ᤂᤠᤏᤡ᤺ᤳ 3 - LIFOTNTᤜᤠᤖᤢᤏᤖᤧ ᤁᤢᤛ᤻ᤛᤠᤜᤠ᤹ 1 ᤛᤡᤏᤤ ᤁᤥ᤺ᤰᤔᤠᤀᤥ ᤕᤜᤘᤣ ᤍᤠᤱᤒᤠᤴ ᤔᤥᤛᤠ᤺ᤴᤏᤢ ᤐᤠᤖᤧᤒᤠ ᤕᤧᤶᤔᤥ ᤜᤠᤖᤢᤏᤧᤴ ᤏᤢ ᤔᤥᤛᤠ᤺ᤸᤗᤧ ᤂᤢᤴᤇᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤖᤧᤴ ᤛᤠᤵᤔᤢ᤺ᤴᤎᤢᤶᤔᤡᤴ ᤜᤠᤒᤠ ᤁᤴᤜᤠ᤹ᤀᤣᤖᤥ॥ 2 ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤜᤠᤒᤠ ᤁᤴᤜᤠ᤹ ᤘᤕᤧ—ᤋᤢᤶᤒᤧᤴ ᤏᤠᤍᤠᤒ ᤜᤧᤰᤁᤩᤠᤱ ᤀᤒᤡᤜᤢ. ᤀᤣᤗᤠᤈᤠᤖ ᤏᤢ ᤀᤡᤋᤠᤔᤠᤖ॥ 3 ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥᤱᤔᤠᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤁᤧᤒᤥᤱᤒᤠ ᤔᤠᤱᤌᤥ᤺ᤰᤏᤠ ᤔᤧᤒᤡᤖᤢᤛᤡᤒᤠ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤁᤴᤜᤠ᤹ᤀᤣ ᤘᤕᤧ॥ 4 ᤁᤖ ᤛᤡᤏᤤᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤔᤧᤒᤡᤖᤢᤛᤡᤴᤒᤠ ᤔᤡ᤺ᤸᤗᤧ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤛᤢ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤃᤡᤀᤣ ᤂᤢᤴᤇᤡ᤹ ᤛᤩᤧᤛᤡ. ᤜᤧᤰᤁᤩᤠᤱ ᤂᤧᤴ ᤏᤧᤵᤑᤢᤖᤧ ᤂᤢᤴᤇᤡ᤹ ᤛᤠᤀᤣ ᤔᤧᤜᤥ᤺ᤵᤋᤧ॥ ᤂᤧᤸᤗᤧᤆᤥᤃᤢᤸᤗᤧ ᤀᤣᤗᤠᤈᤠᤖᤧᤴ ᤏᤢ ᤀᤡᤋᤠᤔᤠᤖᤧᤴᤗᤰ ᤂᤢᤴᤇᤡ᤹ ᤐᤠᤏᤢᤍᤡᤱ ᤐᤠ ᤜᤠᤖᤢᤏᤧᤸᤗᤧ ᤁᤢᤒᤠ᤺ᤸᤗᤠᤀᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤆᤥᤃᤧᤛᤡᤖᤥ॥ ᤗᤧᤒᤡᤜᤠ᤹ ᤕᤢᤰᤋᤡᤱ ᤔᤧᤈᤥᤃᤢᤛᤡ 5 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 6 “ᤗᤧᤒᤡ᤺ᤸᤗᤧ ᤁᤢᤎᤠ᤺ᤰᤁᤡᤴ ᤁᤵᤔᤥ ᤏᤡ᤺ᤳᤋᤠᤱ ᤋᤠᤖᤧᤛᤧ᤹॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤧᤸᤗᤧ ᤁᤢᤒᤣᤛᤠᤱ ᤕᤧᤵᤛᤧᤛᤧ᤹. ᤂᤧᤒᤩᤠᤱ ᤂᤧᤱᤜᤠ᤹ ᤂᤢᤏᤧ᤹ ᤁᤢᤓᤠ᤹ᤒᤠᤱ ᤔᤧᤒᤥᤱᤅᤠᤱ ᤂᤢᤏᤧ᤹ ᤔᤧᤓᤠ᤹ᤖᤢᤖ॥ 