ᤂᤠᤜᤢᤴ 16 - LIFOTNT1 ᤛᤡᤰᤗᤢᤱᤔᤥᤒᤠ ᤏᤡᤱᤛᤣ᤺ᤰᤜᤠ᤹ ᤔᤧᤴᤇᤠᤶ ᤕᤠᤵᤔᤡᤖᤧᤴᤗᤥ. ᤁᤖ ᤁᤢᤍᤥ᤺ᤵᤔᤠ ᤏᤢᤃᤵᤐᤡᤱᤃ ᤕᤜᤘᤣ ᤍᤠᤱᤒᤧᤴ ᤗᤠᤶᤒᤠᤀᤣ ᤋᤠᤖᤥ॥ 2 ᤔᤏᤠ᤺ᤸᤗᤧ ᤁᤧᤖᤧᤰ ᤁᤢᤗᤠᤶᤜᤠ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤗᤣ᤺ᤳᤋᤢᤒᤡᤗᤠ. ᤁᤖ ᤂᤧᤸᤗᤧ ᤌᤣᤀᤠᤱ ᤜᤧᤰᤁᤣ ᤆᤥᤃᤢ ᤁᤧᤗ᤹ᤒᤠ ᤐᤠ᤺ᤴᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤛᤠ᤹ᤖᤢᤖᤥ॥ 3 ᤂᤧᤏᤧ᤹ ᤁᤧᤈᤥᤃᤢᤒᤠ ᤀᤠᤳᤋᤡᤴ ᤐᤠ᤺ᤴᤏᤡᤴᤇᤠᤱ ᤕᤜᤘᤣ ᤍᤠᤱᤒᤧᤴ ᤜᤢᤰᤛᤢᤵᤋᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤡᤱᤛᤣ᤺ᤰᤜᤠ᤹ ᤁᤢᤗᤡᤱᤍᤥ ᤁᤧᤳᤗᤥ॥ 4 ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤢᤏᤧ᤹ ᤁᤢᤍᤠᤖᤵᤗᤧ ᤗᤠᤃᤡ ᤆᤥᤃᤢᤖᤥ. ᤁᤢ᤹ᤀᤡᤃᤧᤓᤧᤴᤏᤠᤱ ᤔᤧᤰᤔᤠ ᤕᤧᤴᤗᤧ ᤗᤠᤃᤡ ᤂᤢᤏᤧ᤹ ᤕᤢᤰᤂᤢᤀᤠᤱ ᤘᤠ᤹ᤖᤥ॥ 5 ᤛᤡᤰᤗᤢᤱᤔᤥ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤁᤧᤖᤧᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰᤗᤧ᤺ᤱᤗᤥ. ᤛᤧᤰᤂᤠᤀᤣ ᤂᤧᤱᤜᤠ᤹ ᤂᤢᤶᤍᤡᤱ ᤔᤧᤱᤄᤥᤀᤣ ᤐᤡᤶᤔᤠ ᤔᤧᤱᤄᤥᤏᤧᤴᤗᤥ॥ 6 ᤌᤎᤵ ᤔᤧᤸᤗ᤹ᤔᤏᤠᤒᤠ ᤔᤡ᤺ᤶᤈᤡ ᤏᤢ ᤏᤛᤠ᤺ᤴᤛᤠᤒᤠᤗᤠᤶ ᤗᤠᤕᤥᤗᤠᤶ ᤜᤡ᤺ᤶᤔᤠ ᤐᤠᤴ ᤐᤥᤱᤗᤥ. ᤕᤜᤘᤣ ᤍᤠᤱᤒᤧᤴ ᤁᤡᤵᤔᤠᤗᤠᤶ ᤔᤏᤠᤴ ᤑᤧᤴᤐᤠ᤺ᤴᤗᤠᤶ ᤗᤠ᤺ᤳᤗᤠ᤺ᤳ ᤐᤥᤱᤗᤥ॥ 