ᤂᤠᤜᤢᤴ 18 - LIFOTNT

¹ ᤕᤧᤔᤧᤴᤍᤱ ᤔᤏᤠᤴ ᤀᤠᤒᤠᤅᤣᤖᤰ ᤆᤥᤃᤢᤱᤈᤠᤱ ᤁᤧᤗ᤹ᤒᤠ ᤐᤡᤛᤠᤱ ᤗᤠ᤺ᤳᤗᤥ. ᤂᤧᤴ ᤁᤧᤖᤧᤰ ᤁᤢᤍᤥ᤺ᤵᤔᤠ ᤐᤠ᤺ᤴᤏᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥

² ᤀᤍᤱ ᤔᤏᤠᤜᤠ᤹ᤖᤧ ᤂᤠᤛᤡᤱᤏᤡ᤺ᤵᤔᤠ ᤐᤠ᤺ᤴᤏᤥ ᤂᤢᤴᤇᤡ᤹ ᤏᤡᤱᤘᤠ᤹ ᤔᤧᤍᤠᤏᤧᤴᤗᤥ. ᤁᤖ ᤀᤠᤵᤑᤣᤰ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤐᤠ᤺ᤵᤔᤠ ᤔᤧᤄᤥᤛᤢᤸᤗᤧ ᤔᤧᤛ᤺ᤳᤗᤥ॥

³ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤧᤴ ᤋᤠ᤺ᤸᤗᤧ. ᤋᤠᤵᤑᤧ᤺ᤸᤗᤡᤰ ᤔᤧᤳᤇᤡᤱᤔᤧᤴᤏᤠᤱ ᤋᤠᤖᤥ. ᤛᤡᤖᤡᤱᤔᤔᤧᤴᤏᤢ ᤛᤥᤛᤥᤖᤡᤰ ᤆᤠ᤺ᤳᤌᤡ ᤐᤣ᤺ᤰᤔᤧᤴᤏᤠᤱ ᤐᤥᤱᤍᤠᤖᤥ॥

⁴ ᤔᤏᤠ᤺ᤸᤗᤧ ᤁᤢᤒᤠ᤺ᤴᤜᤠ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤸᤗᤧ ᤁᤢᤒᤢᤱ ᤐᤥᤱᤔᤠ ᤛᤢᤰᤗᤥ. ᤘᤖ᤺ᤱ ᤁᤢᤀᤡᤛᤡᤰ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠ. ᤁᤧᤃᤢᤱᤒᤠ ᤛᤣᤛᤣᤒᤠ ᤘᤠᤜ᤺ᤱ ᤁᤢᤀᤡᤛᤡ᤺ᤰᤗᤥ॥

⁵ ᤋᤠᤰᤁᤧᤓᤧ᤹ᤒᤠ ᤗᤧᤵᤔᤠᤱ ᤐᤵᤔᤠ. ᤀᤡᤃᤪ ᤁᤢᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤁᤢᤍᤥ᤺ᤵᤔᤠ ᤔᤏᤠᤴ ᤂᤠᤛᤧᤴ ᤔᤧᤸᤗᤥ᤺ᤶᤔᤠ ᤔᤧᤶᤒᤡᤔᤠ ᤏᤢᤒᤠ ᤔᤣ᤺ᤴᤗᤥ॥

⁶ ᤀᤍᤱᤅᤡᤸᤗᤧ ᤁᤢᤶᤒᤪᤠᤛᤣ᤹ᤀᤡᤸᤗᤧ ᤀᤠᤵᤑᤣᤰ ᤂᤢᤏᤧ᤹ᤀᤥ ᤂᤧᤔᤠ᤹ ᤋᤠᤖᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤶᤒᤪᤠ᤺ᤸᤗᤧ ᤂᤢᤏᤧ᤹ ᤋᤧ᤺ᤶᤓᤢᤰ ᤆᤠ᤺ᤳᤋᤢᤖᤥ॥