7 ᤛᤣᤛᤣ ᤕᤢᤱᤍᤧᤴᤏᤥ ᤔᤠᤱᤛᤧᤘᤠ ᤕᤠ᤺ᤶᤒᤰ ᤔᤧᤈᤥ᤺ᤰᤁᤡᤸᤗᤧ ᤂᤧᤱᤜᤠ᤹ᤖᤧ ᤜᤠᤖᤢᤏᤧᤴ ᤏᤢ ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤗᤠᤃᤡ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤔᤧᤈᤥᤃᤢ᤹॥ 8 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤁᤧᤖᤧᤰ ᤛᤠᤔᤠ ᤆᤡᤃᤰᤘᤠᤜᤠ᤹ ᤀᤥᤔᤧᤵᤔᤠ ᤕᤠ᤺ᤶᤒᤰᤁᤡᤴ ᤂᤧᤱᤜᤠ᤹ᤖᤧ ᤔᤧᤈᤥᤃᤢ᤹. ᤜᤧᤰᤁᤩᤠᤱ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤗᤰᤐᤧᤴᤏᤡᤴ ᤁᤢᤗᤡᤱᤍᤥ ᤔᤧᤃᤧᤳᤋᤢ᤹॥ 9 ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤗᤠᤃᤡ ᤗᤧᤒᤡᤜᤠ᤹ ᤐᤡᤖᤧᤛᤧ᤹॥ ᤂᤧᤱᤜᤠ᤹ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥᤗᤠᤶ ᤂᤢᤴᤇᤡ᤹ ᤑᤠ᤹ᤔᤠᤛᤡᤖᤧ ᤗᤠᤃᤡ ᤁᤧᤕᤧᤰᤐᤠ ᤕᤠ᤺ᤶᤒᤰ ᤔᤧᤒᤡᤖᤢᤛᤡᤀᤠᤱ ᤘᤠ᤹॥ 10 ᤂᤧᤏᤧ᤹ ᤜᤠᤖᤢᤏᤧᤴ ᤏᤢ ᤁᤢᤛ᤻ᤛᤠᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠᤀᤥ ᤕᤢᤰᤋᤡᤱ ᤆᤥᤃᤧᤛᤧ᤹॥ ᤂᤧᤱᤜᤠ᤹ᤀᤠᤱᤎᤥ ᤛᤣᤛᤣᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤁᤧᤍᤠᤒᤠ ᤁᤢᤓᤠ ᤘᤣ᤹ ᤔᤏᤠᤜᤠ᤹ ᤛᤧᤵᤔᤠᤛᤡ ᤐᤥᤱ᤹॥” 11 ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 12 “ᤀᤥᤔᤧᤳᤋᤧ᤹. ᤀᤡᤛᤪᤠᤀᤡᤗᤡᤜᤠ᤹ᤀᤥ ᤋᤢᤶᤒᤠ ᤛᤠᤃᤧᤘᤠ᤺ᤴᤇᤡᤱᤒᤠ ᤕᤧᤶᤒᤡᤳᤇᤠ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤧᤰᤘᤠᤀᤥ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤗᤧᤒᤡᤜᤠ᤹ ᤛᤣᤃᤢᤱᤛᤡᤱᤅᤠᤱ ᤔᤧᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤗᤧᤒᤡᤜᤠ᤹ ᤀᤠᤱᤃᤠ᤹ ᤀᤠᤔᤏᤠᤛᤡ. 