ᤂᤠᤏᤡ᤺ᤳ 35 - LIFOTNTᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤂᤥᤔᤠ ᤗᤰ 1 ᤕᤖᤡᤜᤥ ᤁᤢᤍᤥ᤺ᤵᤔᤠ ᤏᤠᤱᤃᤧᤴ ᤐᤡᤛᤠᤱ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤔᤥᤀᤠᤒᤒᤠ ᤏᤧᤏᤧᤒᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤂᤡᤏᤡ᤹ ᤕᤢᤰᤁᤥ ᤁᤧᤎᤠᤒᤠ ᤗᤰᤗᤠᤶ ᤗᤧᤒᤡᤜᤠ᤹ ᤕᤢᤱᤔᤠᤖᤧ ᤗᤠᤃᤡ ᤕᤧᤰᤕᤰᤜᤠ᤹ ᤐᤡᤖᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤀᤡᤱᤈᤠᤱ ᤐᤡᤖᤧᤛᤧ᤹॥ ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤜᤠ᤹ᤖᤧ ᤁᤒᤪᤡᤱ ᤐᤡᤛᤠᤱᤒᤠ ᤌᤰᤛᤠ ᤆᤠᤖᤠᤶᤔᤠᤍᤧᤴᤏᤥᤒᤠ ᤗᤠᤈᤣ᤹ᤜᤠ᤹ ᤗᤧᤒᤡᤜᤠ᤹ ᤐᤡᤖᤧᤶᤛᤡᤶᤔᤧ᤹॥ 3 ᤕᤧᤰᤕᤰᤜᤠ᤹ᤀᤥ ᤆᤠᤀᤣ ᤂᤧᤱᤜᤠ᤹ ᤔᤧᤕᤢᤱᤗ॥ ᤐᤡᤳᤌᤰᤛᤠ ᤆᤠᤖᤠᤶᤔᤠᤍᤧᤴᤜᤠ᤹ ᤆᤠᤀᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤡᤵᤔᤠ ᤐᤡᤳ. ᤔᤧᤸᤗᤢᤰ ᤔᤧ᤺ᤴᤍᤠ ᤏᤢ ᤂᤢᤴᤇᤡ᤹ ᤘᤣ᤹ ᤌᤰᤛᤠᤜᤠ᤹ᤖᤧ ᤗᤠᤃᤡ ᤐᤥᤱᤗ॥ 4 “ᤕᤧᤰᤕᤰᤜᤠ᤹ᤀᤥᤒᤠ ᤀᤠᤳᤋᤡᤴ ᤀᤠᤳᤋᤡᤴ ᤐᤡᤳᤌᤰᤛᤠ ᤆᤠᤖᤠᤶᤔᤠᤍᤧᤴᤜᤠ᤹ ᤂᤡᤏᤡ᤹ ᤗᤧᤒᤡᤜᤠ᤹ ᤁᤧᤒᤡᤖᤢᤶᤛᤡᤶ᤹. ᤂᤧᤴ ᤕᤧᤰᤕᤰᤜᤠ᤹ᤀᤥᤒᤠ ᤗᤢᤱᤎᤠᤰᤜᤠ᤹ᤗᤠᤶ ᥇.