ᤂᤠᤏᤡ᤺ᤳ 8 - LIFOTNT

ᤛᤣᤔᤡᤕᤢᤱᤍᤧᤴ ᤕᤢᤱᤔᤠ ᤌᤡᤶ

¹ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ.

² “ᤂᤧᤏᤧ᤹ ᤜᤠᤖᤢᤏᤧᤴ ᤔᤧᤳᤋᤧ᤹—‘ᤂᤧᤏᤧ᤹ ᤏᤢᤛᤡ ᤛᤣᤔᤡᤜᤠ᤹ ᤁᤧᤕᤢᤰᤂᤢᤸᤗᤧ ᤂᤧᤴ ᤛᤣᤔᤡᤜᤠ᤹ᤖᤧ ᤛᤣᤔᤡᤕᤢᤱᤍᤧᤴ ᤋᤃᤡ ᤗᤧᤵᤔᤠᤱᤒᤠ ᤋᤧᤴᤏᤡᤴ ᤌᤥ᤹ᤖᤢᤖ॥’”

³ ᤜᤧᤰᤁᤩᤠᤱ ᤜᤠᤖᤢᤏᤧᤸᤗᤧ ᤜᤧᤰᤁᤣᤀᤣ ᤆᤥᤃᤢ॥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡ᤺ᤰᤁᤣ ᤛᤣᤔᤡ ᤕᤢᤱᤍᤧᤴᤏᤡᤸᤗᤧ ᤋᤃᤡ ᤗᤧᤵᤔᤠᤱ ᤌᤥ᤹ᤖᤢᤖ ᤂᤢᤏᤧ᤹ ᤛᤣᤔᤡᤜᤠ᤹ ᤕᤢᤰᤂᤢ॥

⁴ ᤂᤧᤸᤗᤧ ᤁᤢᤕᤢᤰᤏᤠᤀᤠᤱᤎᤥ ᤁᤢᤓᤢᤱᤜᤠ᤹ ᤌᤠᤖᤡᤰ ᤛᤣᤔᤡ ᤕᤢᤱᤍᤧᤴᤏᤡᤴ ᤌᤰᤔᤏᤠᤒᤠ ᤛᤠᤶᤔᤩᤠᤱ ᤁᤢᤗ᤺ᤵᤐᤠ ᤆᤥᤃᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤁᤢᤒᤡ ᤀᤥ᤺ᤴᤎᤠᤰᤋᤢᤒᤠ ᤁᤢᤀᤡᤛᤡᤰ ᤂᤧᤴ ᤛᤣᤔᤡ ᤕᤢᤱᤍᤧᤴᤏᤡᤴ ᤔᤧᤈᤥᤃᤢᤖᤥ॥

ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤏᤢ ᤋᤥ᤺ᤴᤇᤡᤱᤔᤠ

⁵ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ.

⁶ “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ᤗᤢᤶᤔᤥᤒᤠ ᤗᤧᤒᤡᤜᤠ᤹ ᤋᤣ᤹ᤖᤧᤛᤧ᤹ᤀᤠᤱ ᤂᤧᤱᤜᤠ᤹ ᤌᤡᤶ ᤁᤢᤀᤡᤛᤡᤰ ᤛᤢᤳᤌᤥ ᤆᤥᤃᤧᤛᤧ᤹॥

⁷ ᤂᤧᤱᤜᤠ᤹ ᤛᤢᤳᤌᤥ ᤆᤥ᤺ᤰᤔᤠᤛᤡᤖᤧ ᤗᤠᤃᤡ ᤂᤧᤏᤧ᤹ ᤀᤰᤂᤣ ᤆᤥᤃᤧ᤹—ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤆᤫᤠ᤺ᤳᤋᤡᤴ ᤛᤠᤰᤂᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤁᤥᤒᤠ ᤁᤧᤖᤧᤰ ᤔᤢᤖᤡᤰᤜᤠ᤹ ᤔᤧᤏ᤺ᤰᤛᤢᤀᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤆᤠᤱᤜᤠ᤹ ᤘᤠᤔᤧᤜᤵᤋᤢᤖ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤢᤳᤌᤥ ᤔᤧᤒᤥᤱᤗ॥