13 ᤌᤣᤀᤠᤱᤓᤧᤸᤗᤧ ᤋᤃᤡ ᤛᤠᤃᤧᤘᤠ᤺ᤴᤇᤡᤱᤒᤠᤜᤠ᤹ ᤁᤧᤖᤧᤰ ᤀᤠᤱᤃᤠ᤹ᤀᤡᤴᤛᤡᤖᤥ॥ ᤔᤡᤛᤪ ᤗᤠᤈᤣ᤹ᤀᤥ ᤋᤃᤡ ᤛᤠᤃᤧᤘᤠ᤺ᤴᤇᤡᤱᤒᤠᤜᤠ᤹ ᤁᤧᤖᤧᤰ ᤛᤧᤖᤢᤱᤛᤡᤱᤒᤠ ᤕᤧᤴᤏᤥ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤋᤃᤡ ᤛᤠᤃᤧᤘᤠ᤺ᤴᤇᤡᤱᤒᤠ ᤔᤏᤠ ᤏᤢ ᤋᤃᤡ ᤁᤧᤎᤠᤵᤐᤠ ᤌᤰᤛᤠ ᤁᤧᤖᤧᤰ ᤀᤠᤱᤃᤠ᤹ ᤀᤠᤗᤠᤃᤡ ᤛᤧᤴᤍᤢᤱᤛᤡᤱᤅᤠᤱ ᤘᤕᤠᤱ॥ ᤂᤧᤱᤜᤠ᤹ ᤀᤠᤱᤃᤠ᤹ᤜᤠ᤹ᤖᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠᤖᤥ॥” ᤗᤧᤒᤡᤖᤧ ᤁᤢᤎᤠ᤺ᤰᤜᤠ᤹ ᤔᤧᤏᤡᤖᤢᤛᤡ 14 ᤛᤡᤏᤤᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 15 “ᤗᤧᤒᤡᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤌᤠ᤺ᤰᤜᤠ᤹ ᤏᤢ ᤜᤡᤶᤛᤕᤱ ᤛᤥᤛᤥᤖᤡᤰ ᤆᤥᤃᤧ᤹ᤀᤠᤱ ᤏᤡᤖᤧᤛᤧ᤹॥ ᤗᤠᤎᤡᤰ ᤁᤧᤃᤧᤵᤐᤠ ᤏᤢ ᤂᤧᤴᤏᤢ᤺ᤸᤗᤧ ᤕᤶᤒᤠ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ ᤂᤧᤏᤧ᤹ ᤏᤡᤖᤧᤛᤧ᤹॥” 16 ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤒᤠ᤺ᤴᤈᤠᤰ ᤜᤧᤰᤁᤣ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤏᤡᤖᤢᤛᤡᤖᤥ॥ 17 ᤗᤧᤒᤡ᤺ᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤁᤴᤜᤠ᤹ᤀᤣ ᤘᤕᤧ— ᤃᤣᤷᤛᤥᤏ. ᤁᤜᤠᤋ ᤏᤢ ᤔᤖᤠᤖᤡ॥ 18 ᤃᤣᤷᤛᤥᤏᤖᤧ ᤁᤢᤎᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ— ᤗᤡᤒ᤻ᤏᤠ ᤏᤢ ᤛᤡᤔᤡ॥ 19 ᤁᤜᤠᤋᤖᤧ ᤁᤢᤎᤠ᤺ᤰᤜᤠ᤹— ᤀᤔᤪᤠᤔ. ᤕᤡᤛᤜᤠᤖ. ᤜᤣᤒᤪᤥᤏ ᤏᤢ ᤀᤢᤈ᤻ᤈᤡᤀᤣᤗ॥ 