⁷ ᤀᤍᤱ ᤔᤏᤠ᤺ᤸᤗᤧ ᤁᤢᤶᤒᤪᤠ᤺ᤴᤏᤣ ᤂᤧᤸᤗᤧ ᤁᤢᤔᤧᤰᤔᤠ ᤐᤥᤱᤗᤥ. ᤜᤧᤰᤁᤩᤠᤱ ᤁᤢᤶᤒᤪᤠᤛᤣ᤹ᤀᤡᤸᤗᤧ ᤁᤢᤜᤡᤱᤔᤴᤏᤧᤴ ᤀᤡᤈᤥᤀᤥ ᤌᤠᤛᤢᤖᤥ॥

⁸ ᤐᤠᤴ ᤁᤧᤒᤱᤒᤠ ᤔᤏᤠ᤺ᤸᤗᤧ ᤁᤢᤒᤠ᤺ᤴᤇᤣ᤺ᤰᤘᤠᤜᤠ᤹ ᤁᤢᤈᤠᤃᤧᤏᤢ᤹ᤒᤠ ᤁᤢᤈᤠ ᤀᤢᤶ ᤜᤧᤰᤁᤣ ᤗ᤹ᤖᤥ. ᤂᤧᤱᤜᤠ᤹ ᤔᤏᤠ᤺ᤸᤗᤧ ᤁᤢᤛᤡᤰᤗᤢᤱᤔᤥ ᤌᤠᤖᤡᤰ ᤁᤧᤳᤗᤥ॥

⁹ ᤀᤠᤵᤑᤣᤰ ᤁᤢᤕᤠ᤺ᤶᤒᤰ ᤆᤥ᤺ᤰᤔᤠ ᤁᤢᤗᤧᤶᤁᤧᤕᤢᤒᤠ ᤔᤏᤠᤴ ᤌᤩ᤺ᤱ ᤀᤠᤔᤧᤱᤔᤧᤱᤒᤧᤸᤗᤧ ᤁᤢᤴᤛᤠ᤹ ᤜᤧᤰᤋᤱᤒᤠᤖᤥ॥

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤗᤳᤇᤠ ᤁᤧᤎᤢᤶᤒᤠ ᤆᤱᤜᤡᤶᤗᤥ. ᤛᤠᤶᤕᤥᤒᤠ ᤔᤏᤠᤜᤠ᤹ ᤂᤧᤵᤔᤥ ᤔᤧᤗᤥ᤺ᤰᤗ ᤔᤧᤒᤣ᤺ᤰᤗᤥ ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤋᤠᤱᤛᤧ᤺ᤵᤛᤡᤱᤔᤠ ᤔᤧᤄᤥᤛᤢᤖᤥ॥

¹¹ ᤕᤠᤱᤛᤠᤁᤢᤴᤎᤣᤛᤠᤒᤧᤸᤗᤧ ᤁᤢᤕᤠᤱᤛᤠᤁᤢᤴᤎᤣ᤺ᤴᤏᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤒᤪᤡᤱ ᤛᤧ᤺ᤵᤔᤏᤠᤒᤠ ᤜᤠᤱᤕᤰᤗᤥ. ᤂᤧᤱᤜᤠ᤹ᤖᤧ ᤁᤴ ᤗᤡᤱᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤗᤢᤱᤎᤠᤰ ᤔᤧᤀᤡ᤺ᤳᤋᤢᤖᤥ॥

¹² ᤔᤧᤰᤔᤠᤏᤢ᤺ᤸᤗᤧ ᤋᤃᤡ ᤔᤏᤠ᤺ᤸᤗᤧ ᤁᤢᤛᤡᤰᤗᤢᤱᤔᤧᤴ ᤀᤠᤱᤍᤡᤱ ᤗ᤹ᤖᤥ. ᤁᤖ ᤔᤡᤱᤛᤥ ᤌᤠᤱᤛᤥ ᤋᤠᤔᤠᤏᤢ᤺ᤸᤗᤧ ᤋᤃᤡ ᤆᤢᤱᤈᤡᤃᤧᤴ ᤋᤠᤖᤥ॥

¹³ ᤀᤠᤳᤋᤡᤸᤗᤧ ᤂᤧᤶᤔᤠᤏᤢ᤺ᤸᤗᤧ ᤋᤃᤡᤀᤣ ᤏᤢᤃᤵ ᤐᤠ᤺ᤴᤏᤡᤴ ᤏᤢ᤺ᤰᤋᤢ᤹. ᤂᤧᤱᤃ ᤂᤢᤏᤧ᤹ ᤁᤢᤀᤍᤱ ᤐᤠᤴ ᤏᤢ ᤁᤢᤛᤡᤖᤡᤱᤔᤔᤠ ᤐᤠ᤺ᤴᤗᤥ॥

