ᤑᤡᤗᤡᤵᤐᤡ 2 - LIFOTNTᤂᤪᤡᤛ᤻ᤋᤖᤧ ᤁᤢᤏ᤺ᤶᤏᤶ ᤗ᤹ᤔᤠᤴ 1 ᤂᤪᤡᤛ᤻ᤋᤧᤴᤏᤢ ᤌᤡᤰᤜᤢᤵ ᤁᤧᤒᤥ᤺ᤰᤂᤡᤒᤠᤗᤠᤶ ᤜᤠᤱᤜᤠᤱ ᤁᤧᤗ᤹ᤖᤡ᤹. ᤂᤢᤏᤧ᤹ ᤁᤢᤔᤡ᤺ᤶᤈᤡᤗᤠᤶ ᤛᤰᤔᤠ ᤁᤧᤳ. ᤛᤣᤛᤣᤔᤠᤱᤅᤡᤴᤏᤢ ᤋᤱᤈᤢᤶᤔᤥ ᤁᤧᤘᤕᤡ᤹. ᤂᤡᤏᤡ᤹ ᤛᤡᤰᤗᤢᤱᤔᤥᤗᤠᤶ ᤗᤢᤱᤔᤠ᤹ ᤁᤧᤍᤢᤰᤁᤠᤛᤡᤒᤠᤸᤗᤧ ᤆᤥᤃᤢᤸᤗᤧ 2 ᤏᤡᤱᤘᤠ᤹ ᤁᤧᤍᤱᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤗᤳᤇᤠ ᤔᤡ᤺ᤶᤈᤡᤀᤥ. ᤗᤳᤇᤠ ᤏᤡᤱᤘᤠ᤹ᤀᤥ ᤏᤢ ᤗᤳᤇᤠ ᤏᤡᤱᤘᤠ᤹ᤛᤥᤰᤁᤥ ᤘᤕᤧᤶᤔᤧ᤹ᤖ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤋᤠᤛᤧᤶᤔᤧ᤹ᤀᤥ॥ 3 ᤂᤰᤂᤫᤠ ᤏᤡᤱᤘᤠ᤹ ᤏᤢ ᤀᤠᤱᤍᤡᤱ ᤗ᤹ᤔᤠᤗᤠᤶ ᤌᤣᤀᤠᤱ ᤔᤧᤈᤥᤃᤧᤶᤔᤡᤴᤏᤧ᤹. ᤁᤖ ᤆᤢᤱᤈᤡᤃᤧᤴ ᤏ᤺ᤶᤛᤡᤱᤔᤠᤗᤠᤶ ᤘᤣ᤹ᤜᤠ᤹ ᤀᤠᤵᤑᤣᤰᤏᤢ᤺ᤸᤗᤧᤀᤠᤱ ᤁᤧᤕᤧᤰᤐᤠ ᤀᤡ᤺ᤳᤋᤧᤶᤛᤡᤶᤔᤧ᤹ᤀᤥ॥ 4 ᤂᤡᤏᤡ᤹ ᤀᤠᤒᤠᤅᤣ ᤏᤢ᤹ᤔᤠ ᤋᤠᤔᤠᤴᤗᤰ ᤔᤣ᤺ᤴ. ᤁᤖ ᤘᤣ᤹ᤜᤠ᤹ᤖᤧ ᤂᤢᤏᤡ᤹ ᤏᤢ᤹ᤔᤠ ᤋᤠᤔᤠᤴᤏᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ 5 ᤂᤪᤡᤛ᤻ᤋ ᤕᤧᤛᤢᤖᤧ ᤏᤡᤱᤘᤠ᤹ ᤀᤡ᤺ᤳᤋᤢᤒᤠ ᤜᤧᤰᤁᤣ ᤂᤡᤏᤡ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ 6 ᤂᤪᤡᤛ᤻ᤋᤧᤴ ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤔᤠᤱ ᤘᤕᤧ. ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤢᤍᤱᤒᤠ ᤐᤥᤱᤔᤠᤀᤠᤱ ᤘᤠ᤹ᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴᤗᤥ॥ 7 ᤂᤧᤸᤗᤧ ᤁᤢᤗᤧᤰᤘᤠ ᤂᤢᤏᤧ᤹ ᤌᤣᤀᤠᤱ ᤔᤣ᤺ᤴᤏᤣᤒᤠ ᤆᤥ᤺ᤰᤛᤡᤱᤅᤠᤱ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡ᤺ᤰᤐᤠ ᤛᤧᤘᤠᤖᤥᤒᤠ ᤐᤥ᤺ᤰᤂᤧᤖᤥ॥ 