ᤂᤠᤏᤡ᤺ᤳ 30 - LIFOTNT

ᤔᤠᤱᤜᤢᤵ ᤆᤥ᤺ᤰᤔᤠ ᤌᤡᤶᤜᤠ᤹

¹ ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤗᤠᤶᤗᤥᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ—

² ᤁᤢᤓᤠ ᤔᤏᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤠᤱᤜᤢᤵ ᤆᤥᤃᤢ᤹ ᤀᤡᤃᤪ ᤔᤠᤱᤜᤧᤰᤛᤡᤱᤅᤠᤱ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤁᤧᤵᤔᤠ ᤐᤠᤴ ᤐᤠ᤺ᤳᤋᤢᤏᤧᤓᤃᤪ. ᤂᤢᤏᤧ᤹ ᤔᤠᤱᤜᤢᤵ ᤆᤥᤃᤢᤒᤠ ᤐᤠ᤺ᤴᤏᤡᤴ ᤔᤧᤱᤃᤧᤵᤔᤠ ᤔᤧᤏᤢ᤹ᤏᤧᤴ॥ ᤂᤢᤏᤧ᤹ ᤁᤢᤶᤒᤪᤠ᤺ᤸᤗᤧ ᤌᤧᤔᤠ ᤐᤠᤴ ᤐᤠ᤺ᤳᤋᤢᤀᤠᤱ ᤘᤕᤧ. ᤂᤢᤏᤧ᤹ ᤂᤧᤴ ᤁᤧᤵᤔᤠᤀᤣ ᤐᤥᤱ᤹॥

³ “ᤁᤢᤓᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤴ ᤁᤢᤶᤒᤠᤖᤧ ᤁᤢᤜᤡᤶᤔᤥ ᤘᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤠᤱᤜᤢᤵ ᤆᤥᤃᤢ᤹ ᤀᤡᤃᤪ ᤔᤠᤱᤜᤧᤰᤛᤡᤱᤅᤠᤱ ᤔᤠᤱᤜᤢᤵᤐᤡᤴ ᤁᤧᤵᤔᤠ ᤐᤠᤴ ᤐᤠ᤺ᤳᤋᤢ᤹.

⁴ ᤜᤧᤰᤁᤩᤠᤱ ᤁᤢᤶᤒᤠᤖᤧ ᤂᤧᤴ ᤔᤠᤱᤜᤢᤵᤐᤡᤴ ᤀᤡᤃᤪ ᤔᤠᤱᤜᤧᤰᤁᤡᤴ ᤂᤧᤵᤛᤢᤀᤠᤱᤛᤠᤱ ᤂᤢᤏᤧ᤹ ᤛᤫᤠ᤺ᤳ ᤘᤠ᤹ᤏᤧᤓᤃᤪ. ᤂᤧᤴ ᤔᤠᤱᤜᤢᤵᤐᤡᤴ ᤀᤡᤃᤪ ᤔᤠᤱᤜᤧᤰᤁᤡᤴ ᤁᤧᤵᤔᤠ ᤐᤥᤱ᤹॥

⁵ ᤁᤖ ᤁᤢᤶᤒᤠᤖᤧ ᤂᤧᤴ ᤂᤧᤵᤛᤢᤒᤠ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰ ᤂᤧᤴ ᤀᤳᤋᤢᤏᤧᤓᤃᤪ. ᤂᤧᤴ ᤛᤡᤛᤠᤃᤧᤴ ᤔᤧᤴᤇ᤻ᤕᤠ᤺ᤸᤗᤧ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤀᤡᤃᤪ ᤔᤠᤱᤜᤧᤰᤁᤡᤴ ᤌᤣᤏᤠᤎᤣᤒᤠ ᤐᤥᤱ᤹॥ ᤂᤢᤏᤧ᤹ ᤁᤢᤶᤒᤠᤖᤧᤀᤣ ᤀᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤔᤧᤴᤇ᤻ᤕᤠᤴ ᤗᤧᤖᤢᤍᤣᤛᤢ᤹॥

⁶ “ᤂᤢᤏᤧ᤹ ᤔᤠᤱᤜᤢᤵ ᤆᤥᤃᤢ ᤛᤢᤖᤢᤀᤠᤱ. ᤀᤡᤃᤪ ᤏᤢᤖᤡᤰ ᤏᤡᤱᤘᤠ᤹ ᤔᤧᤴᤀᤡ᤺ᤳᤇᤡᤱᤅᤣ ᤔᤠᤱᤜᤧᤰᤛᤡᤱ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤣ᤺ᤰᤂᤡᤶ ᤐᤥ᤺ᤰᤂᤧ.