⁸ ᤂᤧᤱᤜᤠ᤹ᤖᤧ ᤁᤢᤶᤒᤠᤒᤠ ᤐᤡᤳᤛᤠᤳ ᤌᤡᤰ ᤏᤢ ᤏᤡ᤺ᤱᤃᤣ᤹ ᤛ᤹ᤔᤏᤠᤒᤠ ᤆᤢᤴᤈᤢᤶᤒᤠ ᤑᤣ᤹ᤖᤢᤶᤔᤡᤸᤗᤧᤴ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤔᤧᤍᤠᤖᤢᤖ. ᤂᤧᤒᤩᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡᤃ ᤂᤧᤏᤧ᤹ ᤘᤣ᤹ ᤁᤢᤶᤒᤠᤒᤠ ᤐᤡᤳᤛᤠᤳ ᤌᤡᤰ ᤋᤠᤖᤧ᤹॥

⁹ ᤂᤧᤏᤧ᤹ ᤗᤧᤒᤡᤜᤠ᤹ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤋᤃᤡ ᤋᤠᤖᤧᤛᤧ᤹ᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤛᤱᤈᤢᤶᤓᤥ᤺ᤴ ᤑᤢᤰᤂᤧᤛᤧ᤹॥

¹⁰ ᤂᤧᤏᤧ᤹ ᤗᤧᤒᤡᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤋᤠᤖᤧᤛᤧ᤹. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤢᤰᤜᤠ᤹ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤔᤧᤏᤧᤛ᤻ᤛᤢᤖ॥

¹¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤛᤧ ᤗᤧᤒᤡᤜᤠ᤹ ᤕᤠᤖᤡᤵ ᤔᤧᤒᤥᤱᤗ ᤑᤠ᤹ᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤗᤠᤶ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤗᤧᤒᤡᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤜᤠᤖᤢᤏᤧᤸᤗᤧ ᤋᤥ᤺ᤴᤍᤢᤛᤡᤖ॥

¹² “ᤂᤧᤴ ᤀᤣᤃᤠᤱ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤜᤠ᤹ ᤂᤧᤴ ᤏᤧᤳᤇᤡ ᤁᤢᤶᤒᤠᤒᤠ ᤐᤡᤳᤛᤠᤳᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤜᤠ᤹ ᤛᤶᤎᤠᤱ ᤔᤧᤏᤧᤛ᤻ᤛᤢ᤹॥ ᤗᤧᤒᤡᤜᤠ᤹ᤖᤧ ᤂᤢᤴᤇᤡ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤗᤳᤇᤠ ᤐᤡᤳᤛᤠᤳᤋᤧᤴ ᤛᤢᤳᤌᤥ ᤐᤥᤱᤔᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤏᤢ ᤘᤣ᤹ ᤐᤡᤳᤛᤠᤳᤋᤧᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤀᤥ ᤔᤧᤍᤥᤴᤍᤢᤛᤡᤖ॥

¹³ ᤂᤧᤏᤧ᤹ ᤗᤧᤒᤡᤜᤠ᤹ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠᤖᤧ ᤂᤢᤴᤇᤡ᤹ ᤋᤃᤡ ᤕᤧᤵᤛᤧᤛᤧ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤋᤥ᤺ᤴᤍᤧᤛᤧ᤹॥

¹⁴ ᤁᤶᤓᤗ᤹ᤖᤡᤰ ᤂᤧᤏᤧ᤹ ᤗᤧᤒᤡᤜᤠ᤹ ᤘᤣ᤹ ᤀᤡᤛᤪᤠᤀᤡᤗᤡᤜᤠ᤹ᤗᤠᤶ ᤀᤣ᤺ᤰ ᤛᤧᤴᤍᤧᤛᤧ᤹. ᤜᤧᤰᤁᤩᤠᤱ ᤗᤧᤒᤡᤜᤠ᤹ ᤀᤠᤱᤃᤠ᤹ ᤀᤠᤔᤏᤠᤛᤡᤖᤥ॥