7 ᤔᤏᤠ᤺ᤸᤗᤧ ᤁᤢᤗᤠᤶᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤐᤥᤱᤅᤡᤸᤗᤧ. ᤂᤢᤏᤧ᤹ ᤂᤧᤸᤗᤧ ᤁᤢᤏᤡᤱᤔᤡᤜᤠ᤹ᤀᤠᤱ ᤂᤧᤴᤏᤢ ᤏᤠᤍᤱ ᤆᤥᤃᤢᤀᤠᤱ ᤁᤳᤋᤢᤛᤡᤖᤥ॥ 8 ᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤴᤏᤢ ᤀᤠᤈᤧ᤺ᤳᤇᤡᤰ ᤁᤵᤔᤏᤠᤒᤧᤴ. ᤔᤧᤴᤘᤠ᤹ᤔᤏᤠᤒᤠᤗᤠᤶ ᤕᤖᤡᤰ ᤌᤰᤔᤏᤠᤒᤠᤴᤏᤢ᤺ᤸᤗᤧ ᤏᤢᤒᤠᤖᤥ॥ 9 ᤔᤏᤠ᤺ᤸᤗᤧ ᤁᤢᤛᤡᤰᤗᤢᤱᤔᤥ ᤆᤥ᤺ᤰᤔᤠ ᤆᤠᤔᤠ ᤐᤠ᤺ᤴᤏᤡᤴ ᤜᤡᤛᤢ ᤋᤱᤄᤢᤖᤥ. ᤁᤖ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤂᤧᤸᤗᤧ ᤁᤢᤗᤠᤶᤜᤠ᤹ ᤏᤡ᤺ᤴᤎᤥ ᤆᤥᤃᤢᤒᤡᤖᤢᤖᤥ॥ 10 ᤜᤠᤱᤅᤡᤸᤗᤧ ᤁᤢᤶᤒᤪᤠᤛᤣ᤹ᤀᤡᤸᤗᤧ ᤔᤠᤱᤀᤡᤱᤄᤱ ᤐᤠᤴ ᤐᤠ᤺ᤳᤋᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤪᤠ᤺ᤸᤗᤧ ᤁᤧᤘᤠ᤹ᤒᤠ ᤂᤠᤛᤧᤴᤏᤡᤴ ᤜᤠᤴᤋᤡ ᤔᤧᤈᤥᤃᤢᤴᤗᤥ॥ 11 ᤁᤧᤃᤧᤵᤐᤠ ᤁᤢᤛᤡ᤺ᤰᤔᤠ ᤏᤢ ᤋᤧᤶᤍᤢᤖᤡᤜᤠ᤹ ᤕᤜᤘᤣ ᤍᤠᤱᤒᤠᤸᤗᤧᤴᤏᤣᤖᤥ. ᤁᤧᤖᤧᤰ ᤐᤖᤡᤰᤐᤠ ᤀᤥᤃᤵ ᤁᤧᤒᤥᤱᤒᤠ ᤁᤢᤎᤠᤱᤗᤢᤱᤜᤠ᤹ ᤂᤢᤏᤧ᤹ᤀᤣ ᤆᤥᤃᤢᤒᤠᤖᤥ॥ 12 ᤜᤠᤱᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤴ ᤂᤢᤴᤇᤡ᤹ ᤛᤡᤰᤗᤧ᤺ᤱᤗᤥ. ᤛᤠᤶᤕᤥᤒᤠ ᤕᤠ᤺ᤶᤒᤰ ᤗᤠᤶᤔᤣ ᤜᤠᤱᤕᤢᤰᤏᤠᤴ ᤌᤎᤵ ᤔᤧᤸᤗ᤹ᤔᤏᤠ ᤐᤥᤱᤗᤥ॥ 13 ᤜᤠᤱᤜᤠ᤹ ᤁᤢᤍᤥ᤺ᤵᤔᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤛᤣ᤹ᤜᤠ᤹ᤏᤢ ᤏᤡᤱᤘᤠ᤹ ᤕᤧᤕᤧ ᤗ᤹ᤖᤥ. ᤁᤢᤳᤆᤠ᤹ ᤁᤧᤒᤠ᤺ᤵᤐᤠ ᤔᤏᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤖᤠ᤹ᤌᤠᤱᤗᤥ॥ 