᥆᥆᥆ ᤜᤢᤰᤛᤡᤰ ᤔᤠ᤺ᤱᤄᤠ ᤌᤠᤖᤡᤰ ᤑᤧᤓᤧ ᤁᤧᤗ᤹ᤒᤠ ᤁᤧᤒᤣ᤺ᤰᤐᤠ ᤐᤥᤱᤔᤠ ᤐᤥᤱ᤹॥ 5 ᤕᤧᤰᤕᤰᤁᤡᤸᤗᤧ ᤗᤠ᤺ᤰᤁᤠᤳ ᤗᤧᤵᤔᤠᤱ ᤏᤠᤱᤃᤧᤴ ᤐᤡᤛᤠᤱ ᥈.᥆᥆᥆ ᤜᤢᤰᤛᤡᤰ. ᤗᤠᤱᤃᤧᤳ ᤐᤡᤛᤠᤱ ᥈.᥆᥆᥆ ᤜᤢᤰᤛᤡᤰ. ᤏᤠᤶᤎᤠ ᤐᤡᤛᤠᤱ ᥈.᥆᥆᥆ ᤜᤢᤰᤛᤡᤰ ᤏᤢ ᤌᤠᤱᤃᤧᤳ ᤐᤡᤛᤠᤱ ᥈.᥆᥆᥆ ᤜᤢᤰᤛᤡᤰ. ᤕᤧᤰᤕᤰᤁᤡᤴ ᤁᤢᤗᤢᤶᤔᤥ ᤆᤢᤰᤗ ᤛᤡ᤺ᤰᤋᤧᤶᤔᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤁᤥᤒᤠ ᤐᤡᤳᤌᤰᤛᤠ ᤆᤠᤖᤠᤶᤔᤠᤍᤧᤴᤏᤡᤴ ᤜᤠᤒᤠ ᤁᤴᤗᤥ॥ ᤛᤧ᤺ᤵᤛᤡᤱᤔᤠᤍᤧᤴ ᤕᤧᤰᤕᤰᤜᤠ᤹ ( ᤛᤠᤶᤕᤥ ᤀᤡᤱ ᥇᥏:᥇-᥇᥉ ; ᤕᤜᤥ ᥈᥆:᥇-᥏ ) 6 “ᤂᤡᤏᤡ᤹ ᤗᤧᤒᤡᤜᤠ᤹ ᤁᤧᤒᤡᤖᤢᤶᤛᤡᤶᤒᤠ ᤕᤧᤰᤕᤰᤜᤠ᤹ᤀᤥ ᤋᤢᤰᤛᤡᤃ ᤛᤧ᤺ᤵᤛᤡᤱᤔᤠ ᤕᤧᤰᤕᤰ ᤐᤥᤱ᤹॥ ᤀᤠᤴᤈᤠᤏᤡ᤺ᤸᤗᤧ ᤔᤏᤠ ᤁᤧᤛᤧᤵᤐᤧᤴ ᤂᤧᤵᤔᤥ ᤂᤧᤳᤇᤡᤱ ᤐᤣ᤺ᤰᤁᤠᤱ ᤕᤢᤱᤔᤠ ᤛᤢᤰ॥ ᤁᤴᤜᤠ᤹ᤏᤢ᤺ᤸᤗᤧ ᤘᤣ᤹ ᤂᤡᤏᤡ᤹ ᤗᤧᤒᤡᤜᤠ᤹ ᤗᤡᤒᤥᤱᤅᤠᤱ ᤏᤧᤳᤇᤡ ᤕᤧᤰᤕᤰᤜᤠ᤹ ᤐᤡᤖᤧᤶᤛᤡᤶᤔᤧ᤹॥ 7 ᤗᤧᤒᤡᤜᤠ᤹ ᤐᤡᤔᤠᤛᤡ ᤁᤧᤒᤥᤱᤒᤠ ᤕᤧᤰᤕᤰ ᤏᤢ ᤂᤧᤵᤔᤥᤒᤠ ᤐᤡᤳᤌᤰᤛᤠ ᤆᤠᤖᤠᤶᤔᤠᤍᤧᤴᤜᤠ᤹ ᤁᤧᤖᤧᤰᤗᤧ ᤗᤡᤒᤥᤱᤅᤠᤱ ᤕᤧᤳᤇᤡ ᤐᤥᤱᤔᤠ ᤐᤥᤱ᤹॥ 