ᤂᤠᤏᤡ᤺ᤳ 9 - LIFOTNTᤆᤥ᤺ᤰᤕᤢᤶᤓᤥ ᤋᤱᤏᤠᤶ 1 ᤂᤧᤱᤜᤠ᤹ ᤔᤡᤛᤪᤗᤠᤶ ᤔᤧᤗ᤺ᤴᤍᤧ ᤔᤧᤓᤧᤖᤧᤒᤠ ᤏᤡᤛᤡᤃᤣᤰᤐᤠ ᤋᤱᤒᤣ ᤁᤧᤖᤧᤒᤠ ᤌᤡᤰᤛᤡᤃᤣᤰᤐᤠ ᤗᤠᤀᤥ ᤛᤡᤏᤤᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤰᤂᤣ ᤔᤧᤳᤋᤢᤀᤠᤱ ᤐᤠᤖᤧ 2 “ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤶᤔᤥ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶ ᤔᤧᤍᤥᤛᤢᤖ॥ 3 ᤀᤠᤶᤓᤠ ᤁᤴ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤗᤡᤛᤡ ᤕᤧᤴᤏᤥᤒᤠ ᤕᤢ᤺ᤴᤇᤡᤰ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤶᤔᤥ ᤂᤡᤏᤡ᤹ ᤁᤴ ᤋᤥᤛᤧᤶᤔᤧ᤹॥ ᤂᤧᤸᤗᤧ ᤗᤠᤃᤡ ᤁᤧᤖᤧᤰ ᤌᤡᤶ ᤏᤢ ᤔᤢᤏᤧ᤺ᤳ ᤁᤢᤀᤡᤛᤡᤰ ᤂᤡᤏᤡ᤹ ᤋᤥᤛᤧᤶᤔᤧ᤹॥” 4 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤔᤧᤍᤥᤛᤢᤖ ᤑᤠ᤹ᤀᤠᤱ ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤢᤛᤡ॥ 5 ᤂᤧᤱᤜᤠ᤹ᤖᤧ ᤛᤡᤏᤤᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤌᤡᤰᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰ ᤕᤢ᤺ᤴᤇᤡᤰ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶ ᤔᤧᤍᤥᤛᤢ॥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤐᤡᤖᤢᤒᤠ ᤁᤧᤖᤧᤰ ᤀᤡᤱᤈᤠᤱ ᤁᤢᤀᤡᤛᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤈᤥᤃᤢ॥ 6 ᤁᤖ ᤔᤏᤠ ᤁᤧᤛᤡᤒᤠ ᤆᤣ᤺ᤴ ᤔᤧᤛᤢᤛᤢᤀᤠᤱ ᤀᤠᤛᤢᤳᤌᤥ ᤁᤧᤒᤥᤱᤒᤠ ᤕᤖᤡᤰᤋᤱᤒᤠ ᤔᤏᤠᤜᤠ᤹ ᤔᤧᤘᤕᤧ. ᤂᤧᤱᤜᤠ᤹ᤖᤧ ᤂᤧᤸᤗᤧ ᤕᤠ᤺ᤴᤍᤡᤰ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤋᤥᤔᤠ ᤔᤧᤴᤇᤢᤰᤋᤢᤴ॥ ᤂᤧᤱᤜᤠ᤹ ᤀᤠᤶᤓᤠ ᤂᤧᤸᤗᤧ ᤕᤠ᤺ᤴᤍᤡᤰ ᤔᤥᤛᤠᤴ ᤏᤢ ᤜᤠᤖᤢᤏᤧᤸᤗᤧ ᤂᤢᤴᤇᤡ᤹ ᤐᤣᤛᤠᤱ ᤔᤧᤍᤩᤧ॥ 7 ᤂᤧᤴ ᤔᤏᤠᤜᤠ᤹ᤖᤧ ᤔᤥᤛᤠᤴ ᤔᤧᤔᤧᤳᤋᤢ. “ᤁᤧᤛᤡᤒᤠ ᤔᤏᤠ᤺ᤸᤗᤧ ᤁᤢᤈᤣᤴ ᤀᤠᤏᤡᤃᤣ ᤛᤢᤛᤢᤶᤒᤧᤀᤠᤱ ᤀᤠᤛᤢᤳᤌᤥ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧ॥ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤴᤏᤥ ᤀᤠᤏᤡᤃᤣ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤥᤛᤥᤖᤡᤰ ᤕᤜᤘᤣ ᤍᤠᤱᤒᤠᤀᤥ ᤀᤠᤏᤡᤃᤣ ᤛᤡᤍᤢᤱᤈᤓᤠᤴ ᤌᤣᤀᤠᤱ ᤋᤥ᤺ᤶᤔᤠ ᤔᤧᤄᤥᤛᤢᤶᤒᤧᤴᤒᤠᤒᤣ᥅” 8 ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤵᤑᤠ ᤜᤠᤱᤄᤧᤶᤔᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤌᤧᤔᤠ ᤀᤡᤱᤈᤠᤱ ᤁᤧᤒᤡᤖᤡ᤹. ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱᤗ॥” 9 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 10 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤂᤡᤏᤡ᤹ ᤜᤡᤶᤛᤕᤱᤅᤥ ᤔᤏᤠ ᤁᤧᤛᤡᤒᤠ ᤆᤣ᤺ᤴ ᤁᤢᤓᤠ ᤔᤏᤠ᤺ᤸᤗᤧ ᤛᤢᤛᤢᤀᤠᤱ ᤀᤠᤛᤢᤳᤌᤥ ᤐᤥ᤺ᤰᤂᤧᤀᤠᤱ ᤘᤠ᤹. ᤀᤡᤃᤪ ᤔᤠ᤺ᤱᤄᤠ ᤔᤠ᤺ᤱᤄᤠ ᤘᤣ᤹ ᤗᤠᤈᤣ᤹ ᤐᤣᤀᤠᤱ ᤘᤠ᤹ᤛᤠᤱ ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤈᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤡᤴ ᤋᤥᤛᤢᤖ ᤐᤥᤱ᤹॥ 11 ᤏᤡᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤗᤡᤛᤡ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰ ᤕᤢ᤺ᤴᤇᤡᤰ ᤂᤧᤱᤜᤠ᤹ᤖᤧ ᤁᤴ ᤔᤧᤍᤥᤛᤢᤖ॥ ᤂᤧᤱᤜᤠ᤹ᤖᤧ ᤔᤧᤸᤗᤢᤰᤛᤠ᤺ᤳ. ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤔᤏᤠᤒᤠ ᤂᤖᤧ᤺ᤱ ᤏᤢ ᤁᤧᤄᤡ᤺ᤰᤐᤠ ᤏᤢᤎᤡᤀᤠᤱ ᤔᤧᤈᤖ॥ 12 ᤂᤧᤱᤜᤠ᤹ᤖᤧ ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶ ᤌᤠᤖᤡᤰ ᤂᤧᤴᤗᤠᤶᤒᤠ ᤁᤢᤓᤠ ᤌᤣᤀᤠᤱ ᤔᤧᤴᤏᤴᤇᤢᤴᤗ॥ ᤂᤧᤸᤗᤧ ᤀᤠᤳᤋᤡᤴ ᤁᤢᤕᤧᤵᤐᤠᤴᤏᤠᤱ ᤔᤧᤴᤀᤧᤰᤂᤢᤴᤗ॥ ᤆᤥ᤹ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤒᤠ ᤁᤧᤖᤧᤰ ᤌᤡᤶ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤔᤧᤍᤥᤛᤢᤖ॥ 13 ᤁᤖ ᤀᤠᤳᤋᤡᤴ ᤔᤏᤠᤴ ᤛᤢᤳᤌᤥ ᤆᤥᤰ. ᤜᤧᤰᤁᤩᤠᤱ ᤗᤠᤶᤍᤡ᤺ᤰᤁᤥᤀᤠᤱ ᤜᤥᤵ. ᤂᤧᤸᤗᤧ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤔᤧᤍᤥᤛᤢᤴᤏᤧᤓᤃᤪ ᤂᤧᤴ ᤔᤏᤠᤴ ᤁᤢᤔᤏᤠᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤖ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤢᤏᤧ᤹ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤴ॥ ᤂᤧᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤁᤢᤗᤠᤕᤥᤸᤗᤧ ᤂᤢᤶᤍᤡᤱ ᤂᤥᤛᤢᤖ॥ 14 “‘ᤂᤡᤏᤡ᤹ ᤗᤢᤶᤔᤥ ᤁᤢᤓᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤴ ᤕᤢᤱ. ᤜᤧᤰᤁᤩᤠᤱ ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤋᤥᤔᤠ ᤏᤡᤱᤘᤠ᤹ ᤆᤥᤃᤢᤏᤧᤓᤃᤪ. ᤂᤧᤸᤗᤧ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤒᤠ ᤌᤡᤶ ᤏᤢ ᤛᤠᤰᤌᤡᤶ ᤁᤢᤀᤡᤛᤡᤰ ᤂᤧᤸᤗᤧ ᤋᤥᤛᤢᤖ॥ ᤘᤣ᤹ ᤗᤠᤈᤣ᤹ᤒᤠ ᤏᤢ ᤀᤠᤵᤑᤣᤰ ᤗᤠᤈᤣ᤹ᤒᤠ ᤔᤏᤠᤖᤧ ᤗᤠᤃᤡ ᤂᤡᤏᤡ᤹ ᤗᤳᤇᤠ ᤌᤡᤶ ᤁᤵᤔᤠ ᤐᤥᤱᤗᤥ॥’” ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤛᤶᤎᤠᤱ ᤁᤧᤒᤵᤐᤠ ᤂᤠ᤹ᤔᤡᤳ ( ᤗᤠ ᥊᥆:᥉᥊-᥉᥎ ) 15 ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤏᤡᤱᤘᤠ᤹ᤑᤢᤔᤠᤱ ᤛᤴᤍᤥᤰ ᤁᤧᤕᤢᤱᤒᤠ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤔᤧᤓᤥ᤺ᤰᤂᤢᤸᤗᤧ ᤕᤠ᤺ᤴᤍᤡᤰ ᤂᤠ᤹ᤔᤡ᤺ᤳᤋᤡᤸᤗᤧ ᤂᤧᤴ ᤐᤴᤇᤢ॥ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤛᤶᤎᤠᤱᤒᤠ ᤂᤧᤴ ᤂᤠ᤹ᤔᤡ᤺ᤳᤋᤡᤴ ᤕᤢ᤺ᤴᤇᤡᤰ ᤐᤥ᤺ᤰᤂᤧᤀᤠᤱᤎᤥ ᤋᤠᤏᤠᤶ ᤌᤠᤖᤡᤰᤁᤣ ᤔᤡᤎᤢᤱ ᤔᤡᤖᤠ᤺ᤰ ᤜᤧᤰᤋᤱᤒᤠ ᤏᤡᤎᤠᤒᤧ॥ 16 ᤁᤴ ᤀᤠᤵᤑᤠᤸᤗᤧᤛᤠᤱ ᤀᤰᤋᤱᤒᤠᤀᤣ ᤐᤥ᤺ᤰᤂᤧᤖ ᤘᤕᤧ—ᤗᤧᤴᤍᤡᤰ ᤂᤠ᤹ᤔᤡ᤺ᤳᤋᤡᤸᤗᤧ ᤐᤴᤇᤢ. ᤜᤧᤰᤁᤩᤠᤱ ᤛᤧᤴᤍᤡᤰ ᤔᤡᤎᤢᤱ ᤔᤡᤖᤠ᤺ᤰ ᤜᤧᤰᤋᤱᤒᤠ ᤏᤡᤎᤠᤒᤧ॥ 17 ᤀᤠᤸᤗ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤛᤶᤎᤠᤱᤒᤠ ᤂᤠ᤹ᤔᤡ᤺ᤳᤋᤡᤴ ᤀᤡ᤺ᤱᤛᤡᤱᤅᤡᤸᤗᤧ. ᤀᤡᤛᤪᤠᤀᤡᤗᤡᤜᤠ᤹ ᤗᤠᤶ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤀᤠᤳᤋᤡᤴ ᤋᤧᤴᤏᤥ ᤂᤠ᤹ᤔᤡ᤺ᤳᤋᤡᤴ ᤑᤴᤇᤡᤱ. ᤜᤠᤒᤠ ᤂᤧᤴ ᤋᤧᤴᤏᤥᤀᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤄᤡᤱᤄᤢ॥ 18 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤥ ᤀᤡᤛᤪᤠᤀᤡᤗᤡᤜᤠ᤹ ᤗᤠᤶ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤁᤢᤀᤡᤱᤈᤠᤱᤅᤥ ᤂᤧᤱᤜᤠ᤹ᤖᤧ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤄᤡᤱᤄᤢ॥ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤛᤶᤎᤠᤱ ᤂᤠ᤹ᤔᤡ᤺ᤳᤋᤡᤴ ᤐᤳᤇᤧᤖ ᤌᤠᤖᤡᤰ ᤂᤧᤱᤜᤠ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥᤀᤣ ᤕᤠᤱᤔᤧᤎᤥ᤺ᤰᤋᤧ॥ 19 ᤕᤖᤡᤰ ᤕᤧᤴ ᤌᤠᤖᤡᤰ ᤂᤠ᤹ᤔᤡ᤺ᤳᤋᤡᤴ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤛᤶᤎᤠᤱ ᤀᤠᤶᤓᤠ ᤐᤳᤇᤧᤏᤧᤓᤃᤪ. ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤴ ᤔᤧᤄᤧᤵᤛᤢᤀᤠᤱ ᤗᤠᤶ ᤔᤧᤴᤎᤠᤛᤡᤱᤅᤡᤴ॥ 20 ᤁᤢᤓᤠ ᤕᤧᤶᤔᤥ ᤛᤣᤛᤣ ᤕᤢᤱᤍᤧᤴᤏᤡᤸᤗᤧ ᤁᤢᤛᤶᤎᤠᤱ ᤁᤢᤓᤠ ᤕᤧᤴ ᤌᤧᤶᤒᤠᤖᤰ ᤂᤠ᤹ᤔᤡ᤺ᤳᤋᤡᤴ ᤐᤳᤇᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤂᤧᤱᤜᤠ᤹ ᤕᤠᤱᤔᤧᤎᤥ᤺ᤰᤋᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤂᤧᤱᤜᤠ᤹ ᤗᤠᤶ ᤔᤧᤎᤠᤛᤡᤱ॥ 21 ᤜᤧᤰᤁᤩᤠᤱ ᤁᤢᤓᤠ ᤕᤧᤶᤔᤥ ᤕᤢ᤺ᤴᤇᤡᤰᤁᤠᤱᤎᤥ ᤋᤠᤏᤠᤶ ᤌᤠᤖᤡᤰᤗᤰ ᤂᤠ᤹ᤔᤡ᤺ᤳᤋᤡᤴ ᤐᤳᤇᤧ. ᤂᤶᤓᤩᤠᤱ ᤋᤠᤏᤠᤶ ᤂᤠ᤹ᤔᤡ᤺ᤳᤋᤧᤴ ᤀᤡ᤺ᤱᤛᤡᤱᤅᤠᤱ ᤂᤧᤱᤜᤠ᤹ ᤗᤠᤶ ᤔᤧᤎᤠᤛᤡᤱ॥ ᤗᤧᤴᤍᤡᤰᤛᤠᤱ ᤀᤡᤃᤪ ᤛᤧᤴᤍᤡᤰᤛᤠᤱ. ᤂᤠ᤹ᤔᤡ᤺ᤳᤋᤧᤴ ᤀᤡ᤺ᤱᤛᤡᤱᤏᤢᤔᤧ᤺ᤴᤏᤣ ᤂᤧᤱᤜᤠ᤹ ᤗᤠᤶ ᤔᤧᤎᤠᤛᤡᤱ॥ 22 ᤏᤡᤕᤠᤴ ᤀᤡᤃᤪ ᤗᤠᤎᤡᤰ ᤁᤡᤃᤪ ᤋᤱᤒᤣᤎᤡᤰ ᤌᤠᤖᤡᤰᤛᤠᤱ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤛᤶᤎᤠᤱ ᤂᤠ᤹ᤔᤡ᤺ᤳᤋᤧᤴ ᤐᤳᤇᤧᤖ ᤌᤠᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤗᤠᤶ ᤔᤧᤴᤎᤠᤛᤡᤱᤅᤡᤴ. ᤁᤖ ᤂᤠ᤹ᤔᤡ᤺ᤳᤋᤧᤴ ᤀᤡ᤺ᤱᤛᤡᤱᤏᤢᤔᤧ᤺ᤴᤏᤣ ᤂᤧᤱᤜᤠ᤹ ᤗᤠᤶ ᤔᤧᤎᤠᤛᤡᤱ॥ 23 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤥ ᤂᤧᤱᤜᤠ᤹ᤖᤧ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤄᤡᤱᤄᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤥᤀᤣ ᤂᤧᤱᤜᤠ᤹ ᤗᤠᤶ ᤔᤧᤎᤠᤛᤡᤱ॥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠ᤺ᤴᤗᤠᤶ ᤀᤠᤰᤋᤱᤒᤠ ᤀᤡᤱᤈᤠᤱ ᤆᤥᤃᤢᤀᤠᤱ ᤘᤕᤧ. ᤂᤧᤱᤜᤠ᤹ᤖᤧ ᤜᤠᤒᤠ ᤂᤧᤴᤏᤣ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.