8 ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡᤰ ᤘᤕᤧᤸᤗᤧ ᤂᤢᤏᤧ᤹ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤃᤧᤶᤒᤠ ᤐᤥ᤺ᤰᤂᤧᤀᤠᤱ ᤁᤢᤓᤠᤱ ᤁᤧᤓᤣ᤺ᤶᤒᤠ ᤁᤢᤀᤡᤛᤡᤰ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤛᤩᤧᤖᤥ॥ 9 ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤠᤰᤏᤢ᤺ᤸᤗᤧ ᤌᤥᤛᤢᤃᤧᤴ ᤕᤢᤱᤍᤧᤴᤏᤥ ᤕᤢᤰᤂᤢᤀᤠᤱ ᤘᤣ᤹ ᤔᤡᤱᤜᤠ᤹ᤏᤢ᤺ᤸᤗᤧᤀᤠᤱ ᤕᤶᤒᤠ ᤔᤡᤱᤛᤥ ᤀᤡᤱᤎᤠᤱᤒᤠ ᤔᤡᤱ ᤐᤡᤖᤢᤖᤥ॥ 10 ᤜᤧᤰᤁᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤏᤢ ᤂᤠᤶᤒᤣ᤺ᤰᤔᤥᤒᤠ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤛᤡᤃᤠᤱ ᤁᤧᤘᤠ᤹ᤒᤠᤜᤠ᤹ ᤁᤧᤖᤧᤰᤗᤧ ᤕᤧᤛᤢᤖᤧ ᤁᤢᤔᤡᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠᤖᤧ ᤗᤠᤃᤡ ᤌᤢᤱᤒᤥ ᤔᤧᤗᤣ᤺ᤳᤋᤢ᤹ᤖᤥ॥ 11 ᤕᤧᤛᤢ ᤂᤪᤡᤛ᤻ᤋᤧᤴᤏᤣ ᤍᤠᤱᤒᤠ ᤗ᤹ᤖᤡᤰ ᤁᤧᤖᤧᤰᤗᤧ ᤔᤧᤒᤠ᤺ᤳᤋᤢ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤱᤛᤥ ᤀᤡᤱᤎᤠᤱ ᤂᤥᤛᤢ᤹ᤖᤥ॥ ᤀᤥ᤺ᤳᤋᤡ ᤜᤧᤰᤁᤣ ᤗᤧᤰᤔᤠ 12 ᤂᤧᤸᤗᤧᤆᤥᤃᤢᤸᤗᤧ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤕᤠᤱᤅᤡᤸᤗᤧ ᤛᤍᤠᤍᤡᤱ ᤀᤡᤱᤈᤠᤱᤃᤧᤶᤒᤠ ᤁᤧᤘᤕᤡᤒᤠ ᤜᤧᤰᤁᤣ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤜᤥ᤺ᤵᤐᤠᤛᤠᤱ ᤀᤡᤱᤈᤠᤱᤃᤧᤶᤒᤠ ᤐᤥᤱᤔᤠ ᤀᤠᤸᤗᤛᤠᤱ ᤁᤧᤕᤧᤰᤐᤠ ᤆᤥᤰᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡᤛᤧᤶᤔᤧ᤹ᤖ ᤁᤧᤄᤥᤛᤢᤶᤒᤠ ᤛᤧᤴᤗᤵᤐᤡᤴ ᤁᤢᤗᤡᤱᤍᤥ ᤁᤧᤳᤋᤧᤶᤔᤧ᤹ᤀᤥ॥ 13 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤡᤱᤈᤠᤱᤃᤧᤶᤒᤠ ᤁᤧᤒᤥ᤺ᤰᤂᤡᤖ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤂᤢᤏᤧ᤹ᤀᤣ ᤂᤡᤏᤡ᤹ᤀᤥ ᤕᤠ᤺ᤶᤒᤰ ᤆᤥᤃᤢᤖ ᤘᤠ᤹ᤖᤥ॥ 