ᤑᤡᤗᤡᤵᤐᤡ 3 - LIFOTNTᤁᤠᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤂᤪᤡᤛ᤻ᤋ 1 ᤀᤠᤸᤗ ᤁᤢᤏᤢᤵᤔᤥ. ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤍᤠᤱᤒᤠᤀᤥ ᤛ᤺ᤳᤋᤧᤶᤔᤧ᤹ᤀᤥ॥ ᤕᤠᤶᤔᤥ ᤒᤠ ᤀᤰᤂᤣᤗ᤹ᤖᤡᤰ ᤗᤳᤇᤠ ᤐᤠ᤺ᤴᤏᤡᤴ ᤛᤠᤵᤔᤠᤖ ᤏᤧᤔᤠᤃ ᤀᤠᤗᤠᤃᤡ ᤌᤣᤀᤠᤱ ᤋᤢᤰᤂᤣ ᤔᤧᤒᤥᤱᤏᤧᤴ. ᤜᤧᤰᤁᤩᤠᤱ ᤁᤸᤗᤧᤃ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤋᤠᤱᤛᤧ᤺ᤵᤗᤥ॥ 2 ᤜᤷᤍᤥ ᤜᤧᤰᤔᤠ ᤁᤧᤒᤠᤱᤒᤠᤜᤠ᤹ᤏᤢ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤁᤡᤵᤔᤠ ᤁᤧᤄᤢᤒᤠ ᤂᤩᤠᤒᤠ ᤜᤧᤰᤋᤱᤒᤠᤛᤡᤖᤥ॥ 3 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤛᤣᤔᤠᤱᤗᤠᤶ ᤛᤧᤘᤠ ᤁᤧᤈᤥ᤺ᤰᤐᤠᤜᤠ᤹ᤖᤰ ᤛᤧᤰᤂᤠ ᤜᤷᤍᤥ ᤁᤧᤜᤧᤰᤐᤠᤛᤡᤖᤥ॥ ᤀᤠᤏᤡ᤹ᤃ ᤔᤧᤴᤇᤠᤶ ᤕᤠ᤺ᤶᤒᤰᤁᤥ ᤋᤠ᤺ᤰᤐᤥ ᤀᤠᤴᤕᤢᤰᤂᤢᤶᤔᤡᤸᤗᤥ. ᤂᤧᤸᤗᤧ ᤁᤢᤗᤧᤰᤘᤠ ᤀᤠᤏᤡ᤹ ᤗᤠᤃᤡ ᤂᤪᤡᤛ᤻ᤋ ᤕᤧᤛᤢᤖᤧ ᤆᤥᤃᤢᤒᤠ ᤐᤠ᤺ᤴᤏᤥᤏᤧ ᤀᤠᤛ᤺ᤳᤗᤥ॥ 4 ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤀᤠᤒᤠᤅᤣ ᤜᤧᤰᤁᤣᤗ᤹ᤖᤡᤰ ᤋᤠ᤺ᤰᤐᤥ ᤕᤢᤱᤔᤠ ᤛᤢᤰᤋᤢᤱᤒᤡᤗᤠ॥ ᤀᤠᤳᤋᤡᤸᤗᤧ ᤔᤧᤴᤇᤠᤶ ᤕᤠ᤺ᤶᤒᤰᤁᤥ ᤋᤠ᤺ᤰᤐᤥ ᤕᤢᤱᤔᤠ ᤛᤢᤰᤋᤢᤱ ᤗ᤹ᤖᤡᤰ ᤀᤡ᤺ᤳᤋᤢ᤹. ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤡᤱᤃᤠ᤹ ᤋᤠ᤺ᤰᤐᤥ ᤕᤢᤱᤔᤠ ᤛᤢᤰᤋᤢᤱ— 5 ᤛᤠᤘᤠ᤺ᤴᤇᤡᤱᤅᤠᤱᤒᤠ ᤕᤧᤳᤇᤡ (᥎) ᤕᤧᤴᤏᤥ ᤜᤷᤍᤥ ᤔᤧᤜᤧᤃᤠᤱ ᤔᤧᤒᤡᤖᤠᤱ. ᤀᤡᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱᤒᤠ ᤒᤧᤴᤈᤠᤔᤡᤏ ᤛᤢᤘᤠᤱᤛᤔᤠ ᤀᤡᤛᤪᤠᤀᤡᤗᤡ ᤔᤏᤠᤀᤠ. ᤜᤡᤒᤪᤢᤜᤠ᤹ᤀᤥ ᤛᤠ᤹ᤖᤡᤰ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤜᤡᤒᤪᤢᤀᤠ. ᤛᤠᤶᤕᤥᤌᤡᤶ ᤀᤡ᤺ᤵᤔᤠ ᤏᤠ᤺ᤵᤔᤠᤀᤥᤃ ᤀᤡᤱᤃᤠ᤹ ᤁᤧᤏᤡᤒᤠ ᤁᤧᤗᤧᤒᤠ ᤑᤖᤡᤛᤡᤀᤠᤖᤥ 6 ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤀᤥ ᤛᤡᤰᤁᤧᤛᤶᤒᤠ ᤘᤕᤠᤱ. ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤣᤛᤣᤜᤢᤵᤗᤰᤁᤡᤴ ᤋᤢᤰᤂᤣ ᤆᤠ᤺ᤳᤋᤢᤱᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤖ ᤑᤠ᤹ᤀᤠᤱ ᤁᤠᤰ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤱᤃ ᤏᤢᤖᤡᤰᤁᤠᤱ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱ॥ 7 ᤁᤖ ᤀᤠᤳᤋᤡᤴ ᤐᤠ᤺ᤴᤜᤠ᤹ ᤀᤠᤗᤠᤃᤡ ᤀᤡᤱᤎᤠᤱᤒᤠ ᤆᤥᤃᤧ. ᤂᤧᤱᤜᤠ᤹ ᤁᤧᤖᤧᤰ ᤂᤪᤡᤛ᤻ᤋᤖᤧ ᤆᤥᤃᤢᤸᤗᤧ ᤁᤢᤔᤧᤸᤗᤢᤱ ᤔᤣ᤺ᤴᤏᤣᤒᤠ ᤀᤡ᤺ᤳᤋᤢᤱᤗᤥ॥ 8 ᤂᤧᤴᤗᤰ ᤔᤣ᤺ᤴ. ᤁᤖ ᤀᤠᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤴ ᤁᤢᤛᤡᤱ ᤏᤡ᤺ᤵᤔᤠ ᤂᤥᤔᤠᤱᤃ ᤁᤠᤰᤏᤢ᤺ᤸᤗᤧ ᤏᤢᤒᤠ ᤐᤠᤴ ᤐᤥ᤺ᤰᤂᤧᤒᤠᤸᤗᤧ ᤁᤠᤰ ᤐᤠ᤺ᤴᤜᤠ᤹ᤃ ᤜᤏᤧᤒᤠᤀᤣ ᤀᤡ᤺ᤳᤋᤢᤱᤅᤠᤱ ᤂᤢᤏᤧ᤹ ᤁᤢᤗᤠᤃᤡ ᤗᤠᤱ ᤜᤠᤰᤋᤢᤱᤍᤣᤛᤢᤱᤗᤥ॥ ᤂᤪᤡᤛ᤻ᤋᤧᤴ ᤂᤥᤔᤠ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤧᤱᤜᤠ᤹ ᤋᤠᤶᤈᤡᤖᤰ ᤀᤡ᤺ᤳᤋᤢᤱᤗᤥ॥ 9 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤂᤢᤏᤧ᤹ᤀᤡᤴ ᤐᤥᤱᤅᤠᤏᤡ ᤑᤠ᤹ᤀᤠᤱ ᤜᤧᤰᤁᤣ ᤀᤡ᤺ᤳᤋᤢᤱᤗᤥ॥ ᤀᤡᤱᤃᤠ᤹ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤅᤠᤱ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤛᤠᤶᤕᤥᤒᤠ ᤐᤥᤱᤔᤠ ᤔᤧᤴᤇᤢᤰᤐᤧᤴᤗᤥ. ᤁᤖ ᤂᤪᤡᤛ᤻ᤋᤧᤴ ᤏᤛᤠᤴ ᤆᤥᤃᤢᤱᤒᤠᤸᤗᤧᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤒᤠ ᤆᤥ᤺ᤰᤁᤠᤖᤥ॥ 10 ᤀᤡᤱᤃᤠ᤹ᤃ ᤂᤪᤡᤛ᤻ᤋᤧᤴ ᤏᤢ ᤛᤡᤔᤧᤴᤗᤠᤶ ᤕᤠᤶᤔᤥ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠ ᤔᤢᤰᤛᤠᤶᤔᤡᤴ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤏᤥᤃᤧᤴ ᤋᤢᤰᤂᤣ ᤆᤩᤧᤒᤠ ᤜᤧᤰᤁᤣ ᤀᤡᤱᤃᤠ᤹ᤀᤠᤱ ᤋᤢᤰᤂᤣ ᤆᤠᤔᤠᤀᤠᤱ ᤁᤢᤛᤡᤔᤧᤴᤏᤥ ᤛᤥᤖᤡᤰ ᤐᤥᤱᤔᤠ ᤏᤡᤱᤘᤠ᤹ ᤆᤥᤃᤢᤱ. 