ᤂᤠᤏᤡ᤺ᤳ 33 - LIFOTNTᤔᤡᤛᤪᤗᤠᤶ ᤔᤥᤀᤠᤒ ᤌᤠᤖᤡᤰᤐᤠ ᤗᤠᤶᤍᤡᤰ 1 ᤔᤥᤛᤠᤴ ᤏᤢ ᤜᤠᤖᤢᤏᤖᤧ ᤔᤡᤛᤪᤗᤠᤶ ᤗᤠᤶᤗᤥᤛᤢ ᤑᤧᤳᤋᤧᤛᤢᤛᤡᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤡᤛᤪ ᤗᤠᤈᤣᤴ ᤔᤧᤗᤧᤖᤢᤀᤠᤱ ᤀᤣᤃᤠᤱ ᤂᤧᤱᤜᤠ᤹ᤖᤧ ᤀᤠᤳᤋᤡᤴ ᤀᤠᤳᤋᤡᤴ ᤋᤧᤴᤜᤠ᤹ᤀᤥ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤈᤥᤃᤢ ᤂᤧᤴ ᤋᤧᤴᤜᤠ᤹ᤖᤧ ᤐᤥᤎᤰᤁᤡᤴ ᤜᤠᤒᤠ ᤁᤴᤗᤥ॥ 2 ᤗᤠᤶᤍᤡᤰ ᤔᤧᤈᤥᤃᤧᤒᤠ ᤘᤣ᤹ᤘᤣ᤹ ᤋᤧᤴᤜᤠ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤁᤢᤀᤡᤛᤡᤰ ᤔᤥᤛᤠ᤺ᤸᤗᤧ ᤗᤠᤶᤍᤡᤰ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤒᤠ ᤋᤧᤴᤜᤠ᤹ᤖᤧ ᤁᤢᤔᤡᤱ ᤛᤠᤵᤋᤢ॥ ᤂᤧᤱᤜᤠ᤹ᤖᤧ ᤗᤠᤶᤍᤡᤰ ᤔᤧᤈᤥᤃᤢᤒᤠ ᤋᤠ᤹ᤈᤧᤱ ᤐᤠ᤺ᤴᤜᤠ᤹ ᤀᤰᤋᤱᤒᤠ ᤆᤥᤰᤗᤥ— 3 ᤌᤡᤰᤛᤡᤃᤣᤰᤐᤠ ᤗᤠ ᤌᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ ᤖᤠᤔᤛᤣᤛᤗᤠᤶ ᤔᤧᤎᤠᤛᤡᤱ ᤔᤧᤓᤧᤖᤧ॥ ᤌᤡᤰᤛᤡᤃᤣᤰᤐᤠ ᤆᤥ᤺ᤰᤕᤢᤶᤓᤥ᤺ᤸᤗᤧ ᤁᤢᤍᤠ᤺ᤴᤍᤡᤰᤛᤔᤠ ᤁᤧᤖᤧᤰ ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤡᤛᤪᤠᤀᤡᤗᤡᤜᤠ᤹ ᤁᤢᤍᤢᤱᤍᤢᤱ ᤔᤧᤎᤠᤛᤡᤱ ᤔᤧᤓᤧᤖᤧ॥ 4 ᤂᤧᤴ ᤕᤧᤶᤔᤥ ᤔᤡᤛᤪᤡᤜᤠ᤹ᤖᤧ ᤆᤠᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤛᤩᤧᤖᤢᤛᤡᤒᤠ ᤂᤢᤴᤇᤡ᤹ ᤋᤢᤶᤒᤠ ᤛᤠᤜᤠ᤹ ᤆᤣᤗᤢᤵ ᤂ᤺ᤱᤗᤢᤵ ᤔᤧᤵᤔᤠ ᤔᤧᤈᤥᤃᤢᤛᤡᤖ ᤔᤧᤕᤠᤃᤧ॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤂᤠᤛᤧᤴ ᤆᤥᤃᤢᤛᤡᤀᤠᤱ ᤔᤧᤘᤕᤧ॥ 5 ᤀᤡᤛᤪᤠᤀᤡᤗᤡᤜᤠ᤹ ᤖᤠᤔᤛᤣᤛᤗᤠᤶ ᤗᤠᤱᤔᤧᤄᤣᤃᤧ ᤔᤧᤓᤧᤖᤧ ᤜᤧᤰᤁᤩᤠᤱ ᤛᤢᤰᤁᤥᤋᤀᤥ ᤔᤧᤃᤧᤖᤧᤀᤠᤱ ᤕᤠᤱᤔᤧᤎᤥ᤺ᤰᤋᤧ॥ 6 ᤂᤧᤱᤜᤠ᤹ ᤛᤢᤰᤁᤥᤋᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤡᤸᤗᤧ ᤁᤢᤕᤠᤀᤥᤒᤠ ᤀᤣᤌᤠᤔᤀᤥ ᤕᤠᤱᤔᤧᤎᤥ᤺ᤰᤋᤧ॥ 7 ᤀᤣᤌᤠᤔᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤒᤠᤗ ᤛᤣᤑᤥᤏ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤐᤡ-ᤜᤜᤡᤖᤥᤋᤀᤥ ᤔᤧᤏᤢ᤺ᤰᤂᤧ. ᤜᤧᤰᤁᤩᤠᤱ ᤔᤡᤃ᤻ᤍᤥᤗᤏᤢ ᤏᤡ᤺ᤳᤋᤠᤱ ᤕᤠᤱᤔᤧᤎᤥ᤺ᤰᤋᤧ॥ 8 ᤂᤧᤱᤜᤠ᤹ ᤐᤡ-ᤜᤜᤡᤖᤥᤋᤗᤠᤶ ᤔᤧᤗ᤺ᤴᤍᤧᤀᤠᤱ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤡᤸᤗᤧ ᤁᤢᤗᤢᤶᤔᤥᤗᤠᤶ ᤔᤧᤒᤥ᤺ᤰᤂᤧᤖ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤔᤧᤗᤠᤛᤧ॥ ᤂᤧᤱᤜᤠ᤹ ᤛᤢᤶᤕᤠᤴᤒᤠ ᤗᤠᤶ ᤀᤣᤌᤠᤔᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤗᤠᤱᤔᤧᤄᤣᤃᤧᤀᤠᤱ ᤔᤠᤖᤠᤀᤥ ᤕᤠᤱᤔᤧᤎᤥ᤺ᤰᤋᤧ॥ 9 ᤔᤠᤖᤠᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤀᤣᤗᤡᤔᤀᤥ ᤔᤧᤒᤣ. ᤂᤧᤵᤔᤥ ᤌᤡᤒᤥᤱᤅᤠᤱ ᤏᤧᤳᤇᤡ ᤆᤫᤠ᤺ᤳ ᤘᤠᤒᤢᤴᤍᤠᤰᤘᤠ ᤏᤧᤛ᤻ᤛᤧ ᤜᤧᤰᤁᤩᤠᤱ ᤏᤢᤒᤥᤱ ᤂᤧᤒᤰᤛᤡᤱᤜᤠ᤹ ᤕᤢᤅᤧ॥ ᤂᤧᤱᤜᤠ᤹ ᤀᤠᤶᤓᤠ ᤂᤧᤵᤔᤥ ᤕᤠᤱᤔᤧᤎᤥ᤺ᤰᤋᤧ॥ 10 ᤂᤧᤱᤜᤠ᤹ ᤀᤣᤗᤡᤔᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤡᤸᤗᤧ ᤁᤢᤒᤣᤛᤠᤱ ᤕᤠᤱᤔᤧᤎᤥ᤺ᤰᤋᤧ॥ 11 ᤂᤧᤱᤜᤠ᤹ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤥᤏᤢ ᤗᤠᤱᤔᤧᤄᤣᤃᤧᤀᤠᤱ ᤛᤡᤏᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤕᤠᤱᤔᤧᤎᤥ᤺ᤰᤋᤧ॥ 12 ᤂᤧᤱᤜᤠ᤹ ᤛᤡᤏᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤍᤥᤑᤁᤠᤀᤥ ᤕᤠᤱᤔᤧᤎᤥ᤺ᤰᤋᤧ॥ 13 ᤂᤧᤱᤜᤠ᤹ ᤍᤥᤑᤁᤠᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤀᤠᤗᤢᤛᤀᤥ ᤕᤠᤱᤔᤧᤎᤥ᤺ᤰᤋᤧ॥ 14 ᤀᤠᤗᤢᤛᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤖᤐᤡᤍᤡᤔᤀᤥ ᤕᤠᤱᤔᤧᤎᤥ᤺ᤰᤋᤧ. ᤂᤧᤵᤔᤥ ᤔᤏᤠᤜᤠ᤹ᤖᤧ ᤗᤠᤃᤡ ᤌᤢᤱᤔᤠ ᤆᤫᤠ᤺ᤳ ᤔᤧᤏᤧᤛ᤻ᤛᤧᤴ॥ 15 ᤂᤧᤱᤜᤠ᤹ ᤖᤐᤡᤍᤡᤔᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤛᤡᤏᤤᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤕᤠᤱᤔᤧᤎᤥ᤺ᤰᤋᤧ॥ 16 ᤂᤧᤱᤜᤠ᤹ ᤛᤡᤏᤤᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤁᤡᤒᤪᤥᤌ-ᤜᤳᤋᤠᤘᤠᤀᤥ ᤕᤠᤱᤔᤧᤎᤥ᤺ᤰᤋᤧ॥ 17 ᤂᤧᤱᤜᤠ᤹ ᤁᤡᤒᤪᤥᤌ-ᤜᤳᤋᤠᤘᤠᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤜᤛᤣᤖᤥᤋᤀᤥ ᤕᤠᤱᤔᤧᤎᤥ᤺ᤰᤋᤧ॥ 18 ᤂᤧᤱᤜᤠ᤹ ᤜᤛᤣᤖᤥᤋᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤖᤡᤳᤏᤠᤀᤥ ᤕᤠᤱᤔᤧᤎᤥ᤺ᤰᤋᤧ॥ 19 ᤂᤧᤱᤜᤠ᤹ ᤖᤡᤳᤏᤠᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤖᤡᤶᤔᤥᤏ-ᤑᤠᤖᤣᤛᤀᤥ ᤕᤠᤱᤔᤧᤎᤥ᤺ᤰᤋᤧ॥ 20 ᤂᤧᤱᤜᤠ᤹ ᤖᤡᤶᤔᤥᤏ-ᤑᤠᤖᤣᤛᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤗᤡᤒ᤻ᤏᤠᤀᤥ ᤕᤠᤱᤔᤧᤎᤥ᤺ᤰᤋᤧ॥ 21 ᤂᤧᤱᤜᤠ᤹ ᤗᤡᤒ᤻ᤏᤠᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤖᤡᤛ᤻ᤛᤠᤀᤥ ᤕᤠᤱᤔᤧᤎᤥ᤺ᤰᤋᤧ॥ 22 ᤂᤧᤱᤜᤠ᤹ ᤖᤡᤛ᤻ᤛᤠᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤁᤣᤜᤣᤗᤠᤋᤠᤀᤥ ᤕᤠᤱᤔᤧᤎᤥ᤺ᤰᤋᤧ॥ 23 ᤂᤧᤱᤜᤠ᤹ ᤁᤣᤜᤣᤗᤠᤋᤠᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤛᤣᤐᤣᤖ ᤁᤥ᤺ᤰᤔᤠᤀᤥ ᤕᤠᤱᤔᤧᤎᤥ᤺ᤰᤋᤧ॥ 24 ᤂᤧᤱᤜᤠ᤹ ᤛᤣᤐᤣᤖ ᤁᤥ᤺ᤰᤔᤠᤀᤥᤏᤢ ᤗᤠᤱᤔᤧᤄᤣᤃᤧᤀᤠᤱ ᤜᤖᤠᤍᤠᤜᤀᤥ ᤕᤠᤱᤔᤧᤎᤥ᤺ᤰᤋᤧ॥ 