¹⁴ ᤔᤏᤠ᤺ᤸᤗᤧ ᤁᤢᤕᤠᤶᤛᤶᤔᤡᤸᤗᤧ ᤂᤢᤏᤧ᤹ ᤁᤢᤕᤠᤶᤍᤢᤰᤁᤡᤸᤗᤧ ᤌ᤺ᤵᤔᤠ ᤛᤢᤰᤋᤢᤖᤥ. ᤁᤖ ᤋᤢᤰᤂᤣ ᤁᤧᤈᤠᤒᤠ ᤕᤠᤶᤛᤠᤶᤔᤡᤸᤗᤧ ᤁᤢᤍᤢᤰᤔᤠᤴ ᤜᤠ᤺ᤳᤗᤧ ᤌ᤺ᤵᤔᤠ ᤛᤢᤰᤋᤢᤒᤣ᥅

¹⁵ ᤂᤠᤛᤡᤱᤃᤧᤏᤡ᤺ᤵᤐᤠ ᤛᤡᤰᤗᤢᤱᤔᤧᤸᤗᤧ ᤏᤧᤜᤡᤏᤡᤱᤘᤠ᤹ ᤂᤥᤛᤢᤖᤥ. ᤌᤣᤀᤠᤱᤓᤧᤸᤗᤧ ᤛᤡᤰᤁᤢᤶᤛᤠᤒᤠ ᤏᤧᤓᤠᤰᤁᤡᤸᤗᤧ ᤂᤧᤴ ᤁᤥ᤺ᤳᤋᤢ ᤗ᤺ᤳᤋᤢᤖᤥ॥

¹⁶ ᤆᤠᤛᤢᤱᤅᤡᤸᤗᤧ ᤀᤠᤒᤡᤒᤡᤒᤠᤸᤗᤧ ᤁᤢᤗᤠᤶ ᤁᤢᤃᤥᤜᤠ᤹ ᤜᤴᤍᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤕᤕᤶ ᤕᤶᤒᤠ ᤔᤏᤠ ᤁᤧᤘᤠ᤹ᤒᤠᤍᤧᤴᤏᤥ ᤀᤠᤃᤧᤳᤗᤥ॥

¹⁷ ᤏᤡᤛᤡᤃᤣᤰᤐᤠ ᤔᤏᤠᤴ ᤋᤃᤡ ᤋᤠᤀᤠᤱ ᤐᤠᤴ ᤛᤧ᤺ᤴᤀᤠᤴᤍᤥᤏᤧᤸᤗ ᤌᤠᤖᤡᤰ. ᤋᤢ᤺ᤴᤍᤣ ᤁᤧᤃᤢ᤺ᤵᤐᤠ ᤌᤡᤰᤛᤡᤃᤣᤰᤐᤠ ᤔᤏᤠ᤺ᤴᤏᤣ ᤁᤢᤍᤥ᤺ᤵᤔᤠ ᤏᤡᤍᤧᤳᤗᤥ॥

¹⁸ ᤋ᤹ᤕᤠ᤺ᤴᤛᤥᤴ ᤁᤧᤔᤧᤸᤗᤧ ᤁᤧᤒᤥ᤺ᤰᤐᤠ ᤐᤠ᤺ᤴᤎᤱᤜᤠ᤹ ᤋᤱᤗᤥ. ᤜᤧᤰᤁᤩᤠᤱ ᤁᤧᤎᤢᤶᤒᤠ ᤀᤳᤁᤧᤒᤠᤱᤒᤠᤜᤠ᤹ ᤂᤣᤔᤠ ᤔᤧᤏᤠ᤹ᤖᤥ॥