14 ᤜᤠᤱᤅᤡᤸᤗᤧ ᤛᤠ᤹ᤖᤡᤰ ᤁᤢᤛᤡᤰ ᤐᤥ᤺ᤰᤔᤧᤱᤃ ᤛᤡᤔᤧᤸᤗᤧ ᤁᤢᤀᤡᤱᤛᤠᤒᤠᤖᤥ. ᤁᤖ ᤛᤡᤰᤁᤢᤶᤛᤠᤒᤠ ᤔᤏᤠ᤺ᤸᤗᤧ ᤂᤧᤴ ᤆᤡᤈᤡ ᤕᤧᤶᤕᤧᤶᤒᤠ ᤆᤥᤃᤢᤖᤥ॥ 15 ᤜᤠᤱᤅᤡᤸᤗᤧ ᤁᤢᤏᤠᤖᤠᤴ ᤀᤥ᤺ᤳᤋᤡ᤺ᤸᤗᤧ. ᤂᤧᤸᤗᤧ ᤁᤢᤒᤣ᤺ᤱᤃ ᤜᤡᤱᤔᤴᤗᤥ. ᤂᤧᤸᤗᤧ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤁᤢᤗᤢᤱᤃᤢᤶᤔᤡᤱᤃ ᤜᤠᤱᤘᤠᤔᤠ ᤕᤧᤶᤔᤥᤒᤠ ᤘᤜᤡᤳᤋᤡᤸᤗᤧᤴ ᤂᤠ᤹ᤔᤡᤳ ᤜᤧᤰᤋᤱᤒᤠᤖᤥ॥ 16 ᤛᤠᤶᤔᤩᤠᤱᤏᤢ᤺ᤸᤗᤧᤃ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤂᤥᤔᤠᤖᤥ. ᤜᤧᤰᤁᤩᤠᤱ ᤕᤢᤵᤐᤠᤏᤢ᤺ᤸᤗᤧᤃ ᤂᤠᤛᤡᤱᤏᤡ᤺ᤵᤔᤠ ᤛᤣ᤺ᤰᤔᤧᤴ ᤛᤠ᤹ᤖᤡᤰ ᤏᤢᤒᤠᤖᤥ॥ 17 ᤁᤢᤍᤥ᤺ᤵᤔᤧᤸᤗᤧ ᤁᤢᤔᤠᤖᤠᤶᤔᤡᤴ ᤑᤧᤴᤐᤠᤴ ᤗᤠᤶᤒᤠ ᤗᤠ᤺ᤳᤗᤠ᤺ᤳ ᤐᤥᤱᤗᤥ. ᤀᤠᤳᤋᤡᤸᤗᤧ ᤁᤢᤗᤠᤶᤔᤡᤴ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤥᤔᤧᤳᤋᤢ᤹. ᤂᤧᤸᤗᤧ ᤁᤢᤜᤡᤱᤔᤴ ᤋᤠᤱᤛᤧ᤺ᤵᤋᤢᤖᤥ॥ 18 ᤔᤧᤰᤔᤠᤏᤢ᤺ᤸᤗᤧ ᤋᤃᤡ ᤀᤠᤱᤍᤡᤱ ᤗ᤹ᤔᤠᤴ ᤏᤢ ᤂᤠᤵᤐᤢᤌᤩ᤺ᤱ ᤐᤥᤱᤔᤠᤏᤢ᤺ᤸᤗᤧ ᤋᤃᤡ ᤕᤶᤒᤠ ᤜᤧᤴᤇᤡᤱᤔᤠ ᤕᤠᤶᤛᤠᤶ ᤋᤠᤖᤥ॥ 19 ᤔᤧᤕᤢᤰᤋᤢᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤕᤠᤶᤛᤠᤶᤔᤥ ᤏ᤺ᤶᤏ᤺ᤶᤔᤠᤱ ᤘᤠ᤹ᤔᤠᤃ ᤏᤠᤵᤔᤏᤠᤒᤠ ᤆᤡᤃᤰᤘᤠᤜᤠ᤹ ᤁᤧᤜᤧᤴᤇᤡᤱᤒᤠᤜᤠ᤹ᤏᤢ ᤜᤠᤔᤠᤏᤢ᤺ᤸᤗᤧ ᤏᤢᤒᤠᤖᤥ॥ 