ᤂᤠᤏᤡ᤺ᤳ 28 - LIFOTNTᤆᤰᤔᤧᤸᤗ᤹ᤀᤣ ᤋᤥ᤺ᤶᤔᤠ ᤁᤧᤒᤥᤱᤒᤠ ᤛᤡᤍᤢᤱᤈᤓᤠᤜᤠ᤹ ( ᤗᤠ ᥈᥏:᥉᥎-᥊᥌ ) 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹ᤀᤠᤱ ᤀᤡᤱᤈᤠᤱ ᤐᤡᤖᤧᤛᤧ᤹—‘ᤀᤠᤱᤃᤠ᤹ ᤀᤠᤛᤡᤖᤠ᤹ ᤁᤧᤎᤠᤱᤒᤠ ᤁᤢᤏᤠᤶᤃᤧᤏᤢ᤹ᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹ ᤀᤠᤱᤃᤠ᤹ᤀᤥ ᤋᤥ᤺ᤶᤔᤠ ᤁᤧᤒᤥᤱᤒᤠ ᤕᤧᤶᤔᤥ ᤂᤡᤏᤡ᤹ ᤀᤡ᤺ᤳᤋᤧᤶᤔᤧ᤹ᤀᤠᤱ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤧᤶᤔᤧ᤹॥’ 3 ᤂᤧᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤥ᤺ᤶᤔᤠ ᤁᤧᤒᤥᤱᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤜᤠᤒᤠ ᤁᤴᤗᤥ—ᤔᤧᤱᤃᤠ᤺ᤶᤔᤏᤠᤒᤠ ᤋᤱᤒᤣ ᤌᤡᤰ ᤁᤧᤃᤧᤵᤐᤠ ᤔᤧᤸᤗᤢᤰᤛᤠ᤺ᤳ ᤏᤧᤳᤇᤡ ᤆᤰᤔᤧᤸᤗ᤹ᤀᤣᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤌᤡᤰᤕᤠ᤺ᤴᤎᤰ ᤋᤥ᤺ᤴᤍᤧᤶᤔᤧ᤹. 4 ᤗᤳᤇᤠ ᤋᤠᤏᤠᤶ ᤏᤢ ᤗᤳᤇᤠ ᤕᤢ᤺ᤴᤇᤡᤰ॥ 5 ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤕᤢᤔᤏᤠᤒᤠ ᤔᤠᤏᤠ ᤗᤡᤛᤡ ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤁᤡᤗᤥ ᤌᤡᤰ ᤆᤢᤴᤈᤢᤶᤒᤠ ᤑᤣ᤹ᤖᤢᤶᤔᤠᤱ ᤋᤥ᤺ᤴᤍᤧᤶᤔᤧ᤹॥ 6 ᤁᤴ ᤆᤰᤔᤧᤸᤗ᤹ᤀᤣ ᤋᤥ᤺ᤶᤔᤏᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤛᤡᤏᤤ ᤁᤥ᤺ᤰᤔᤠᤀᤥ ᤏᤡ᤺ᤴᤎᤥ ᤐᤥ᤺ᤰᤂᤧᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤁᤢᤏᤠᤶᤃᤧᤏᤢ᤹ᤒᤠ ᤁᤢᤏᤠᤶ ᤐᤥᤱᤗ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤧᤶᤔᤧ᤹॥ 7 ᤁᤴᤏᤢ ᤋᤥ᤺ᤶᤔᤏᤠᤒᤠ ᤘᤍᤢᤶᤒᤰᤘᤠ ᤛᤡᤍᤢᤱᤈᤓᤠᤴ ᤗᤳᤇᤠ ᤌᤢ᤺ᤶᤒᤠ᤺ᤸᤗᤧ ᤗᤠᤃᤡ ᤗᤡᤋᤖ ᤌᤡᤰ ᤛᤣᤈ᤺ᤱᤘᤠ ᤆᤠᤜᤠ ᤆᤥᤰ॥ ᤂᤧᤴ ᤘᤍᤢᤶᤒᤰᤘᤠ ᤛᤡᤍᤢᤱᤈᤓᤠᤴ ᤛᤣᤛᤣᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤥ᤺ᤴᤍᤧᤶᤔᤧ᤹॥ 8 ᤏᤡᤛᤡᤃᤣᤰᤐᤠ ᤌᤢ᤺ᤶᤒᤠ᤺ᤴ ᤕᤢ᤺ᤴᤇᤡᤰ ᤋᤥ᤺ᤴᤍᤧᤶᤔᤧ᤹॥ ᤋᤠᤏᤠᤶ ᤁᤧᤍᤥ᤺ᤴᤍᤢᤶᤒᤠ ᤜᤧᤰᤁᤣ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤏᤢ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠᤴ ᤋᤥ᤺ᤴᤍᤧᤶᤔᤧ᤹॥ ᤁᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤁᤢᤏᤠᤶᤃᤧᤏᤢ᤹ᤒᤠ ᤁᤢᤏᤠᤶ ᤐᤥᤱᤗ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤧᤶᤔᤧ᤹ᤀᤥ॥ ᤏᤠ᤺ᤶᤛᤡᤱᤔᤠ ᤕᤧᤴᤏᤥᤒᤠ ᤜᤢᤰᤘᤠ 9 “‘ᤛᤒᤠᤌ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰ ᤔᤧᤱᤃᤠ᤺ᤶᤔᤏᤠᤒᤠ ᤋᤱᤒᤣ ᤁᤧᤃᤧᤵᤐᤠ ᤌᤢ᤺ᤶᤒᤠ ᤏᤧᤳᤇᤡ. ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤑᤥᤗᤰ ᤌᤡᤰ ᤆᤢᤴᤈᤢᤶᤒᤠ ᤑᤣ᤹ᤖᤢᤶ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤂᤧᤴᤏᤢ ᤛᤥᤖᤡᤰ ᤋᤥ᤺ᤶᤔᤠ ᤁᤧᤒᤥᤱᤒᤠ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ᤺ᤴᤏᤠᤱ ᤋᤥ᤺ᤴᤍᤧᤶᤔᤧ᤹॥ 10 ᤆᤰᤔᤧᤸᤗ᤹ᤀᤣ ᤋᤥ᤺ᤶᤔᤏᤠᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤀᤥ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ᤺ᤴᤏᤢ ᤛᤥᤛᤥᤖᤡᤰ ᤛᤒᤠᤌ ᤕᤧᤴ ᤌᤰᤔᤠ ᤋᤥ᤺ᤶᤔᤏᤠᤒᤠ ᤁᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤥ॥ ᤗᤠ ᤌᤰᤔᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ 11 “‘ᤗᤠ ᤌᤰᤔᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤁᤢᤶᤒᤠᤒᤠ ᤐᤡᤳᤛᤠᤳ ᤏᤧᤳᤇᤡ. ᤌᤢ᤺ᤶᤒᤠ ᤌᤡᤰ ᤏᤢ ᤋᤱᤒᤣ ᤌᤡᤰ ᤁᤧᤃᤧᤵᤐᤠ ᤔᤧᤸᤗᤢᤰ ᤏᤢᤛᤡ ᤋᤥ᤺ᤴᤍᤧᤶᤛᤡᤶᤔᤧ᤹॥ ᤁᤴᤜᤠ᤹ ᤁᤧᤖᤧᤰ ᤔᤧᤱᤃᤠ᤺ᤶᤔᤏᤠᤒᤠ ᤔᤧᤒᤥᤱᤗ ᤐᤥᤱ᤹॥ 12 ᤗᤳᤇᤠ ᤁᤢᤶᤒᤠᤒᤠ ᤐᤡᤳᤛᤠᤳ ᤌᤰᤔᤠ ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤆᤢᤴᤈᤢᤶᤒᤠ ᤑᤥᤗᤰ ᤌᤡᤰᤁᤠᤱ ᤁᤢᤓᤪᤧ᤺ᤰ ᤑᤣ᤹ᤖᤢᤶ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ. ᤌᤢ᤺ᤶᤒᤠ᤺ᤴᤏᤢ ᤛᤥᤛᤥᤖᤡᤰ ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤑᤥᤗᤰ ᤌᤡᤰ ᤆᤢᤴᤈᤢᤶᤒᤠ ᤑᤣ᤹ᤖᤢᤶ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ. 