14 ᤁᤠᤰ ᤐᤠ᤺ᤴᤜᤠ᤹ ᤗᤢᤱᤔᤧᤴᤜᤠ᤺ᤳᤋᤣ ᤏᤢ ᤐᤠ᤺ᤴᤎᤱ ᤔᤧᤴᤈᤥ᤺ᤰᤁᤣ ᤆᤥᤃᤧᤶᤔᤧ᤹॥ 15 ᤜᤧᤰᤁᤩᤠᤱ ᤂᤡᤏᤡ᤹ᤃ ᤛᤣᤛᤣ ᤏᤢ ᤑᤥᤋᤩᤠ ᤔᤣ᤺ᤴᤏᤣᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ ᤁᤧᤒᤥ᤺ᤰᤂᤡ᤹. ᤜᤧᤰᤁᤩᤠᤱ ᤁᤴ ᤀᤡᤰᤛᤠᤒᤠ ᤋᤠᤰᤁᤧᤓᤧ᤹ᤒᤠ ᤏᤢ ᤗᤠᤕᤥᤒᤠ ᤔᤏᤠᤜᤠ᤹ᤏᤢ ᤁᤧᤘᤕᤡᤸᤗᤧ ᤂᤠᤔᤠᤰᤗᤢᤶᤔᤥ ᤁᤧᤀᤥ᤺ᤵᤐᤠ ᤀᤥ᤺ᤳᤋᤡᤜᤠ᤹ ᤁᤢᤀᤡᤛᤡᤰ ᤂᤧᤱᤜᤠ᤹ ᤗᤢᤶᤔᤥ ᤁᤧᤀᤥ᤺ᤳᤋᤡ᤹ᤖᤥ॥ 16 ᤜᤧᤰᤁᤩᤠᤱ ᤜᤡᤱᤔᤴ ᤁᤧᤒᤡᤒᤠ ᤐᤠ᤺ᤴᤈᤠᤰᤁᤡᤴ ᤗᤡᤱᤒᤡᤳᤋᤠᤱ ᤏᤛᤠᤴ ᤆᤥᤃᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤪᤡᤛ᤻ᤋᤖᤧ ᤁᤢᤏᤢ᤺ᤱᤔᤠ ᤕᤢᤔᤠ ᤕᤧᤴᤏᤥ ᤂᤡᤏᤡ᤹ ᤗᤠᤃᤡ ᤀᤡᤱᤃᤠ᤹ ᤆᤥᤃᤢᤱᤒᤠ ᤕᤠᤶᤒᤢᤎᤡᤰᤐᤠ ᤕᤠ᤺ᤶᤒᤰᤜᤠ᤹ ᤆᤠᤔᤧᤛᤥ᤺ᤰᤋᤧᤴᤒᤠ ᤐᤠ᤺ᤴᤏᤡᤴ ᤏᤡᤔᤠ ᤛᤢᤰᤋᤢᤱᤗᤥ॥ 17 ᤍᤠᤱᤒᤠᤀᤥᤒᤠ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤏᤢ ᤛᤣᤛᤣ ᤔᤠᤱᤛᤣᤘᤠ᤺ᤱᤃ ᤁᤧᤍᤥ᤺ᤴᤍᤢᤶᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤆᤥᤰᤗᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤜᤡᤱᤔᤴᤏᤡᤴ ᤂᤧᤴ ᤛᤡᤍᤢᤱᤈᤓᤠᤀᤥ ᤕᤥ᤹ᤔᤠ ᤐᤥᤱᤛᤠᤱ ᤀᤡᤱᤃᤠ᤹ ᤀᤥᤔᤢ ᤗ᤹ᤀᤠ. ᤜᤧᤰᤁᤩᤠᤱ ᤂᤡᤏᤡ᤹ᤏᤢᤀᤣ ᤛ᤺ᤳᤋᤠᤖᤥ॥ 18 ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ᤀᤠᤱ ᤀᤥᤔᤢ ᤗ᤹ᤖᤧᤶᤔᤧ᤹ᤖ ᤀᤡᤱᤃᤠ᤹ᤏᤢ ᤛ᤺ᤳᤋᤧᤶᤔᤧ᤹ᤀᤥ॥ ᤐᤠᤘᤗᤖᤧ ᤋᤡᤔᤥᤌᤡᤖᤧ ᤁᤢᤏᤡᤛᤢᤶ ᤆᤥᤃᤢ᤹ 19 ᤍᤠᤱᤒᤠ ᤕᤧᤛᤢᤖᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤐᤥᤱᤏᤧ ᤑᤠ᤹ᤃᤪ ᤂᤡᤏᤡ᤹ᤀᤥ ᤜᤠᤖᤠᤀᤣ ᤋᤡᤔᤥᤌᤡᤴ ᤐᤠᤱᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤡᤱᤄᤱᤅᤡᤴ ᤂᤧᤵᤛᤢᤱᤅᤡᤸᤗᤧ ᤜᤠᤱᤜᤠᤱ ᤗ᤹ᤀᤠᤖᤥ॥ 