11 ᤜᤧᤰᤁᤩᤠᤱ ᤀᤠᤰᤂᤣᤗ᤹ᤖᤡᤰᤛᤠᤱ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤱᤃ ᤂᤥᤔᤠ ᤛᤢᤰᤋᤢᤱᤗ ᤁᤧᤗ᤹ᤒᤠ ᤏᤡᤱᤛᤠᤱ ᤁᤳᤋᤢᤱᤗᤥ॥ ᤋᤠᤖᤵᤐᤥ ᤋᤃᤡ ᤐᤥᤔᤠ 12 ᤀᤡᤱᤃᤠ᤹ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤥᤛᤢᤱ ᤀᤡᤃᤪ ᤁᤢᤛᤠᤱ ᤗᤛ᤻ᤛᤢᤱ ᤛᤢᤖᤢᤱᤅᤠᤱ ᤘᤠ᤹ᤀᤠ ᤁᤧᤗ᤹ᤒᤠᤃ ᤔᤣ᤺ᤴᤗᤥ. ᤁᤖ ᤀᤡᤱᤃᤠ᤹ᤃ ᤁᤴ ᤐᤠ᤺ᤴᤜᤠ᤹ ᤂᤥᤔᤠ ᤑᤠ᤹ᤀᤠᤱ ᤋᤃᤡ ᤐᤥᤀᤠᤖ ᤐᤳᤋᤠᤖᤥ. ᤌᤣᤀᤠᤱᤓᤧᤸᤗᤧ ᤒᤠ ᤂᤧᤸᤗᤧ ᤗᤠᤃᤡ ᤂᤪᤡᤛ᤻ᤋ ᤕᤧᤛᤢᤖᤧ ᤋᤠᤱᤛᤧ᤺ᤵᤋᤠᤱᤒᤠᤖᤥ॥ 13 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ᤃ ᤀᤠᤸᤗᤛᤠᤱ ᤁᤠᤰ ᤐᤠ᤺ᤴᤜᤠ᤹ ᤔᤧᤱᤄᤥᤀᤣ ᤘᤠ᤹ᤀᤠᤖᤥ॥ ᤁᤖ ᤀᤡᤱᤃᤠ᤹ ᤗᤳᤇᤠ ᤕᤠ᤺ᤶᤒᤰᤁᤡᤴ ᤆᤥᤃᤢᤱ—ᤐᤣᤕᤧᤶᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤑᤣ᤺ᤳᤇᤢᤱᤅᤠᤱ ᤀᤡᤱᤃᤠ᤹ᤃ ᤋᤃᤡ ᤗᤧᤵᤔᤠᤱᤏᤧ ᤗᤢᤒᤢᤒᤢ ᤐᤥᤀᤠᤖᤥ॥ 14 ᤂᤧᤸᤗᤧᤆᤥᤃᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤛᤧᤶᤔᤡᤴ ᤂᤥᤔᤠ ᤑᤠ᤹ᤀᤠᤱ ᤋᤃᤡ ᤐᤥᤀᤠᤖ ᤐᤳᤋᤠᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤸᤗᤧ ᤗᤠᤃᤡᤀᤣ ᤂᤪᤡᤛ᤻ᤋ ᤕᤧᤛᤢᤗᤠᤶᤒᤠ ᤀᤢ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ 15 ᤀᤠᤏᤡ᤹ ᤁᤠᤰ ᤏᤛᤠ᤺ᤴᤏᤥ ᤁᤢᤏᤡᤱᤘᤠ᤹ ᤁᤧᤍᤢᤶᤒᤠᤜᤠ᤹ᤖᤧᤃ ᤀᤰᤋᤱᤒᤠ ᤐᤠ᤺ᤴᤜᤠ᤹ᤀᤥ ᤋᤧᤴᤍᤡᤱ ᤆᤥ᤺ᤰᤔᤠ ᤐᤥᤱᤗᤥ॥ ᤜᤧᤰᤁᤩᤠᤱ ᤘᤣ᤹ ᤐᤖᤡᤰᤗᤧ ᤁᤧᤀᤡ᤺ᤳᤋᤢᤶᤏᤧ ᤑᤠ᤹ᤃᤪ ᤂᤧᤴᤏᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤏᤢᤖᤡᤰᤁᤠᤱ ᤀᤥᤛᤣ᤺ᤴᤃᤧᤎᤠᤰᤋᤡ᤹ᤖᤥ॥ 16 ᤁᤖ ᤀᤠᤸᤗᤥ ᤌᤠᤖᤡᤰ ᤌᤣ ᤏᤛᤠᤴ ᤀᤠᤈᤥᤃᤢᤶᤔᤠᤱ ᤀᤠᤘᤠ᤹ ᤂᤧᤵᤔᤥᤀᤣ ᤔᤧᤶᤔᤢᤴᤏᤣ ᤘᤕᤡᤖᤥ॥ 