ᤑᤡᤗᤡᤵᤐᤡ 4 - LIFOTNT

¹ ᤂᤧᤸᤗᤧᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤜᤧᤰᤁᤣᤗ᤹ᤖᤡᤰ ᤍᤠᤱᤒᤠᤴ ᤆᤰᤔᤧᤸᤗ᤹ᤀᤣ ᤏᤛᤠᤴ ᤆᤥᤃᤧᤶᤔᤧ᤹ᤀᤥ॥ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤏᤡᤱ ᤜᤧᤰᤁᤩᤠᤱ ᤏᤡᤔᤠ ᤏᤡᤱᤘᤠ᤹ ᤆᤥ᤺ᤰᤏᤡᤱ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤀᤣ ᤀᤠᤛ᤺ᤵᤔᤠᤴ ᤏᤢ ᤀᤠᤕᤠ᤺ᤶᤒᤰᤁᤡᤸᤗᤧᤴ ᤌᤢᤶᤄᤥᤏᤡᤱᤗᤥ॥

ᤜᤠᤱᤜᤠᤱᤒᤠ ᤋᤠ᤹ᤈᤧᤱᤜᤠ᤹

² ᤀᤠᤸᤗ ᤀᤡᤱᤃᤠ᤹ ᤂᤧᤴ ᤏᤧᤵᤑᤢ ᤔᤧᤴᤇᤢᤔᤠ᤹ ᤀᤡᤕᤥᤍᤡᤕᤠᤴ ᤏᤢ ᤛᤢᤴᤋᤢᤂᤣ᤺ᤴ ᤍᤠᤱᤒᤠᤸᤗᤧ ᤁᤢᤔᤏᤠ ᤘᤠ᤹ᤛᤡᤒᤠᤸᤗᤧ ᤆᤥᤃᤢᤸᤗᤧ ᤏᤠᤍᤱ ᤆᤥ᤺ᤰᤛᤡᤖ ᤑᤠ᤹ᤀᤠᤱ ᤐᤣᤗᤡ ᤑᤠᤰᤁᤠᤖᤥ॥

³ ᤜᤧᤰᤁᤩᤠᤱ ᤏᤡᤱᤘᤠ᤹ ᤀᤡᤖᤧ ᤂᤥ᤺ᤵᤋᤢᤒᤠ ᤀᤠᤴᤈᤢᤶᤔᤣ. ᤁᤴ ᤔᤧᤴᤇᤢᤔᤠᤜᤠ᤹ ᤁᤢᤓᤠ᤹ ᤐᤡᤖᤧᤛᤧ᤹ ᤑᤠ᤹ᤀᤠᤱ ᤔᤧᤳᤏᤧ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤃ ᤛᤢᤏᤠᤀᤡᤱ ᤀᤡᤱᤓᤥᤔᤠ ᤕᤠ᤺ᤶᤒᤰᤁᤡᤴ ᤀᤡᤱᤃᤠ᤹ᤏᤢ ᤕᤠᤶᤒᤢᤎᤡᤰᤁᤠᤱ ᤆᤥᤃᤧᤳᤇᤢ॥ ᤂᤧᤱᤜᤠ᤹ᤖᤧ ᤰᤗᤣᤔᤧᤴᤋ ᤜᤧᤰᤁᤩᤠᤱ ᤘᤣ᤹ ᤀᤡᤱᤃᤠ᤹ᤏᤢ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤆᤢᤶᤜᤠ᤹ᤏᤢᤀᤠᤱ ᤕᤠ᤺ᤶᤒᤰ ᤆᤥᤃᤧᤳᤇᤢᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤡᤱᤅᤡᤴ ᤜᤡᤱᤔᤴᤗᤧᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳᤗᤥ॥

⁴ ᤍᤠᤱᤒᤠᤴᤏᤢ ᤂᤡᤏᤡ᤹ ᤌᤡᤰᤜᤢᤵ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤛᤍᤠᤍᤡᤱ ᤛ᤺ᤳᤋᤧᤶᤔᤧ᤹ᤀᤥ॥ ᤕᤠᤶᤔᤥᤀᤠᤱ ᤔᤧᤳᤏᤡᤱ—ᤛ᤺ᤳᤋᤧᤶᤔᤧ᤹ᤀᤥ᥄