25 ᤂᤧᤱᤜᤠ᤹ ᤜᤖᤠᤍᤠᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤔᤂᤣᤗᤥᤋᤀᤥ ᤕᤠᤱᤔᤧᤎᤥ᤺ᤰᤋᤧ॥ 26 ᤔᤂᤣᤗᤥᤋᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤋᤜᤋᤀᤥ ᤕᤠᤱᤔᤧᤎᤥ᤺ᤰᤋᤧ॥ 27 ᤂᤧᤱᤜᤠ᤹ ᤋᤜᤋᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤋᤣᤖᤜᤀᤥ ᤕᤠᤱᤔᤧᤎᤥ᤺ᤰᤋᤧ॥ 28 ᤂᤧᤱᤜᤠ᤹ ᤋᤣᤖᤜᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤔᤡᤳᤁᤠᤀᤥ ᤕᤠᤱᤔᤧᤎᤥ᤺ᤰᤋᤧ॥ 29 ᤂᤧᤱᤜᤠ᤹ ᤔᤡᤳᤁᤠᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤜᤛᤔᤥᤏᤠᤀᤥ ᤕᤠᤱᤔᤧᤎᤥ᤺ᤰᤋᤧ॥ 30 ᤂᤧᤱᤜᤠ᤹ ᤜᤛᤔᤥᤏᤠᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤔᤛᤣᤖᤥᤋᤀᤥ ᤕᤠᤱᤔᤧᤎᤥ᤺ᤰᤋᤧ॥ 31 ᤂᤧᤱᤜᤠ᤹ ᤔᤛᤣᤖᤥᤋᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤒᤏᤣᤕᤠᤁᤠᤏᤀᤥ ᤕᤠᤱᤔᤧᤎᤥ᤺ᤰᤋᤧ॥ 32 ᤂᤧᤱᤜᤠ᤹ ᤒᤏᤣ-ᤕᤠᤁᤠᤏᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤜᤥᤖ-ᤜᤃᤡᤍᤃᤠᤍᤀᤥ ᤕᤠᤱᤔᤧᤎᤥ᤺ᤰᤋᤧ॥ 33 ᤂᤧᤱᤜᤠ᤹ ᤜᤥᤖ-ᤜᤃᤡᤍᤃᤠᤍᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤕᤥᤋᤒᤠᤋᤠᤀᤥ ᤕᤠᤱᤔᤧᤎᤥ᤺ᤰᤋᤧ॥ 34 ᤂᤧᤱᤜᤠ᤹ ᤕᤥᤋᤒᤠᤋᤠᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤀᤒᤪᤥᤏᤠᤀᤥ ᤕᤠᤱᤔᤧᤎᤥ᤺ᤰᤋᤧ॥ 35 ᤂᤧᤱᤜᤠ᤹ ᤀᤒᤪᤥᤏᤠᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤀᤣᤛᤩᤥᤏ-ᤃᤣᤒᤣᤖᤀᤥ ᤕᤠᤱᤔᤧᤎᤥ᤺ᤰᤋᤧ॥ 36 ᤂᤧᤱᤜᤠ᤹ ᤀᤣᤛᤩᤥᤏ-ᤃᤣᤒᤣᤖᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤈᤡᤏᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤏᤧᤒᤠ ᤁᤠᤍᤣᤛᤀᤥ ᤕᤠᤱᤔᤧᤎᤥ᤺ᤰᤋᤧ॥ 