20 ᤔᤖᤠᤖᤡ᤺ᤸᤗᤧ ᤁᤢᤎᤠ᤺ᤰᤜᤠ᤹— ᤔᤜᤗᤡ ᤏᤢ ᤔᤢᤛᤡ॥ ᤗᤧᤒᤡ᤺ᤸᤗᤧ ᤁᤢᤎᤠ᤺ᤰᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤛᤕᤱ ᤁᤢᤀᤡᤛᤡᤰ ᤁᤴᤜᤠ᤹ᤀᤣ ᤔᤧᤘᤕᤧ॥ 21 ᤃᤣᤷᤛᤥᤏᤗᤠᤶ ᤗᤡᤒ᤻ᤏᤡ ᤏᤢ ᤛᤡᤔᤡᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰ ᤘᤕᤧ॥ ᤃᤣᤷᤛᤥᤏᤖᤧ ᤁᤢᤎᤠ᤺ᤰᤜᤠ᤹ ᤁᤴᤜᤠ᤹ᤀᤣ ᤔᤧᤘᤕᤧ॥ 22 ᤗᤠᤎᤡᤰ ᤁᤧᤃᤧᤵᤐᤠ ᤏᤢ ᤂᤧᤴᤏᤢ᤺ᤸᤗᤧ ᤕᤖᤡᤰ ᤁᤧᤕᤥᤒᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤱᤜᤠ᤹ ᥍.᥋᥆᥆ ᤔᤧᤘᤕᤧ॥ 23 ᤃᤣᤷᤛᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤀᤠᤒᤠᤅᤣ ᤛᤠ᤺ᤱᤃᤠᤜᤡᤶᤜᤠ᤹ ᤛᤣᤛᤣ ᤛᤠ᤺ᤱᤃᤠᤜᤡᤶ ᤀᤣᤃᤠᤱ ᤏᤠᤶᤎᤠ ᤗᤧᤵᤔᤠᤱ ᤂᤡᤱᤔᤠ ᤁᤧᤒᤥᤱᤒᤠ ᤘᤕᤧ॥ 24 ᤃᤣᤷᤛᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠᤴ ᤗᤠᤀᤣᤗᤖᤧ ᤁᤢᤛ᤻ᤛᤠ ᤀᤣᤗᤩᤠᤛᤠᤐᤧᤴ ᤘᤕᤧ॥ 25 ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤛᤣᤛᤣ ᤕᤢᤱᤍᤧᤴ. ᤂᤡᤱᤔᤏᤠᤒᤠ ᤛᤠ᤺ᤱᤃᤠᤜᤡᤶ. ᤂᤧᤸᤗᤧ ᤗᤠᤃᤡ ᤗᤡᤱᤄᤠᤶᤒᤢ. ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤗᤠ᤺ᤵᤔᤠᤍᤧᤴᤏᤥ ᤁᤧᤒᤵᤐᤠ ᤑᤥ᤺ᤴᤍᤠ. 26 ᤗᤰᤂᤢᤶᤔᤥᤒᤠ ᤑᤥ᤺ᤴᤍᤠᤜᤠ᤹. ᤛᤣᤛᤣ ᤛᤠ᤺ᤱᤃᤠᤜᤡᤶ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤒᤪᤡᤱ ᤐᤡᤛᤠᤱ ᤗᤰᤂᤢᤶᤔᤥ ᤗᤠ᤺ᤵᤔᤠᤍᤧᤴᤏᤡᤴ ᤁᤧᤃᤵᤐᤠ ᤑᤥ᤺ᤴᤍᤠᤜᤠ᤹. ᤌᤠᤰᤐᤠᤜᤠ᤹ ᤏᤢ ᤁᤸᤗᤧ ᤗᤠᤃᤡ ᤀᤥᤃᤵ ᤆᤥ᤺ᤰᤔᤠ ᤁᤧᤒᤥᤱᤒᤠ ᤁᤧᤖᤧᤰ ᤆᤡᤃᤰᤘᤠ ᤛᤠᤔᤠᤜᤠ᤹ ᤃᤣᤷᤛᤥᤏᤡᤜᤠ᤹ᤖᤧ ᤀᤥᤔᤧᤵᤔᤠ ᤕᤠ᤺ᤶᤒᤰ ᤘᤕᤧ॥ 27 ᤁᤜᤠᤋᤗᤠᤶ ᤀᤔᤪᤠᤔᤡ. ᤕᤡᤛᤜᤠᤖᤡ. ᤜᤧᤒᤪᤥᤏᤡ ᤏᤢ ᤀᤢᤈ᤻ᤈᤡᤀᤣᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰ ᤔᤧᤒᤥ᤺ᤰᤂᤧ॥ ᤁᤜᤠᤋᤖᤧ ᤁᤢᤎᤠ᤺ᤰᤜᤠ᤹ ᤁᤴᤜᤠ᤹ᤀᤣᤖᤥ॥ 28 ᤗᤠᤎᤡᤰ ᤁᤧᤃᤧᤵᤐᤠ ᤏᤢ ᤂᤧᤴᤏᤢ᤺ᤸᤗᤧ ᤕᤖᤡᤰ ᤁᤧᤃᤧᤵᤐᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤱᤜᤠ᤹ ᥎.᥌᥆᥆ ᤔᤧᤘᤕᤧ॥ ᤁᤜᤠᤋᤡᤜᤠ᤹ᤖᤧ ᤛᤣᤛᤣᤍᤧᤴᤏᤡᤴ ᤀᤥᤔᤧᤵᤔᤠ ᤁᤧᤒᤥᤱᤒᤠ ᤘᤕᤧ॥ 29 ᤁᤜᤠᤋᤖᤧ ᤁᤢᤎᤠ᤺ᤰᤜᤠ᤹ᤖᤧ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤱᤃᤧᤳ ᤗᤧᤵᤔᤠᤱ ᤛᤠ᤺ᤱᤃᤠᤜᤡᤶᤜᤠ᤹ ᤂᤡᤱᤔᤠ ᤁᤧᤒᤥᤱᤒᤠ ᤘᤕᤧ॥ 30 ᤀᤢᤈ᤻ᤈᤡᤀᤣᤗᤖᤧ ᤁᤢᤛ᤻ᤛᤠ ᤀᤣᤗᤡᤛᤠᤐᤠᤏᤧᤴ ᤁᤜᤠᤋᤖᤧ ᤁᤢᤎᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤘᤕᤧ॥ 31 ᤔᤠᤱᤜᤢᤵ ᤛᤴᤍᤥᤰ. ᤆᤵᤋᤧᤴ. ᤛᤣᤔᤡᤕᤢᤱᤍᤧᤴ. ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤠᤱᤛᤧᤘᤠ ᤕᤠ᤺ᤶᤒᤰ ᤔᤧᤈᤥᤃᤢᤸᤗᤧ ᤛᤣᤛᤣᤍᤧᤴᤏᤥ ᤆᤠᤜᤠ ᤁᤧᤈᤥ᤺ᤰᤐᤠ ᤆᤡᤃᤰᤘᤠ ᤛᤠᤔᤠᤜᤠ᤹. ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴ ᤁᤧᤎᤣ᤺ᤰᤐᤠ ᤑᤥ᤺ᤴᤍᤠ ᤏᤢ ᤁᤴᤜᤠ᤹ ᤕᤠᤱᤔᤠ ᤁᤧᤖᤧᤰ ᤛᤠᤔᤠ ᤐᤢᤔᤠᤜᤠ᤹ ᤀᤥᤔᤧᤵᤔᤠ ᤁᤧᤒᤥᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰ ᤘᤕᤧ॥ 32 ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤀᤣᤗᤠᤈᤠᤖᤧᤱᤃ ᤗᤧᤒᤡ ᤌᤠ᤺ᤰᤁᤥᤒᤠ ᤋᤢᤶ ᤗᤠᤶᤗᤥᤒᤠ ᤘᤕᤧ॥ ᤛᤣᤛᤣᤍᤧᤴᤏᤥᤒᤠ ᤐᤠ᤺ᤴᤜᤠ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤁᤧᤖᤧᤰ ᤔᤏᤠᤜᤠ᤹ ᤔᤢᤖᤠ ᤔᤧᤵᤔᤠᤛᤡᤖᤧ ᤗᤠᤃᤡ ᤂᤢᤏᤧ᤹ ᤕᤢᤰᤋᤡᤱ ᤔᤧᤈᤥᤃᤢ॥ 33 ᤔᤖᤠᤖᤡᤗᤠᤶ ᤔᤜᤗᤡ ᤏᤢ ᤔᤢᤛᤡᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤜᤠ᤹ ᤔᤧᤒᤥ᤺ᤰᤂᤧ॥ ᤔᤖᤠᤖᤡᤖᤧ ᤁᤢᤎᤠ᤺ᤰᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ 34 ᤗᤠᤎᤡᤰ ᤁᤧᤃᤧᤵᤐᤠ ᤏᤢ ᤂᤧᤴᤏᤢ᤺ᤸᤗᤧ ᤕᤖᤡᤰ ᤁᤧᤕᤥᤒᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤱᤜᤠ᤹ ᥌.᥈᥆᥆ ᤔᤧᤘᤕᤧ॥ 35 ᤔᤖᤠᤖᤡᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠᤴ ᤀᤒᤡᤜᤣᤗᤖᤧ ᤁᤢᤛ᤻ᤛᤠ ᤛᤢᤖᤡᤀᤣᤗᤧᤴ ᤘᤕᤧ॥ ᤂᤧᤱᤜᤠ᤹ᤖᤧ ᤛᤣᤛᤣ ᤛᤠ᤺ᤱᤃᤠᤜᤡᤶ ᤌᤥ᤺ᤴᤍᤠᤱ ᤗᤧᤵᤔᤠᤱ ᤛᤠ᤺ᤱᤃᤠᤜᤡᤶᤜᤠ᤹ ᤂᤡᤱᤔᤠ ᤁᤧᤒᤥᤱᤒᤠ ᤘᤕᤧ॥ 36 ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤛᤡᤱᤓᤧᤸᤗᤧᤰᤜᤠ᤹. ᤐᤧᤖᤧᤶ ᤁᤢᤛᤠᤰᤔᤠᤜᤠ᤹. ᤛᤡᤳᤗᤠᤱᤜᤠ᤹. ᤁᤢᤕᤢᤰᤏᤠᤜᤠ᤹ ᤏᤢ ᤂᤧᤸᤗᤧ ᤗᤠᤃᤡ ᤁᤧᤖᤧᤰ ᤆᤡᤃᤰᤘᤠ ᤛᤠᤔᤠᤜᤠ᤹ ᤜᤧᤰᤁᤩᤠᤱ ᤁᤴᤜᤠ᤹ ᤀᤥᤃᤵ ᤆᤥ᤺ᤰᤔᤠ ᤁᤧᤖᤧᤰ ᤛᤠᤔᤠᤜᤠ᤹. 37 ᤁᤧᤖᤧᤰ ᤐᤡᤛᤠᤱᤒᤠ ᤗᤰᤂᤢᤶᤔᤥᤒᤠ ᤛᤡᤳᤗᤠᤱᤜᤠ᤹. ᤂᤧᤸᤗᤧ ᤁᤢᤕᤢᤰᤏᤠᤜᤠ᤹. ᤗᤰᤆᤢᤜᤠ᤹ ᤏᤢ ᤌᤠᤰᤐᤠᤜᤠ᤹ ᤔᤖᤠᤖᤡᤜᤠ᤹ᤖᤧ ᤀᤥᤔᤧᤵᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰ ᤘᤕᤧ॥ 38 ᤛᤣᤛᤣ ᤛᤠ᤺ᤱᤃᤠᤜᤡᤶ ᤏᤠᤱᤃᤧᤴ ᤗᤧᤵᤔᤠᤱ. ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤋᤃᤡ ᤏᤠᤶ ᤁᤧᤃᤧᤵᤐᤠ ᤗᤧᤵᤔᤠᤱ ᤔᤥᤛᤠ. ᤜᤠᤖᤢᤏ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤛᤠ᤺ᤱᤃᤠᤜᤡᤶᤜᤠ᤹ ᤂᤡᤱᤔᤠ ᤁᤧᤒᤥᤱᤒᤠ ᤘᤕᤧ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤧᤱᤜᤠ᤹ᤖᤧ ᤛᤣᤛᤣᤍᤧᤴᤏᤡᤴ ᤀᤥᤔᤧᤵᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰ ᤘᤕᤧ॥ ᤂᤧᤸᤗᤧ ᤁᤢᤒᤣᤛᤠᤱ ᤁᤧᤍᤠᤒᤠ ᤘᤣ᤹ ᤀᤠᤳᤋᤡᤴ ᤔᤏᤠ᤺ᤴᤇᤠᤱ ᤛᤧᤵᤔᤠ ᤐᤥᤱ᤹॥ 