⁵ ᤂᤡᤏᤡ᤹ ᤛᤢᤶᤛᤢᤶ ᤗ᤹ᤔᤠᤱᤃ ᤘᤣ᤹ ᤁᤧᤖᤧᤰᤗᤧ ᤔᤧᤏᤡᤛᤢᤖᤖᤥ॥ ᤍᤠᤱᤒᤠᤱᤃ ᤏᤡ᤺ᤳᤋᤠᤱᤅᤣ ᤘᤠ᤹ᤖᤥ॥

⁶ ᤀᤠᤳᤋᤡᤴ ᤐᤠ᤺ᤴᤏᤥᤀᤠᤱ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤁᤖ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤧᤶᤔᤧ᤹ᤖ ᤋᤢᤘᤠ ᤏᤢ ᤕᤧᤰᤐᤣᤗᤡᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤂᤡᤏᤡ᤹ ᤐᤣᤗᤡᤜᤠ᤹ ᤋᤥ᤺ᤴᤍᤧᤶᤔᤧ᤹ᤀᤥ॥

⁷ ᤜᤧᤰᤁᤩᤠᤱ ᤔᤧᤴᤇᤠᤶ ᤏᤡᤱᤘᤠ᤹ᤖᤧ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤏᤠᤖᤢᤱᤅᤡᤸᤗᤧᤀᤣ ᤂᤡᤏᤡ᤹ ᤛᤡᤰᤗᤢᤱᤔᤠ ᤏᤢ ᤏᤡᤱᤘᤠ᤹ᤀᤡᤴ ᤂᤪᤡᤛ᤻ᤋ ᤕᤧᤛᤢᤀᤥ ᤋᤠᤱᤛᤧ᤺ᤵᤋᤢ᤹ᤖᤥ॥

⁸ ᤀᤠᤸᤗ ᤁᤢᤏᤢᤵᤔᤥ. ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤳᤋᤡᤴ ᤐᤠ᤺ᤴᤏᤡᤴ ᤛᤧᤰᤂᤠᤒᤠ. ᤛᤢᤶᤒᤥᤎᤠᤒᤠ. ᤁᤢᤍᤥ᤺ᤵᤔᤠ. ᤛᤣᤛᤣᤒᤠ. ᤛᤡᤖᤠ᤹ ᤁᤧᤎᤠᤱᤒᤠ. ᤀᤡᤱᤎᤠᤱ ᤐᤡᤔᤠ ᤗᤠ᤹ᤖᤢᤒᤠ. ᤀᤠᤳᤋᤡᤴ ᤐᤠ᤺ᤴᤏᤡᤴ ᤛᤠ᤹ᤖᤡᤰ ᤏᤢᤒᤠ ᤏᤢ ᤏᤧᤶᤓᤥᤔᤠ ᤗᤠ᤹ᤖᤢᤒᤠ ᤆᤥᤰ. ᤂᤧᤴ ᤐᤠ᤺ᤴᤜᤠ᤹ᤀᤣ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ॥

⁹ ᤀᤡᤱᤃᤠ᤹ᤗᤠᤶ ᤁᤧᤜᤢ᤹ᤀᤠᤛᤡᤒᤠ. ᤁᤧᤄᤥᤛᤢᤶᤒᤠ. ᤁᤧᤄᤧᤵᤛᤢᤶᤒᤠ. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤥ ᤁᤧᤏᤡᤛᤢᤶᤒᤠ ᤐᤠ᤺ᤴᤜᤠ᤹ ᤁᤢᤀᤡᤛᤡᤰ ᤆᤥᤃᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤛᤏᤠᤖᤢᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ᤏᤢ ᤘᤠ᤹ᤖᤥ॥

ᤁᤢᤓᤠ᤹ ᤕᤠᤱᤗᤧ ᤗᤠᤃᤡ ᤏᤥᤃᤧᤴ

¹⁰ ᤀᤡᤱᤃᤠ᤹ ᤍᤠᤱᤒᤠᤴ ᤛᤠ᤹ᤖᤡᤰ ᤁᤢᤏᤠᤖᤠ ᤑᤥᤛᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤕᤠᤶᤔᤥ ᤕᤠᤵᤔᤡ ᤗᤢᤱᤔᤠ᤹ ᤋᤢᤰᤔᤠ ᤁᤧᤜᤣ᤺ᤰᤋᤡᤖᤥ॥ ᤛᤧᤰᤂᤠ᤺ᤸᤗᤧ ᤂᤡᤏᤡ᤹ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤋᤡᤀᤠᤱ ᤘᤠ᤹. ᤁᤖ ᤂᤧᤴ ᤀᤥᤛᤣ᤺ᤴᤎᤠᤰᤔᤠ ᤛᤢᤕᤧᤶᤔᤡᤴᤏᤣ ᤔᤧᤱᤄᤥᤀᤣ ᤁᤧᤘᤕᤡᤖᤥ॥