20 ᤂᤠᤜᤢᤴ ᤐᤠᤴ ᤏᤢᤖᤡᤰ ᤁᤧᤄᤧᤶᤒᤠ ᤔᤏᤠᤴ ᤁᤧᤏᤢ᤹ᤒᤠ ᤁᤧᤍᤠᤒᤠ ᤐᤥᤱᤗᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤏᤠᤃᤧᤛᤠ᤹ᤒᤠ ᤔᤏᤠᤴ ᤔᤢ᤹ᤀᤡᤛᤠᤒᤠᤖᤥ॥ 21 ᤛᤡᤰᤗᤢᤱᤔᤥ ᤛᤡᤰᤁᤢᤶᤛᤠᤒᤠ ᤁᤧᤒᤥᤱᤒᤠᤜᤠ᤹ ᤕᤧᤰᤕᤧᤰᤐᤠ ᤔᤧᤔᤧᤳᤋᤢᤛᤡᤖᤥ. ᤜᤧᤰᤁᤩᤠᤱ ᤁᤢᤈᤠᤃᤧᤏᤢ᤹ᤒᤠ ᤐᤠ᤺ᤴᤜᤠ᤹ᤖᤧ ᤏᤡᤛᤠᤶ ᤑᤥᤛᤢᤖᤥ॥ 22 ᤂᤠᤛᤡᤱᤃᤧᤏᤡ᤺ᤵᤔᤠ ᤏᤡᤱᤘᤠ᤹ ᤁᤧᤃᤵᤐᤠᤸᤗᤧ ᤁᤢᤗᤠᤃᤡ ᤁᤴ ᤜᤡᤱᤔᤴᤗᤧ ᤁᤢᤒᤢᤴᤗᤥ. ᤁᤖ ᤀᤍᤱᤅᤡᤸᤗᤧ ᤁᤢᤀᤍᤱ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧᤀᤣ ᤂᤢᤶᤍᤡᤱ ᤂᤥᤛᤢᤖᤥ॥ 23 ᤛᤡᤰᤁᤢᤶᤛᤠᤒᤧᤸᤗᤧ ᤁᤢᤛᤡᤰᤗᤢᤱᤔᤧᤸᤗᤧ ᤀᤠᤒᤠᤅᤣ ᤁᤢᤶᤒᤪᤠᤴ ᤂᤠᤛᤡᤱᤃᤧᤏᤡ᤺ᤵᤐᤠ ᤆᤥᤃᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤶᤒᤪᤠᤛᤣ᤹ᤀᤡᤸᤗᤧ ᤏᤡᤛᤠᤶ ᤑᤥᤛᤢᤖᤥ॥ 24 ᤁᤢᤈᤠᤃᤧᤏᤢ᤹ᤒᤠ ᤐᤠ᤺ᤴᤜᤠ᤹ᤃ ᤛᤰᤘᤠᤄᤢ᤺ᤸᤗᤧ ᤁᤢᤗᤣᤰ ᤜᤧᤰᤋᤱᤒᤠᤖᤥ. ᤂᤧᤸᤗᤧᤃ ᤕᤠᤶᤛᤠᤶᤔᤡᤴ ᤆᤠᤱᤈᤠᤱ ᤏᤢ ᤕᤧᤳ ᤗᤢᤱᤛᤡᤜᤠ᤹ ᤘᤣ᤺ᤴᤍᤢᤖᤥ॥ 25 ᤁᤢᤓᤠ ᤗᤠᤶᤔᤡᤴ ᤔᤏᤠ᤺ᤸᤗᤧ ᤁᤢᤏᤡᤔᤥ ᤁᤢᤍᤥ᤺ᤵᤔᤠ ᤏᤡᤍᤧᤳᤐᤡᤗᤠ. ᤁᤖ ᤂᤧᤸᤗᤧ ᤏᤡᤴᤎᤠᤛᤣ᤺ᤰᤀᤥ ᤛᤡᤔᤠᤀᤥ ᤁᤧᤵᤔᤠ ᤛᤢᤰᤋᤢᤖᤥ॥ 26 ᤕᤠ᤺ᤶᤒᤢᤍᤡᤰᤐᤠᤴ ᤁᤢᤛᤠᤰᤐᤥ᤺ᤰᤐᤠᤸᤗᤧᤀᤣ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤠᤱᤄᤢᤖᤥ. ᤂᤧᤸᤗᤧ ᤁᤢᤛᤡᤰᤗᤠ᤺ᤰᤔᤧᤸᤗᤧᤀᤣ ᤂᤧᤴ ᤁᤢᤛᤡᤰ ᤀᤣ᤺ᤳᤋᤢᤖ ᤕᤠ᤺ᤴᤍᤢᤖᤥ॥ 