ᤂᤠᤏᤡ᤺ᤳ 5 - LIFOTNTᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤐᤥᤱᤔᤠ ᤁᤧᤒᤥᤱᤒᤠ ᤛᤢᤳᤌᤥ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤜᤥᤖᤡᤰᤐᤥ ᤀᤠᤗᤡ᤺ᤰᤗᤡ᤺ᤰᤐᤠ ᤕᤠᤱᤄᤣ᤺ᤰ ᤁᤧᤗ᤺ᤶᤒᤠ. ᤌᤰᤁᤥᤗᤠᤶ ᤘᤕᤢᤔᤠ ᤋᤢᤰᤔᤠ ᤁᤧᤃᤵᤐᤠ. ᤜᤧᤰᤁᤩᤠᤱ ᤆᤣ ᤁᤧᤛᤢᤒᤠᤀᤠᤱ ᤀᤠᤛᤢᤳᤌᤥ ᤁᤧᤒᤥᤱᤒᤠ ᤀᤡᤛᤪᤠᤀᤡᤗᤡᤜᤠ᤹ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤗᤠ᤺ᤳᤗᤠ᤺ᤳ ᤔᤧᤘᤠ᤹ᤖ ᤁᤧᤗ᤹ᤒᤠ ᤀᤡᤱᤈᤠᤱ ᤐᤡᤖᤧᤛᤧ᤹॥ 3 ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠ ᤏᤧᤵᤔᤠᤱ ᤗᤠ᤺ᤰᤁᤠᤳ ᤕᤢᤰᤂᤧᤛᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤕᤠᤱᤎᤥ᤺ᤰᤁᤠᤒᤠ ᤛᤠ᤺ᤱᤃᤠᤜᤡᤶᤜᤠ᤹ ᤂᤧᤱᤜᤠ᤹ᤖᤧ ᤀᤠᤛᤢᤳᤌᤥ ᤔᤧᤴᤈᤥᤃᤢᤴᤗ॥” 4 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤜᤧᤰᤁᤣᤀᤣ ᤔᤧᤈᤥᤃᤢ. ᤂᤧᤱᤜᤠ᤹ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤔᤧᤕᤢᤰᤂᤢᤛᤡ॥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢᤒᤠ ᤜᤧᤰᤁᤣᤀᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤈᤥᤃᤢᤖᤥ॥ ᤑᤣᤴᤕᤠ᤺ᤶᤒᤰᤗᤧ ᤁᤢᤗᤧᤰᤘᤠ ᤜᤢᤱᤔᤠ ᤁᤧᤒᤥᤱᤒᤠ ᤛᤠᤶᤒᤠᤴ 5 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 6 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹—‘ᤀᤠᤸᤗ ᤁᤢᤓᤠ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤴ ᤀᤡᤱᤗᤧᤰ ᤔᤧᤳᤋᤢᤀᤠᤱ ᤁᤢᤓᤠ ᤘᤣ᤹ ᤐᤖᤡᤰᤐᤠ ᤗᤠᤕᤥ ᤑᤧᤴᤕᤠ᤺ᤶᤒᤰ ᤆᤥᤃᤢᤏᤧᤓᤃᤪ. ᤂᤧᤴ ᤔᤏᤠᤴ ᤀᤠᤵᤋᤡᤰᤛᤠᤒᤠ ᤐᤥᤱ᤹. 7 ᤜᤧᤰᤁᤩᤠᤱ ᤂᤧᤸᤗᤧ ᤂᤢᤏᤧ᤹ ᤆᤥᤃᤢᤒᤠ ᤗᤠᤕᤥᤒᤠ ᤐᤠ᤺ᤴᤏᤥ ᤋᤧᤶᤔᤠ ᤐᤥᤱ᤹॥ ᤂᤧᤸᤗᤧ ᤜᤠᤳ ᤋᤠᤵᤑᤧ᤺ᤶᤒᤠ ᤔᤧᤳᤋᤢᤀᤠᤱ ᤘᤠ᤹. ᤂᤢᤏᤧ᤹ ᤂᤧᤴ ᤔᤧᤳᤋᤢᤒᤠ ᤀᤠᤵᤋᤡᤰᤗᤧ ᤁᤢᤗᤧᤰᤘᤠ ᤁᤧᤖᤧᤰ ᤛᤠᤶᤒᤠᤴ ᤏᤢ ᤀᤠᤸᤗᤛᤠᤱ ᤅᤠᤛᤡᤃᤣᤰᤐᤠ ᤗᤰ ᤐᤡᤖᤢᤖ ᤐᤥᤱ᤹॥ 8 ᤁᤖ ᤂᤧᤴ ᤔᤏᤠᤴ ᤛᤩᤧᤄᤧᤖᤧᤀᤠᤱ ᤁᤢᤀᤠᤵᤋᤡᤰᤁᤡᤸᤗᤧ ᤁᤢᤗᤧᤰᤘᤠ ᤛᤠᤶᤒᤠᤴ ᤁᤧᤜᤢᤱᤒᤠ ᤜᤠ᤺ᤳᤋᤠᤱ ᤁᤢᤔᤏᤠ ᤔᤧᤜᤥ᤺ᤵᤏᤧᤓᤃᤪ. ᤂᤧᤴ ᤛᤠᤶᤒᤠᤴ ᤆᤡᤃᤰᤘᤠᤴ ᤕᤜᤘᤣ ᤍᤠᤱᤒᤧᤸᤗᤧᤴ ᤐᤥᤱᤅᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤐᤡᤔᤠ ᤐᤥᤱ᤹॥ ᤛᤠᤶᤒᤠᤴ ᤜᤢᤱᤔᤠ ᤏᤢ ᤀᤠᤵᤋᤡᤰᤛᤠᤒᤧᤸᤗᤧ ᤁᤢᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤗᤳᤇᤠ ᤌᤢ᤺ᤶᤒᤠᤎᤡᤰ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤐᤡᤔᤠ ᤐᤥᤱ᤹॥ 9 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤔᤧᤍᤥᤴᤍᤢ ᤔᤧᤍᤠᤖᤢᤒᤠ ᤛᤣᤛᤣᤒᤠ ᤛᤡᤍᤢᤱᤈᤓᤠᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧᤴ ᤐᤥᤱᤗ॥ 10 ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤣᤛᤣᤒᤠ ᤔᤡᤰᤋᤥ᤺ᤰᤜᤠ᤹ ᤂᤢᤴᤇᤡ᤹ᤀᤡᤴᤏᤣᤖᤥ. ᤁᤖ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤔᤧᤒᤡᤖᤢᤒᤠ ᤌᤧᤔᤠ᤺ᤴᤇᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧᤴᤏᤣ ᤐᤥᤱᤗᤖᤥ॥’” ᤁᤢᤏᤠᤃᤧᤜᤧᤶᤒᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ 11 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 12 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹—‘ᤁᤢᤓᤠ ᤔᤏᤠ᤺ᤸᤗᤧ ᤁᤢᤔᤣ᤺ᤳᤋᤡᤴ ᤋᤠᤵᤐᤧ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤧᤶᤒᤠ᤺ᤴ ᤀᤡᤱᤗᤧᤰᤁᤥ ᤌᤠᤛᤢᤀᤠᤱ 13 ᤘᤣ᤹ ᤕᤧᤶᤒᤡᤳᤇᤠ᤺ᤴᤏᤢ ᤀᤡᤶᤔᤠ ᤕᤠ᤺ᤶᤒᤰ ᤆᤥᤃᤢ᤹. ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤁᤢᤕᤧᤶᤒᤠ᤺ᤸᤗᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤳᤋᤢ᤹. ᤂᤶᤓᤩᤠᤱ ᤂᤧᤴ ᤔᤧᤴᤇᤢᤔᤠᤴ ᤑᤧᤳᤗᤠᤖᤧᤛᤠᤱ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤜᤠ᤺ᤳᤋᤠᤱ ᤁᤧᤏᤡᤒᤠ ᤜᤥ᤺ᤵᤋᤧᤒᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤔᤧᤴᤕᤠᤱᤅᤣᤀᤠᤱ ᤘᤕᤧ. 14 ᤜᤧᤰᤁᤩᤠᤱ ᤂᤧᤴ ᤑᤧᤰᤁᤧᤗᤠ᤹ᤔᤠ ᤁᤢᤔᤣ᤺ᤳᤋᤡᤴ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤥ ᤏᤠᤜᤧᤳᤋᤢ. ᤂᤧᤒᤩᤠᤱ ᤔᤡᤰᤆᤥᤒᤥ᤹ᤔᤠ ᤜᤣ᤺ᤰᤋᤢ. ᤀᤡᤃᤪ ᤂᤧᤸᤗᤧ ᤁᤢᤔᤣ᤺ᤳᤋᤡᤴ ᤑᤧᤳᤔᤧᤸᤗᤠ᤹ᤀᤣ ᤘᤠ᤹ᤛᤠᤱ ᤁᤢᤏᤠᤜᤧᤴᤏᤠᤱ ᤏᤠᤜᤧᤳᤋᤢᤏᤧᤓᤃᤪ. 15 ᤂᤧᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤁᤢᤔᤣ᤺ᤳᤋᤡᤴ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤋᤠᤖᤢᤖ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤸᤗᤧ ᤁᤢᤗᤠᤃᤡ ᤔᤠᤏᤠ ᤗᤡᤛᤡ ᤕᤠᤖᤡᤰ ᤜ᤺ᤰᤛᤡ ᤑᤣ᤹ᤖᤢᤶ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤖ॥ ᤂᤢᤏᤧ᤹ ᤂᤧᤵᤔᤥ ᤏᤡ᤺ᤱᤃᤣ᤹ ᤀᤡᤃᤪ ᤛᤢᤰᤐᤠ ᤔᤧᤕᤠᤰᤋᤢᤴᤗ. ᤌᤣᤀᤠᤱᤓᤧᤸᤗᤧ ᤁᤱᤃ ᤀᤠᤵᤋᤡᤰᤁᤧᤴ ᤏᤡᤱᤘᤠ᤹ᤛᤢᤶ ᤁᤧᤗ᤹ᤒᤠ. ᤀᤡᤃᤪ ᤏᤠᤜᤧᤴᤗᤧ ᤗᤠᤃᤡ ᤋᤥ᤺ᤶᤔᤏᤠᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤖᤥ॥ 16 “‘ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤔᤧᤴᤇᤢᤔᤠᤴ ᤏᤡ᤺ᤳᤋᤠᤱ ᤋᤠᤖᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤕᤧᤵᤛᤢᤖ॥ 17 ᤂᤧᤴ ᤀᤣᤃᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤠᤶ ᤂᤵᤐᤩᤠᤀᤥ ᤛᤣᤛᤣᤒᤠ ᤆᤫᤠ᤺ᤳ ᤋᤠᤖᤢᤖ. ᤂᤧᤒᤩᤠᤱ ᤛᤣᤛᤣ ᤛᤠ᤺ᤱᤃᤠᤜᤡᤶ ᤛᤡᤃᤠᤱᤒᤠ ᤂᤠᤶᤒᤠᤱᤅᤥᤒᤠ ᤂᤠᤶᤜᤡ᤺ᤰᤁᤡᤴ ᤕᤠᤱᤛᤡᤱᤅᤠᤱ ᤂᤧᤴ ᤆᤫᤠ᤺ᤳᤋᤥ ᤁᤣ᤺ᤳᤋᤢᤖ॥ 