13 ᤜᤧᤰᤁᤩᤠᤱ ᤌᤢ᤺ᤶᤒᤠ ᤌᤵᤔᤣ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤔᤠᤏᤠ ᤗᤡᤛᤡ ᤆᤢᤴᤈᤢᤶᤒᤠ ᤑᤣ᤹ᤖᤢᤶ ᤋᤥ᤺ᤴᤍᤧᤶᤔᤧ᤹॥ ᤁᤱᤃ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤁᤢᤈᤠ ᤛᤡᤍᤢᤱᤈᤓᤠᤴ ᤁᤢᤏᤠᤶᤃᤧᤏᤢ᤹ᤒᤠ ᤁᤢᤏᤠᤶ ᤐᤥᤱᤗ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤧᤶᤔᤧ᤹॥ 14 ᤂᤧᤴᤏᤢ ᤛᤥᤖᤡᤰ ᤋᤥ᤺ᤶᤔᤏᤠᤒᤠ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ. ᤗᤳᤇᤠ ᤐᤡᤳᤛᤠᤳᤋᤧᤴᤏᤢ ᤛᤥᤛᤥᤖᤡᤰ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤗᤡᤋᤖ ᤏᤧᤳᤇᤡ. ᤜᤧᤰᤁᤩᤠᤱ ᤗᤳᤇᤠ ᤌᤢ᤺ᤶᤒᤠ ᤌᤵᤔᤣ ᤗᤡᤋᤖ ᤌᤡᤰᤁᤠᤱ ᤁᤢᤓᤪᤧ᤺ᤰ ᤆᤧᤸᤗᤣᤰ ᤛᤣᤈ᤺ᤱᤘᤠ ᤁᤧᤍᤥ᤺ᤶᤍᤢᤶᤗ ᤐᤥᤱ᤹॥ ᤁᤢᤶᤒᤠᤒᤠ ᤔᤧᤸᤗᤢᤰᤛᤠ᤺ᤳ ᤌᤰᤔᤠ ᤗᤡᤋᤖ ᤌᤡᤰ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ. ᤋᤱᤒᤣᤀᤥᤒᤠ ᤁᤧᤖᤧᤰ ᤗᤠᤜᤠ᤹ᤀᤥ ᤗᤠᤍᤢᤵ ᤌᤰᤔᤠ ᤋᤥ᤺ᤶᤔᤠ ᤁᤧᤒᤥᤱᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤜᤠᤒᤠ ᤁᤴᤗᤥ॥ 15 ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤳᤇᤠ ᤔᤧ᤺ᤴᤍᤒᤁᤠᤴ ᤆᤰᤔᤧᤸᤗ᤹ᤀᤣᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ᤺ᤸᤗᤧ ᤘᤣ᤹ ᤋᤥ᤺ᤴᤍᤧᤶᤔᤧ᤹ᤀᤥ॥ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶ ( ᤗᤧᤒᤡ ᥈᥉:᥋-᥇᥊ ) 16 “‘ᤌᤡᤰᤛᤡᤃᤣᤰᤐᤠ ᤗᤠ᤺ᤸᤗᤧᤴ ᤌᤡᤒᤥᤱᤅᤠᤱ ᤗᤡᤛᤡ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤸᤗᤧᤴ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤋᤥᤔᤠ ᤐᤥᤱ᤹॥ 17 ᤂᤧᤴ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤅᤠᤛᤡ ᤕᤧᤴᤏᤥ ᤗᤳᤇᤠ ᤛᤥᤛᤥ᤺ᤳ ᤗᤖᤠᤱ ᤐᤥᤱᤗ॥ ᤂᤧᤴ ᤛᤥᤛᤥᤳᤗᤖᤠᤱᤅᤥ ᤏᤢᤛᤡ ᤕᤧᤴ ᤌᤠᤖᤡᤰ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤔᤏᤠᤒᤠ ᤂᤖᤧ᤺ᤱ ᤆᤠᤔᤠ ᤐᤥᤱ᤹॥ 18 ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤛᤣᤛᤣ ᤆᤢᤶᤗᤢᤱ ᤐᤥᤱᤗ॥ ᤂᤧᤴ ᤕᤧᤴᤏᤥ ᤂᤡᤏᤡ᤹ ᤌᤡᤰᤕᤠ᤺ᤴᤎᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰ ᤌᤧᤔᤠᤀᤠᤱ ᤔᤧᤈᤥᤃᤧᤶᤔᤡᤴᤏᤧ᤹॥ 19 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤥ᤺ᤶᤔᤏᤠᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤁᤢᤶᤒᤠᤒᤠ ᤐᤡᤳᤛᤠᤳ ᤏᤧᤳᤇᤡ. ᤌᤢ᤺ᤶᤒᤠ ᤌᤡᤰ ᤏᤢ ᤋᤱᤒᤣ ᤁᤧᤃᤧᤵᤐᤠ ᤁᤢᤶᤒᤠᤒᤠ ᤔᤧᤸᤗᤢᤰᤛᤠ᤺ᤳ ᤏᤢᤛᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹॥ ᤁᤴᤜᤠ᤹ ᤁᤧᤖᤧᤰ ᤔᤧᤱᤃᤠ᤺ᤶᤏᤠ ᤔᤧᤒᤥᤱᤗ ᤐᤥᤱ᤹॥ 20 ᤂᤧᤴᤏᤢ ᤛᤥᤖᤡᤰᤐᤠ ᤐᤥᤃᤢᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤗᤳᤇᤠ ᤁᤢᤶᤒᤠᤒᤠ ᤐᤡᤳᤛᤠᤳ ᤏᤢ ᤛᤥᤛᤥᤖᤡᤰ ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤑᤥᤗᤰ ᤌᤡᤰᤁᤠᤱ ᤁᤢᤓᤪᤧ᤺ᤰ ᤆᤢᤴᤈᤢᤶᤒᤠ ᤑᤣ᤹ᤖᤢᤶ. ᤌᤢ᤺ᤶᤒᤠ᤺ᤴᤏᤢ ᤑᤥᤗᤰ ᤌᤡᤰ. 21 ᤜᤧᤰᤁᤩᤠᤱ ᤏᤢᤛᤡ ᤌᤢ᤺ᤶᤒᤠᤜᤠ᤹ᤀᤥ ᤗᤳᤇᤠ ᤌᤢ᤺ᤶᤒᤠ ᤌᤵᤔᤣ ᤔᤠᤏᤠ ᤗᤡᤛᤡ ᤆᤢᤴᤈᤢᤶᤒᤠ ᤑᤣ᤹ᤖᤢᤶ॥ 22 ᤂᤧᤴᤏᤢ ᤛᤥᤛᤥᤖᤡᤰ ᤂᤡᤏᤡ᤹ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤔᤧ᤺ᤴᤍᤒᤁᤠ ᤌᤡᤰᤁᤠᤱ ᤋᤥ᤺ᤴᤍᤧᤶᤔᤧ᤹॥ 23 ᤁᤴ ᤋᤠᤏᤠᤶ ᤌᤰᤔᤠ ᤋᤥ᤺ᤶᤔᤏᤠᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ᤺ᤴᤏᤢ᤺ᤸᤗᤧ ᤘᤣ᤹ ᤋᤥ᤺ᤴᤍᤧᤶᤔᤧ᤹॥ 24 ᤜᤠᤒᤠ ᤁᤴ ᤐᤖᤡᤰᤗᤧ ᤏᤢᤛᤡ ᤕᤧᤴ ᤌᤠᤖᤡᤰᤁᤣ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤁᤢᤏᤠᤶᤃᤧᤏᤢ᤹ᤒᤠ ᤁᤢᤏᤠᤶ ᤐᤥᤱᤗ ᤑᤠ᤹ᤀᤠᤱ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤌᤡᤰᤕᤠ᤺ᤴᤎᤰ ᤋᤥ᤺ᤴᤍᤧᤶᤔᤧ᤹॥ ᤁᤴ ᤆᤰᤔᤧᤴᤗ᤹ᤀᤣᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤂᤧᤴᤏᤢ ᤛᤥᤖᤡᤰᤐᤠ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ᤺ᤴᤏᤢ᤺ᤸᤗᤧ ᤘᤣ᤹ ᤋᤥ᤺ᤴᤍᤧᤶᤔᤧ᤹॥ 