⁷ ᤂᤧᤒᤩᤠᤱ ᤂᤢᤏᤧ᤹ ᤁᤢᤕᤧᤶᤒᤠ᤺ᤸᤗᤧ ᤂᤧᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥᤛᤢᤒᤠ ᤕᤧᤴᤏᤥ ᤛᤫᤠ᤺ᤳ ᤔᤧᤶᤒᤠ᤺ᤳᤋᤣ ᤕᤢᤅᤧᤏᤧᤓᤃᤪ ᤂᤧᤴ ᤔᤠᤱᤜᤢᤵᤐᤡᤴ ᤀᤡᤃᤪ ᤔᤠᤱᤜᤧᤰᤁᤡᤴ ᤁᤧᤵᤔᤠ ᤐᤥᤱ᤹॥

⁸ ᤁᤖ ᤂᤢᤏᤧ᤹ ᤁᤢᤕᤧᤶᤒᤠ᤺ᤸᤗᤧ ᤏᤡᤱᤘᤠ᤹ ᤂᤥᤛᤢᤒᤠ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰ ᤂᤧᤴ ᤐᤠ᤺ᤴᤏᤡᤴ ᤂᤢᤏᤧ᤹ ᤀᤳᤋᤢᤏᤧᤓᤃᤪ. ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤀᤡᤃᤪ ᤔᤠᤱᤜᤧᤰᤁᤡᤴ ᤌᤣᤏᤠᤎᤣᤒᤠ ᤐᤥᤱ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤔᤧᤴᤇᤢᤔᤠᤴ ᤗᤧᤖᤢᤍᤣᤛᤢ᤹॥

⁹ “ᤁᤢᤕᤧᤶᤒᤠ ᤁᤧᤛᤡᤔᤠ ᤔᤣᤔᤣᤍᤢᤔᤠ ᤏᤢ ᤁᤢᤕᤧᤶᤒᤠ᤺ᤸᤗᤧ ᤏᤠ᤹ᤖᤢᤔᤠ ᤔᤧᤴᤇᤢᤔᤠ᤺ᤸᤗᤧ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤀᤡᤃᤪ ᤔᤠᤱᤜᤧᤰᤁᤡᤴ ᤁᤧᤵᤔᤠ ᤐᤥᤱ᤹॥

¹⁰ “ᤁᤢᤓᤠ ᤔᤧᤴᤇᤢᤔᤠᤴ ᤁᤢᤕᤧᤶᤒᤠ᤺ᤸᤗᤧ ᤁᤢᤜᤡᤶᤔᤥ ᤋᤠᤈᤢ᤺ᤳᤋᤠᤱ ᤁᤢᤓᤠ ᤔᤠᤱᤜᤢᤵ ᤆᤥᤃᤢ᤹ ᤀᤡᤃᤪ ᤔᤠᤱᤜᤢᤵ ᤁᤧᤵᤔᤠᤖᤧ ᤗᤠᤃᤡ ᤔᤠᤱᤜᤧᤰᤛᤡᤱ᤹.

¹¹ ᤜᤧᤰᤁᤩᤠᤱ ᤂᤧᤴ ᤔᤠᤱᤜᤢᤵᤐᤡᤴ ᤀᤡᤃᤪ ᤔᤠᤱᤜᤧᤰᤁᤡᤴ ᤂᤧᤵᤛᤢᤀᤠᤱᤛᤠᤱ ᤂᤢᤏᤧ᤹ ᤁᤢᤕᤧᤶᤒᤠ᤺ᤴ ᤛᤫᤠ᤺ᤳ ᤘᤠ᤹ᤀᤠᤱ ᤔᤧᤀᤳᤋᤢᤴᤏᤧᤓᤃᤪ. ᤂᤧᤴ ᤔᤠᤱᤜᤢᤵᤐᤡᤴ ᤀᤡᤃᤪ ᤔᤠᤱᤜᤧᤰᤁᤡᤴ ᤁᤧᤵᤔᤠ ᤐᤥᤱ᤹॥