18 ᤂᤶᤓᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤔᤧᤴᤇᤢᤔᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤕᤧᤵᤛᤢᤀᤠᤱ ᤀᤣᤃᤠᤱ ᤁᤢᤎᤧᤃᤣᤰ ᤀᤡ᤺ᤴ ᤑᤠ᤺ᤰᤂᤢ ᤐᤡᤖᤢᤖ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤢᤰᤁᤥ ᤏᤡᤱᤘᤠ᤹ᤛᤥᤰ ᤛᤡᤍᤢᤱᤈᤓᤠ ᤏᤠᤜᤧᤴ ᤛᤡᤍᤢᤱᤈᤓᤠᤴ ᤁᤣ᤺ᤳᤋᤢ ᤐᤡᤖᤢᤖ. ᤜᤧᤰᤁᤩᤠᤱ ᤔᤠᤱᤍᤣ ᤛᤠᤱᤃᤪᤠ ᤁᤧᤍᤠ᤺ᤵᤐᤠ ᤁᤧᤄᤡ᤺ᤰᤐᤠ ᤆᤫᤠ᤺ᤳᤋᤡᤴ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤜᤢᤰᤁᤥ ᤕᤠᤱᤛᤡᤱᤗ॥ 19 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤔᤧᤴᤇᤢᤔᤠᤴ ᤔᤠᤱᤜᤧᤰᤛᤡᤱᤔᤠ ᤐᤠᤱᤄᤢᤀᤠᤱ ᤀᤰᤂᤣ ᤔᤧᤳᤋᤢᤖ. “ᤁᤢᤓᤠ ᤕᤧᤶᤒᤡᤳᤇᤠᤴ ᤂᤧᤏᤧ᤹ᤏᤢ ᤔᤧᤴᤏᤧᤀᤣ ᤘᤠ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤕᤧᤶᤒᤠ᤺ᤸᤗᤧ ᤁᤢᤕᤢᤰᤁᤥ ᤁᤧᤘᤕᤧᤸᤗᤧ ᤑᤧᤳᤗᤠ᤹ᤔᤠ ᤗᤠᤶᤔᤥ ᤔᤧᤴᤘᤠ᤹ᤀᤣ ᤁᤧᤘᤕᤧᤀᤠᤱ ᤀᤠᤛᤢᤳᤌᤥ ᤔᤧᤶᤒᤥᤱᤅᤣ ᤁᤧᤘᤠ᤹ᤏᤧᤓᤃᤪ. ᤔᤠᤱᤍᤣ ᤛᤠᤱᤃᤪᤠ ᤁᤧᤍᤠ᤺ᤵᤐᤠ ᤁᤴ ᤁᤧᤄᤡ᤺ᤰᤐᤠ ᤆᤫᤠ᤺ᤳᤋᤡᤸᤗᤧ ᤂᤧᤏᤧ᤹ ᤌᤧᤔᤠᤀᤠᤱ ᤜᤠᤴᤋᤡ ᤁᤧᤴᤈᤥ᤺ᤰᤏᤧᤴᤗ॥ 20 ᤁᤖ ᤂᤧᤏᤧ᤹ ᤁᤧᤕᤧᤶᤒᤠ᤺ᤸᤗᤧ ᤁᤢᤕᤢᤰᤁᤥ ᤁᤧᤘᤕᤧᤸᤗᤧ ᤂᤧᤏᤧ᤹ ᤋᤠᤵᤁᤧᤒᤧ᤹ᤖᤧ ᤁᤧᤒᤣᤀᤠᤱ ᤁᤧᤘᤠ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤕᤧᤶᤒᤠ᤺ᤴᤏᤢ᤺ᤸᤗᤧᤀᤠᤱ ᤘᤣ᤹ ᤕᤧᤶᤒᤡᤳᤇᤠ᤺ᤴᤏᤢ ᤂᤧᤏᤧ᤹ ᤁᤧᤏᤧᤛ᤻ᤛᤧᤀᤠᤱ ᤑᤧᤰᤁᤧᤗᤠ᤹ᤖᤧᤀᤠᤱ ᤁᤧᤘᤠ᤹ᤏᤧᤓᤃᤪ.” 21 (ᤁᤴ ᤕᤧᤶᤔᤥ. ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤔᤧᤴᤇᤢᤔᤠᤴ ᤔᤠᤱᤍᤣ ᤛᤠᤱᤃᤪᤠᤒᤠ ᤔᤠᤱᤜᤧᤰ ᤆᤥ᤺ᤰᤔᤠ ᤐᤠᤱᤄᤢᤖ) “ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤁᤢᤛ᤻ᤛᤠ ᤔᤧᤴᤕᤠᤰᤔᤏᤠᤔᤠ ᤏᤢ ᤂᤧᤏᤧ᤹ ᤁᤧᤛᤠᤵᤐᤥᤰ ᤁᤧᤎᤱᤔᤠ ᤁᤧᤈᤥ᤺ᤰᤁᤡᤸᤗᤧ. ᤂᤢᤏᤧ᤹ ᤂᤧᤏᤧ᤹ ᤁᤧᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤠᤱᤍᤣ ᤛᤠᤱᤃᤪᤠ ᤁᤧᤍᤠ᤺ᤵᤔᤠ ᤏᤢ ᤆᤡ᤺ᤳᤋᤧ ᤛᤩᤧᤔᤠ ᤁᤧᤈᤥ᤺ᤰᤗ॥ 