤁᤧᤕᤠᤶᤛᤠᤶᤔᤡᤸᤗᤧ ᤗᤠᤃᤡ ᤕᤧᤕᤧᤒᤠ ᤐᤥᤱᤗᤥ॥

¹¹ ᤀᤡ᤺ᤳᤇᤡᤱ ᤛᤠᤶᤔᤡᤸᤗᤧ ᤂᤧᤏᤧ᤹ ᤋᤠᤵᤌᤣᤰ ᤕᤠᤶᤎᤣᤰ ᤁᤧᤃᤳᤗᤥ. ᤂᤠᤛᤡᤱᤏᤡ᤺ᤵᤔᤧᤸᤗᤧ ᤂᤧᤏᤧ᤹ ᤋᤠᤱᤃᤧᤛᤧ᤺ᤵ ᤁᤧᤃᤳᤗᤥ॥

¹² ᤛᤡᤰᤁᤢᤶᤍᤡᤱ ᤏᤡᤱᤘᤠ᤺ᤸᤗᤧ ᤂᤧᤏᤧ᤹ ᤁᤢ᤹ᤀᤡᤓᤧᤶᤔᤠ ᤕᤧᤵᤗᤧᤰᤗᤠᤶ. ᤜᤧᤰᤁᤩᤠᤱ ᤀᤡᤱᤗᤧᤰ ᤐᤠᤴ ᤁᤧᤒᤠ᤺ᤵᤐᤠ ᤔᤏᤠᤜᤠ᤹ᤗᤠᤶ ᤁᤧᤍᤠᤱᤗᤥ॥

¹³ ᤜᤧᤰᤋᤱᤒᤠ ᤔᤏᤠᤜᤠ᤹ᤖᤧ ᤁᤢᤍᤥ᤺ᤵᤔᤠ ᤗᤠᤶᤜᤠ᤹ ᤔᤧᤗᤧᤖᤢ ᤔᤧᤍᤣᤛᤢᤖᤥ ᤜᤧᤰᤁᤩᤠᤱ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤂᤠᤔᤠᤰᤔᤥ ᤗᤠᤱᤔᤧᤄᤣ᤺ᤰᤗᤥ.

¹⁴ ᤂᤧᤱᤜᤠ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤥ ᤔᤧᤛ᤺ᤳᤗᤥ ᤂᤶᤓᤩᤠᤱ ᤁᤢ᤹ᤀᤡᤓᤧᤶᤔᤠ ᤂᤠᤷᤔᤧᤴᤍᤰ ᤕᤠ᤺ᤶᤒᤰᤁᤥ ᤏᤡᤱᤘᤠ᤹ ᤋᤠᤖᤥ.

¹⁵ ᤂᤧᤱᤜᤠ᤹ᤖᤧ ᤔᤧᤏᤠ᤺ᤳᤋᤢᤒᤠ ᤗᤠᤶᤔᤡᤴ ᤐᤧᤷᤃᤧᤰᤁᤧᤰᤐᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤕᤧᤵᤗᤧᤰᤜᤠ᤹ ᤁᤢᤍᤥ᤺ᤵᤔᤠ ᤔᤧᤈᤥᤰᤏᤧᤴᤗᤥ॥

¹⁶ ᤁᤧᤳᤏᤡᤔᤠ ᤏᤢ ᤕᤧᤵᤗᤧᤰ ᤁᤧᤓᤧ᤹ᤔᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤗᤧᤶᤔᤠ ᤁᤢᤛᤢ᤺ᤶᤔᤠ ᤐᤠ᤺ᤴᤜᤠ᤹ᤗᤠᤶ ᤛᤡᤰᤁᤢᤶᤍᤡᤱ ᤏᤡᤱᤘᤠ᤺ᤸᤗᤧ ᤁᤧᤍᤠᤱᤗᤥ.

¹⁷ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤘᤧᤶᤔᤥᤒᤠ ᤁᤢᤕᤧᤶᤒᤠ᤺ᤴ ᤗᤠᤵᤑᤢᤛᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤢᤏᤧ᤹ ᤜᤢᤵᤋᤢᤒᤠ ᤔᤠᤱᤜᤢᤵᤐᤡᤴ ᤂᤢᤏᤧ᤹ ᤏᤡᤏᤡ ᤂᤧᤵᤄᤧᤶ ᤔᤧᤸᤗᤠᤵᤐᤣ ᤘᤠ᤹ᤈᤠᤖᤥ॥

¹⁸ ᤂᤢᤏᤧ᤹ ᤁᤢᤜᤡᤶᤔᤥ ᤁᤧᤗᤠ᤺ᤵᤐᤧᤴ ᤛᤡᤔᤧᤸᤗᤧ ᤛᤱᤔᤠᤱ ᤋᤣ᤹ᤖᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤠᤶ ᤁᤧᤏᤠ᤺ᤵᤐᤠᤜᤠ᤹ ᤂᤧᤔᤠ ᤕᤱᤛᤱᤅᤥ ᤔᤧᤃᤧᤳᤗᤥ॥

¹⁹ ᤂᤧᤴ ᤔᤧᤴᤇᤢᤔᤠᤀᤥ ᤁᤧᤒᤣ᤺ᤰᤐᤠᤜᤠ᤹ ᤀᤠᤳᤋᤡᤴᤏᤠᤱ ᤔᤧᤏᤢ᤺ᤱᤏᤧᤴ ᤔᤧᤍᤠᤏᤧᤴᤗᤥ. ᤜᤧᤰᤋᤱᤒᤠᤜᤠ᤹ᤖᤧ ᤜᤡᤱᤔᤠ ᤗᤠᤶᤔᤡᤴᤏᤠᤱ ᤕᤠᤶᤔᤥ ᤂᤥᤔᤠ ᤔᤧᤴᤇᤢᤰᤋᤢᤴᤗᤥ॥

²⁰ ᤁᤸᤗᤧᤆᤥᤃᤢᤸᤗᤧ ᤏᤢᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤆᤥ᤺ᤱ ᤀᤡ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤕᤧᤵᤗᤧᤰᤁᤥ ᤔᤧᤶᤔᤢᤴᤏᤣ ᤘᤕᤧ᤹ᤀᤥ॥

²¹ ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤒᤠᤜᤠ᤹ ᤗᤠᤈᤣ᤹ᤀᤥ ᤔᤧᤕᤢᤱᤗᤥ. ᤂᤧᤒᤩᤠᤱ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤂᤧᤵᤔᤥ ᤔᤧᤘᤠ᤹ᤖᤥ॥

²² ᤁᤖ ᤋᤠᤰᤁᤧᤓᤧ᤹ᤒᤠᤜᤠ᤹ ᤗᤠᤈᤣ᤹ᤗᤠᤶ ᤜᤠ᤹ᤕᤠᤰ ᤔᤧᤀᤠ᤺ᤰᤂᤢᤛᤡᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤀᤡᤖᤧ ᤔᤧᤄᤥᤵᤋᤢᤶᤒᤠᤜᤠ᤹ ᤕᤠ᤺ᤴᤛᤢᤱ ᤜᤧᤰᤁᤣ ᤗᤠᤵᤔᤧᤓᤢᤛᤢᤛᤡᤖᤥ॥