25 ᤏᤢᤛᤡᤃᤣᤰᤐᤠ ᤕᤧᤴᤏᤥ ᤂᤡᤏᤡ᤹ ᤗᤳᤇᤠ ᤛᤣᤛᤣ ᤆᤢᤶᤗᤢᤱ ᤆᤥ᤺ᤰᤔᤠ ᤐᤥᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤸᤗᤧ ᤕᤠ᤺ᤴᤍᤡᤰ ᤌᤡᤰᤕᤠ᤺ᤴᤎᤰ ᤁᤧᤈᤥᤃᤢᤶᤒᤠ ᤌᤧᤔᤠ ᤕᤠ᤺ᤶᤒᤰᤁᤠᤱ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ ᤕᤧᤳᤏᤠᤶᤜᤠ᤹ᤀᤥᤒᤠ ᤋᤱᤏᤠᤶ ( ᤗᤧᤒᤡ ᥈᥉:᥇᥋-᥈᥈ ) 26 “‘ᤋᤃᤡ ᤁᤧᤍᤢᤶᤒᤠ ᤁᤢᤈᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤕᤧᤳᤏᤠᤶᤜᤠ᤹ᤀᤥᤒᤠ ᤋᤱᤏᤠᤶᤔᤥ ᤂᤠᤖᤰ ᤁᤧᤍᤢᤶᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤁᤧᤍᤥ᤺ᤴᤍᤢᤶᤔᤡᤸᤗᤧ ᤂᤡᤏᤡ᤹ ᤗᤳᤇᤠ ᤛᤣᤛᤣ ᤆᤢᤶᤗᤢᤱ ᤐᤥᤱᤗ॥ ᤂᤡᤏᤡ᤹ ᤂᤧᤸᤗᤧ ᤕᤠ᤺ᤴᤍᤡᤰ ᤌᤡᤰᤕᤠ᤺ᤴᤎᤰ ᤁᤧᤈᤥᤃᤢᤶᤒᤠ ᤌᤧᤔᤠ ᤕᤠ᤺ᤶᤒᤰᤁᤠᤱ ᤔᤧᤈᤥᤃᤧᤶᤔᤡᤴᤏᤧ᤹॥ 27 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤢᤏᤠᤶᤃᤧᤏᤢ᤹ᤒᤠ ᤁᤢᤏᤠᤶ ᤐᤥᤱᤗ ᤑᤠ᤹ᤀᤠᤱ ᤆᤰᤔᤧᤸᤗ᤹ᤀᤣ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤁᤢᤶᤒᤠᤒᤠ ᤐᤡᤳᤛᤠᤳ ᤏᤧᤳᤇᤡ. ᤌᤢ᤺ᤶᤒᤠ ᤌᤡᤰ ᤏᤢ ᤋᤱᤒᤣ ᤌᤡᤰ ᤁᤧᤃᤧᤵᤐᤠ ᤔᤧᤸᤗᤢᤰ ᤏᤢᤛᤡ 28 ᤂᤧᤴᤏᤢ ᤛᤥᤖᤡᤰᤐᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤗᤳᤇᤠ ᤁᤢᤶᤒᤠᤒᤠ ᤐᤡᤳᤛᤠᤳ ᤌᤰᤔᤣ ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤆᤢᤴᤈᤢᤶᤒᤠ ᤑᤥᤗᤰ ᤌᤡᤰᤁᤠᤱ ᤁᤢᤓᤪᤧ᤺ᤰ ᤑᤣ᤹ᤖᤢᤶ. ᤌᤢ᤺ᤶᤒᤠ᤺ᤴ ᤏᤢ ᤑᤥᤗᤰ ᤌᤡᤰ. 29 ᤜᤧᤰᤁᤩᤠᤱ ᤏᤢᤛᤡ ᤁᤢᤶᤒᤠᤒᤠ ᤔᤧᤸᤗᤢᤰᤛᤠ᤺ᤳᤜᤠ᤹ᤀᤥ ᤗᤳᤇᤠ ᤁᤢᤶᤒᤠᤒᤠ ᤔᤧᤸᤗᤢᤰᤛᤠ᤺ᤳ ᤌᤵᤔᤣ ᤔᤠᤏᤠ ᤗᤡᤛᤡ ᤆᤢᤴᤈᤢᤶᤒᤠ ᤑᤣ᤹ᤖᤢᤶ ᤋᤥ᤺ᤴᤍᤧᤶᤔᤧ᤹॥ 30 ᤂᤧᤴᤏᤢ ᤛᤥᤛᤥᤖᤡᤰ ᤂᤡᤏᤡ᤹ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤔᤧ᤺ᤴᤍᤒᤁᤠ ᤌᤡᤰᤁᤠᤱ ᤋᤥ᤺ᤴᤍᤧᤶᤔᤧ᤹॥ 31 ᤆᤰᤔᤧᤸᤗ᤹ᤀᤣᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤂᤧᤴᤏᤢ ᤛᤥᤖᤡᤰᤐᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤓᤠ᤺ᤴᤏᤢ᤺ᤸᤗᤧ ᤘᤣ᤹ ᤂᤧᤴᤏᤢ ᤛᤥᤖᤡᤰ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹॥ ᤂᤧᤱᤜᤠ᤹ ᤁᤧᤖᤧᤰ ᤔᤧᤱᤃᤠ᤺ᤶᤔᤏᤠᤒᤠ ᤔᤧᤒᤥᤱᤗ ᤐᤥᤱᤗᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.