8 ᤀᤡᤛᤪᤠᤀᤡᤗᤡᤜᤠ᤹ᤀᤥ ᤕᤖᤡᤰ ᤗᤰᤁᤧᤄᤥᤒᤠᤜᤠ᤹ᤗᤠᤶ ᤕᤖᤡᤰ ᤏᤢ ᤀᤠᤈᤧ᤺ᤳᤇᤡᤰᤗᤰ ᤗᤰᤁᤧᤄᤥᤒᤠᤜᤠ᤹ᤗᤠᤶ ᤀᤠᤈᤧ᤺ᤳᤇᤡᤰᤗᤰ ᤕᤧᤰᤕᤰᤜᤠ᤹ ᤔᤧᤳᤋᤠᤛᤡᤶᤔᤧ᤹॥ ᤀᤠᤳᤋᤡᤴ ᤀᤠᤳᤋᤡᤴᤜᤠ᤹ᤖᤧ ᤀᤠᤰᤂᤩᤠᤖᤡᤰ ᤕᤧᤰᤕᤰᤜᤠ᤹ ᤔᤧᤃᤳᤋᤢ᤹. ᤆᤡᤈᤧᤵᤋᤧᤶᤔᤧ᤹ᤀᤠᤱ ᤂᤧᤴ ᤁᤢᤀᤡᤛᤡᤰ ᤕᤧᤰᤕᤰᤜᤠ᤹ ᤗᤧᤒᤡᤜᤠ᤹ ᤐᤡᤖᤧᤶᤛᤡᤶᤔᤧ᤹॥” 9 ᤕᤜᤘᤣ ᤍᤠᤱᤒᤧᤸᤗᤧ ᤕᤠᤶᤔᤥ ᤔᤥᤛᤠᤴ ᤔᤧᤳᤋᤢ. 10 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹—‘ᤂᤡᤏᤡ᤹ ᤕᤷᤍᤏ ᤘᤜ᤺ᤱᤅᤡᤴ ᤁᤧᤃᤠ᤺ᤰᤋᤢᤶᤔᤡᤸᤗᤧ ᤁᤏᤠᤏ ᤗᤠᤈᤣ᤹ᤀᤥ ᤁᤧᤃᤧᤖᤡᤀᤠᤱ. 11 ᤂᤡᤏᤡ᤹ ᤂᤧᤵᤔᤥ ᤁᤢᤓᤠ ᤛᤧ᤺ᤵᤛᤡᤱᤔᤠ ᤕᤧᤰᤕᤰᤜᤠ᤹ ᤛᤣᤃᤧᤶᤔᤧ᤹. ᤂᤶᤓᤩᤠᤱ ᤁᤢᤓᤠᤖᤧ ᤀᤠᤴᤈᤠᤏᤡ᤺ᤸᤗᤧ ᤔᤏᤠ ᤛᤩᤧᤖᤢᤏᤧᤓᤃᤪ ᤂᤧᤴ ᤔᤏᤠ ᤁᤧᤛᤧᤵᤐᤧᤴ ᤂᤧᤵᤔᤥ ᤂᤧᤳᤇᤡᤱ ᤐᤣ᤺ᤰᤗ॥ 12 ᤔᤠᤰᤂᤡᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤔᤠ ᤁᤧᤃᤥ᤺ᤵᤐᤠᤗᤠᤶ ᤂᤧᤳᤇᤡᤱᤔᤠᤖᤧ ᤗᤠᤃᤡ ᤂᤧᤴ ᤕᤧᤰᤕᤰᤜᤠ᤹ ᤛᤧ᤺ᤵᤛᤡᤱᤔᤠᤍᤧᤴ ᤐᤥᤱ᤹. ᤜᤧᤰᤁᤩᤠᤱ ᤂᤧᤴ ᤔᤏᤠ ᤁᤧᤛᤧᤵᤐᤧᤴ ᤂᤠᤛᤧᤴᤗᤧ ᤗᤠᤃᤡ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤋᤃᤡ ᤔᤧᤴᤕᤧᤶᤔᤧ ᤌᤧᤶᤒᤠ ᤔᤧᤴᤇᤧᤖᤢᤴᤗ॥ 