37 ᤂᤧᤱᤜᤠ᤹ ᤁᤠᤍᤣᤛᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤀᤧᤍᤥᤔ ᤗᤠᤈᤣ᤹ᤀᤥᤒᤠ ᤀᤡ᤺ᤴᤍᤥᤀᤥ ᤁᤧᤕᤢᤱᤒᤠ ᤜᤥᤖ ᤌᤧᤃᤢᤀᤥ ᤕᤠᤱᤔᤧᤎᤥ᤺ᤰᤋᤧ॥ 38 ᤂᤧᤵᤔᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱᤅᤡᤴ ᤂᤧᤵᤛᤢᤀᤠᤱ ᤜᤥᤖ ᤌᤧᤃᤢ᤺ᤳᤌᤠ᤺ᤱ ᤌᤥ᤺ᤰᤛᤡᤱ ᤐᤣ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤔᤧᤗ᤺ᤴᤍᤧ ᤔᤧᤓᤧᤖᤧᤒᤠ ᤗᤡᤒᤥᤱ ᤋᤱᤒᤣ ᤀᤣᤃᤠᤱ ᤅᤠᤛᤡᤃᤣᤰᤐᤠ ᤗᤠ ᤁᤧᤖᤧᤒᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤂᤢᤏᤧ᤹ ᤔᤠᤛᤡᤱ॥ 39 ᤜᤥᤖ ᤁᤥ᤺ᤰᤔᤠᤀᤥ ᤜᤠᤖᤢᤏᤧᤴ ᤔᤠᤛᤡᤱᤅᤧᤸᤗᤧ ᤂᤢᤏᤧ᤹ ᥇᥈᥉ ᤋᤱᤒᤣ ᤁᤧᤖᤧᤀᤠᤱ ᤘᤕᤧ॥ 40 ᤁᤏᤠᤏᤒᤠ ᤏᤣᤃᤣᤘ ᤔᤧᤵᤔᤏᤠᤒᤠ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤀᤠᤖᤠᤍᤒᤠ ᤁᤏᤠᤏᤡ ᤜᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤓᤧᤴᤗ ᤔᤧᤒᤳ ᤁᤧᤗ᤹ᤒᤠ ᤀᤡᤱᤄᤱ ᤂᤧᤵᤛᤢ॥ 41 ᤂᤧᤱᤜᤠ᤹ ᤜᤥᤖ ᤁᤥ᤺ᤰᤔᤠ ᤑᤠᤱᤈᤱᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤛᤗᤔᤥᤏᤠᤀᤥ ᤕᤠᤱᤔᤧᤎᤥ᤺ᤰᤋᤧ॥ 42 ᤂᤧᤱᤜᤠ᤹ ᤛᤗᤔᤥᤏᤠᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤐᤢᤏᤥᤏᤀᤥ ᤕᤠᤱᤔᤧᤎᤥ᤺ᤰᤋᤧ॥ 43 ᤂᤧᤱᤜᤠ᤹ ᤐᤢᤏᤥᤏᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤀᤥᤒᤥᤋᤀᤥ ᤕᤠᤱᤔᤧᤎᤥ᤺ᤰᤋᤧ॥ 44 ᤂᤧᤱᤜᤠ᤹ ᤀᤥᤒᤥᤋᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤔᤥᤀᤠᤒᤒᤠ ᤀᤡ᤺ᤴᤍᤥᤀᤥ ᤁᤧᤏᤧᤒᤠ ᤀᤡᤕᤣ-ᤀᤒᤠᤖᤡᤔᤀᤥ ᤕᤠᤱᤔᤧᤎᤥ᤺ᤰᤋᤧ॥ 