22 ᤁᤴ ᤔᤠᤱᤍᤣ ᤛᤠᤱᤃᤪᤠ ᤁᤧᤍᤠ᤺ᤵᤐᤠ ᤆᤫᤠ᤺ᤳᤋᤡᤴ ᤁᤧᤛᤠᤵᤐᤥ᤺ᤰᤁᤥ ᤗᤠ᤺ᤳᤋᤠᤱ ᤁᤢᤛᤠᤵᤐᤥᤰ ᤁᤧᤎᤱᤔᤠ ᤏᤢ ᤁᤢᤛ᤻ᤛᤠ ᤔᤧᤴᤕᤠᤰᤔᤏᤠᤔᤠ ᤁᤧᤈᤥ᤺ᤰᤗ॥” “‘ᤂᤧᤒᤩᤠᤱ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤖ “ᤀᤠᤔᤡᤴ. ᤀᤰᤋᤱᤒᤠᤀᤣ ᤐᤥᤱᤗ॥” 23 “‘ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤔᤠᤱᤍᤣ ᤛᤠᤱᤃᤪᤠᤜᤠ᤹ ᤛᤠᤵᤗᤠᤌ᤺ᤱᤔᤥ ᤛᤠᤵᤋᤢᤖ ᤂᤧᤒᤩᤠᤱ ᤁᤧᤄᤡ᤺ᤰᤐᤠ ᤆᤫᤠ᤺ᤳ ᤁᤧᤕᤠᤰᤐᤠ ᤂᤥᤷᤕᤠᤀᤥ ᤂᤧᤴ ᤁᤣ᤺ᤳᤋᤢᤀᤠᤱ ᤘᤠᤜᤵᤋᤢᤍᤣᤛᤢᤖ. 24 ᤂᤶᤓᤩᤠᤱ ᤂᤢᤏᤧ᤹ ᤂᤧᤴ ᤔᤧᤴᤇᤢᤔᤠᤴ ᤂᤧᤴ ᤔᤠᤱᤍᤣ ᤁᤧᤍᤠ᤺ᤵᤐᤠ ᤁᤧᤄᤡ᤺ᤰᤐᤠ ᤆᤫᤠ᤺ᤳᤋᤡᤴ ᤌᤢᤱᤔᤠ ᤐᤠᤱᤄᤢᤖ. ᤜᤧᤰᤁᤩᤠᤱ ᤂᤧᤴ ᤔᤠᤱᤍᤣ ᤁᤧᤍᤠ᤺ᤵᤐᤠ ᤆᤫᤠ᤺ᤳᤋᤡᤴ ᤂᤧᤴ ᤔᤧᤴᤇᤢᤔᤠᤀᤥ ᤗᤠ᤺ᤳᤋᤠᤱ ᤂᤢᤏᤧ᤹ ᤀᤠᤵᤋᤡᤰᤛᤠᤔᤠ ᤆᤥ᤺ᤰᤏᤧᤓᤃᤪ ᤂᤧᤴ ᤆᤫᤠ᤺ᤳᤋᤡᤸᤗᤧ ᤛᤠ᤹ᤖᤡᤰ ᤁᤧᤍᤢᤰᤔᤠ ᤐᤥᤱᤗ ᤕᤠ᤺ᤴᤍᤢ᤹॥ 25 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤏᤠᤜᤧᤶᤔᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤜᤢᤰᤁᤥᤗᤠᤶ ᤕᤠᤱᤛᤡᤱᤅᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤴ ᤐᤥᤃᤢᤃᤧᤴ ᤛᤡᤍᤢᤱᤈᤓᤠᤴ ᤌᤠ᤺ᤱ ᤐᤰᤂᤢᤖ. ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤋᤠᤖᤢᤖ॥ 26 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤗᤠᤶ ᤜᤢᤰᤐᤰ ᤌᤡᤰ ᤕᤠᤱᤛᤡᤱᤗ ᤜᤧᤰᤁᤩᤠᤱ ᤏᤡᤱᤘᤠ᤹ᤛᤥᤰ ᤛᤡᤍᤢᤱᤈᤓᤠ ᤋᤱᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤂᤧᤴ ᤔᤡᤎᤡᤰᤂᤢᤖ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤂᤧᤴ ᤆᤫᤠ᤺ᤳᤋᤡᤴ ᤂᤧᤴ ᤔᤧᤴᤇᤢᤔᤠᤴ ᤌᤢᤱᤔᤠ ᤐᤠᤱᤄᤢᤖ॥ 