13 ᤂᤡᤏᤡ᤹ ᤁᤧᤒᤡᤖᤢᤶᤛᤡᤶᤒᤠ ᤛᤧ᤺ᤵᤛᤡᤱᤔᤠᤍᤧᤴ ᤕᤧᤰᤕᤰᤜᤠ᤹ ᤋᤢᤰᤛᤡ ᤕᤠᤖᤡᤰ ᤏᤧᤖ॥ 14 ᤕᤷᤍᤏ ᤁᤳᤏᤠᤜᤠᤱᤍᤠᤱ ᤏᤠᤱᤃᤧᤴ ᤐᤡᤛᤠᤱ ᤛᤢᤶᤛᤡ. ᤁᤏᤠᤏ ᤗᤠᤈᤣ᤹ᤀᤥ ᤛᤢᤶᤛᤡ ᤛᤧ᤺ᤵᤛᤡᤱᤔᤠ ᤕᤧᤰᤕᤰᤜᤠ᤹ ᤛᤧᤴᤍᤠᤶᤔᤧ᤹॥ 15 ᤀᤡᤛᤪᤠᤀᤡᤗᤡᤜᤠ᤹. ᤘᤧᤵᤔᤡᤒᤠᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤧᤕᤢᤱᤒᤠ ᤘᤣ᤹ ᤔᤏᤠᤜᤠ᤹ᤖᤧ ᤗᤠᤃᤡ ᤂᤧᤴ ᤕᤧᤰᤕᤰᤜᤠ᤹ᤀᤥ ᤋᤢᤰᤛᤡ ᤆᤠᤀᤣ ᤛᤧ᤺ᤵᤛᤡᤱᤔᤠ ᤕᤧᤰᤕᤰᤜᤠ᤹ ᤐᤥᤱ᤹॥ ᤁᤶᤓᤗ᤹ᤖᤡᤰ ᤀᤠᤴᤈᤠᤏᤡ᤺ᤸᤗᤧ ᤁᤢᤓᤠ ᤔᤏᤠ ᤁᤧᤛᤧᤵᤐᤠ ᤔᤏᤠᤴ ᤂᤧᤵᤔᤥ ᤂᤧᤳᤇᤡᤱᤔᤠ ᤐᤣ᤺ᤰᤔᤠ ᤛᤢᤰ॥ 16 “‘ᤁᤢᤓᤠ ᤔᤏᤠ᤺ᤸᤗᤧ ᤑᤧᤴᤈᤣ᤹ᤀᤡᤸᤗᤧ ᤁᤢᤓᤠ ᤔᤏᤠ ᤜᤡᤵᤋᤢ ᤛᤩᤧᤖᤢᤏᤧᤓᤃᤪ ᤂᤧᤱᤃ ᤔᤏᤠ ᤁᤧᤛᤧᤵᤐᤠᤀᤣᤖᤥ॥ ᤂᤧᤴ ᤔᤏᤠᤴ ᤛᤡᤔᤧᤸᤗᤧ ᤂᤢᤶᤍᤡᤱ ᤐᤡᤔᤠᤀᤣ ᤐᤥᤱ᤹॥ 17 ᤁᤢᤓᤠ ᤔᤏᤠ᤺ᤸᤗᤧ ᤁᤢᤓᤠ ᤗᤢᤱᤅᤡᤸᤗᤧ ᤗᤧᤵᤋᤢᤀᤠᤱ ᤂᤧᤴ ᤛᤩᤧᤏᤧᤓᤃᤪ ᤂᤧᤴ ᤔᤏᤠ ᤁᤧᤛᤧᤵᤐᤠᤀᤣᤖᤥ॥ ᤂᤧᤴ ᤔᤏᤠ ᤁᤧᤛᤧᤵᤐᤧᤴ ᤛᤡᤔᤧᤸᤗᤧ ᤂᤢᤶᤍᤡᤱ ᤐᤡᤔᤠᤀᤣ ᤐᤥᤱ᤹॥ 18 ᤀᤡᤃᤪ ᤁᤢᤓᤠ ᤔᤏᤠ᤺ᤸᤗᤧ ᤛᤡᤱ ᤂᤈᤢᤶ ᤂᤕᤠᤴ ᤕᤠᤱᤛᤡᤱᤅᤠᤱ ᤁᤢᤓᤠ ᤜᤡᤵᤋᤢᤀᤠᤱ ᤂᤧᤴ ᤛᤩᤧᤏᤧᤓᤃᤪ ᤂᤧᤴ ᤔᤏᤠ ᤁᤧᤛᤧᤵᤐᤠᤀᤣ ᤐᤥᤱ᤹॥ ᤂᤧᤴ ᤔᤏᤠ ᤁᤧᤛᤧᤵᤐᤧᤴ ᤛᤡᤔᤧᤸᤗᤧ ᤂᤢᤶᤍᤡᤱ ᤐᤡᤔᤠᤀᤣ ᤐᤥᤱ᤹॥ 19 ᤔᤠᤰᤂᤡᤸᤗᤧ ᤁᤢᤗᤧᤰᤘᤠ ᤔᤠᤰᤂᤡ᤹ᤀᤣ ᤏᤢ᤺ᤰᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤧ ᤂᤧᤴ ᤔᤏᤠ ᤁᤧᤛᤧᤵᤐᤧᤴ ᤛᤩᤧᤖᤢᤖ॥ ᤂᤧᤴ ᤋᤢᤔᤢᤏᤢᤔᤧ᤺ᤴᤏᤣ ᤂᤢᤏᤧ᤹ ᤂᤧᤴ ᤔᤏᤠ ᤁᤧᤛᤧᤵᤐᤧᤴ ᤛᤩᤧᤖᤢᤖ॥ 20 ᤁᤢᤓᤠ ᤔᤏᤠ᤺ᤸᤗᤧ ᤆᤡ᤺ᤳᤋᤢᤀᤠᤱ ᤁᤢᤓᤠ ᤆᤴᤍᤢ ᤛᤩᤧᤖᤢ ᤀᤡᤃᤪ ᤛᤡᤱᤀᤠ᤺ᤳᤋᤡᤸᤗᤧ ᤗᤧᤵᤋᤢ ᤛᤩᤧᤖᤢ᤹. 21 ᤁᤡᤃᤪ ᤜᤢᤰᤁᤡᤸᤗᤧ ᤜᤡᤵᤋᤢᤀᤠᤱ ᤁᤢᤓᤠ ᤛᤩᤧᤖᤢᤏᤧᤓᤃᤪ. ᤁᤧᤜᤡᤵᤐᤠ ᤔᤏᤠᤴ ᤛᤧᤵᤔᤠᤀᤣ ᤐᤥᤱ᤹॥ ᤂᤧᤱᤃ ᤔᤏᤠ ᤁᤧᤛᤧᤵᤐᤠᤖᤥ॥ ᤔᤠᤰᤂᤡᤸᤗᤧ ᤁᤢᤗᤧᤰᤘᤠ ᤔᤠᤰᤂᤡ᤹ᤀᤣ ᤁᤢᤗᤧᤰᤘᤠ ᤏᤢ᤺ᤰᤔᤠ ᤏᤡᤱᤘᤠ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤧ ᤂᤧᤴ ᤀᤠᤳᤋᤡ ᤋᤢᤔᤢ᤹ ᤂᤧᤵᤔᤥᤀᤣ ᤛᤩᤧᤖᤢᤖ॥ 22 “‘ᤁᤖ ᤁᤢᤓᤠ ᤔᤏᤠ᤺ᤸᤗᤧ ᤁᤢᤓᤠ ᤀᤠᤴᤈᤠᤏᤡ᤺ᤸᤗᤧ ᤆᤴᤍᤢ ᤛᤩᤧᤖᤢ᤹. ᤀᤡᤃᤪ ᤁᤢᤓᤠ ᤗᤢᤱᤛᤡᤱ ᤗᤠᤵᤑᤢᤛᤢᤍᤣᤛᤢᤸᤗᤧ ᤕᤠᤱᤄᤢᤀᤠᤱ ᤂᤧᤴ ᤛᤩᤧ. 23 ᤁᤡᤃᤪ ᤏᤡᤱᤔᤡ ᤜᤥ᤺ᤵᤋᤧᤒᤠ ᤏᤢ ᤂᤠ᤺ᤶᤔᤠ ᤏᤡᤱᤘᤠ᤹ ᤔᤧᤴᤈᤥ᤺ᤰᤔᤏᤠᤒᤠ ᤔᤏᤠ᤺ᤸᤗᤧ ᤗᤠᤵᤐᤢᤱᤍᤣᤛᤢᤒᤠ ᤗᤢᤱᤅᤡᤸᤗᤧ ᤕᤠᤱᤄᤢᤀᤠᤱ ᤁᤢᤓᤠ ᤔᤏᤠ ᤛᤩᤧᤏᤧᤓᤃᤪ. 