45 ᤂᤧᤱᤜᤠ᤹ ᤀᤡᤕᤣ-ᤀᤒᤠᤖᤡᤔᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤍᤡᤒᤥᤏ-ᤃᤠᤍᤀᤥ ᤕᤠᤱᤔᤧᤎᤥ᤺ᤰᤋᤧ॥ 46 ᤂᤧᤱᤜᤠ᤹ ᤍᤡᤒᤥᤏ-ᤃᤠᤍᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤀᤸᤔᤥᤏ-ᤍᤡᤒ᤻ᤗᤠᤋᤤᤔᤀᤥ ᤕᤠᤱᤔᤧᤎᤥ᤺ᤰᤋᤧ॥ 47 ᤂᤧᤱᤜᤠ᤹ ᤀᤸᤔᤥᤏ-ᤍᤡᤒ᤻ᤗᤠᤋᤤᤔᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤏᤣᤒᤥ ᤁᤥ᤺ᤰᤔᤠᤸᤗᤧ ᤁᤢᤒᤣᤛᤠᤱ ᤀᤒᤠᤖᤡᤔᤒᤠ ᤁᤥ᤺ᤰᤔᤠᤜᤠ᤹ᤀᤥ ᤕᤠᤱᤔᤧᤎᤥ᤺ᤰᤋᤧ॥ 48 ᤂᤧᤱᤜᤠ᤹ ᤀᤒᤠᤖᤡᤔᤒᤠ ᤁᤥ᤺ᤰᤔᤠᤜᤠ᤹ᤀᤥᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤕᤖᤡᤜᤥ ᤁᤢᤍᤥ᤺ᤵᤔᤠ ᤏᤠᤱᤃᤧᤴ ᤐᤡᤛᤠᤱ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤔᤥᤀᤠᤒᤒᤠ ᤏᤧᤏᤧᤒᤠᤍᤧᤴᤏᤥ ᤕᤠᤱᤔᤧᤎᤥ᤺ᤰᤋᤧ॥ 49 ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤔᤥᤀᤠᤒᤒᤠ ᤏᤧᤏᤧᤒᤠᤍᤧᤴᤏᤥ ᤒᤣᤌ-ᤕᤛᤡᤔᤥᤋᤗᤠᤶ ᤜᤠᤒᤡᤗ-ᤛᤡᤳᤋᤡᤔ ᤌᤠᤖᤡᤰᤁᤣ ᤂᤧᤱᤜᤠ᤹ ᤕᤠᤱᤔᤧᤎᤥ᤺ᤰᤋᤧᤖᤥ॥ ᤁᤏᤠᤏᤡᤜᤠ᤹ ᤗ᤺ᤵᤔᤠᤍᤣᤔᤠᤛᤡ ᤀᤡᤱᤈᤠᤱ 50 ᤂᤧᤒᤩᤠᤱ ᤕᤖᤡᤜᤥ ᤁᤢᤍᤥ᤺ᤵᤔᤠ ᤏᤠᤱᤃᤧᤴ ᤐᤡᤛᤠᤱ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤔᤥᤀᤠᤒᤒᤠ ᤏᤧᤏᤧᤒᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 51 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤀᤠᤸᤗ ᤂᤡᤏᤡ᤹ ᤕᤷᤍᤏ ᤘᤜ᤺ᤱᤅᤡᤴ ᤁᤧᤃᤠ᤺ᤰᤋᤢᤶᤔᤠᤱ ᤁᤏᤠᤏ ᤗᤠᤈᤣ᤹ᤀᤥ ᤁᤧᤃᤧᤖᤡ᤹. 52 ᤂᤧᤒᤩᤠᤱ ᤂᤡᤏᤡ᤹ ᤂᤧᤴ ᤗᤠᤈᤣ᤹ᤀᤥᤒᤠ ᤕᤰᤕᤢᤱᤒᤠᤜᤠ᤹ ᤁᤧᤖᤧᤰ ᤂᤧᤵᤔᤥᤗᤠᤶ ᤏᤠ᤺ᤳᤋᤧᤶᤍᤣᤛᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤥ᤺ᤶᤔᤏᤠ ᤗᤰᤔᤏᤠᤒᤠ ᤆᤀᤡ᤺ᤳᤜᤠ᤹ ᤏᤢ ᤕᤥ᤺ᤶᤔᤏᤠᤒᤠ ᤏᤠᤘᤠᤀᤡᤳᤗᤠᤜᤠ᤹ ᤁᤧᤖᤧᤰ ᤂᤠᤵᤐᤢᤌᤩ᤺ᤱ ᤆᤥᤃᤧᤶ ᤐᤡᤖᤧᤶᤛᤡᤶᤔᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤥ᤺ᤰᤔᤠᤀᤥᤒᤠ ᤔᤠᤱᤎᤠ᤺ᤴᤜᤠ᤹ ᤗᤢ᤺ᤴᤍᤧᤶ ᤐᤡᤖᤧᤶᤛᤡᤶᤔᤧ᤹॥ 