27 ᤀᤠᤸᤗ ᤂᤢᤏᤧ᤹ ᤂᤧᤴ ᤔᤧᤴᤇᤢᤔᤠᤴ ᤆᤫᤠ᤺ᤳ ᤌᤢᤱᤔᤠ ᤐᤠᤱᤄᤢᤸᤗᤧ. ᤂᤧᤴ ᤑᤧᤳᤗᤠ᤹ᤖᤧᤀᤠᤱ ᤘᤠ᤹ ᤜᤧᤰᤁᤩᤠᤱ ᤂᤧᤸᤗᤧ ᤂᤢᤏᤧ᤹ ᤁᤢᤕᤧᤶᤒᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤑᤧᤴᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹ᤏᤧᤓᤃᤪ. ᤂᤧᤴ ᤔᤠᤱᤍᤣ ᤁᤧᤍᤠ᤺ᤵᤐᤠ ᤆᤫᤠ᤺ᤳᤋᤡᤴ ᤂᤢᤏᤧ᤹ ᤁᤢᤛᤠᤵᤐᤥ᤺ᤰᤁᤥ ᤗᤠ᤺ᤳᤋᤠᤱ ᤛᤠ᤹ᤖᤡᤰ ᤌ᤺ᤵᤔᤠᤀᤣ ᤔᤧᤛᤢᤰᤋᤢᤴᤗ ᤌᤠᤖᤡᤰ ᤋᤢᤰ॥ ᤂᤧᤸᤗᤧ ᤁᤢᤛᤠᤵᤐᤥ᤺ᤰᤁᤡᤴ ᤌᤱᤍᤢ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛ᤻ᤛᤠ ᤔᤧᤴᤕᤠᤰᤔᤏᤠᤔᤠ ᤐᤥᤱ᤹. ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠᤴ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤠᤱᤍᤣ ᤛᤠᤱᤃᤪᤠ ᤁᤧᤍᤠ᤺ᤵᤔᤠ ᤐᤥᤱ᤹॥ 28 ᤁᤖ ᤂᤧᤴ ᤔᤧᤴᤇᤢᤔᤠᤴ ᤑᤧᤳᤔᤧᤴᤗᤠ᤹ᤀᤣ ᤘᤠ᤹ᤀᤠᤱ ᤁᤢᤀᤠᤵᤋᤡᤰ ᤀᤠᤛᤢᤳᤌᤥ ᤔᤧᤶᤒᤥᤱᤅᤣ ᤘᤠ᤹ᤏᤧᤓᤃᤪ. ᤂᤧᤴ ᤀᤠᤵᤋᤡᤰ ᤔᤧ᤺ᤴᤏᤣᤔᤠ ᤁᤢᤍᤥ᤺ᤵᤔᤠ ᤐᤥᤱᤅᤠᤱ ᤛᤠᤃᤵᤔᤠᤖᤧ ᤗᤠᤃᤡ ᤔᤧᤴᤇᤢᤰᤔᤠ ᤐᤥᤱᤔᤠ ᤛᤢᤰ॥ 29 “‘ᤁᤢᤕᤧᤶᤒᤠ᤺ᤸᤗᤧ ᤁᤢᤕᤢᤰᤁᤥ ᤁᤧᤘᤠ᤹ᤔᤠ ᤔᤣ᤺ᤳᤋᤡᤴ ᤋᤠᤰᤁᤴ ᤜᤧᤰᤁᤩᤠᤱ ᤀᤡᤱᤗᤧᤰᤛᤫᤠᤔᤠ ᤐᤥᤱᤅᤠᤱ ᤀᤠᤛᤢᤳᤌᤥ ᤁᤧᤒᤥᤱᤔᤠ. 30 ᤀᤡᤃᤪ ᤏᤡᤱᤘᤠ᤹ᤀᤥ ᤏᤠᤜᤧᤴ ᤁᤧᤀᤡ᤺ᤵᤐᤠᤀᤠᤱ ᤁᤢᤔᤣᤳ ᤔᤡᤰᤆᤥ ᤁᤧᤒᤥ᤹ᤒᤠᤸᤗᤧ ᤗᤠᤃᤡ ᤌᤡᤶᤒᤣ ᤀᤠᤶᤓᤠ ᤁᤴᤗᤥ॥ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤔᤧᤴᤇᤢᤔᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤕᤧᤵᤛᤢᤖ. ᤜᤧᤰᤁᤩᤠᤱ ᤁᤴ ᤌᤡᤶᤒᤣᤀᤡᤴ ᤁᤧᤖᤧᤰ ᤂᤢᤏᤧ᤹ ᤁᤢ᤺ᤳᤋᤢᤖ॥ 31 ᤂᤧᤒᤩᤠᤱ ᤂᤧᤴ ᤁᤢᤕᤧᤶᤒᤠ᤺ᤴ ᤁᤢᤓᤠ ᤐᤖᤡᤰᤐᤠ ᤑᤧᤴᤕᤠ᤺ᤶᤒᤰᤗᤠᤶ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤥᤱ᤹. ᤁᤖ ᤂᤧᤴ ᤔᤧᤴᤇᤢᤔᤠ᤺ᤸᤗᤧᤃ ᤂᤢᤏᤧ᤹ ᤆᤥᤃᤢᤒᤠ ᤁᤢᤓᤧᤴ ᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱ ᤋᤢᤔᤢᤖᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.