17 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤜᤡᤱᤅᤠᤒᤠ ᤁᤢᤀᤡᤛᤡᤰ ᤀᤠᤈᤥ᤺ᤱ ᤁᤧᤀᤡ᤺ᤵᤐᤠ ᤐᤥ᤺ᤰᤂᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤕᤠᤵᤔᤡ ᤁᤧᤍᤡᤶᤒᤠᤜᤠ᤹ᤖᤧ ᤂᤢᤏᤡ᤹ ᤜᤡᤱᤔᤴᤏᤥᤗᤠᤶ ᤜᤢ᤹ᤛᤡᤱᤅᤧᤶᤔᤧ᤹ᤀᤥ 18 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤕᤖᤡᤰᤗᤧᤱ ᤔᤧᤳᤏᤡᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤕᤠᤶᤔᤥᤀᤠᤱ ᤀᤠᤔᤡᤰᤘᤠ ᤌᤠᤛᤢᤱᤗ ᤔᤧᤳᤏᤡᤱ. ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤧᤵᤗᤧᤰᤁᤡᤸᤗᤧᤀᤣ ᤂᤧᤱᤜᤠ᤹ ᤂᤪᤡᤛ᤻ᤋᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤸᤗᤧ ᤁᤢᤏᤡᤱᤔᤡᤛᤡ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤋᤢᤛᤡ᤹ᤖᤥ॥ 19 ᤁᤢᤏᤢᤵᤔᤥ ᤂᤧᤱᤜᤠ᤹ ᤔᤧᤔᤧᤰᤗᤥ. ᤂᤧᤱᤜᤠ᤹ᤖᤧ ᤕᤠᤶᤍᤠᤍᤠ ᤏᤢ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤆᤥ᤺ᤰᤔᤠᤴᤏᤣ ᤂᤢᤏᤡ᤹ ᤔᤠᤱᤗᤥ. ᤂᤢᤏᤡ᤹ ᤛᤡᤖᤡᤱᤔ᤺ᤔᤠ ᤐᤠ᤺ᤴᤜᤠ᤹ᤀᤥ ᤂᤧᤱᤜᤠ᤹ ᤀᤠᤱᤍᤡᤱ ᤔᤧᤗ᤹ᤖᤥ॥ ᤂᤧᤱᤜᤠ᤹ᤖᤧᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ᤀᤥᤖᤰ ᤂᤢᤏᤡ᤹ ᤏᤡᤱᤘᤠ᤹ ᤔᤧᤒᤡᤖᤢᤀᤠᤱ ᤘᤠ᤹ᤖᤥ॥ 20 ᤁᤖ ᤀᤠᤏᤡ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤕᤰᤕᤢᤱᤒᤠᤛᤡᤖᤥ. ᤜᤧᤰᤁᤩᤠᤱ ᤀᤠᤏᤡ᤹ᤃ ᤂᤧᤵᤔᤥᤗᤠᤶ ᤁᤧᤕᤢᤒᤠ ᤛᤧᤴᤗᤵᤍᤠᤱᤒᤠ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤛᤡᤰᤛᤶᤔᤠᤱ ᤀᤠᤜᤠᤱᤄᤢᤶᤗᤥ॥ 21 ᤂᤢᤏᤧ᤹ᤀᤣ ᤁᤠᤰ ᤐᤠ᤺ᤴᤜᤠ᤹ ᤁᤢᤕᤢᤰᤁᤥ ᤁᤵᤔᤠ ᤔᤢᤰᤛᤠᤶ ᤁᤳᤋᤢ᤹. ᤜᤧᤰᤁᤩᤠᤱ ᤒᤠ ᤂᤧᤴ ᤔᤢᤰᤛᤠᤶᤔᤡᤸᤗᤧ ᤀᤠᤏᤡ᤹ ᤆᤵᤗᤧᤰᤘᤠ ᤏᤠᤛᤡᤱᤃᤧᤴ ᤌᤰᤁᤡᤴ ᤔᤡᤔᤡᤍᤡᤱᤃᤧᤴ ᤁᤢᤎᤰᤁᤡᤴ ᤁᤢᤀᤡᤛᤡᤰ ᤗᤧᤰᤂᤢ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.