¹¹ ᤀᤡᤱᤃᤠ᤹ᤃ ᤆᤠᤜᤠᤒᤥ ᤘᤠ᤹ᤀᤠ ᤑᤠ᤹ᤀᤠᤱ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤱᤒᤠ ᤔᤣ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤏᤢ ᤘᤠ᤹ᤛᤠᤱ ᤜᤥ᤺ᤵᤛᤠᤱ ᤏᤡᤱᤘᤠ᤹ ᤋᤠᤔᤠᤀᤠᤱ ᤘᤠ᤹ᤔᤠ ᤜᤢ᤹ᤛᤡᤱᤅᤠᤱᤅᤠᤱ ᤘᤠ᤹ᤀᤠᤖᤥ॥

¹² ᤀᤡᤱᤃᤠ᤹ ᤆᤠᤜᤠᤒᤥ ᤘᤠ᤹ᤔᤠ ᤏᤢ ᤕᤖᤡᤰ ᤁᤵᤔᤠ ᤑᤠ᤹ᤀᤡᤴ ᤌᤧᤔᤠᤒᤣ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ ᤜᤧᤰᤁᤩᤠᤱ ᤀᤠᤰᤋᤱᤒᤠ ᤕᤠᤰᤏᤠᤶᤔᤥ ᤘᤠ᤹ᤀᤠᤛᤠᤱ. ᤆᤠᤔᤠ ᤌᤢᤱᤔᤠ ᤀᤡᤃᤪ ᤛᤠᤰᤔᤧᤴᤈᤠ ᤘᤠ᤹ᤔᤠ ᤐᤥᤱᤛᤠᤱ. ᤕᤖᤡᤰ ᤁᤵᤔᤠ ᤀᤡᤃᤪ ᤆᤠᤜᤠᤒᤠᤀᤥ ᤘᤠ᤹ᤔᤠ ᤐᤥᤱᤛᤠᤱ. ᤏᤡᤱᤘᤠ᤹ ᤋᤠᤔᤠᤀᤠᤱ ᤘᤠ᤹ᤔᤠ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤜᤢ᤹ᤛᤡᤅᤠᤱᤅᤠᤱ ᤘᤠ᤹ᤀᤠᤖᤥ॥

¹³ ᤀᤡᤱᤃᤠ᤹ᤃ ᤍᤠᤱᤒᤠᤸᤗᤧ ᤁᤧᤎᤢᤶᤒᤠ ᤆᤥ᤺ᤰᤁᤠᤒᤠᤸᤗᤧ ᤆᤥᤃᤢᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤛᤢᤰᤋᤢᤱᤗᤥ॥

¹⁴ ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤡᤏᤥᤃᤧᤴ ᤀᤠᤍᤢᤰᤂᤣᤀᤥ ᤁᤢᤓᤠ᤹ ᤕᤠᤵᤔᤡ ᤁᤧᤒᤡᤖᤡᤒᤠᤴ ᤏᤢᤒᤠᤀᤣ ᤁᤧᤈᤥᤃᤢᤶᤗᤥ॥

¹⁵ ᤁᤠᤰᤏᤢ᤺ᤸᤗᤧ ᤋᤃᤡ ᤂᤡᤏᤡ᤹ᤀᤥ ᤛᤢᤏᤠᤀᤡᤱᤅᤡᤴ ᤋᤠᤖᤢᤱᤅᤠᤱ ᤔᤧᤛᤣᤍᤥᤏᤡᤕᤠ ᤌᤢᤶᤔᤥᤗᤠᤶ ᤌᤠᤛᤡᤱᤅᤠᤱᤅᤡᤸᤗᤧ ᤘᤣ᤹ ᤀᤠᤳᤋᤡᤴ ᤛᤣᤛᤣᤜᤢᤵᤗᤰᤜᤠ᤹ᤖᤧᤀᤠᤱ ᤁᤢᤓᤠ᤹ ᤔᤧᤶᤒᤡᤖᤠᤱᤅᤡᤴᤗᤥ. ᤁᤖ ᤂᤡᤏᤡ᤹ ᤑᤡᤗᤡᤵᤐᤡᤒᤠᤜᤠ᤹ᤖᤧᤖᤰ ᤁᤢᤓᤠ᤹ᤕᤠᤱ ᤕᤠᤵᤔᤡ ᤁᤧᤒᤡᤖᤡᤒᤠᤴ ᤁᤧᤏᤡᤛᤢᤶᤗᤥ॥