24 ᤛᤱᤈᤢᤶᤓᤥ᤺ᤸᤗᤧ ᤔᤏᤠ ᤁᤧᤛᤧᤵᤐᤧᤴ ᤏᤢ ᤔᤠᤰᤂᤡ᤹ ᤁᤢᤗᤧᤰᤘᤠ ᤏᤢ᤺ᤰᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤸᤗᤧ ᤂᤢᤴᤇᤡ᤹ ᤗᤢᤶᤔᤥ ᤁᤴ ᤌᤡᤶᤜᤠ᤹ ᤁᤢᤀᤡᤛᤡᤰ ᤂᤠᤛᤧᤴ ᤆᤥ᤺ᤰᤔᤠᤛᤡ ᤐᤥᤱ᤹॥ 25 ᤛᤱᤈᤢᤶᤓᤥ᤺ᤸᤗᤧ ᤂᤧᤴ ᤔᤏᤠ ᤁᤧᤛᤧᤵᤐᤧᤴ ᤔᤠᤰᤂᤡᤸᤗᤧ ᤁᤢᤗᤧᤰᤘᤠ ᤔᤠᤰᤂᤡ᤹ ᤏᤢ᤺ᤰᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤸᤗᤧ ᤁᤢᤜᤢᤰᤁᤥᤗᤠᤶ ᤔᤧᤛᤧᤴᤍᤢᤖ. ᤜᤧᤰᤁᤩᤠᤱ ᤂᤧᤴ ᤂᤧᤳᤇᤡᤱᤅᤠᤱ ᤐᤣᤒᤠ ᤛᤧ᤺ᤵᤛᤡᤱᤔᤠᤍᤧᤴᤏᤥᤀᤣ ᤂᤧᤴ ᤔᤧᤒᤠᤱᤄᤢ ᤔᤧᤍᤣᤛᤢᤖ॥ ᤂᤧᤒᤩᤠᤱ ᤛᤣᤛᤣᤒᤠ ᤏᤡ᤺ᤱᤃᤣᤸᤗᤧ ᤔᤠᤱᤌᤥ᤺ᤰᤔᤠ ᤁᤧᤒᤥᤱᤒᤠ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤔᤧᤛᤡᤏᤧᤴᤗ ᤌᤠᤖᤡᤰ ᤂᤧᤴ ᤔᤏᤠᤴ ᤜᤠᤒᤠ ᤂᤧᤵᤔᤥᤀᤣ ᤘᤠ᤹ᤖ॥ 26 “‘ᤁᤖ ᤂᤧᤴ ᤔᤏᤠ ᤁᤧᤛᤧᤵᤐᤧᤴ ᤁᤢᤓᤠ ᤕᤧᤶᤔᤥ ᤂᤢᤏᤧ᤹ ᤂᤧᤳᤇᤡᤱᤅᤠᤱ ᤐᤣᤒᤠ ᤛᤧ᤺ᤵᤛᤡᤱᤔᤠᤍᤧᤴ ᤕᤧᤰᤕᤰᤁᤥᤗᤠᤶ ᤗᤠ᤺ᤰᤁᤠᤳ ᤐᤣ. 27 ᤜᤧᤰᤁᤩᤠᤱ ᤔᤠᤰᤂᤡᤸᤗᤧ ᤁᤢᤗᤧᤰᤘᤠ ᤔᤠᤰᤂᤡ᤹ ᤏᤢ᤺ᤰᤔᤠ ᤁᤧᤃᤥ᤺ᤵᤐᤧᤸᤗᤧ ᤁᤶᤓᤗ᤹ᤖᤡᤰ ᤂᤧᤴ ᤗᤠ᤺ᤰᤁᤠᤳ ᤋᤢᤔᤢᤀᤠᤱ ᤔᤏᤠ ᤁᤧᤛᤧᤵᤐᤧᤴ ᤛᤩᤧᤖᤢᤏᤧᤓᤃᤪ. ᤂᤢᤏᤧ᤹ ᤔᤠᤰᤂᤡ᤹ ᤁᤧᤛᤧᤒᤠ ᤀᤠᤵᤋᤡᤰᤛᤠᤒᤠ ᤔᤧᤒᤥᤱᤏᤧᤴ॥ 