¹⁵ “ᤂᤧᤏᤧ᤹ ᤗᤧᤒᤡᤜᤠ᤹ ᤛᤢᤳᤌᤥ ᤁᤧᤈᤥᤃᤢᤛᤡᤀᤠᤱ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ ᤜᤧᤰᤁᤣ ᤂᤧᤱᤜᤠ᤹ ᤋᤥ᤺ᤴᤍᤧᤛᤧ᤹ ᤂᤧᤴ ᤀᤣᤃᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤔᤠᤱᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤗᤧᤒᤡᤜᤠ᤹ ᤛᤡᤃᤠᤱ ᤔᤧᤗᤠ᤺ᤳᤗ॥

¹⁶ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤂᤧᤱᤜᤠ᤹ ᤁᤧᤖᤧᤰᤁᤣ ᤀᤠᤱᤃᤠ᤹ᤀᤥ ᤔᤧᤍᤥᤴᤍᤢᤛᤡᤒᤠᤖᤥ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤒᤠ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤧᤰᤘᤠᤀᤥ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤔᤏᤠ ᤜᤧᤰᤁᤣ ᤂᤧᤱᤜᤠ᤹ ᤋᤠ᤺ᤰᤋᤢᤱᤛᤡᤱᤅᤠᤱ ᤘᤠ᤹ᤀᤠ॥

¹⁷ ᤀᤡᤛᤪᤠᤀᤡᤗᤀᤥ. ᤔᤏᤠᤛᤠᤱ. ᤌᤰᤛᤠᤛᤠᤱ. ᤋᤃᤡ ᤛᤠᤃᤧᤘᤠ᤺ᤴᤇᤡᤱᤒᤠ ᤁᤧᤎᤠᤵᤐᤠᤜᤠ᤹ ᤁᤧᤖᤧᤰ ᤀᤠᤱᤃᤠ᤹ ᤀᤠᤔᤏᤠ ᤀᤠᤎᤰᤛᤠᤛᤡᤖᤥ॥ ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤋᤢᤶᤒᤠ ᤛᤠᤜᤠ᤹ ᤀᤠᤱᤃᤠ᤹ ᤛᤧᤖᤢᤱᤛᤡᤱᤒᤠ ᤕᤧᤴᤏᤥ ᤁᤴᤜᤠ᤹ ᤀᤠᤱᤃᤠ᤹ ᤀᤠᤗᤠᤃᤡ ᤀᤣ᤺ᤰ ᤛᤧᤴᤍᤢᤱᤛᤡᤱ॥

¹⁸ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤒᤠ ᤛᤠᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤗᤧᤰᤘᤠᤀᤥ ᤀᤠᤱᤃᤠ᤹ ᤗᤧᤒᤡᤜᤠ᤹ ᤋᤠ᤺ᤰᤋᤢᤱᤛᤡᤱᤅᤠᤱ ᤔᤧᤘᤠ᤹॥

¹⁹ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤗᤠᤶ. ᤀᤠᤱᤃᤠ᤹ ᤗᤧᤒᤡᤜᤠ᤹ ᤜᤠᤖᤢᤏᤧᤴ ᤏᤢ ᤁᤢᤛ᤻ᤛᤠᤜᤠ᤹ ᤐᤡᤖᤢᤱᤛᤡᤱᤅᤠᤱ ᤘᤠ᤹॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤧᤰᤘᤠᤀᤥ ᤂᤧᤱᤜᤠ᤹ᤖᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤔᤧᤈᤥᤃᤢ ᤔᤧᤒᤡᤖᤢᤛᤡᤖ ᤜᤧᤰᤁᤩᤠᤱ ᤔᤏᤠᤜᤠ᤹ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤑᤠ᤹ᤀᤠᤱ ᤛᤡᤍᤢᤱᤓᤈᤠᤜᤠ᤹ ᤔᤧᤈᤥᤃᤢ ᤔᤧᤒᤡᤖᤢᤛᤡᤖ ᤜᤧᤰᤁᤣᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤛᤣᤛᤣᤍᤧᤴᤏᤥ ᤔᤧᤍᤠ᤺ᤸᤗᤧ ᤋᤢᤰᤔᤠ ᤗᤠ᤺ᤰᤔᤠᤖᤧ ᤔᤧᤍᤖᤢᤛᤡᤴᤗ॥”

²⁰ ᤗᤧᤒᤡᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤔᤥᤛᤠ. ᤜᤠᤖᤢᤏ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤗᤧᤒᤡᤜᤠ᤹ ᤔᤧᤍᤥᤴᤍᤢᤛᤡ॥

²¹ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤢᤳᤌᤥ ᤔᤧᤈᤥ᤺ᤰᤛᤡᤱᤅᤠᤱ ᤂᤢᤴᤇᤡ᤹ ᤆᤠᤱᤜᤠ᤹ ᤘᤠᤔᤧᤜᤵᤋᤢ॥ ᤂᤧᤒᤩᤠᤱ ᤜᤠᤖᤢᤏᤧᤸᤗᤧ ᤂᤧᤱᤜᤠ᤹ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤋᤥ᤺ᤴᤍᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤛᤢᤳᤌᤥ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤕᤠ᤺ᤶᤒᤰ ᤆᤥᤃᤢ॥

²² ᤂᤧᤴ ᤀᤣᤃᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤠ᤺ᤶᤒᤰ ᤆᤥ᤺ᤰᤛᤧ ᤗᤧᤒᤡᤜᤠ᤹ ᤛᤡᤃᤠᤱ ᤔᤧᤗᤠᤛᤧ॥ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤔᤧᤈᤥᤃᤢ॥

²³ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ.

²⁴ “ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤁᤡᤸᤗᤧ ᤌᤡᤶᤔᤡᤴ ᤜᤠᤒᤠ ᤁᤴᤗᤥ—ᤏᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤁᤧᤃᤧᤵᤐᤠ ᤏᤢ ᤂᤧᤴᤏᤢ᤺ᤸᤗᤧ ᤌᤥᤒᤠᤜᤠ᤹ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤛᤧ ᤔᤧᤗᤠ᤺ᤳᤗ॥

²⁵ ᤁᤖ ᤅᤠᤒᤥᤱ ᤋᤱᤒᤣ ᤔᤧᤃᤧᤳᤋᤠᤱ ᤀᤣᤃᤠᤱ ᤂᤧᤱᤜᤠ᤹ᤖᤧ ᤕᤠ᤺ᤶᤒᤰ ᤔᤧᤴᤈᤥᤃᤢᤴᤗ. ᤜᤧᤰᤁᤩᤠᤱ ᤕᤠ᤺ᤶᤒᤰᤗᤠᤶ ᤂᤧᤱᤜᤠ᤹ ᤔᤧᤀᤱᤛᤡᤱᤗ. ᤂᤧᤒᤩᤠᤱ ᤕᤠᤶᤔᤥ ᤕᤠ᤺ᤶᤒᤰ ᤔᤧᤴᤈᤥᤃᤢᤴᤗ॥

²⁶ ᤁᤖ ᤕᤠ᤺ᤶᤒᤰ ᤜᤧᤴᤕᤠ ᤆᤥ᤺ᤰᤔᤠᤀᤠᤱ ᤘᤠ᤹ᤔᤠᤖᤧ ᤗᤠᤃᤡ ᤗᤧᤒᤡ ᤑᤢ᤹ᤏᤢᤛᤠ᤹ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤔᤧᤓᤠ᤹ᤖᤢᤛᤡᤖ ᤔᤧᤘᤠ᤹ᤖ. ᤁᤖ ᤂᤧᤱᤜᤠ᤹ᤖᤧ ᤀᤠᤵᤑᤣᤰ ᤕᤠ᤺ᤶᤒᤰ ᤔᤧᤴᤈᤥᤃᤢᤴᤗ॥ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤀᤰᤂᤣᤀᤣ ᤆᤥᤃᤧ᤹ᤀᤥ॥”