¹⁶ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤌᤡᤛ᤻ᤛᤗᤥᤏᤡᤁᤠ ᤕᤧᤰᤕᤰᤁᤥ ᤘᤕᤠᤱᤅᤡᤸᤗᤧ ᤆᤠᤜᤠᤒᤥ ᤘᤕᤠᤱ. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤌᤡᤰᤗᤧᤱ ᤏᤡᤗᤧᤱ ᤁᤢᤓᤠ᤹ᤕᤠᤱ ᤕᤠᤵᤔᤡ ᤀᤠᤃᤧᤜᤠᤰᤋᤡᤖᤥ॥

¹⁷ ᤀᤡᤱᤃᤠ᤹ ᤂᤡᤏᤡ᤹ᤗᤠᤶ ᤁᤢᤓᤠ᤹ ᤂᤥᤔᤠ ᤑᤠ᤹ᤀᤠᤱᤃ ᤔᤣ᤺ᤴᤗᤥ. ᤁᤖ ᤁᤢᤓᤠ᤹ ᤕᤠᤵᤔᤡ ᤁᤧᤒᤡᤖᤡᤒᤠᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤱᤘᤠ ᤔᤢ᤹ᤀᤡᤛᤠᤶᤔᤡᤴ ᤂᤡᤏᤡ᤹ ᤁᤧᤒᤡᤖᤡᤖ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥

¹⁸ ᤁᤴ ᤕᤧᤶᤔᤥ ᤀᤡᤱᤃᤠ᤹ ᤆᤠᤜᤠᤒᤠ ᤆᤥᤃᤠᤱᤒᤠᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤐᤠ᤺ᤴᤜᤠ᤹ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ॥ ᤀᤡᤐᤠᤑᤪᤥᤍᤡᤋᤛᤖᤧ ᤁᤢᤜᤢᤰᤁᤥᤗᤠᤶ ᤁᤧᤜᤠᤅᤢᤶᤒᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢᤒᤠ ᤏᤢ ᤁᤢᤏᤡᤱᤘᤠ᤹ ᤋᤠᤛᤢᤒᤠ ᤁᤢᤏᤠᤶ ᤁᤧᤏᤢ᤹ᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡ᤺ᤰᤐᤠ ᤁᤢᤓᤠ᤹ ᤕᤠᤱᤅᤡᤴ ᤀᤡᤱᤃᤠ᤹ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ॥

¹⁹ ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤧᤘᤠ ᤆᤥᤃᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋ ᤕᤧᤛᤢᤗᤠᤶ ᤀᤠᤳᤋᤠᤳᤋᤠᤴᤏᤣ ᤁᤢᤕᤠᤱᤛᤠᤁᤢᤴᤎᤣ᤺ᤸᤗᤧ ᤂᤡᤏᤡ᤹ ᤆᤠᤜᤠᤒᤠ ᤁᤧᤈᤥᤃᤡᤒᤠ ᤁᤠᤰ ᤐᤠ᤺ᤴᤜᤠ᤹ ᤁᤧᤳᤋᤢ᤹ ᤁᤧᤒᤡᤖᤡ᤹ᤖᤥ॥

²⁰ ᤀᤠᤸᤗ ᤀᤠᤏᤡ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤍᤠᤍᤡᤱ ᤛᤍᤠᤍᤡᤱ ᤁᤢᤔᤡᤔᤡᤍᤡᤱ ᤐᤥᤱᤗᤥ॥ ᤀᤠᤔᤧᤴ॥

ᤁᤢᤏᤢᤵᤔᤠ ᤛᤧᤘᤠ

²¹ ᤂᤧᤵᤔᤥᤒᤠ ᤂᤪᤡᤛ᤻ᤋ ᤕᤧᤛᤢᤴ ᤏᤛᤠᤴ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤛᤣᤛᤣ ᤁᤢᤔᤏᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ᤏᤢ ᤁᤵᤔᤥ ᤁᤧᤘᤠ᤹ᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧᤀᤠᤱ ᤛᤧᤘᤠ ᤁᤧᤶᤜᤠᤰᤋᤡᤀᤠᤱ ᤘᤠ᤹ᤖᤥ॥

²² ᤁᤠᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤜᤧᤰᤁᤩᤠᤱ ᤁᤢᤳᤆᤡᤀᤥ ᤛᤡᤈᤖᤗᤧ ᤁᤢᤜᤠᤱᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ. ᤛᤧᤘᤠ ᤁᤧᤶᤜᤠᤰᤋᤡ᤹ᤖᤥ॥

²³ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖᤖᤥ॥ ᤀᤠᤔᤧᤴ॥