39 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤔᤥᤛᤠᤴ ᤏᤢ ᤜᤠᤖᤢᤏᤧᤸᤗᤧ ᤏᤡᤖᤧᤛᤢᤛᤡᤒᤠ ᤗᤠᤎᤡᤰ ᤁᤧᤃᤧᤵᤐᤠ ᤏᤢ ᤂᤧᤴᤏᤢ᤺ᤸᤗᤧ ᤕᤖᤡᤰ ᤁᤧᤕᤥᤒᤠ ᤗᤧᤒᤡᤜᤠ᤹ ᤂᤢᤴᤇᤡ᤹ ᤁᤧᤖᤧᤰ ᤂᤠᤏᤡ᤺ᤳᤋᤧᤴ ᥈᥈.᥆᥆᥆ ᤔᤧᤘᤕᤧᤖᤥ॥ ᤋᤢᤶᤒᤠ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤋᤠᤰᤑᤠ᤺ᤴ ᤗᤧᤒᤡᤜᤠ᤹ ᤔᤧᤔᤧᤳᤇᤡᤱ 40 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤗᤠᤎᤡᤰ ᤁᤧᤃᤧᤵᤐᤠ ᤏᤢ ᤂᤧᤴᤏᤢ᤺ᤸᤗᤧ ᤕᤖᤡᤰ ᤁᤧᤕᤥᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤒᤠ ᤕᤧᤶᤒᤡᤳᤇᤠᤛᤠᤜᤠ᤹ ᤏᤡᤖᤧᤛᤧ᤹ᤀᤠᤱ ᤂᤢᤴᤇᤡ᤹ ᤔᤡᤱᤜᤠ᤹ ᤛᤠᤵᤋᤧ᤹॥ 41 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤒᤠ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤧᤰᤘᤠᤀᤥ ᤂᤧᤏᤧ᤹ ᤗᤧᤒᤡᤜᤠ᤹ ᤋᤠᤖᤧᤛᤧ᤹॥ ᤁᤶᤓᤗ᤹ᤖᤡᤰᤁᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤁᤧᤎᤠᤵᤐᤠ ᤌᤰᤛᤠᤜᤠ᤹ᤖᤧ ᤁᤢᤗᤧᤰᤘᤠᤀᤥ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤠᤜᤠ᤹ ᤋᤠᤖᤧᤛᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥” 42 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤒᤠ ᤛᤠᤜᤠ᤹ ᤏᤡᤖᤢᤛᤡ॥ 43 ᤗᤠᤎᤡᤰ ᤁᤧᤃᤧᤵᤐᤠ ᤏᤢ ᤂᤧᤴᤏᤢ᤺ᤸᤗᤧ ᤕᤖᤡᤰ ᤁᤧᤕᤥᤒᤠ ᤋᤢᤶᤒᤠ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤂᤠᤏᤡ᤺ᤳ ᥈᥈.᥈᥍᥉ ᤘᤕᤧ॥ 