20 ᤛᤧᤰᤂᤠᤀᤣ ᤂᤡᤏᤡ᤹ ᤁᤧᤏᤢ᤺ᤖᤡ ᤁᤧᤍᤠᤛᤡᤖ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤵᤐᤠ ᤔᤏᤠ ᤂᤢᤏᤧ᤹ᤏᤢ᤺ᤸᤗᤧ ᤘᤣ᤹ ᤀᤡᤱᤃᤠ᤹ᤏᤢ ᤜᤠ᤺ᤳᤋᤠᤱ ᤜᤥᤵᤗᤥ. 21 ᤌᤣᤀᤠᤱᤓᤧᤸᤗᤧ ᤁᤧᤖᤧᤰᤗᤧ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤒᤠ᤺ᤴᤏᤡᤱᤃ ᤔᤣ᤺ᤴ. ᤁᤖ ᤀᤠᤒᤠᤅᤣ ᤐᤠ᤺ᤴᤗᤰ ᤔᤧᤃᤥ᤺ᤳᤋᤢ᤹ᤖᤥ॥ 22 ᤁᤖ ᤂᤢᤏᤧ᤹ ᤀᤠᤰᤂᤧᤴ ᤗᤠ᤹ᤖᤢᤒᤠ ᤔᤏᤠ ᤆᤥᤰ ᤁᤧᤗ᤹ᤒᤠᤴ ᤂᤡᤏᤡ᤹ ᤁᤧᤏᤡᤛᤢᤶᤔᤣᤖᤥ॥ ᤁᤢᤛ᤻ᤛᤠ᤺ᤸᤗᤧ ᤁᤢᤶᤒᤠ᤺ᤴᤏᤢ ᤕᤠ᤺ᤶᤒᤰ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤀᤡᤱᤃᤠ᤹ᤏᤢ ᤛᤢᤏᤠᤀᤡᤱ ᤀᤡᤱᤓᤥᤔᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹ᤖᤥ॥ 23 ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ᤏᤢ ᤌᤣᤎᤣ ᤐᤥᤱᤅᤡ. ᤂᤧᤴ ᤀᤡᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱᤏᤠᤔᤧ᤺ᤴᤏᤣ. ᤋᤡᤔᤥᤌᤡᤴ ᤂᤡᤏᤡ᤹ᤀᤥ ᤐᤠᤱᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ 24 ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤐᤥᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤀᤠᤒᤠᤅᤣ ᤂᤡᤏᤡ᤹ᤀᤥ ᤜᤠᤖᤠᤀᤣ ᤋᤠᤀᤠ ᤁᤧᤗ᤹ᤒᤠᤴ ᤏᤡᤛ᤻ᤛᤣᤀᤣ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ ᤐᤠᤘᤗᤖᤧ ᤀᤡᤐᤠᤑᤪᤥᤍᤡᤋᤛᤖᤧ ᤁᤢᤏᤡᤛᤢᤶ ᤆᤥᤃᤢ᤹ 25 ᤁᤖ ᤀᤠᤸᤗᤥᤃ ᤀᤡᤐᤠᤑᤪᤥᤍᤡᤋᤛᤧᤴ ᤂᤡᤏᤡ᤹ᤀᤥ ᤕᤠᤱᤏᤠ ᤐᤠᤱᤔᤠ ᤁᤧᤕᤧᤰᤐᤠ ᤏᤡᤛᤢᤱᤗᤥ॥ ᤀᤠᤴᤇᤡᤃᤣ ᤛᤥᤖᤡᤰ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥᤃᤢᤛᤡᤃᤧ. ᤜᤧᤰᤁᤩᤠᤱ ᤛᤢᤏᤠᤀᤡᤱ ᤛᤧᤔᤠ ᤌᤱᤅᤡᤴᤏᤠᤱ ᤛᤥᤛᤥᤖᤡᤰ ᤌᤰᤋᤧᤛᤡᤃᤧ॥ ᤂᤢᤏᤧ᤹ᤃ ᤀᤡᤱᤃᤠ᤹ ᤁᤢᤓᤠ᤹ ᤐᤡᤛᤧ ᤁᤧᤒᤠᤱᤄᤢᤶᤒᤠ ᤂᤡᤏᤡ᤹ ᤀᤡᤱᤛᤠᤒᤠᤖᤥ॥ 26 ᤂᤢᤏᤧ᤹ ᤁᤢᤕᤠᤶ ᤋᤢᤃᤧᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤄᤧᤵᤛᤢᤶᤒᤠᤀᤥ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤗᤢᤱᤔᤠ᤹ ᤕᤥ᤺ᤴᤍᤧᤀᤠᤱ ᤂᤡᤏᤡ᤹ ᤋᤢᤶᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤠ᤹ᤖᤥ॥ 27 ᤏᤡᤛ᤻ᤛᤣᤀᤣ ᤂᤢᤏᤧ᤹ ᤛᤠ᤹ᤖᤡᤰ ᤋᤢᤃᤧᤀᤠᤱ ᤂᤵᤔᤧᤴ ᤛᤩᤧ. ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤖᤰ ᤔᤣ᤺ᤴ. ᤁᤖ ᤀᤡᤱᤃᤠ᤹ᤀᤠᤱ ᤀᤠᤸᤗᤛᤠᤱ ᤛᤠ᤹ᤖᤡᤰ ᤋᤢᤰᤂᤣᤀᤥ ᤔᤧᤎᤠᤀᤠᤴᤗ ᤑᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤠᤱᤗᤥ॥ 28 ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤡᤏᤡ᤹ᤀᤥ ᤐᤠᤱᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤁᤧᤏᤡᤛᤢᤶᤔᤠᤱ ᤁᤧᤛ᤺ᤳᤋᤡ᤹. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤀᤠᤏᤡᤱᤘᤠ᤹ᤀᤡᤴ ᤕᤠᤱᤕᤠᤱ ᤐᤥᤱᤗᤥ॥ 29 ᤂᤢᤏᤧ᤹ ᤍᤠᤱᤒᤠᤀᤥ ᤛ᤺ᤳᤋᤧᤶᤔᤧᤖ ᤗᤠᤱᤍᤠ᤺ᤰᤋᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ ᤜᤧᤰᤋᤱᤒᤠ ᤔᤏᤠᤜᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤶᤛᤡᤶᤔᤧ᤹ᤀᤥ. 30 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤠᤗᤠᤃᤡ ᤐᤡᤔᤠ ᤁᤧᤴᤇᤢᤰᤋᤢᤶᤔᤡᤴᤒᤠ ᤁᤢᤓᤠ᤹ᤀᤡᤴ ᤂᤢᤏᤧ᤹ ᤐᤡᤖᤠᤱᤅᤡᤸᤗᤧ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤰᤗᤧ ᤗᤠᤃᤡ ᤂᤢᤏᤧ᤹ ᤂᤵᤔᤧᤴ ᤛᤩᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.