¹⁹ ᤁᤶᤒᤪᤠᤱ ᤔᤧᤔᤧᤳᤋᤢᤒᤠ ᤕᤧᤰᤕᤰᤁᤡᤴ ᤜᤢᤰᤁᤥ ᤌᤠᤔᤠᤏᤢ᤺ᤸᤗᤧ ᤁᤢᤏᤡᤱᤘᤠ᤹ ᤋᤢᤰᤗ ᤕᤠ᤺ᤶᤔᤏᤠᤒᤠ ᤏᤢᤛᤠ᤹ᤀᤡᤴ ᤗᤧᤶᤔᤠ ᤛᤠ᤹ᤖᤡᤰ ᤛᤠᤰᤗᤥ. ᤜᤧᤰᤁᤩᤠᤱ ᤂᤧᤔᤠ᤹ ᤆᤥ᤺ᤰᤔᤠᤃ ᤀᤧᤵᤔᤏᤠ ᤑᤶᤔᤏᤠᤒᤠ ᤕᤰᤁᤥᤒᤠ ᤗᤠᤶᤎᤣ᤺ᤳᤜᤠ᤹ ᤁᤢᤀᤡᤛᤡ᤺ᤰᤗᤥ॥

²⁰ ᤔᤏᤠᤴ ᤂᤢᤏᤧ᤹ ᤁᤢᤶᤒᤪᤠᤀᤥᤒᤠ ᤐᤠ᤺ᤴᤏᤡᤸᤗᤧ ᤁᤢᤛᤠᤵᤐᤥᤰ ᤋᤡᤶᤗᤥ. ᤂᤧᤸᤗᤧ ᤁᤢᤶᤒᤪᤠᤛᤣ᤹ᤗᤠᤶ ᤛᤢᤵᤛᤢᤒᤠ ᤐᤠ᤺ᤴᤇᤣ᤺ᤰᤘᤠ᤺ᤸᤗᤧ ᤁᤢᤛᤡᤰᤀᤣ᤺ᤳᤋᤢᤖᤥ॥

²¹ ᤜᤡᤱᤔᤴ ᤏᤢ ᤛᤡᤔᤧᤸᤗᤧ ᤔᤢᤰᤛᤠᤶᤔᤡᤴ ᤗᤧᤛᤥ᤺ᤳᤋᤥ ᤐᤳᤗᤥ. ᤂᤧᤴ ᤐᤠ᤺ᤵᤔᤠ ᤁᤢᤛᤡᤖᤠ᤹ ᤁᤧᤎᤠᤱᤒᤧᤸᤗᤧ ᤜᤠᤒᤠ ᤂᤧᤴ ᤋᤢᤔᤢᤖᤥ॥

²² ᤔᤧᤸᤗᤡᤱᤃᤧᤴ ᤔᤣ᤺ᤳ ᤁᤧᤄᤥᤒᤠᤸᤗᤧ ᤏᤢᤒᤠ ᤐᤠᤴ ᤂᤥᤛᤢᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤂᤧᤴᤏᤢ ᤁᤢᤏᤡᤱᤘᤠ᤹ ᤋᤠᤖᤥ॥

²³ ᤕᤠᤱᤃᤧᤛᤠ᤹ᤒᤧᤸᤗᤧ ᤗᤢᤱᤔᤠ᤹ ᤋᤢᤰᤔᤠᤖᤧ ᤗᤠᤃᤡ ᤐᤣᤗᤡ ᤑᤠᤰᤋᤢᤖᤥ. ᤁᤖ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠ᤺ᤸᤗᤧ ᤀᤠᤗᤰᤗᤰᤐᤠ ᤐᤠᤴ ᤏᤢ᤺ᤰᤋᤢᤖᤥ॥

²⁴ ᤁᤢᤴᤍᤣᤱ ᤁᤢᤴᤈᤢᤶ ᤕᤖᤡᤰ ᤁᤧᤘᤠ᤹ᤒᤠ ᤔᤏᤠ᤺ᤴᤏᤠᤱ ᤜᤍ᤹ ᤔᤧᤰᤔᤠ ᤛᤢᤰᤗᤥ. ᤁᤖ ᤁᤢᤓᤠ ᤋᤣ᤺ᤱᤈᤢᤶᤜᤠ᤹ᤃ ᤑᤢ᤹ᤏᤢᤛᤠ᤹ᤏᤢ᤺ᤸᤗᤧᤀᤠᤱ ᤏᤡ᤺ᤳᤋᤠᤱ ᤔᤧᤄᤡᤶᤛᤡᤱᤗᤥ॥