44 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 45 “ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤒᤠ ᤛᤠᤜᤠ᤹ᤖᤧ ᤂᤢᤏᤡ᤹ ᤗᤧᤰᤘᤠᤀᤥ ᤗᤧᤒᤡᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤡᤳ ᤌᤰᤛᤠᤜᤠ᤹ᤖᤧ ᤗᤧᤰᤘᤠᤀᤥ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤐᤡᤳᤌᤰᤛᤠᤜᤠ᤹ ᤋᤣ᤹ᤖᤧᤛᤧ᤹॥ ᤗᤧᤒᤡᤜᤠ᤹ ᤀᤠᤱᤃᤠ᤹ᤀᤡᤴ ᤔᤧᤒᤥᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 46 ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤒᤠ ᤛᤠᤜᤠ᤹ ᤗᤧᤒᤡᤜᤠ᤹ᤏᤢ᤺ᤸᤗᤧ ᥈᥍᥉ ᤕᤖᤡᤰ ᤔᤧᤕᤥ॥ ᤁᤴ ᤁᤧᤏᤶᤒᤠ ᤋᤢᤶᤒᤠ ᤛᤠᤜᤠ᤹ ᤌᤧ᤹ᤔᤠᤛᤡᤖᤧ ᤗᤠᤃᤡ. 47 ᤛᤣᤛᤣᤍᤧᤴᤏᤥᤒᤠ ᤛᤣᤁᤣᤗ ᤁᤢᤀᤡᤛᤡᤰ ᤌᤡᤰᤌᤡᤰ ᤁᤧᤖᤧᤰᤗᤧ ᤗᤠᤃᤡ ᤛᤣᤁᤣᤗ ᤅᤠᤛᤡ ᤅᤠᤛᤡ ᤕᤢᤵᤐᤠ ᤑᤢᤰᤂᤣ᤹॥ ᤏᤡᤒᤥᤱ ᤃᤣᤖᤠᤖᤧ ᤛᤣᤁᤣᤗ ᤌᤡᤰ ᤐᤥᤱ᤹॥ 48 ᤜᤧᤰᤁᤩᤠᤱ ᤕᤠᤶᤔᤥ ᤁᤢᤕᤥ᤹ᤒᤠ ᤋᤢᤶᤒᤠ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤒᤠ ᤛᤠᤜᤠ᤹ ᤌᤧ᤹ᤔᤠᤛᤡᤖᤧ ᤗᤠᤃᤡ ᤕᤠᤱᤅᤡᤴ ᤜᤠᤖᤢᤏᤧᤴ ᤏᤢ ᤁᤢᤛ᤻ᤛᤠᤜᤠ᤹ ᤐᤡᤖᤧᤛᤧ᤹॥” 49 ᤁᤶᤓᤗ᤹ᤖᤡᤰ ᤗᤧᤒᤡᤜᤠ᤹ᤗᤠᤶ ᤆᤥ᤺ᤰᤕᤢᤶᤓᤥ ᤔᤧᤒᤡᤖᤢᤛᤡᤒᤠ ᤁᤧᤏᤶᤒᤠ ᤔᤏᤠᤜᤠ᤹ᤗᤠᤶᤒᤠ ᤔᤥᤛᤠ᤺ᤸᤗᤧ ᤌᤧ᤹ᤔᤠᤛᤡ ᤕᤠᤱᤅᤡᤴ ᤑᤢᤰᤂᤢ॥ 50 ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤒᤠ ᤛᤠᤜᤠ᤹ᤖᤧ ᤂᤢᤏᤡ᤹ ᤕᤢᤵᤐᤠ ᤂᤧ᤺ᤰᤜᤠ᤹ ᤑᤢᤰᤂᤢ. ᤂᤧᤴ ᤕᤢᤵᤐᤠ ᤂᤧᤸᤗᤧᤰᤜᤠ᤹ ᤛᤣᤛᤣᤍᤧᤴᤏᤥᤒᤠ ᤛᤣᤁᤣᤗ ᤁᤢᤀᤡᤛᤡᤰ ᥇.᥉᥌᥋ ᤛᤣᤁᤣᤗ ᤕᤥᤖᤧ॥ 51 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤛᤡᤱ ᤂᤧᤴ ᤔᤏᤠ ᤌᤧ᤹ᤔᤠ ᤕᤠᤱᤅᤡᤴ ᤂᤢᤏᤧ᤹ ᤜᤠᤖᤢᤏᤧᤴ ᤏᤢ ᤁᤢᤛ᤻ᤛᤠᤜᤠ᤹ ᤐᤡᤖᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.