28 ᤌᤣᤀᤠᤱᤓᤧᤸᤗᤧ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤔᤧᤴᤇᤡᤀᤣ ᤌᤠᤖᤡᤰ ᤂᤢᤏᤧ᤹ ᤕᤧᤰᤕᤰᤁᤥᤀᤣ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤕᤢᤱᤔᤠ ᤁᤧᤒᤥᤱᤒᤠ ᤘᤕᤧ॥ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤛᤡᤀᤠᤱᤗᤰ ᤂᤧᤴ ᤔᤏᤠᤴ ᤂᤢᤏᤧ᤹ ᤁᤢᤗᤰᤂᤥᤔᤠ ᤗᤰ ᤗᤠᤈᤣ᤹ᤀᤥ ᤏᤢ᤺ᤱᤒᤣ᤺ᤰᤗ॥ 29 “‘ᤂᤡᤏᤡ᤹ ᤀᤠᤳᤋᤡ ᤁᤧᤕᤢᤅᤡᤛᤠᤱ ᤂᤡᤏᤡ᤹ ᤏᤢ ᤂᤡᤏᤡ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤡᤒᤠ ᤁᤧᤍᤠᤒᤠ ᤌᤠ᤺ᤰᤜᤠ᤹ᤀᤥ ᤁᤴ ᤌᤡᤶᤒᤣ ᤛᤠᤰᤌᤡᤶᤔᤡᤴ ᤁᤢᤀᤡᤛᤡ᤺ᤰᤛᤡ᤺ᤰ ᤘᤠ᤹॥ 30 “‘ᤁᤢᤓᤠ ᤔᤏᤠ᤺ᤸᤗᤧ ᤁᤢᤓᤠ ᤛᤩᤧᤖᤢᤏᤧᤓᤃᤪ ᤂᤧᤴ ᤔᤏᤠ ᤁᤧᤛᤧᤵᤐᤧᤴ ᤏᤧᤳᤇᤡ ᤋᤥ᤺ᤴᤍᤡ ᤁᤧᤒᤡᤒᤠᤜᤠ᤹ᤖᤧ ᤐᤠ᤺ᤳᤇᤢᤒᤠ ᤐᤷᤔᤠᤱᤃᤡ ᤁᤢᤀᤡᤛᤡ᤺ᤰᤗᤰ ᤂᤢᤏᤧ᤹ ᤛᤡᤔᤧᤸᤗᤧ ᤂᤢᤶᤍᤡᤱ ᤂᤥᤛᤢᤖ॥ ᤁᤖ ᤗᤳᤇᤠ ᤋᤥ᤺ᤴᤍᤡᤖᤧ ᤐᤠ᤺ᤳᤋᤢᤒᤠ ᤐᤷᤔᤠᤱᤃᤡ ᤐᤠ᤺ᤴᤏᤥᤖᤰ ᤜᤠ᤺ᤳᤋᤠᤱ ᤛᤡᤔᤧᤸᤗᤧ ᤂᤢᤶᤍᤡᤱ ᤔᤧᤒᤡᤖᤧᤶᤔᤡᤴᤏᤧ᤹॥ 31 “‘ᤛᤡᤔᤧᤸᤗᤧ ᤂᤢᤶᤍᤡᤱ ᤂᤥᤔᤠ ᤁᤧᤗᤠ᤹ᤒᤠ ᤔᤏᤠ ᤁᤧᤛᤧᤵᤐᤠᤴ ᤛᤧ᤺ᤵᤔᤠᤖᤧ ᤗᤠᤃᤡ ᤂᤡᤏᤡ᤹ ᤁᤢᤎᤧ᤹ᤔᤠ ᤕᤠᤱ ᤔᤧᤍᤠ᤺ᤰᤋᤠᤶᤔᤡᤴᤏᤧ᤹॥ ᤂᤧᤸᤗᤧ ᤛᤡᤔᤧᤸᤗᤧ ᤂᤢᤶᤍᤡᤱ ᤂᤥᤔᤠᤀᤣ ᤐᤥᤱ᤹॥ 32 “‘ᤛᤧ᤺ᤵᤛᤡᤱᤔᤠ ᤕᤧᤰᤕᤰᤁᤥ ᤁᤧᤄᤧᤳᤇᤡᤱ ᤁᤧᤒᤣ᤺ᤰᤐᤥᤗᤠᤶ ᤁᤢᤎᤧ᤹ᤔᤠ ᤕᤠᤱ ᤂᤡᤏᤡ᤹ ᤔᤧᤍᤠ᤺ᤰᤋᤠᤶᤔᤡᤴᤏᤧ᤹. ᤂᤧᤒᤩᤠᤱ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤔᤧᤴᤇᤡᤀᤣ ᤌᤠᤖᤡᤰ ᤂᤧᤴ ᤀᤠᤒᤠᤅᤣ ᤁᤢᤒᤠᤱᤓᤣ᤹ᤀᤥ ᤏᤢ᤺ᤱᤔᤠᤒᤣ᤺ᤰᤔᤠ ᤔᤧᤄᤥᤏᤧᤴᤗ॥ 33 “‘ᤂᤡᤏᤡ᤹ ᤀᤠᤵᤑᤣᤰ ᤗᤠᤈᤣ᤹ᤜᤠ᤹ ᤀᤠᤛᤢᤳᤌᤥ ᤔᤧᤈᤥᤃᤧᤶᤔᤡᤴᤏᤧ᤹॥ ᤌᤣᤀᤠᤱᤓᤧᤸᤗᤧ ᤔᤠᤰᤂᤡᤸᤗᤧ ᤗᤠᤈᤣᤴ ᤀᤠᤛᤢᤳᤌᤥ ᤆᤥᤃᤢ᤹. ᤔᤠᤰᤂᤡ᤹ ᤁᤛᤧᤒᤧᤸᤗᤧ ᤁᤢᤔᤠᤰᤂᤡᤴᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴ ᤔᤠᤰᤂᤡᤸᤗᤧᤀᤠᤱ ᤂᤧᤴ ᤔᤠᤰᤂᤡ᤹ ᤁᤧᤛᤧᤒᤠ ᤗᤠᤈᤣ᤺ᤸᤗᤧ ᤗᤠᤃᤡ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤛᤢᤰᤔᤧᤍᤧᤳᤏᤧᤴ॥ 34 ᤂᤡᤏᤡ᤹ ᤀᤠᤵᤑᤣᤰ ᤁᤧᤕᤢᤅᤡᤒᤠ ᤗᤠᤈᤣᤴ ᤀᤠᤛᤢᤳᤌᤥ ᤔᤧᤈᤥᤃᤧᤶᤔᤡᤴᤏᤧ᤹. ᤂᤧᤵᤔᤥ ᤀᤠᤱᤃᤠ᤹ᤀᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤘᤠ᤹ᤀᤠᤖᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.