53 ᤂᤧᤴ ᤗᤠᤈᤣᤴ ᤜᤢᤰᤁᤥ ᤌᤠᤛᤧᤶᤔᤧ᤹ᤀᤠᤱ ᤂᤡᤏᤡ᤹ ᤂᤧᤵᤔᤥ ᤕᤢᤅᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤗᤠᤈᤣᤴ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤅᤠᤱ ᤏᤧᤖᤥ॥ 54 ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤌᤠ᤺ᤰ ᤁᤢᤀᤡᤛᤡᤰ ᤂᤧᤴ ᤗᤠᤈᤣ᤹ᤀᤥ ᤋ᤹ᤕᤠ᤺ᤴᤛᤥᤴ ᤁᤧᤛᤧᤶᤔᤧ᤹ᤀᤠᤱ ᤂᤡᤏᤡ᤹ ᤗᤰᤜᤠ᤹ ᤑ᤺ᤰᤂᤧᤶᤔᤧ᤹॥ ᤕᤖᤡᤰ ᤜᤡᤶᤛᤕᤱ ᤁᤧᤘᤠ᤹ᤒᤠ ᤌᤠ᤺ᤰᤜᤠ᤹ ᤕᤶᤒᤠ ᤕᤢᤰ ᤐᤡᤖᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤛᤢ᤺ᤸᤗᤡᤰ ᤜᤡᤶᤛᤕᤱ ᤁᤧᤘᤠ᤹ᤒᤠ ᤌᤠ᤺ᤰᤜᤠ᤹ ᤆᤢᤰᤐᤠ ᤕᤢᤰ ᤐᤡᤖᤧᤶᤛᤡᤶᤔᤧ᤹॥ ᤜᤠ᤺ᤳᤗᤧ ᤁᤢᤍ᤹ᤕᤠ᤺ᤴᤛᤥ᤺ᤴᤏᤡᤴ ᤀᤠᤳᤋᤡ ᤌᤠ᤹᤺ ᤂᤧᤴ ᤂᤢᤏᤧ᤹ᤀᤡᤴᤏᤣ ᤐᤥᤱᤗ॥ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰ ᤁᤢᤀᤡᤛᤡᤰ ᤂᤡᤏᤡ᤹ ᤂᤥᤔᤠ ᤗᤰᤜᤠ᤹ ᤜᤠᤛᤧᤶᤔᤧ᤹॥ 55 “‘ᤁᤖ ᤂᤡᤏᤡ᤹ ᤂᤧᤴ ᤗᤠᤈᤣ᤹ᤀᤥᤒᤠ ᤕᤰᤕᤢᤱᤒᤠᤜᤠ᤹ ᤁᤧᤴᤏᤠ᤺ᤳᤋᤢᤶ ᤁᤧᤴᤍᤣᤛᤢᤶᤛᤡᤶᤔᤧᤴᤏᤧᤓᤃᤪ. ᤂᤧᤵᤔᤥ ᤕᤢᤱᤔᤠ ᤁᤧᤓᤠ᤺ᤰᤋᤢᤶᤛᤡᤶᤒᤠᤜᤠ᤹ᤃ ᤂᤡᤏᤡ᤹ ᤔᤡᤰᤁᤥ ᤁᤧᤗᤠ᤺ᤵᤐᤠ ᤛᤠᤰᤆᤡ᤹ ᤏᤢ ᤌᤰᤁᤡᤴ ᤁᤧᤎᤢᤵᤐᤠ ᤋᤡᤱ ᤜᤧᤰᤋᤱᤒᤠ ᤔᤧᤒᤥᤱ᤹. ᤂᤶᤓᤩᤠᤱ ᤂᤡᤏᤡ᤹ ᤀᤠᤳᤋᤡ ᤁᤧᤕᤢᤅᤡᤛᤠᤱ ᤂᤧᤱᤜᤠ᤹ᤖᤧ ᤋᤢᤰᤂᤣ ᤁᤧᤶᤈᤠ᤺ᤳᤋᤡ᤹॥ 56 ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤌᤧᤔᤠ ᤔᤧᤳᤋᤢᤱᤛᤡᤱ᤹ ᤑᤠ᤹ᤀᤠᤱ ᤀᤡ᤺ᤳᤋᤢᤱᤅᤠᤱ ᤘᤕᤧ. ᤂᤧᤴ ᤀᤠᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱᤗᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.