¹² ᤁᤖ ᤂᤢᤏᤧ᤹ ᤁᤢᤕᤧᤶᤒᤠ᤺ᤸᤗᤧ ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤒᤠ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰ ᤂᤧᤸᤗᤧ ᤁᤢᤔᤠᤱᤜᤢᤵᤐᤡᤴ ᤀᤡᤃᤪ ᤁᤢᤔᤠᤱᤜᤧᤰᤁᤡᤴ ᤌᤣᤏᤠᤎᤣᤒᤠ ᤆᤥᤃᤢᤏᤧᤓᤃᤪ. ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤶᤒᤪᤠᤀᤥᤗᤠᤶ ᤁᤧᤗ᤺ᤶᤒᤠ ᤐᤠ᤺ᤴᤏᤡᤴ ᤜᤏᤧᤒᤠ ᤐᤥᤱ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤔᤧᤴᤇᤢᤔᤠᤴ ᤗᤧᤖᤢᤍᤣᤛᤢ᤹ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤕᤧᤶᤒᤠᤗᤧᤀᤣ ᤂᤧᤴ ᤁᤢᤔᤠᤱᤜᤢᤵᤐᤥ ᤁᤧᤵᤔᤠᤗᤠᤶ ᤌᤣ᤺ᤰᤋᤢ॥

¹³ ᤂᤧᤸᤗᤧ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤀᤡᤃᤪ ᤔᤠᤱᤜᤢᤵᤐᤡᤴ ᤁᤧᤵᤔᤠ ᤏᤢ ᤔᤧᤱᤃᤧᤵᤔᤠ ᤂᤢᤏᤧ᤹ ᤁᤢᤕᤧᤶᤒᤠ᤺ᤸᤗᤧ ᤆᤥ᤺ᤰᤔᤠ ᤕᤢᤰ ᤁᤳᤋᤢ᤹॥

¹⁴ ᤁᤖ ᤂᤢᤏᤧ᤹ ᤁᤢᤕᤧᤶᤒᤠ᤺ᤸᤗᤧ ᤁᤢᤔᤣ᤺ᤳᤋᤡᤸᤗᤧ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤀᤡᤃᤪ ᤔᤠᤱᤜᤧᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤡᤰᤕᤠ᤺ᤴᤎᤰᤔᤠ ᤛᤫᤠ᤺ᤳ ᤔᤧᤶᤒᤠ᤺ᤳᤋᤣ ᤘᤠ᤹ᤏᤧᤓᤃᤪ. ᤂᤢᤏᤧ᤹ ᤂᤧᤴ ᤏᤡ᤺ᤴᤎᤥ ᤆᤥᤃᤢᤒᤠ ᤐᤥᤱ᤹॥ ᤂᤢᤏᤧ᤹ ᤂᤧᤴ ᤂᤧᤵᤛᤢᤀᤠᤱᤛᤠᤱ ᤛᤫᤠ᤺ᤳ ᤔᤧᤶᤒᤠ᤺ᤳᤋᤣ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤁᤢᤔᤣ᤺ᤳᤋᤡᤴ ᤜᤧᤰᤁᤣ ᤆᤥ᤺ᤰᤔᤠ ᤑᤠ᤺ᤰᤋᤢᤒᤠ ᤁᤢᤍᤱᤒᤠ ᤐᤥᤱ᤹॥

¹⁵ ᤁᤖ ᤂᤢᤏᤧ᤹ ᤂᤧᤵᤛᤢᤒᤠ ᤁᤢᤓᤠ ᤕᤧᤶ ᤀᤣᤃᤠᤱ ᤂᤧᤴ ᤐᤠ᤺ᤴᤏᤡᤴ ᤌᤣᤏᤠᤎᤣᤒᤠ ᤆᤥᤃᤢᤏᤧᤓᤃᤪ. ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤀᤠᤵᤋᤡᤰᤁᤧᤴ ᤂᤢᤏᤧ᤹ᤀᤥᤀᤣ ᤌᤠᤖᤥ॥”

¹⁶ ᤕᤧᤶᤒᤠ. ᤔᤣ᤺ᤳ ᤏᤢ ᤁᤢᤶᤒᤠ ᤁᤢᤶᤔᤠᤖᤧ ᤂᤢᤴᤇᤡ᤹ ᤜᤡᤶᤔᤥ ᤁᤧᤘᤠ᤹ᤔᤠ ᤔᤧᤴᤇ᤻ᤕᤠ ᤛᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤐᤡᤖᤢᤒᤠ ᤌᤡᤶᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ॥