27 ᤂᤠᤷᤔᤧᤴᤍᤰ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤧ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤀᤡ᤺ᤳᤋᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤒᤠ᤺ᤴᤇᤣ᤺ᤰᤘᤠᤴ ᤀᤠᤀᤥ᤹ᤀᤥ᤹ᤒᤠ ᤔᤡ ᤜᤧᤰᤁᤣ ᤗ᤹ᤖᤥ॥ 28 ᤑᤧᤰᤁᤧᤗᤠ᤹ᤒᤠ ᤔᤏᤠ᤺ᤸᤗᤧ ᤂᤧᤈᤧᤰ ᤐᤠᤴ ᤑᤥ᤺ᤰᤂᤢᤖᤥ. ᤜᤧᤰᤁᤩᤠᤱ ᤀᤠᤈᤧᤱᤈᤧᤱᤒᤧᤸᤗᤧ ᤀᤠᤍᤱᤍᤱᤒᤠ ᤋᤣ᤺ᤱᤈᤢᤶᤜᤠ᤹ᤀᤥ ᤛᤣᤔᤧᤴ ᤋᤠᤖᤢᤖᤥ॥ 29 ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠ᤺ᤸᤗᤧ ᤀᤠᤵᤑᤣᤰ ᤁᤢᤜᤡᤶᤒᤣᤛᤠᤱᤒᤧᤴ ᤗᤠᤶ ᤑᤥ᤺ᤳᤋᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤂᤢᤏᤧ᤹ ᤋᤠᤵᤑᤧ᤺ᤶᤒᤠ ᤗᤠᤶ ᤗᤧᤵᤔᤠᤱ ᤋᤣ᤹ᤖᤢᤖᤥ॥ 30 ᤁᤢᤔᤡᤰ ᤆᤡᤄᤡᤶ ᤆᤡᤄᤡᤶ ᤁᤧᤔᤧᤵᤐᤧᤸᤗᤧ ᤆᤧᤶᤓᤴ ᤆᤥᤃᤢᤖᤥ. ᤁᤢᤶᤒᤪᤠᤛᤣ᤹ ᤁᤧᤘᤧᤒᤧᤸᤗᤧ ᤁᤢᤕᤧᤵᤗᤧᤰᤁᤡᤴ ᤋᤠᤵᤑᤧ᤺ᤶᤒᤠ ᤆᤥᤰᤗᤥ॥ 31 ᤁᤧᤓᤢᤵᤐᤠ ᤌᤧᤃᤣ᤺ᤰᤁᤡᤴ ᤔᤡᤱᤛᤥ ᤀᤡᤱᤎᤠᤱᤗᤧᤴ ᤋᤡᤆᤖᤥ. ᤛᤠᤶᤕᤥᤒᤠ ᤜᤡᤱᤔᤴ ᤗᤠᤶᤒᤠ ᤁᤴ ᤂᤥᤍᤧᤳᤗᤥ॥ 32 ᤏᤠᤛᤡᤃᤧᤎ᤺ᤵᤐᤠ ᤔᤏᤠ ᤐᤥᤱᤔᤠᤃ ᤌᤱᤃᤧᤎᤰᤐᤠ ᤐᤥᤱᤔᤠᤏᤢ᤺ᤸᤗᤧᤀᤠᤱ ᤏᤢᤒᤠᤖᤥ. ᤛᤡᤰᤐᤥ᤺ᤰᤔᤠᤴ ᤕᤢᤰᤁᤥ ᤁᤵᤔᤠᤃ ᤕᤧᤰᤕᤰᤁᤡᤴᤏᤣ ᤜᤢᤰᤁᤥ ᤌᤠᤔᤠᤏᤢ᤺ᤸᤗᤧ ᤏᤢᤒᤠᤖᤥ॥ 33 ᤋ᤹ᤕᤠ᤺ᤴᤛᤥᤴᤏᤡᤴ ᤋ᤹ᤕᤠ᤺ᤴᤛᤥᤴ ᤁᤧᤔᤠᤍᤧᤴᤏᤥ ᤔᤧᤃᤧᤛᤢᤖᤥ. ᤁᤖ ᤂᤧᤸᤗᤧᤴ ᤁᤧᤖᤧᤰ ᤐᤠ᤺ᤴᤏᤡᤴ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤏᤡ᤺ᤴᤎᤥ ᤆᤥᤃᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.